Ko ha Fehālaaki Nai Hoku Uiuiʻi Fakafaifekaú?

ʻI he taʻu hono ua ʻo ʻeku ako ki hoku mataʻitohi ʻi he fiká mo e meʻa fakapaʻangá, naʻá ku maʻu ha ueʻi mālohi ke u ʻalu ʻo ngāue fakafaifekau. Naʻá ku fili ke u ngāue, neongo te u fakataʻeʻaongaʻi ai ha ngaahi maaka (credits) ʻi he ʻunivēsití ʻa ia naʻe pau ke toʻo hokohoko ia.

Hili ha kiʻi taimi nounou mei ai, lolotonga ʻeku lau hoku uiuiʻi fakafaifekau ki he Misiona Utah Salt Lake City Central, naʻe ongo ngali kehé ʻa e momeniti ko iá. Naʻe ʻikai ke u ʻiloʻi ha taha kuo ngāue ʻi Sōleki Siti. Naʻá ku fakakaukau mahalo ʻoku hala ʻa e uiuiʻi fakafaifekau naʻá ku fakaavá. Ko e taimi naʻá ku tūʻuta ai ʻi Sōleki Sití, naʻá ku ongoʻi naʻe foʻou ʻa e meʻa kotoa pē ʻi hoku ʻātakaí. Naʻá ku heka pasikala ʻi he sinoú ʻikai ʻiloʻi ha meʻa ʻe taha ki he founga ke u hoko ai ko ha faifekaú. Koeʻuhí ko e kehe ʻa e ʻulungaanga mo e ʻātakai ʻi Sōleki Sití, naʻá ku ongoʻi vāmamaʻo ʻaupito ai mei Saute ʻAfilika.

ʻI hoku fuofua ʻēliá, naʻá ku ʻaʻahi ai mo hoku hoá ki ha mēmipa ko Kulisi Lupeli ke mau maʻu meʻatokoni efiafi. Naʻá ne ʻeke mai pe ʻoku ʻi ai ha taha ʻiate kimaua ʻoku ʻilo ki he mūsiká. Naʻe talaange ʻe hoku hoá ʻoku ou tā piano mo hiva, ko ia naʻá ku hivaʻi ai ha foʻi hiva ki he fāmilí. Naʻe hoko leva ha meʻa makehe. Naʻe sio mai ʻa Brother Lupeli kiate au mo pehē mai, “ʻEletā Visini, kapau te ke hiva pehē ai pē, te ke hoko ko ha faifekau lavameʻa.” Naʻá ku fakakaukau ko ha fakahīkihiki lelei ia kuó ne faí, ka naʻe ʻikai ke u fuʻu fakakaukau lahi ki ai.

Hili ha ngaahi māhina siʻi mei ai, naʻá ku tokoni ai mo Brother Lupeli ke fokotuʻutuʻu ha faeasaiti hiva fekauʻaki mo e ngāue fakafaifekaú. Talu mei ai, ko e feituʻu kotoa pē naʻá ku ngāue ai, naʻa mau fakaʻoangaʻi ʻa e founga faeasaiti tatau ko ʻení. Naʻe tokolahi ha kakai naʻa mau ngāue fakataha, mei he kau mēmipa ʻo e siteikí ʻo aʻu ki ha kau hiva ʻiloa fakalotofonua pea mo ha kāingalotu mei he ngaahi tui fakalotu kehé. Naʻa mau akoʻi fekauʻaki mo e Fakamoʻuí ʻo fakafou ʻi he mūsiká, ki ha kakai naʻe ʻikai ke nau mei fie tangutu ʻo fakafanongo ki ha lēsoni. Naʻá ku ʻilo ai ʻe lava ʻa e mūsiká ʻo ongo ki he masivá mo e koloaʻiá fakatouʻosi, ki he taha naʻe akó pea mo e taha naʻe taʻeakó.

Naʻe akoʻi au ʻe heʻeku ngāue fakafaifekaú te u lava ʻo fai ʻa e ngaahi meʻa faingataʻá. ʻI heʻeku ngāue ʻi he feituʻu ʻoku fuʻu mamaʻo pea mātuʻaki kehe mei hoku fonuá, naʻá ku ʻilo ai ko e tokotaha kotoa pē ko ha fānau ia ʻa e ʻOtuá. Kuó u mātā ha ngaahi mana ʻi he moʻui ʻa e kakaí ʻi he tafaʻaki ʻe taha ʻo e māmaní ʻi ʻIutā, pea kuó u mātā ia ʻi heni ʻi Saute ʻAfilika. ʻOku ou ʻilo kapau te tau maʻu pē ʻa e tuí, ʻe lava ke hoko ha ngaahi mana ʻi heʻetau moʻuí takitaha (vakai, Molomona 9:15–21).