Ko e Meʻaʻofa ʻo e Lotú

Kuo foaki atu ʻe he Tamai Hēvaní ha meʻaʻofa mātuʻaki makehe. Ko e meʻaʻofa ʻo e lotú. ʻE lava ke tokoniʻi kitautolu ʻe he lotú ʻi ha faʻahinga taimi, pe feituʻu pē.

ʻOku ou fie vahevahe atu ha meʻaʻofa ʻe tolu te ke lava ʻo lotua.

1. Lotu ke ʻiloʻi.

Kapau ʻoku ʻikai ke tau lava ʻo mamata ki he Tamai Hēvaní ʻi he taimi ʻoku tau fai ai ʻetau lotú, te tau ʻilo fēfē ʻokú Ne fanongo mai?

Naʻe fakaafeʻi kimoutolu ʻe Palesiteni Lāsolo M. Nalesoni ke “fakahā hake ho lotó ki hoʻo Tamai Hēvaní. … Peá ke fakafanongo leva!”* Te ke lava ʻo ʻiloʻi ʻoku fanongo mai ʻa e Tamai Hēvaní ki hoʻo ngaahi lotú ʻi he taimi ʻokú ke fakafanongo ai ki he meʻa ʻokú ke ongoʻi ʻi ho lotó mo e ngaahi fakakaukau ʻoku haʻu ki ho ʻatamaí.

2. Lotu ke tupulaki.

ʻOkú ke fie tupulakí fēfē? ʻOkú ke fie ako ha pōtoʻi ngāue foʻou pe maʻu ha ngaahi kaungāmeʻa foʻou? Te ke lava ʻo lotu ke tupulaki ke hoko ʻo hangē ange ko Sīsū Kalaisí!

Naʻe talamai ʻe hoku kaungāmeʻa foʻou ko Sioná ʻa ʻene faʻa ongoʻi hohaʻa ʻi he akó. Ka ʻi he kamata ke ne lotu kimuʻa ʻi he akó, naʻá ne ongoʻi nonga. ʻOku lotu ʻa Siona ke tupulaki ʻi he ʻaho kotoa pē, pea te ke lava foki mo koe!

3. Lotu ke fakahaaʻi.

Naʻá ku lotua hoku fāmilí ʻi heʻeku kei siʻí. Naʻá ku fie ʻilo pe ʻe founga fēfē haʻaku tokoniʻi kinautolu. Naʻe tokoniʻi au ʻe he Tamai Hēvaní ke u ʻiloʻi te u lava ʻo hoko ko ha faʻifaʻitakiʻanga ʻo e ongoongolelei ʻo Sīsū Kalaisí. Ko e meʻa ia te u lava ʻo fakahokó!

Kapau ʻokú ke lotua ho fāmilí pe niʻihi kehe ʻoku nau ʻofa ʻiate koé, ʻoua naʻá ke foʻi! ʻE fakahaaʻi atu ʻe he Tamai Hēvaní ʻa e meʻa te mou lava ʻo faí. ʻI he taimi ʻokú ke kole fakamātoato ai ʻEne tokoní, ʻe tataki koe ʻe Hono Laumālié.

Fakaava ʻa e PDF

Ngaahi tā fakatātā ʻa Jared Beckstrand