Ñandejára Ombopya’e hína Hembiapo

Ojeikuaa porã Charles Dickens omoñepyrũhague inovela clásica Historia de dos ciudadesomoañetévo “Ha’ékuri pe ára iporãvéva; ha’ékuri pe ára ivaivéva”. Peteĩ sentídope, upeichaite avei ko’ã ñande árape.

Jaikohína peteĩ ára ivaietévape “ha opa pe yvy [oĩ] jepy’apyvaípe”. Elder Gary E. Stevenson omomba’eguasu porãite ko pyharevépe Presidente Russell M. Nelson momarandu ñande ha’eva’erãha py’aguapy’apoha, Jesucristo segiha ramo. Kóva ha’e peteĩ pehẽ tekotevẽtéva ñamokyre’ỹ hag̃ua joaju, py’aguapy ha ñemonguera “umi ára ivaivévape g̃uarã”.

Avei jaiko “pe ára iporãvévape”, ha upéva amomba’eguasúta. Ñandejára, Doctrina ha Konveniokuéra moñepyrũme, sección 1-pe, omomarandu pe evanhélio renyhẽ “oñemomarandú[ta] … yvy opaha peve”. Añetehápe Ñandejára ombopya’e hína Hembiapo ñande árape. Ja’aguyjeme’ẽ pypukuva’erã pe ñembopya’e rehe, oikova’ekue ha oikóva hína ko’ã ára hasýrõ jepe. Jaiko peteĩ árape Ñandejára segihakuéra ikatuvehápe ohendu Iñe’ẽpu ha ombohovái korasõ ha apytu’ũ ojepe’áva reheve. Umi Jesucristo Tupao Santokuéra Ára Pahapegua miembro, ojejokuáva pe Salvador ha Hembiapoukapykuéra rehe, ojuhu hína jehupytyrã ha py’aguapy personal ipypukúva.

Heta árape Tupao rembiasakuépe, oĩkuri tuicha ñemboheta umi oikeva’ekue konvénio rapére rehegua. Peteĩ peichagua ára oikókuri 1837 ha 1850 apytépe. Oĩkuri umi Apóstol ypykue Ñandejára Tupao oñemoĩ jeyvapegua oserviva’ekue misiõ Reino Unido-pe. Ko’ã misiõ rupi miles tapichakuéra ojoaju pe Tupaóre ha 1850-pe oĩ hetavékuri Tupaogua miembro oikóva Reino Unido-pe Estados Unidos-gui. Upérõ, Ñandejára omandákuri umi Santo-pe oñembyaty hag̃ua Utah-pe. Oiko peteĩ jeva tuichaitereíva ha oĩ ohupytyva’ekue pytyvõ umi préstamo rupi pe Fondo Perpetuo para la Emigración-gui.

Che ahayhuete pe ñemombe’u umi hetaiterei konvérso Inglaterra ha Gales pegua ñeg̃uahẽ Valle de Lago Salado-pe rehegua 1852-pe. Primera Presidencia omog̃uahẽ ko atýpe Cañón de Emigración jurúpe oñemoirũvo Capitán Pitt Band rehe. Pe periódico Deseret News he’i hesekuéra ha’eha “peteĩ peregrino aty [oikehápe] umi hermana ha mitãnguéra, oguatáva, kuarahýpe okáiva ha ára oinupãva, ha katu noñemotyre’ỹiva, ikorasõnguéra hory ha ikyre’ỹ, ojehechakuaa porãva hova ovy’a ha hetia’éva rupi”.

Ohasávo hikuái “pe templo manzana-re, … miles kuimba’e, kuña ha mitãnguéra, oñembyatýva heta tendágui pe tavaguasupegua, oñembojoaju hag̃ua pe ñemog̃uahẽ glorioso ha horyetévape”. Presidente Brigham Young oñe’ẽ chupekuéra: “Ajerure’asy Ñandejára Israel Tupã tapenderovasa. … Roñembo’e meme penderehe; miles ñembo’e oñeikuave’ẽ penderehe, ára ha ára, Upe omandava’ekuépe ñandéve ñambyaty hag̃ua Israel, jasalva hag̃ua yvypóra ra’ykuérape pe evanhélio ñemombe’u rupi, ha ñambosako’i chupekuéra Mesías jejurã.”

Upe javegua vy’apavẽ espíritu-pe, pehejami tamoañete jey opa umi kovérso pyahúpe ha umi ou jeývape Ñandejára Tupaópe: Ore pohayhu; roikotevẽ penderehe; Ñandejára oikotevẽ penderehe. Ikatu noromog̃uahẽi peẽme banda pu reheve, ha katu roñembo’e umi yvagagua jehovasa tomoirũ pene ñeha’ã peho hag̃ua tenonde gotyo pe konvénio rapére oporogueraháva Tupã pe Túva ha Jesucristo-pe rréino celestial-pe.

Oĩ techauka hesakã porãva pe jerovia Jesucristo-re okakuaaha hína ko’ã ñande árape. Jesucristo Tupao Santokuéra Ára Pahapeguápe oĩkuri peteĩ konversiõ hetave ojekuaaporãva. Ko’ã 36 meses ohasava’ekuépe haimete 900.000 konvérso ojoaju Tupaóre. Ko’ã konvérso ha’e haimete 5 por ciento umi Tupaogua miembro total-gui. Romog̃uahẽporãite umi miembro pyahúpe, jyvape’a ha momba’eguasu pypuku reheve pe tape peiporavova’ekuére.

Ko’ã 900.000 konvérso ko’ã 36 meses ohasava’ekuepegua ohasáma pe total miembro Tupao orekova’ekue 110 aniversario-pe 1940-pe, ohupytýva 860.000 miembro rasamínte. Kóva ha’e pe ary élder Jeffrey R. Holland, élder Dieter F. Uchtdorf ha che orereñói haguépe.

Ko’ã konvérso pyahu hechapyrãitéva ou opa tendágui ko yvórapegua. Umi seis meses ñepyrũme ko arýpe, umi konversiõ ojupi hetave 20 por ciento pe ary ohasava’ekuégui Europa, África, Asia, Pacífico ha América Latina-pe. Estados Unidos-pe jahecha ojupiha 17 por ciento. Ñandejára rembiapo oho meme tenonde gotyo mbarete reheve. Ko’ã jeipapa ojupíva ohóvo ha’e peteĩ testigo hesakãva pe evanhélio opokohahína umi korasõre ha omoambueha tekovekuéra oparupiete.

Ñande árape, ko’ã kovérso imba’eguasuetéva noñembyatyvéima peteĩ tenda central-pe. Tupaogua miembro-kuéra jerovia ha konsagrasiõ rupi, ojeguereko umi rrekúrso oñeipytyvõ hag̃ua umi ñembyatýpe, tupao ha templo ñemopu’ã reheve, opa yvóra tuichakue rupi. Umi sacerdocio-gua llave oñeikotevẽva ha umi rrekúrso oñeme’ẽva reheve, umi ordenánsa salvasiõrã ko’ág̃a ojeguerekóma hetave tendápe ko yvórape.

Taha’e ha’éva moõpa jaiko, umi miembro ko’ág̃agua oikotevẽ omog̃uahẽ cientos de miles miembro pyahúpe jajapo haguéicha umi Santo Inglés ha Galés ndive ñane rembiasa ñepyrũme amombe’uva’ekue. Che ahayhuete élder Gerrit W. Gong discurso ko sesiõme ñanembo’ehápe avave ndoguapyiva’erãha ha’eño, emocional ni espiritualmente.

Ñane rembiaporã imarangatúva ha’e ñamboaje ha ñamog̃uahẽ umi miembro pyahu ha ou jeývape. Ñandejára ombopya’eháicha hína Hembiapo, ñande jahayhu, ñamongaru ha jaserviva’erã umi omboajévape Iñevanhélio. Ikatu ñaipytyvõ ñamopu’ã hag̃ua peteĩ Sión tavayguakuéra, ha’ehápe “peteĩ [ñane] korasõ ha akãme, ha [jaiko] tekojojápe”. Ñañemopeteĩ hag̃ua Ñandejára ndive, ñañemopeteĩ raẽva’erã Ñandejára renondépe. Opa miembro taha’e ha’éva ára oñemongarai haguépe omboja’o pe responsabilidad omog̃uahẽ hag̃ua ambue tapichakuérape.

Che ñemoñe’ẽ Tupaogua miembro-kuérape ha’e peañua ko’ã tapicha hepyete ha ojeiporavopyrévape omboajeva’ekue Jesucristo evanhélio.

Presidente Gordon B. Hinckley ñanembo’e peteĩ konvérso pyahu oikotevẽha “peteĩ angirũ, peteĩ responsabilidad, ha oñemongaru ‘Tupã ñeʼẽ porã’ rehe (Moroni 6:4)”. Ikatu ñaime umi angiru apytépe omoañetéva ko’ã konvérso pyahúpe ha’ekuéra opertenseha ha ndaha’eiha umi oñekombidávante. Ikatu ñaipytyvõ chupekuéra oikũmby hag̃ua ha’eha hikuái Jesucristo discípulo ikatúva oministra ambue tapichakuérape ha omog̃uahẽ umi llamamiento oservi hag̃ua. Umi konvérso imitãva ojepy’amongetava’erã oservi hag̃ua peteĩ misión de tiempo completo. Opavave oiporavovaʼerã oñehaʼã ovivi peteĩ tekove Cristo-icha.

Heta ojoaju Tupaóre tuicha sacrificio personal reheve ha oikotevẽ py’aropúpe hapicha Santokuéra mborayhu ha pytyvõ.

Umi peẽ pendepyahúvape térã pejujevývape jeroviápe, oĩ py’ara’ã ikatúva pembohovake. Tapeha’arõkuaáke pendejehe. Umi misionero penembo’e pe doctrina imba’eguasúva ha omyesakã peẽme umi konvénio ha ordenánsa rréinopegua, oĩháicha escritura-kuéra ha Epredika Che Evanhéliope.

Imba’eguasueterei jahupyty umi ordenánsa ha konvénio ha jaiko umi tembiapoukapy. Pejesareko umi konvénio oñeikotevẽvare pe exaltasiõrã. Pe evanhélio ojapo exaltasiõ ikatukuaa, oikotevẽva ojejapo ha oñeñongatu umi konvénio marangatu Tupã ndive. Ỹrõ pe bautismo, confirmación ha pe Melquisedec Sacerdocio ñeme’ẽ kuimba’ekuérape, umi konvénio jajapóva ojejapo templo-pe. Umi omanóvape g̃uarã, peteĩ teĩ ko’ã ordenánsa salvasiõrã ojejapo templo-pe añoite. Péicha, peñembosako’ívo templo-pe g̃uarã ha’eva’erã peteĩ jehupytyse pya’éva.

Sapyʼánte peñeñandúta naiporãiha umi mbaʼe peikuaáva. Evanhélio jeikuaa ha’e peteĩ jehovasa tuicháva ojehupytýva mbeguekatu ára ohasávo, ha katu ndaha’éi peteĩ ordenánsa salvasiõrã. Pe evanhélio ndaha’éi peteĩ jeikuaa rehegua ñeha’ã. Upevére, Presidente Nelson opromete haguéicha: “Peñemoarandúrõ ñembo’épe Mormón Kuatiañe’ẽme ára ha ára, peiporavo porãvéta—ára ha ára. … Pejepy’amongetávo umi peñemoarandúvare, ojeipe’áta yvága rovetãkuéra, ha pehupytýta ñembohovái pene ñeporandúpe g̃uarã ha sãmbyhy pende rekovépe g̃uarã”.

Avei, opa ary pe Tupao currículo umi ñembyaty dominical-pe g̃uarã ojejere Antiguo Testamento, Nuevo Testamento, Mormón Kuatiañe’ẽ ha Doctrina ha Konveniokuéra rupi. Ára ohasávo pejeroviavéta pene evanhélio kuaapy okakuaavévo. Umi escritura-pe ñemoarandu meme ohovasáta ha omoporãvéta pende rekove ombopypukúvo pene konversiõ Jesucristo evanhéliope.

Jaikuaave Jesucristo doctrina potĩ ha’e peteĩ tekove pukukue jeporeka, mokõive, ñaikũmby hag̃ua pe doctrina ha jaiko hag̃ua peteĩ tekove Cristo-icha. Umi konvénio tekotevẽtéva ome’ẽ peteĩ jere jaheróva konvénio rape ramo. Presidente Nelson ombo’e mbarete porã ko’ã principio. Opavave miembro, ko’ýte katu umi ipyahúva ha ou jeýva, ojehovasáta oñemoarandúrõ ha omomba’apóvo umi imarandu profético konveniokuéra ha konvénio rape rehegua.

Pemoĩramo peteĩ jehupytyse pehupyty hag̃ua tekopotĩme opa konvénio oñeikotevẽva exaltasiõrã, peiméta pe tapépe oporogueraháva rréino celestial-pe. Templo ha pe templo-gua ordenansakuéra ha’eva’erã jajesarekoha rehe. Hetave umi konvénio oĩ káda tapicha ohupyty hag̃uáicha. Peteĩ umi konvéniope, ñemenda opave’ỹva, oike pembojoaju pene ñeha’ã peteĩ irũ ndive. Ñane meta ha’eva’erã jajuhu upe ñane irũ eterno.

Upevére, ani pendepy’amano ndaikatúiramo pehupyty pe ñemenda opaveʼỹva ko’ág̃a. Profetakuéra ombo’ékuri mba’eveichagua jehovasa ndojejokomo’ãiha umi miembro ijeroviarekóvagui oñongatúva tembiapoukapykuéra. Rréi Benjamín, peteĩ profeta Mormón Kuatiañe’ẽmegua, he’i porãiterei: “Umi iñeʼẽrendúva Tupã rembiapoukapykuérare … ojehovasa opa mbaʼépe … ha [o]pytáramo hikuái jeroviarekópe ipahaite peve … oikóta hikuái Tupã ndive peteĩ vyʼapavẽ opaveʼỹvape”.

Pehechakuaáta, ndapehecháirõma voi, umi miembro ndaha’eiha oĩporãmbáva. Pe doctrina ojerreveláva omohesakã porã jajavytaha ñande jeguatápe ko yvy ape ári. Jaiko peteĩ yvóra imarã ha ho’ava’ekuépe, ndaha’éi peteĩ yvóra celestial-pe. Ko tekove ha’e peteĩ ára jajepy’ara’ã hag̃ua, jaguerekóvo tapiaite poja ñañearrepenti ha ñaha’ã hag̃ua ñandejupe.

Opavave ñañeñandu pokã ñañehaʼãvo jaiko Jesucristo-icha. Iñexpiasiõ oheja ñañearrepenti ára ha ára ja’a jave. Nefi, ambue Mormón Kuatiañe’ẽmegua proféta he’i haguéicha: “[Ña]ñemotenondeva’erã ñemova’ỹme Cristo-pe, jaguerekóvo peteĩ ñeha’arõporã mimbi, ha mborayhu Tupãre ha mayma yvypórare. Upévare, jaháramo tenonde gotyo, ñande rorývo Cristo ñeʼẽme, ha ñañehaʼãmbaitéramo ipahaite peve, péina ápe, péicha heʼi pe Túva: Jahupytýta tekove opaveʼỹva”.

Ñama’ẽ aja umi ñande aragua py’ara’ãre, ñanemandu’ava’erã pe Salvador, Iministerio tekovegua aja, oikohague avei umi ára ivaieterei ha ipochývape. Ha’e ndojesarekói umi py’ara’ã político upe araguáre; ha katu umi Santo rekoporãmbaitére.

Jesegi Salvador-pe ha Idoctrina ha Imbo’epykuéra araka’eve ndahasy’ỹikuri peteĩ yvóra oĩ meméva jepy’apyvaietépe. Ndahasy’ỹikuri Salvador-pe g̃uarã pe yvóra oñemoambuévape Ijeguata tekovegua aja, ndahasy’ỹikuri umi ñande lider ha miembro ypykuérape g̃uarã ha ndahasy’ỹi ñandéve g̃uarã avei. Vy’arã, profetakuéra oikovéva ome’ẽ ñandéve pe gía ñaikotevẽva ko’ã ñande araitépe g̃uarã. Presidente Dallin H. Oaks omboguata meméta upe jehejapyre espiritual mbaretete.

Atestifika Jesucristo Tupao doctrina ijapyra’ỹ ha añeteguaha. Ame’ẽ che testimonio katuete ha añetéva Jesucristo oikoveha, ha Iñexpiasiõ rupi, ikatuha ñañemopeteĩ Hendive. Jesucristo réra marangatúpe, Amén.