Ngaahi ʻEkitivitī ʻo e Haʻu, ʻo Muimui ʻIate Aú

ʻOku ʻuhinga ʻa e fakafoki ha meʻá ke toe fakatahaʻi ia. Lau ʻa e “Ko Hono Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko ha Fanongonongo ʻo e Taʻu ʻe Uangeaú ki he Māmaní” ʻi he Gospel Library ke ako lahi ange fekauʻaki mo e founga naʻe fakafoki mai ai ʻa e Siasí. Fai leva ha vaʻinga fakafoki! Kumi pe tā ha fakatātā pea kosikosi ia ki ha ngaahi kongokonga pāsolo. Fakafetongi pāsolo mo ha mēmipa ʻo e fāmilí pea fakafoki ʻa e ngaahi fakatataá ki heʻene tuʻu totonú. Ko e hā naʻe mahuʻinga ai ke fakafoki mai ʻe Siosefa Sāmita ʻa e ongoongolelei ʻo Sīsū Kalaisí?

ʻOku faʻa folofola mai ʻa e Tamai Hēvaní kiate kitautolu ʻo fakafou ʻi Heʻene kau palōfitá (vakai, Tokāteline mo e Ngaahi Fuakava 1:38). ʻOku fiemaʻu pē ke tau fanongo! Akoako ʻa e fakafanongó ʻaki hano fai ha foʻi vaʻinga. ʻE tā ʻe ha tokotaha ha foʻi hiva, pea hulohula ʻa e tokotaha kotoa pē lolotonga hono tā ʻo e fasí. ʻI he tuʻu ʻa e hivá, ʻe tuʻu maʻu fakaʻaufuli ʻa e tokotaha kotoa pē. Ko hai pē ʻe tuʻu maʻu fakamuimui tahá te ne vahevahe ʻa e ʻuhinga ʻokú ne ʻofa ai ʻi he kau palōfitá. Vaʻinga kae ʻoua kuo maʻu ʻe he tokotaha kotoa ha faingamālie ke vahevahe!

Naʻe hā ʻa e Tamai Hēvaní mo Sīsū Kalaisi kia Siosefa Sāmita (vakai, Siosefa Sāmita—Hisitōlia 1:15–20). ʻOku tau ui ia ko e ʻUluaki Mata Meʻa-Hā-Maí. ʻAlu ki he peesi 13 ke faʻu haʻo faʻunga fakatātā ʻUluaki Mata Meʻa-Hā-Mai, pea fakaʻaongaʻi ia ke fakamatalaʻi ki ha taha kehe ʻa e talanoá.

ʻI he taimi ʻoku tau ako lahi ange ai fekauʻaki mo ʻetau ngaahi kuí, ʻoku tau ongoʻi ofi ange ai kiate kinautolu mo e Tamai Hēvaní (vakai, Tokāteline mo e Ngaahi Fuakava 2). Kole ki ha mēmipa ʻo e fāmilí ke ne fai atu ha talanoa mei heʻenau moʻuí pe mei he moʻui ʻa ha taha ʻo hoʻo ngaahi kuí. Toe faʻu foʻou ʻa e talanoá ko ha tulama pe tā fakatātā!