Ko e Hā ha Ngaahi Moʻoni ʻOku Akoʻi ʻe he Fanongonongo ʻo e Fakafoki Mai ʻo e Ongoongoleleí

Sānuali 2025

“Ko e Hā ha Ngaahi Moʻoni ʻOku Akoʻi ʻe he Fanongonongo ʻo e Fakafoki Mai ʻo e Ongoongoleleí,” Liahona, Sānuali 2025.

Haʻu, ʻo Muimui ʻIate Au

Ko Hono Fakafoki Mai ʻo e Ongoongoleleí

Ko e Hā ha Ngaahi Moʻoni ʻOku Akoʻi ʻe he Fanongonongo ʻo e Fakafoki Mai ʻo e Ongoongoleleí?

Ko Siosefa Sāmita ʻoku tūʻulutui ʻi he vao ʻakaú

ʻI he konifelenisi lahi ʻo ʻEpeleli 2020, naʻe lau ai ʻe Palesiteni Lāsolo M. Nalesoni ʻa e “Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko ha Fanongonongo ki Māmani ʻo e Taʻu Uangeaú.” Naʻá ne toki pehē leva: “Ako fakafoʻituitui ia pea mo e kau mēmipa ho fāmilí mo e ngaahi kaungāmeʻá. Fakalaulauloto ki he ngaahi moʻoní pea fakakaukau ki he ʻaonga ʻo e ngaahi moʻoni ko iá ki hoʻomou moʻuí kapau te mou fanongo ki ai, tokanga ki ai, mo talangofua ki he ngaahi fekau mo e ngaahi fuakava ʻoku haʻu fakataha mo iá.”

ʻE tokoni atu ʻa e tēpile ko ʻení ke ke muimui ki he faleʻi ʻa e palōfitá ke ako ʻa e fanongonongó. ʻI hoʻo fai iá, fakakaukau ke fakatokangaʻi ʻo ʻikai ngata pē ʻi he ngaahi meʻa fakahisitōlia naʻe hoko ʻi hono Fakafoki Mai ʻo e Ongoongoleleí kae kau ai foki mo hono tataki ʻe he toʻukupu ʻo e ʻEikí ʻa e ngaahi meʻa ko ia naʻe hokó. (ʻOku maʻu ʻa e fakamatala ʻo e fanongonongó ʻi he Gospel Library pe ʻi he ngataʻanga ʻo e fuofua lēsoni Haʻu, ʻo Muimui ʻIate Au ʻo e taʻu ní.)

Palakalafi	Ako: Ko e hā ʻa e Ngaahi Moʻoni Naʻá Ke Maʻú?	Fakalaulauloto: Ko e hā ʻOku Akoʻi Atu ʻe he Ngaahi Moʻoni Ko ʻEní?	Tokanga: Te Ke Lava Fēfē ʻo Fakaʻaongaʻi ʻa e Ngaahi Moʻoni Ko ʻEní ʻi Hoʻo Moʻuí?	Vahevahe: Te Ke Lava Fēfē ʻo Vahevahe ʻa e Ngaahi Moʻoni Ko ʻEní mo Ho Fāmilí mo e Kaungāmeʻá?
1
2
3
4
5
6
7
8
9

Ko e hā ʻa e ʻUhinga ʻo e Ngaahi Fanongonongó?

Naʻá ke ʻiloʻi ko e fanongongo fakamafaiʻi pē ʻe ono kuo tuku mai ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní? Naʻe pulusi ʻa e ʻuluaki fanongonongo ʻe tolú ʻi he vahaʻa ʻo e 1841 mo e 1865. Ko e fanongonongo ʻe tolu fakamuimuí naʻe pulusi ia talu mei he 1980:

“Fanongonongo mei he Kau Palesitenisī ʻUluaki mo e Kōlomu ʻo e Kau ʻAposetolo ʻe Toko Hongofulu Mā Ua ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní” (1980), naʻe fakangofua ʻe Palesiteni Sipenisā W. Kimipolo (1895–1985) pea lau ia ʻe ʻEletā Kōtoni B. Hingikelī ʻi he taʻu 150 ʻo e fokotuʻu ʻo e Siasí.
“Ko e Fāmilí: Ko ha Fanongonongo ki Māmani” (1995), naʻe lau ʻe Palesiteni Kōtoni B. Hingikelī ʻi he Fakataha Lahi ʻa e Fineʻofá ke vahevahe ʻa e fakamatala fakaʻofisiale ʻa e Siasí ki he tokāteline ʻo e fāmilí.
“Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko ha Fanongonongo ki Māmani ʻo e Taʻu Uangeaú” (2020), naʻe lau ʻe Palesiteni Lāsolo M. Nalesoni ʻi he konifelenisi lahi ʻo ʻEpeleli 2020—hili ia ha taʻu ʻe 200 mei he ʻUluaki Mata Meʻa-Hā-Maí. Naʻá ne toe fakapapauʻi mai ko Siosefa Sāmitá ko ha palōfita ia ʻa e ʻOtuá pea ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e Siasi ia ʻo Sīsū Kalaisi kuo fakafoki maí.

ʻOku fakataumuʻa ʻa e ngaahi fanongonongó ki he tokotaha kotoa pē ʻi he funga ʻo e māmaní. ʻOku “molumalu mo toputapu honau natulá pea … naʻe tuku atu ia mo e taumuʻa ke ʻomai, langa hake, mo tokangaʻi ʻa e ngaahi ngāue ʻo e Siasí ko e puleʻanga ʻo e ʻOtuá ʻi he māmaní.” Ko e ngaahi fanongonongó ko ha fakamoʻoni hāhāmolofia mo mālohi ia ʻoku tau maʻu ha palōfita moʻui ʻokú ne tataki ʻa e Siasí pea mo e māmaní he ʻahó ni.