Jesucristo ha Pende Ñepyrũ Pyahu

Jesús “oiko ojapóvo iporãva.” Ñamoñe’ẽ pe ñemombe’upy ndahasyietéva Hechos kuatiañeʼẽme. Ajépa tuichaite upe ñemombe’u kangymi! Jesús katuete oiko ojapóvo iporãva! Ha’e upe tekoite—upe osẽvagui—mba’eporã! Ha’e ohekome’ẽ Hekove ñemanomegua pukukue ojapo hag̃ua iporãva. Ha’e “iporiahuvereko ha ipy’aporã, oha’arõkuaa’are, ha henyhẽ hese,” mba’e porã ha añetegua opave’ỹva.

Oimeraẽ ñeha’ã ñamombe’uhai térã ñamombykymi hag̃ua Imba’eporã ha iporiahuvereko opytáta imbyky! Añetehápe, Apóstol Juan oñeha’ãhaguéicha oikuaauka, ñañeha’ãramo jahai opa káso ha jehechauka pe Salvador mba’eporãgui oúva, “ko yvóra voi ndaikatúiva’erãmo’ã oguerekopávo umi aranduka ojehaipava’erã.”

Umi techapyrã poravopy ñamomanokuaa’ỹva Jesús escritura-kuérape ha’ehína oikoha “ojapóvo iporãva” omombáy ñemondýi ha py’andýi ipypukúva, ko’ýte ñamomba’évo añetehápe mba’éichapaneraka’e ñaime upépe, jahecha Imilagro-kuéra, jahupyty Imbo’epy ha jahasa Iñemonguera rupive. Ha’e oñe’ẽ umi oñemboykéva’ekue ndive tapicha’atýgui, Ha’e opoko umi hasy ha ipotĩ’ỹva rehe, Ha’e ogueru angapyhy umi ikane’õvape, Ha’e ombo’e añetegua oporomosãsóva ha Ha’e ohenói umi angaipa’apoha arrepentimiento-pe. Peteĩteĩ umi leproso, ohecha’ỹva ha kuña oporomoakãratĩvape; umi ikarẽva, ohendu’ỹva ha iñe’ẽngúvape; opa sy oñembyasývape, túva ipy’atarováva ha viuda oñembyasývape; umi oñekondenávape, umi oñemotĩvape ha umi ohasa asývape; umi omanóva hetépe térã umi omanóva espíritu-pe, upe Ha’e ojapova’ekue oikuave’ẽ chupekuéra peteĩ ñepyrũ pyahu. Héẽ, ambue hechapyrãitéva ñemombe’u kangymi!

Opa mba’e he’i ha ojapóva ome’ẽ peteĩ ñepyrũ pyahu peteĩteĩ umi Ha’e omonguera, ohovasa, ombo’e ha angaipágui omosãsóvape g̃uarã. Ha’e ndojeíri chuguikuéra, ha katuete ndojeimo’ãi pendehegui. Peimo’ãmi ko sapy’aitemi pehenduha oimeraẽva ko’ã ñe’ẽ ome’ẽva tekove Chugui:

“Che ra’y, oñeperdona ne angaipakuéra.”

“Mitãkuña, ndéve Ha’e, epu’ã.”

“Tanepotĩ.”

“Che avei norokondenái: tereho ha anivéma ejapo angaipa.”

“Che rajy, angapyhy tanemoirũ, nde jerovia nemonguera, tereho py’aguapýpe.”

Pe Salvador ñe’ẽ ko’ã tapichápe imbyky, ha katu hendivekuéra Ha’e opinta ñema’ẽ pyahu tuichaitereíva perdón, ñemonguera, ñembopyahujey, py’aguapy ha tekove opave’ỹva reheguáva. Ha pe marandu hechapyrãvahína Ha’e oikuave’ẽ peteĩchagua ñepyrũ pyahu peẽme ha chéve g̃uarã. Opavave ikatu jareko peteĩ ñepyrũ pyahu Jesucristo rupi, ha hese rupive. Peẽ jepe. Umi ñepyrũ pyahu oĩ pe Túva plan korasõme Ita’yrakuérape g̃uarã. Kóva ha’e tupao ñepyrũ pyahu rehegua! Kóva ha’e tupao oñeñepyrũ pyahu jeyha!

Pe ñemongarai y ha Espíritu rupive, “ñanereñói jey”ha ikatu “jaguata tekove pyahúpe.” Mboy ta’arõmbýpa ogueru upe ñepyrũ pyahu peteĩ opyrũva’ekue angaipa pohyiguýpe térã ohasa’asýva umi ohejava’ekue rupi peteĩ tekove apañuãi ha umi joaju ojuehegua’ỹva? Jesús noikotevẽikuri angaipa ñeperdona ni peteĩ ñepyrũ pyahu hekovépe, jepeve Ha’e voi oñemongarai, ohechaukávo ñandéve ijyvytavehápe upe tape ñepyrũ pyahúpe ohóva Ha’e ohaíva’ekue peteĩteĩ ñandéve g̃uarã.

Ha upe ñane ñepyrũ pyahu ndaha’éi peteĩ jeýnte oikóva. Ñaimo’ã jepi ñane ñemongarai ha’eha pe juruja ha’eñomíva ñandéve g̃uara peteĩ ñepyrũ pyahurã. Ndaha’éi upéicha. Ndajarekói peteĩ juruja añónte. Ko’ã ñepyrũ pyahu ikatu oiko ko’ẽko’ẽvére! Ha katuete opaite semana ja’u jave peteĩ mbujape pehẽngue’imi ha jay’u jave peteĩ y vaso’imi ñanemandu’ávo ñande Salvador hekoporambáva don rehe, omanóva upe propósito-iete rehe ome’ẽvo ñandéve hetaite ñepyrũ pyahu ñaikotevẽháicha! Jesús ome’ẽ ñandéve hetaite ñepyrũ pyahu ñaikotevẽháicha.

Ñe’ẽme’ẽ ha vy’a reheve peteĩ tekove pyahu Cristo-pe, ikatu oiko ñandehegui peteĩ “mitã pyahu,” umi mba’e tuja ohasahápe ha opa mba’e oñembopyahuhápe. Mba’éichaite ombopiro’y upéichagua ko’ẽ pyahu peteĩ ánga oñeha’ã memévape, oiporavo meméva jerovia ñande Redentor pokatu rehe omonguera ha ombopyahujey hag̃ua, jepe umi jeguevi ojejopypáva oiko rupi peteĩ yvóra ho’apyrévape? Pe Salvador araka’eve noñeme’ẽi Iñe’eme’ẽ renonderãme okumpliva’erãha Túva rembipota ha omohu’ã hag̃ua Imisiõ expiatoria divina, jepe tasy omboryrýiva chupe rupi, huguy opa ipireguy rupive, ohasa’asy hete ha espíritu-pe, ha oñembo’e ojeipe’a hag̃ua chugui pe kópa iroitéva. Jeyve, Ha’e ohechaukahínakuri ñandéve mba’éichapa pe jegueropu’aka ijeroviapýva Tupã ndive.

Opa konvénio jajapóva ndive ha opa ñeha’ã ñame’ẽva ñañongatu hag̃ua umíva ndive, ikatu jahupyty “peteĩ korasõ pyahu” ha peteĩ medida henyhẽva oguerúva “peteĩ espíritu pyahu.” Sa’imimi, ñakombida hetavévo Imba’eporã ñane korasõme ha ñamombo umi ñe’ẽ ndouporãiva ñane akãgui, oiko ñandehegui Itavayguakuéra añetehápe jajapógui Chugui ñane Tupã. Jesús oikoseterei ñande Rréi ha ñande Ovecharerekua ha ñane Py’aguapy Príncipe ramo, ha jaiporavova’erã jajapo Chugui upéicha ñane korasõ ha ñane apytu’ũteépe.

Pe arrepentimiento oipe’a okẽ umi ñane ñepyrũ pyahúpe, umi ñemoñepyrũ pyahúpe ha umi juruja mokõiha. Presidente Russell M. Nelson jahayhuetéva mbo’epy omohesakãkuri umi concepto vai pe arrepentimiento don divino rehegua, ha arovia ipahápe ñañepyrũmaha ñaikumby umíva.

Iporãiterei ñahendu ñane mitãrusukuéra omombe’u mba’épa he’ise chupekuéra g̃uarã pe arrepentimiento. Nda’aréi ahendu peteĩ mitãkuñame he’ívo, peteĩ pukavy hováre, “Ajepy’ahóvo arrepentimiento rehe, añandu vy’apavẽ ha ta’arõmby oñeimo’a’ỹva. Añandu che Ru Yvagagua ha che Salvador mborayhu ha vy’apy. Ndakyhyjéi añemboja hag̃ua Túva Yvagagua rendápe ñembo’épe ha ajerure Ipytyvõ oimeraẽ mba’e añeha’ãva reheve. Aikuaa Ha’ekuéra noñeha’ãiha chepilla ajapo jave mba’e vai. Umi Ijyva ojepe’a tuicha. Kóva ha’e arrepentimiento chéve g̃uarã,” he’i. Ko mitãkuña oikumby Jesucristo rupi, ha’e ikatuha oguereko peteĩ ñepyrũ pyahu!

Peikotevẽpa peteĩ ñepyrũ pyahu? Ikatúpa peñepyrũ pyahu, peẽ jepeve? Peimo’ãmína umi tavayguakuéra Salvador oministrava’ekue—umi tapicha Ha’e ombo’e, omonguera, omopu’ã, operdona ha ombopyahujeyva’ekue. Oiporavóparaka’e chupekuéra peteĩ clase iviru hetakuére térã peteĩ aty poravopyre apytégui? Ombojoavyparaka’e umi hekojojáva ha umi angaipa’apoha apytépe? Omboyképaraka’e umi tapicha omereseve térã ojehayhuvégui? Nahániri.

Oĩ oúva Hendápe tuicha jerovia reheve, oguerovia ipokatu omonguera hag̃ua—pe kuña hyguy syry mémevaicha, pe centurión romano hembiguái omanóva, pe leproso, Jairo, ha Bartimeo upe ohecha’ỹva. Peteĩteĩ ha’ekuéra omoĩ ijerovia ñeha’ãme, oha’arõvo pe rabino Nazaret-gua mba’eporã ha pokatu omoambuetaha hekove ha umi ohechaháicha hikuái. Ha upéicha Ojapo. Ha’e oheja osyry Iñemonguera.

Ha katu Jesús ohovasa avei umi oguerekóva jerovia ombotapykuéva, pe mitã hasýva túvaicha osapukáiva, ikatu nde rerekoháicha, “Ñandejára, che arovia, eipytyvõmi che jerovia’ỹ” Ha Ha’e oñohẽ avei poriahuvereko umi ndohekaiva’ekuépe chupe mba’eveichavérõ, pe kuña ojeguerahahaguéicha oporomoakãratĩ rupi, Naín viuda-re, pe kuimba’e ikatupyry’ambuéva oĩva Betesda estanque-pe, ha pe kuimba’e heñóiva ohecha’ỹre. Peñandúpa Ha’e ojapoha iporãva pende rekovépe ndapehekái ni ndapesegíriramo jepe Chupe?

Peteĩteĩ ko’ã tekove escritura-pegua, ha opavave ohendu ha ombohováiva’ekue, Ha’e ome’ẽ peteĩ ñepyrũ pyahu, taha’e peteĩ tekove pyahu oñeperdonáva angaipágui térã peteĩ tekove pyahu oñemongueráva mba’asýgui, térã peteĩ tekove pyahu oñemopu’ãva ñemanógui.

Mbaʼépa kóva heʼise ndéve ha chéve g̃uarã? Imba’eporã ha iporiahuvereko ha imborayhu ndoikuaái ñemohu’ã. Umi ñepyrũ pyahu oĩ pe Túva plan korasõme! Umi ñañepyrũ pyahu ha’e pe Ta’ýra misiõ! Ko’ẽ pyahu, capítulo pyahu ha juruja pyahu ha’e pe evanhélio marandu porã amboapyte sa’imína!

Upéicharamo, aretereípa peimera’e mombyry pene konvéniokuéragui pehupytyva’erã rupi peteĩ ñepyrũ pyahu? Nahániri. Hetaiterei jeýpiko pejapo kóva térã umíva oñemeʼẽva’erã rupi peẽme ambue juruja? Nahániri. Peho mombyryeterei pikora’e Cristo-gui Ha’e penepytyvõva’erã rupi pehai hag̃ua peteĩ ñemonbe’u pyahu ko’águi guive? Nahániri. Pe teko ñanerairõva añoitépe ou porã pe apytu’ũroky peẽ peñehundiha. Peẽ añete napeiméi.

Ha umi ñepyrũ pyahu hetave umi ñande angaipa ha jejavype g̃uarã añónte. Salvador mba’eporã ha grásia rupive, ikatu jaguereko ñepyrũ pyahu omoheñóiva ñemoambue umi mba’éichapa ñaimo’ã ymave, jepokuaa vai, teko arhél, teko vai meme, temiandu nañandepu’akáiha ha upe jakulpase ambue tapichápe ha jajehekýi umi ñane rembiaporã teégui. Añetehápe ikatu pemoambue umi mbaʼe pendejehegua heta arýma penemokangýva. Ikatu peñepyrũ jey upe ñepyrũ pyahu Mbo’ehára pu’aka rupive. Ha’e araka’eve naikane’õi ome’ẽvo ñandéve ñepyrũ pyahu.

Umi oñeha’ãvape peteĩchagua angaipa térã peteĩchagua ñembotapykue reheve jeyjeyve, tapeho hese tenonde. Ha’e nomoĩri mba’evéichagua oporohapejokóva penerenondépe. Ha’e nomoĩri ñemohu’ã umi mokõiha jurujape g̃uarã. Tapeho hese tenonde. Tapeñehaʼã meme. Peheka ñepytyvõ umi oĩvagui pende jerére. Ha pejerovia pe ñepyrũ pyahúre oĩva peẽme g̃uarã opaite pejevy jave pende Ru rendápe pende py’aite guive. Peheja tapykue gotyo, angaipa upéicha pejaposégui, pejapo jejey jepi ha pepu’ã orgúllope, opa ko’ava oĩ hag̃uáme Peẽ natekotevẽi ha’e umi ha’eva’ekue yma. Peñanuã pene ñepyrũ pyahu, pende mokõiha térã mbohapyha térã irundyha —térã centésima—juruja, oñeikuave’ẽva peẽme Jesucristo ruguy expiatorio rupive.

Che aguyje oje’ekuaa mboypýri umi ñepyrũ pyahu oñeme’ẽvare chéve ha umi oñeme’ẽtavare chéve.

Ñande Salvador he’i peteĩ ñemombe’u kangymi paha hese’ỹ ndaiporimo’ãigui mba’érepa ojeguerekóvo ta’aromby térã vy’apy ko árape. Ohasa’asy rire Getsemaníme ha oñembopakuévo pe kurusu ñembohasa’asy, Ha’e he’imínte: “Ojejapopáma.” Oñekumplíkuri pe profesía mesiánica, ha ojehepyme’ẽmbaite upe ojedevéva ojehepyme’ẽva’erã yvypóra angaipa ha jehasa’asy rehehápe. Ha’e omombe’u “ojejapopamaha” Hekome’ẽ ijapyra’ỹ ha opave’ỹva. Upevére, Ijexpiasiõ noĩmbamo’ãiramo’ã Ha’e voi ohasa peve tekove pyahu ára mbohapyhápe, peñepyrũ pyahu peteĩ tekove ojeglorifikáva, oikovejeýva ramo Túva pokatu rupive.

Ha’e akóinte ojapógui umi mba’e ombovy’áva Itúvape, ha Ha’e “ohasa’asýgui Túva rembipota opa mba’épe,” nde ha che ikatu jaguereko ñepyrũ pyahu. Pehupyty pende ñepyrũ pyahu, ko árape jepeve, upe ko’ag̃aite. Jesucristo ha’e ñande jerovia Apoha ha Omohu’ãva, ohaívo hetaiterei capítulo pyahu ñanendive. Ha’e upe Ñepyrũmby ha Ipaháva—ñande ñemotĩ ha jehasa’asy paha, ha pe tekove pyahu ñepyrũ Hese, ohejávo jaheja pe ymaguare, ha ñañepyrũ jey peteĩ ko’ẽju pyahu rehe, hetaite ñaikotevẽháicha. Añetehápe “Imba’eporã ha poriahuvereko [ñandesegíta] opa ára [ñande rekovépe].” Jesucristo rérape, amén.