Fuʻu ʻIta Lahi ke Lotu

“ʻOku ʻikai mahino au ki ha taha!” Naʻe kaila ʻa Kelela ʻi heʻene haʻaki mai ʻa e matapā hono loki mohé. Ko ha ʻaho faingataʻa ʻeni. Naʻe fakakata ʻaki ia ʻe ha taha ʻi he akó. Pea ʻi he foki mai ʻa Kelela ki ʻapí, naʻá ne ʻiteʻita pea ʻikai femahinoʻaki mo Muti (Faʻeé).

Naʻe tō hifo ʻa Kelela ki hono mohengá pea kamata ke ne tangi. Naʻá ne tangi peá ne ongoʻi ʻoku mamahi hono lotó ʻi he ʻitá. Naʻe ʻikai ke ne saiʻia ke ongoʻi peheni.

Naʻá ne manatuʻi ʻene ako ʻi he Palaimelí ʻe lava ke ne lotu ki he Tamai Hēvaní ʻi ha taimi pē ʻokú ne fiemaʻu tokoni ai. Naʻá ne fie fai ha lotu ke tokoniʻi ia ke ne ongoʻi fiemālie ange, ka naʻá ne fuʻu loto-mamahi ke tokanga taha ki ai. Naʻá ne kuikui pea mihiʻi ʻene mānavá. Ko e hā te ne lava ʻo fai ke nonga hifo aí?

Hili ha ngaahi sēkoni siʻi, naʻe haʻu ha fakakaukau ki ai.

Fakakaukau ki ha ngaahi meʻa ʻokú ke houngaʻia ai.

Naʻá ne ʻāʻā hake ʻo sio takai ʻi hono lokí. Naʻe ʻi ai ha fakatātā ʻi he holisí ʻo Muti mo Vati (Tamaí). Naʻe ʻofa ʻa Kelela ʻi hono fāmilí, naʻa mo e taimi naʻá ne ʻita ai kiate kinautolú.

Naʻá ne pehē, “ʻOku ou houngaʻia ʻi heʻeku ongomātuʻá.”

Naʻá ne fakakaukau leva ki hono kāinga ko Kuenitoliní, Lītia, mo Tōmasi. Naʻa nau vahevahe maʻu pē ʻenau ngaahi meʻa-vaʻingá mo ia mo ʻai ke kata. Naʻá ne saiʻia ke vaʻinga mo kinautolu.

Naʻe pehē ange ʻe Kelela, “ʻOku ou houngaʻia ʻi hoku kāingá.”

Naʻá ne sio leva ki tuʻa ʻi hono matapā sioʻatá.

Naʻe tō ʻa e laʻaá, pea naʻe kāpui ʻa e langí ʻe ha ngaahi lanu fakaʻofoʻofa—lanu moli, kulokula, engeenga, mo e pingikī.

Naʻe pehē ange ʻe Kelela, “ʻOku ou houngaʻia ʻi he tō ʻa e laʻaá.”

Peá ne fakakaukau leva ki ha ngaahi meʻa lahi ange. Naʻá ne houngaʻia ʻi he meʻatokoni hoʻatā naʻá ne maʻu ʻi he ʻahó ni ʻi he akó. Naʻá ne houngaʻia ʻi hono ngaahi kaungāmeʻá. Naʻá ne houngaʻia ʻi he fale nofoʻanga naʻá ne nofo aí.

Naʻe fakafiefia ʻene fakakaukau ki he ngaahi meʻa ke houngaʻia aí! Naʻe ʻikai faʻa fakatokangaʻi ʻe Kelela ʻa e lahi ʻo e ngaahi meʻa lelei ʻi heʻene moʻuí.

Naʻá ne ʻiloʻi naʻe ueʻi ia ʻe he Laumālie Māʻoniʻoní ke fakakaukau ki hono ngaahi tāpuakí. Naʻe nonga hono lotó ʻi he taimí ni. Naʻá ne ongoʻi mateuteu ke lotu.

Naʻá ne pehē, “ʻE Tamai Hēvani. ʻOku ou kole fakamolemole atu ʻi heʻeku ʻita ʻia Mutí. Fakamālō ki hoʻo ʻAfió ʻi hono tokoniʻi au ke u toe ongoʻi nonga mo fiefiá. Fakamālō ki hoʻo ʻAfió ʻi hono fekauʻi mai ʻa e Laumālie Māʻoniʻoní ke fakamanatu mai hoku ngaahi tāpuakí. ʻI he huafa ʻo Sīsū Kalaisí, ʻēmeni.”

Naʻá ne hū ki tuʻa mei hono lokí. Naʻe ʻi peito ʻa Muti mo Vati ʻo ngaohi ʻa e meʻatokoni efiafí. Naʻá ne fāʻofua kia Muti.

Naʻe pehē ange ʻe Kelela, “ʻOku ou kole fakamolemole atu ʻi heʻeku ʻita atu kiate koé.”

Naʻe talaange ʻe Muti, “ʻOku sai pe ia. Fakamālō atu hoʻo kole fakamolemolé.”

Naʻa nau tangutu takai ʻi he tēpile kaí ʻo tāpuakiʻi ʻa e meʻatokoní. Naʻe maʻu ʻe Kelela ha foʻi fakakaukau!

Naʻá ne pehē ange, “Tau vilo takai ʻi he tēpilé ʻo takitaha lea ʻaki ha meʻa ʻokú ne houngaʻia ai.”

Naʻe malimali ʻa Vati. “Ko ha fakakaukau lelei ia!”

Naʻe pehē ange ʻe Muti, “ʻOku ou houngaʻia ʻi he koá.”

Naʻe kiʻi fakakaukau ʻa Vati.

Naʻá ne pehē, “Pisa.” Naʻa nau kakata kotoa.

Naʻe hoko leva ki he taimi ʻo Kelelá. Naʻá ne ʻosi ʻiloʻi ʻa e meʻa naʻá ne fie lea ʻakí.

“ʻOku ou houngaʻia ʻi he lotú!”

ʻŪ tā fakatātā ʻa Simini Blocker