“Ko e Matasioʻata Molé,” Ko e Kaumeʻá, Sānuali 2025, 44–45.
Ko e Matasioʻata Molé
Ko ha talanoa moʻoni mei Polīvia.
Ko e fuofua ʻaho ʻeni ʻo e akó. Naʻe mātuʻaki fiefia ʻa ʻOnitelea! Naʻá ne ʻi he kalasi tahá ʻi he taimí ni. Ko ha tamasiʻi lahi ia!
Ka ʻi heʻene aʻu ki he akó, naʻe hā ngali fuʻu lahi mo fakailifia, naʻa mo ha tamasiʻi lahi ʻe ilifia mo ia. Naʻá ne puke maʻu ʻa e nima ʻa Mamí.
“ʻE LELEI pē ʻa e meʻa kotoa.” Naʻe mamali ʻa Mami. “Lea mālō e lelei ki hoʻo faiakó. Angalelei ki ho kaungāakó. Pea ʻoua naʻa ngalo ke tokanga ki ho matasioʻatá.”
ʻI he uike ʻe taha kuo hilí, naʻe maʻu ʻe ʻOnitelea ʻene fuofua matasioʻatá. Naʻe fakamanatu maʻu pē ki ai ʻe heʻene ongomātuʻá ke ne tokangaʻi hono matasioʻatá.
Naʻe taʻataʻalo ange ʻene faʻeé. “ʻOfa ke ke maʻu ha ʻaho lelei!”
Ka naʻe ʻikai ke maʻu ʻe ʻOnitelea ha ʻaho lelei. Naʻe hoko ha meʻa fakamamahi!
Naʻá ne lele ki a Mami ʻi he tuku ʻa e akó. Naʻá ne kaila, “ʻOku mole hoku matasioʻatá! Kuó u fakasio ʻi he feituʻu kotoa pē, ka ʻoku ʻikai ke u maʻu ia!”
“ʻOiauē!” Naʻe fofonga hohaʻa ʻene faʻeé. “Ta kole tokoni ki he Tamai Hēvaní.”
Naʻá ne fehuʻi ange, “ʻOkú ke pehē ʻe ʻaonga?”
“Ta ʻahiʻahi angé. ʻOku fanongo maʻu pē ʻa e Tamai Hēvaní ki heʻetau ngaahi lotú,” ko ʻene faʻeé ange ia.
Naʻe fai ʻe ʻOnitelea mo ʻene faʻeé ha lotu. Naʻá na kole ki he Tamai Hēvaní ke tokoni kia ʻOnitelea ke maʻu hono matasioʻatá.
ʻI he ʻaho hono hokó ʻi he akó, naʻe kei loto-mamahi pē ʻa ʻOnitelea. Naʻe lue atu leva ha kiʻi tamasiʻi kiate ia.
“ʻOku ou tui ko ho matasioʻata ʻeni.” Naʻe toʻo hake ʻe he kiʻi tamasiʻí ha matasioʻata. “Naʻá ku maʻu ia ʻi he malaʻe ʻakapulú.”
Naʻe toʻo ʻe ʻOnitelea ʻa e matasioʻatá. Ko hono matasioʻatá ia! Naʻe ʻikai ke ne tui ki ai.
ʻI he tuku ʻa e akó, naʻá ne lele ki heʻene faʻeé ʻo fāʻofua kiate ia.
Naʻá ne pehē ange, “Kuó ke maʻu ho matasioʻatá! Pau pē ʻokú ke fiefia hono toe maʻu iá.”
“ʻOku ou fiefia!” Ko ʻOnitelea ange ia. “Ka ʻoku ou fiefia ange koeʻuhí ko e meʻa naʻá ku akó.”
“ʻA ia ko e hā ia?”
Naʻe malimali fiefia ʻa ʻOnitelea. “ʻOku ngāue ʻa e lotú!”
Ngaahi tā fakatātā ʻa Susanna Teodoro