Te u Fokotuʻu Fēfē Ha Ngaahi Taumuʻa Māʻoniʻoni mo Moʻoni?

ʻI he ngaahi taimi ʻo e faingataʻá, mahalo te ke fifili pe ʻoku mahuʻinga nai ke fokotuʻu ha ngaahi taumuʻa pe ʻe malava koā ke aʻusia kinautolu. Naʻe ʻeke ʻe he palōfita ko Molomoná ha fehuʻi pehē: “ʻOku mou lava fēfē ke puke maʻu ʻa e meʻa kotoa pē ʻoku leleí?” (Molonai 7:20). Naʻá ne fakamatalaʻi leva ʻa e founga kuo fakaʻaongaʻi ai ʻe he kakaí ʻi he fakalau ʻa e taimí ʻa e “tui kia Kalaisí; pea ko ia ʻi he tuí, naʻa nau puke maʻu ʻa e meʻa kotoa pē ʻoku leleí” (Molonai 7:25).

Te tau lava ʻo fakahoko mo maʻu ʻa e ngaahi meʻa ʻoku leleí ʻo fakafou ʻi he tui kia Kalaisí. ʻOku hanga ʻe Hono mālohí, ʻEne ʻofá, mo ʻEne ngaahi akonakí ʻo ʻai ke tau lava ʻo fakahoko ʻetau ngaahi holi māʻoniʻoní. ʻI he kamataʻanga ʻo e Fakafoki Mai ʻo e Ongoongoleleí, naʻe folofola ʻa e ʻEikí ki Heʻene ongo tamaioʻeikí, “Kapau te mo holi ki ai, te mo hoko ko e fouʻanga ʻo hono fai ʻo ha ngāue lelei lahi ʻi he toʻu tangatá ni” (Tokāteline mo e Ngaahi Fuakava 6:8).

Ko e hā hono ʻuhinga ʻo e “fai ʻo ha ngāue lelei lahi” kiate koé? ʻOku lahi ha ngaahi founga ʻe lava ke fakaʻaongaʻi ai ʻe he ʻOtuá ho ngaahi talēniti mo e ʻulungaanga makehé ke langa Hono puleʻangá. ʻI hoʻo fakakaukau ki he ngaahi taumuʻa ʻokú ke fie fokotuʻú, fekumi ki ha ueʻi fakalaumālie mo ha tokoni meiate Ia. “Fealeaʻaki mo e ʻEikí ʻi he meʻa kotoa pē te ke fai, pea te ne fakahinohinoʻi koe ʻi he meʻa ʻoku leleí” (ʻAlamā 37:37).

ʻOku tau ako ʻi he Tohi ʻa Molomoná “ʻoku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6). ʻE lava ʻe he akonaki ko ʻení ʻo ʻai ʻetau ngaahi taumuʻá ke ngali siʻisiʻi ange hono faingataʻá kae lahi ange ʻa e malava ke fai iá. ʻI he taimi ʻe niʻihi, ʻoku faʻa ngāue ʻa e ʻOtuá ʻi he “ngaahi meʻa īkí” (ʻAlamā 37:7) mo ʻomi ʻEne folofolá ʻi he “ʻotu lea ki he ʻotu lea, ʻa e akonaki ki he akonaki, ko e siʻi ʻi heni pea siʻi ʻi hena” (2 Nīfai 28:30).

Te ke lava foki mo koe ʻo ngāueʻi hoʻo ngaahi taumuʻá ʻi he “ʻotu lea ki he ʻotu lea” pea ʻi ha fanga kiʻi sitepu “[matuʻaki iiki].” Ko ha ngaahi sīpinga eni ʻe niʻihi ʻo e fokotuʻu ʻo ha ngaahi taumuʻa ke fai leleí, fakataha mo ha fanga kiʻi founga iiki ke ngāueʻi ai hoʻo lavameʻá:

Hangē ko ia naʻe fakatokangaʻi ʻe ʻEletā Tieta F. ʻUkitofá: “ʻI heʻetau vakai ki heʻetau moʻuí pea sio ki he ngaahi meʻa ʻe lau ngeau ke fakahokó, ʻoku tau ongoʻi lōmekina ai. ʻI heʻetau vakai ki he meʻa pē ʻe taha—ko e ʻofa mo e tauhi ki he ʻOtuá mo ʻEne fānaú, ʻi he ngaahi founga kehekehe ʻe lau ngeau—te tau lava leva ʻo ngāue fiefia ki he ngaahi meʻa ko iá.”

Kapau ʻoku tuai hoʻo fakalakalaká pe ʻokú ke tūkia lolotonga hoʻo fonongá, ʻoua naʻá ke loto-foʻi. ʻOku fakahinohinoʻi kitautolu ʻe Nīfai ke “vivili atu ki muʻa ʻi he tui mālohi kia Kalaisi, pea maʻu ʻa e ʻamanaki ʻoku mālohi haohaoa” (2 Nīfai 31:20). ʻOku tuʻu mateuteu ʻa Sīsū Kalaisi ke hiki hake koe mo tokoniʻi koe ke ke toe feinga pē.

ʻOku fiefia ʻa langi ʻi he feinga kotoa pē ke aʻusia ʻetau ngaahi taumuʻá, neongo pe ʻe fēfē ʻene taʻe-haohaoá. Naʻe pehē ʻe Palesiteni Hauati W. Hanitā: “ʻOku tau aʻusia kotoa pē ha ngaahi siakale ʻo e fakalakalaká mo ha ngaahi taimi ʻoku tau fakafepakiʻi ai e ngaahi pole ʻo e fakaholomuí ʻoku pau ke hoko maí. ʻOku ʻi ai ha ngaahi tāpuaki maʻongoʻonga mei he ʻEikí ʻi heʻetau feinga ke fakalakalaká.”

ʻOku ʻafioʻi ʻe hoʻo Tamai Hēvaní hoʻo ngaahi holí mo e ngaahi faingataʻaʻiá. Te Ne lava ʻo tataki mo tokoniʻi koe ʻi hoʻo ngaahi taumuʻa māʻoniʻoní. Lotu kiate Ia, pea te Ne fakatapui ʻa e meʻa ʻokú ke lavá, neongo pe ʻe siʻisiʻi fēfē, ke “ʻaonga … ki ho laumālié” (2 Nīfai 32:9).