”Cherayhúpa Nde?”
Upéicha avei, jahechaukasérõ ñane mborayhu Tupãre, ñaikũmbyva’erã mba’éicha Ha’e ohechakuaa ñane mborayhu techauka.
Ta’ýra pródigo ñemombe’úpe, ta’ýra ypykuépe hasy ovy’a hag̃ua ityvýra ojevývo hógape peteĩ ára oiporavovai hague rire ha “ohepyme’ẽreípe imba’erepy tekove tavyraípe”. Pe tyke’ýra orgullo ha ijehénte ñeimo’ãporã ojoko chupe oañuã hag̃ua ityke’ýra arrepentido jejevy vy’apavẽ. Ñande avei ikatu jaheja umi poja tojehasa ñandehegui jaheja’ỹre umi jahayhúva toikuaa, ñane ñe’ẽ ha apo rupi, ñane mborayhu añetégui hesekuéra.
Oĩ heta techapyrã ipu’akáva mborayhu añete oñemboja’o ha oñemog̃uahẽvagui escritura-kuérape: Naomi ha Rut, Amón ha Rréi Lamoni, ta’ýra pródigo ha itúva, pe Salvador ha Hemimbo’ekuéra.
Mborayhu oñeme’ẽrei ha oñemog̃uahẽ añetévo, peteĩ tekopotĩ ciclo ojehu peteĩ mborayhu kakuaa rehe ome’ẽva ha omog̃uahẽva apytépe.
Tupã mborayhu iporãmbaite, ijapyra’ỹ, oho meme, ha ha’e “mba’e he’ẽvéva”. Omyenyhẽ pe ánga “vy’apavẽ tuichaitereíva” reheve. Upevére, sapy’ánte ikatu hasy ñandéve jahechakuaa Tupã mborayhu ñande rekovépe. Ha katu, Túva Yvagagua ñanderayhu porãmbaitéva “oñeʼẽ [ñandéve] ñane ñeʼẽme … [ñaikũmby] hag̃ua” oipota pypukúgui tañañandu Imborayhu. Ha’e ohechaukáta Imborayhu ñanderehe tape ñande, peteĩteĩ, jahechakuaátavape. Ikatu ñañandu Tupã mborayhu ñanderehe ñamañávo iporãva tekohápe, térã ñamog̃uahẽvo mbohovái ñembo’ekuérape, térã jarekóvo akãremiandu oúva ára ñaikotevẽvévape, térã jahasávo vy’apavẽ jehasa re’ẽ. Túva Yvagagua mborayhu ñanderehe rechauka tuichavéva ipu atãva akã ha korasõme ha’e Ha’e oheja vove Ita’ýra Ohayhuetéva oñeikuave’ẽ expiador ramo.
Pe ta’ýra pródigo tyke’ýraicha, ñamaña meme jepi ñandejupénte. Avei ñañeha’ãiterei jahekávo Tupã mborayhu techauka ñanderehe, ha ñañeñandu vai ndajahecháirõ upéva. Ha katu pe paradoja iporãva ha’e ñañeha’ãvévo jahechauka ñane mborayhu Tupãre, hasy’ỹvéta jahechakuaa Imborayhu ñanderehe. Ikatu kóva rupi pe Salvador ombohováira’e “Mávapa pe tembiapoukapy tuichavéva?” porandu ko ñembohovái hasy’ỹ ha imba’eguasúva reheve: “Rehayhúta Ñandejára ne Tupã opa nde korasõ, ha opa ne ánga, ha opa ne akã ñeimo’ã reheve”.
Sapy’ánte umi mba’e jahechaukahápe ñane mborayhu umi jahayhuvévape ndaha’éi umi mba’e ha’ekuéra ohechakuaápe mborayhu. Kóva ikatu omoñanduvai mokõivéva, ome’ẽva ha omog̃uahẽvape. Ikatu oipytyvõ ñaporandúvo umi jahayhúvape mba’éicha ohechakuaa hikuái mborayhu techauka. Upéicha avei, jahechaukasérõ ñane mborayhu Tupãre, ñaikũmbyva’erã mba’éicha Ha’e ohechakuaa ñane mborayhu techauka. Javy’a, Ha’e tesakãre ome’ẽgui escritura-kuérape heta tape ikatúva rupi jahechauka ñane mborayhu Hese.
Cherayhuvépa Ko’ãvagui?
Ñomongeta oporombo’éva Pedro ha Ñandejára oikovejeýva apytépe Mar de Tiberias-pe, ñañemoarandu umi tape ikatúva rupi jahechauka ñane mborayhu Ñandejárare.
”Jesus he’i Simón Pedro-pe: Simón, Jonas ra’y, cherayhuvépa ko’ãvagui? Ha’e he’i chupe, Héẽ, Ñandejára; reikuaa che rohayhuha”.
Pe porandu kláve ko Ñandejára oporandúvape ha’e “Cherayhuvépa ko’ãvagui?” Jahechauka ñane mborayhu Ñandejárare ñamoĩvo Chupe “ko’ãva” ári, ha “ko’ãva” ikatu ha’e oimeraẽva, oimeraẽ tembiapo, térã oimeraẽ mba’e omyañáva Chupe ani hag̃ua ha’e pe influencia imba’eguasuvéva ñande rekovépe.
Araka’eve ndaiporimo’ãi tiempo peteĩ ára, arapokõindy, mes térã arýpe jajapo hag̃ua opaite mba’e jajapova’erã térã jajaposéva. Ñemanokuaa ñeha’ã pehẽ ha’e jaiporu pe tiempo hepyetéva umi mba’e imba’eguasuvévape ñane ñeimeporã apyra’ỹme g̃uarã ha japoívo umi mba’e imba’eguasu’ỹva.
Presidente Russell M. Nelson he’iva’ekue: “Pe porandu ñande peteĩteĩme g̃uarã … ha’e peteĩcha. … Peimépa peẽ peheja hag̃ua Tupã taha’e influencia imba’eguasuvéva pende rekovépe? Pehejátapa Iñe’ẽ, Hembiapoukapykuéra ha Ikonveniokuéra tomyaña mba’e pejapóva ára ha ára? Pehejátapa Iñe’ẽpu taitenonde opa mba’e ári? Peimépa peheja hag̃uáicha opa mba’e Ha’e oikotevẽva pejapo taitenonde opa ambue rembipota peguerekóva ári? Peimépa pende potapy okañy hag̃uáicha Imba’évape?” Jahechauka ñane discipulado ha mborayhu Tupã rehe jajapo jave Chugui mba’e tenondevéva ñandéve g̃uarã.
Emongaru Che Ovechara’ykuéra
Versículo oúvape ko ñomongeta Pedro ha pe Salvador apytépe, ñañemoarandu ambue tapégui Ñandejára ohechakuaávape ñane mborayhu jehechauka: “[Ñandejára] he’i jey chupe, Simón, Jonas ra’y, cherayhúpa nde? Ha’e he’i chupe, Héẽ, Ñandejára; reikuaa che rohayhuha. Ha’e he’i chupe: Emongaru che ovechara’ykuéra”.
Jahechauka ñane mborayhu Túva Yvagaguáre jaservi, ñahendu, jahayhu, ñamopu’ã, térã ñaministrávo Ita’yrakuérape. Upe servicio ikatu ha’e hasy’ỹva ha’eháicha tajahecha ambuekuérape jehusga’ỹre. Sección 76 Doctrina ha Koveniokuérape, jahechamimi mba’éicha ha’e umi ohupytýva gloria celestial carácter: “Ohecha ojehechaháicha hikuái, ha oikuaa ojeikuaaháicha hikuái”. Ha’ekuéra ohecha ambuekuérape Tupã ohechaháicha chupekuéra, ha Ha’e ohecha chupekuéra ikatúva oiko chuguikuéra ramo, jehupytykuaa divino glorioso reheve.
Ajevy rire che misión-gui, aisãmbyhyva’ekue jeka’api negocio che ryke’ykuéra ha che romoñepyrũva’ekue ore mitãrusu vove. Avei aguereko heta ajapova’erã che ñemoarandu universitario-pe. Peteĩ arapokõindy arapotýpe, heta ama ha kuaara’ã paha oúva chereja py’apohýi ha heta jeka’api ajapova’erã rehe.
Arapokõindy mbytépe pe ára ojepe’a, ha aplanea amoĩporãtaha jeka’api rembiapo clase rire. Ha katu ag̃uahẽvo che rógape, che camión ha che equipo ndaipóri. Aikuaaségui, aha umi patio ojeka’apiva’erãme; opaitére oñeñangareko porãma hese. Pe patio ojeka’apiva’erã pahaitépe, ahecha che tyvýra oguatávo pe ka’api máquina rapykuéri. Ha’e cherecha, opukavy ha chemomaitei ipópe. Ipu’akapávo cherehe aguyjeme’ẽ, añañua ha aagujeme’ẽ chupe. Iservicio rembiapo he’iséva omombarete pypukuve che mborayhu ha che rekoañete hese. Jajoservívo ojupe ha’e peteĩ tape ojavy’ỹva jahechaukaháicha ñane mborayhu Tupã ha Ita’ýra Ohayhuetévare.
Ehechakuaa Ipo Opa Mba’épe
Jahechauka avei ñane mborayhu Tupãre jaguerekóvo peteĩ korasõ hiaguyjeme’ẽva. Ñandejára he’iva’ekue: “Ha mba’evépe yvypóra nomoñeko’õi Tupãme, … ndaha’éiramo umi ohechakuaa’ỹvare ipo opa mba’épe”. Jahechauka ñane mborayhu Tupãre jahechakuaávo Chupe opa mba’e iporãva fuente ramo ñande rekovépe.
Umi ára ypy peteĩ empresa roñepyrũháme, che socio empresarial ha che roñembo’e’asy ñembyaty imba’eguasúva mboyve, rojerure hag̃ua Túva Yvagagua pytyvõre. Ára ha ára, Tupã ombohovái ore ñembo’ekuéra, ha ore ñembyaty oho porã. Peteĩ ñembyaty rire, che socio empresarial ohechauka ore pya’ehague rojerure hag̃ua pytyvõ ha katu orembegue roaguyjeme’ẽ hag̃ua. Upe ára rire, rojepokuaa rome’ẽvo aguyjeme’ẽ ñembo’e añete, rohechakuaávo Ñandejára po umi ore ñesẽporãme. Jahechauka ñane mborayhu Tupãre peteĩ “aguyjeme’ẽ ñemoĩ reheve”.
Cherayhúramo, Peñongatu Che Rembiapoukapykuéra
Ambue tape jahechauka hag̃ua ñane mborayhu Túva Yvagagua ha Ita’ýra Ohayhuetéva rehe ha’e jaiporavóvo ñaneñe’ẽrendu Chupekuéra. Pe Salvador he’iva’ekue, “Cherayhúramo, peñongatu che rembiapoukapykuéra” Koichagua ñe’ẽrendu ndaha’éi ohecha’ỹva ni oñemyañáva ha katu ha’e mborayhu techauka añete ha ojejaposéva. Túva Yvagagua oipota tajaipota ñaneñe’ẽrendúvo. Hermana Tamara W. Runia ohenoiva’ekue kóva “ñe’ẽrendu mborayhúre”. Ha’e he’iva’ekue: “Ndajaguerekói peteĩ ñe’ẽrendu porãmba jepe gueteri, ñaha’ã ñe’ẽrendu mborayhúre ko’ág̃a, jaiporavo japyta hag̃ua, jeyjeyve, jahayhu rupi Chupe”.
Túva Yvagagua ome’ẽ ñandéve poravokuaa ñaneinspira hag̃ua jaipotávo jaiporavo Chupe. Hembiapo ha gloria ndaha’éi toikónte ñande rekove ijapyra’ỹva ha katu oike avei upévape pe ta’ãromby ñande potapy tuichavéva taha’e jajevyseha Chupe. Upevére, Ha’e araka’eve nañanemyañamo’ãi ñaneñe’ẽrendu hag̃ua. Purahéi “Eikuaa Kóva, Opa Ánga Isãsoha”-pe, japurahéi:
Misión sãmbyhyha ramo, che rembireko Christina ha che roñeinspira heta misionero oiporavóva iñe’ẽrendu rupi, ndaha’éi umi misionero estándar añórente, ha katu ohechaukaségui imborayhu Ñandejárare oiporavóvo ñemomirĩme omoha’anga Chupe.
Élder Dale G. Renlund he’iva’ekue:, “Túva Yvagagua ohupytyséva Túva ramo ndaha’éi Ita’yrakuéra tojapo oĩporãva; ha’e Ita’yrakuéra toiporavo ojapo hag̃ua oiporãva ha, ipahápe, toiko chuguikuéra Ha’éicha”. Ha’e oipotárõnte tañaneñe’ẽrendu, Ha’e oiporúne jopói ha jehavira pya’e omomýi hag̃ua ñane mba’e’apokuéra”. Jahechauka ñane mborayhu Tupãre jaiporavóvo ñaneñe’ẽrendu ha jasegi Chupe.
Ñande Ru Yvagagua ha ñande Salvador ohechakuaa ñane mborayhu jehechauka Hesekuéra ñamoĩvo Chupekuéra tenondépe ñande rekovépe, jajoservívo ojupe, jahechakuaávo aguyjeme’ẽ reheve opa jehovasa Chuguikuéra, ha jaiporavóvo ñaneñe’ẽrendu ha jasegi Chupekuéra.
Atestifika peteĩteĩ ñande añetehápe ha’eha Tupã ra’y, ha Ha’e ñanderayhu porãmbaite. Atestifika Ha’e oipota’asyha ñañandu Imborayhu tape jahechakuaáva ha ñaikũmbýva rupi. Ha pe paradoja iporãva ha’e ñañandu pypukuvetaha Imborayhu ñanderehe jahechaukavévo ñane mborayhu Hese. Jesucristo rérape, amén.