Fakaʻilekitulōnika Pē
Ko e Hā ʻOku Tau Fiemaʻu Ai Ha Tui Fakalotu Kuo Fokotuʻutuʻu Māú?
ʻE lava ke tokoni ʻetau kau ki he Siasi ʻo e ʻEikí ke tau manatuʻi mo hoko ʻo hangē ko Sīsū Kalaisí.
Kuó ke fifili nai ki he ʻuhinga naʻe fokotuʻutuʻu ai ʻe he ʻOtuá Hono Siasí ʻi he founga naʻá Ne fakahokó? Ko e hā ʻoku tau maʻu ai ha kau palōfita, kau ʻaposetolo, mo e ngaahi uiuiʻi faka-Siasí? Mahalo kuó ke fifili pe ko e hā ʻoku fiemaʻu ai ke tau fakahoko mo tauhi ʻa e ngaahi fuakava ke maʻu ʻa e hakeakiʻí, kae ʻikai maʻu pē ia ʻaki haʻatau hoko ko ha tokotaha leleí.
Naʻe pehē ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku ʻikai ke tau feinga ke ului ki he Siasí ka kia Kalaisi mo ʻEne ongoongoleleí, ko ha ului ʻoku [tokoniʻi] ʻe he Siasí.” Ko ha ngaahi founga eni ʻe niʻihi ʻe lava ke fakaloloto ai ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻetau ului kia Sīsū Kalaisí mo tokoniʻi kitautolu ke hoko ʻo hangē ko Iá.
Ko Hono Maʻu ʻo e Ngaahi Kī mo e Mālohi ʻo e Lakanga Fakataulaʻeikí
Naʻe pehē ʻe Palesiteni Lāsolo M. Nalesoni, “Ka ne taʻe-ʻoua ʻa e ngaahi kī ʻo e lakanga fakataulaʻeikí, ʻe ala hoko pē ʻa e Siasí ko ha akonaki mahuʻinga mo ha kautaha ke tokoni ʻofa fakaetangata kae ʻikai toe laka hake ai.” ʻOku fakaʻatā ʻe he ngaahi kī ʻo e lakanga fakataulaʻeikí ha ngaahi fuakava mo e ʻOtuá ki he houʻeiki tangatá mo fafiné. ʻI heʻetau tauhi ʻetau ngaahi fuakavá, ʻoku tau maʻu lahi ange ai e mālohi ʻo e ʻOtuá, ʻa ia ʻe lava ʻo tokoni ke tau fakahoko e ngaahi uiuiʻí, kātakiʻi e ngaahi faingataʻá, tekeʻi ʻa e ʻahiʻahí, mo fakafaikehekeheʻi ʻa e totonú mei he halá.
Ko Hono Maʻu ʻa e Fakahinohino ʻa e Kau Palōfitá
Ko e kau palōfitá ko ha fakavaʻe mahuʻinga ia ʻo e Siasi ʻo Kalaisí. Hangē pē ko hono tataki ʻo e kakai ʻi he Tohi Tapú ʻe ʻĒpalahame, Mōsese, mo e kau palōfita maʻongoʻonga kehé, ʻoku tataki kitautolu ʻe he kau palōfita ʻi he ngaahi ʻaho kimui ní. ʻOku mahuʻinga ʻa e kau palōfitá ki heʻetau tupulaki fakalaumālié, hangē ko hono akoʻi ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku nau fakafofongaʻi e finangalo mo e loto ʻo e ʻEikí pea ʻoku uiuiʻi kinautolu ke nau fakafofongaʻi Ia mo akoʻi kiate kitautolu ʻa e meʻa kuo pau ke tau faí ke tau toe foki ai ʻo nofo ʻi he ʻao ʻo e ʻOtuá mo Hono ʻAlo ko Sīsū Kalaisí.” ʻI ha māmani ʻoku lahi ai ʻa e ngaahi leʻo ʻoku fepakipakí, ʻoku fakafiemālie ke ʻiloʻi te tau lava maʻu pē ʻo vakai ki he kau palōfita moʻuí ko ha maʻuʻanga ʻo e moʻoní.
Tupulaki ʻi he Ngaahi Uiuiʻí
Ko e founga ʻe taha ʻoku tokoniʻi ai kitautolu ʻe he Siasí ke tau hoko ʻo hangē ko Sīsū Kalaisí ko hono fakahoko ha ngaahi uiuiʻi ki he kāingalotu fakafoʻituituí. Ko ʻetau ngāue ʻi he Siasí ʻoku ʻikai ko e feau pē ʻo e ngaahi fiemaʻu fakatuʻasinó, ka ke tokoni mai foki ke tau hoko ʻo hangē ange ko e Fakamoʻuí, ʻa e sīpinga haohaoa ʻo e tokoni taʻesiokitá. Naʻe pehē ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku ʻomi ʻe he uiuiʻi kotoa pē ha faingamālie ke tau tokoni mo tupulaki ai. Naʻe fokotuʻu ʻe he ʻEikí ʻa e Siasí ʻi ha founga ʻe maʻu ai ʻe he tokotaha kotoa pē ha faingamālie ke tokoni, ʻa ia ʻe iku ia ki he tupulaki fakalaumālie fakafoʻituitui.”