Ñañomokyre’ỹvo

Nda’aréi amoñe’ẽ peteĩ jehasa opoko mbaretéva cherehe. Oikókuri Estados Unidos-gua Campeonato Nacional de Atletismo Masters-pe—peteĩ competencia tapichakuéra ijedávape g̃uarã.

Peteĩ tapicha opartisipáva prueba 1.500 metro-pe ha’ékuri Orville Rogers orekóva 100 ary. Pe omombe’úva ohai:

“Oñembopu vove mboka oñesẽ hag̃ua, umi oñanítava oñepyrũ, Orville pya’ete oñemoĩ ipahaitépe, opytahápe ha’eño haimete opa ñeñani pukukue, oñemotenondévo mbeguekatumi. Pe oñani paháva ha’e’ỹva Orville oguahẽma [jave], Orville oikotevẽ gueteri mokõi vuelta y media omohu’ã hag̃ua. Haimete 3.000 espectador oguapy oma’ẽ hese kirirĩháme ojere mbeguekatumi aja—kirirĩhaitépe, ha ta’eño vaietépe.

“[Ha katu] omoñepyrũvo ijere paha, pe atyguasu oñembo’y, osapukái ha ojepopete. Og̃uahẽvo ipahápe, pe atyguasu ijayvuetékuri. Miles espectador omokyre’ỹ roryetéva reheve, Orville oiporúkuri mbarete pahaite orekóva. Pe atyguasu hatã osapukái ha’e ohasávo pe meta paha ha oñañua chupe tapichakuéra hendive oñaníva Orville omomaitei pe atyguasúpe tekomirĩ ha aguyjeme’ẽme ha osẽ pista-gui umi iñangirũ pyahu ndive”.

Péva ha’ékuri Orville quinta carrera upe competencia-pe, ha opa ambue evéntope, ha’e avei ojapyhýkuri tenda paha. Oiméne oĩ ojepy’ara’ãva ohusga hag̃ua Orville-pe, oimo’ãvo ha’e nokompetiriva’erãha jepe ijedámagui—ha’e noperteneseiha pista-pe omombegueterei rupi hembiapo opavavépe g̃uarã.

Ha katu akói omohu’arõ jepe ipahápe, Orville ojapo cinco record mundial upe ára. Avave oma’ẽva hese oñanívo ndogueroviái péva ikatuha, ha katu ni umi ohecháva ni umi oñaníva ndaha’ékuri hue. Orville ndojapyharái mba’eve umi regla, ha árbitro-kuéra nomboguejýi mba’eve umi estándar. Ha’e oñani peteĩchagua carrera ha omyenyhẽ peteĩchagua ojejeruréva opa ambue competidor-cha. Ha katu pe hasykue—ko kásope, ijeda ha sa’ímagui hete mbaretekue—ojehechakuaákuri oñemoĩvo chupe umi orekóva 100 ary ha hetave división-pe. Ha upe división-pe, ha’e ojapókuri cinco record mundial.

Orville ojapyhy haguéicha tuicha py’aguasu osẽ hag̃ua pista-pe opaite ára, oikotevẽ avei tuicha py’aguasu ñande hermano ha hermana-kuera oñembo’y hag̃ua tekove pista-pe opaite ára, oikuaávo ikatuha ojehusga joja’ỹme ojapóramo jepe hikuái opa ikatumíva umi mba’evai oporomongyre’ỹpoíva rehe osegi hag̃ua hikuái Salvador-pe ha omomorã ikonveniokuéra Hendive.

Taha’eha’éva moõpa jaiko múndope, taha’eha’e ñande eda, ha’e peteĩ yvypóra remikotevẽ opavavépe g̃uarã ñañandu ñaperteneseha, ñañandu jajehayhu ha oñeikoteveha ñanderehe ha ñande rekove orekoha jehupytyrã ha he’iseha, taha’eha’e mba’éichapa ñaime térã umi porãmba’ỹ jarekóva.

Pe carrera jere pahápe, atyguasu ojepopete mbarete Orville-pe, omombaretévo chupe oho meme hag̃ua. Ndaha’éi mba’eve omohu’ãhague ipahaitépe. Umi oñaníva ha atyguasúpe g̃uarã, péva tuichavékuri peteĩ competencia-gui. Heta hendáicha, péva ha’ékuri Salvador mborayhu momba’apo rechaukarã porãite. Orville omohu’ãvo, ovy’a hikuái oñondive.

Pe Campeonato Masters-cha, ñande aty ha ogayguakuéra ikatu oñembyaty peteĩ hendápe oñomongyre’ỹ hag̃ua—konvénio tapicha’aty omýiva Cristo mborayhu rehe ojuehe—ñañopytyvõva jagueropu’aka hag̃ua oimeraẽ umi mba’ejetu’u ñambohovakéva, ñañomombarete ha ñañomongyre’ỹvo jajohusga’ỹre. Ñaikotevẽojuehe. Ñemopeteĩgui ou mbarete divino, ha péva rupi Satana oñeha’ã ñanemboja’o.

Ñembyasyrã, mbovy ñandekuérape g̃uarã, tupaópe jeho ikatu hasy sapy’ánte heta mba’ére. Ikatu peteĩ tapicha ohasavahína jerovia rehegua porandu térã peteĩ orekóva ansiedad social térã depresión. Ikatu peteĩ tapicha ambue tetã térã raza-gua, térã peteĩ tapicha ohasava’ekue ambue tekovegua jehasa térã ohecháva umi mba’e omoñandúva ndaijaiha hikuái. Ikatu jepe sy/túva ndokepái ha noñeñandu porãiva oreko rupi mitãra’y ha mitã michĩva térã peteĩ omenda’ỹva kongregasiõ henyhẽvape paréha ha ogayguágui. Ikatu peteĩ tapicha ombyatýva py’aguasu ou jey hag̃ua heta ary imombyry rire térã peteĩ tapicha manterei oimo’ãva ndohupytyiha ha araka’eve ndaijamo’ãi.

Presidente Russell M. Nelson he’i: “Peteĩ paréha pende barrio-pe ojopoi ramo, térã peteĩ misionero imitãva oujeýrõ hógape itiempo mboyve, térã peteĩ adolescente odudárõ itestimóniogui, noikotevẽi pehusga chupekuéra. Oikotevẽ oñandu hikuái Jesucristo mborayhu potĩ ojehechaukáva pene ñe’ẽ ha pene mba’e’apópe”.

Ñande jehasa tupaópe ome’ẽva’erã imba’eguasúva joaju Ñandejára ndive ha oñondive tekotevẽtereíva ñane ñeimeporã espiritual ha emocional-rã. Ojoajúva umi konvénio Tupã ndive jajapóva rehe, oñepyrũva ñemongarai reheve, ha’e ñande resposabilidad jajoayhu ha ñañangareko hag̃ua ojuehe Tupã rogaygua miembro ramo, Cristo rete miembro ramo, ha ndaha’éi ñamarkánte peteĩ lísta umi mba’e oñeha’arõvape jajapo.

Cristo-pegua mborayhu ha ñangareko ijyvateve ha imarangatuve. Cristo mborayhu potĩ ha’e karida. Presidente Nelson ombo’e haguéicha: “Karida ñanemyaña ‘jagueraha hag̃ua ojupe ñanemba’epohyikuéra’ [Mosíah 18:8ñambyaty rangue umi mba’epohýi peteĩva ambue ári”.

Salvador he’i, “Péva rupi opavave oikuaáta peẽ ha’eha che remimbo’ekuéra, pejoayhúramo peteĩva ambuépe”. Ha Presidente Nelson ombojoapy: “Karida ha’e peteĩ Jesucristo-pe osegíva rekopy tuichave”. “Salvador marandu hesakã: Umi Idiscípulo añete omopu’ã, ohupi, omongyre’ỹ, oipy’amovã ha oinspira. … Mba’éichapa ñañe’ẽ ambuévape ha hesekuéra … añetehápe he’ise”.

Salvador mbo’epy péva rehegua ndahasyiete. Oñemombyky regla de oro-pe: Ejapo ambue tapicha rehe nde reipotaháicha ojejapo nderehe. Eñemoĩ ndejupe upe tapicha rendaguépe ha etrata chupekuéra nde reipotataháicha rejetrata reime sapy’áramo hendaguépe..

Pe trato cristiano ambuekuéra rehe oho mombyryve ñande rogaygua ha tapicha’atýgui. Pévape oike ñande hermana ha hermano-kuéra ambue jeroviapegua térã umi oguerovia’ỹva. Oike ñande hermana ha hermano-kuéra ambue tetãygua ha avei umi orekóva ambueichagua convicción política. Ñande opavave peteĩ Tupã rogaygua pehẽ, ha Ha’e ohayhu opavave Ita’ýra. Ha’e oipota Ita’yrakuéra tohayhu Chupe ha avei tojoayhu ojupe.

Pe Salvador rekove ha’ékuri mborayhu, ñembyaty, ha jehupi techapyrã jepe umi sociedad ohusgávape oñemboyke ha iky’áva ramo. Hekove peteĩ tembiecharã oñemandáva jasegi hag̃ua. Ñaime ko’ápe ñamohenói hag̃ua umi Cristo rekopy ha ipahápe oiko hag̃ua ñandehegui ñande Salvador-chagua. Imba’éva ndaha’éi peteĩ evanhélio lísta oñemarka hag̃ua; ha’e peteĩ evanhélio ojeiko hag̃ua—oiko hag̃ua ñandehegui Ha’éicha ha jahayhu Ha’e ohayhuháicha. Ha’e oipota toiko ñandehegui Sion tavaygua.

Arekópe 20 ary rasami, ahasa peteĩ depresión pypuku rupive, ha upe ára jave, pe añetegua Tupã oikoveha ha’etékuri okañy sapy’áva. Ndaikatúi amombe’u porãmba pe temiandu ndaha’éiva añeñandu akañyetehague. Che mitãkuña’i guive, akói aikuaáva che Ru Yvagagua oĩha upépe ha ikatuha añe’ẽ Hendive. Ha hatu upe ára aja, ndaikuaavéima oĩpa peteĩ Tupã. Araka’eve nañandúiva mba’eve peichagua che rekovépe upe mboyve, ha añandu opa che pyenda ho’ahahína.

Péicha rupi, hasýkuri chéve aha hag̃ua tupaópe. Ahákuri, ha katu hasýkuri akyhyjégui ajeherorõ g̃uarã “inactiva” térã “oguerovia’ỹva” ha akyhyje oikorõ g̃uarã chehegui peteĩ asignasiõ mávape oñeme’ẽva. Pe añetehápe aikotevẽva upe ára jave ha’ékuri añandu hag̃ua mborayhu añete, jehechakuaa ha pytyvõ umi che jerereguágui, ndaha’éi huísio.

Umi ñeimo’ã akyhyjéva tekovekuéra ojapotaha cherehe, chete aimo’ãkuri ambue tapicha rehe ha’ekuéra ndoupy’ỹi jave tupaópe. Upe tembiasa tee rasyete chembo’e hepýva mbo’epy mba’érepa oñemandava’ekue ñandéve ani hag̃ua jajohusga joja’ỹme.

Oĩpa ñande apytépe ohasa’asýva kirirĩháme, okyhyjéva ambuekuéra toikuaa iñorairõ kañymby ndoikuaái rupi mba’éichapa umíva ombohováita?

Ñandejára añoite oikuaa porãmba umi mba’ejetu’u pohyikue peteĩteĩ ñande ñañaníva reheve ñande rekovepegua ñeñaníme—umi mba’epohýi, mba’erasy, ha pa’ã ñambohovakéva py’ỹi ambue tapichakuéra ndaikatúiva ohecha. Ha’e añoite oikũmby añete umi ñehunga ha trauma tekove omoambuéva ikatúva oĩ ñande apytépe jahasava’ekue yma ha opokóva gueteri ñanderehe ko’ág̃a.

Py’ỹi ñandejupe jepe jajehusga mbarete, ñaimo’ãvo ñaime tenondeveva’erãha pe tapépe. Ñandejára añoite oikuaa porã umi porãmba’ỹ ha katupyry peteĩteĩ jarekóva, ha upéva rupi, Ha’e añoite ikatu ohusgapaite ñane rembiapo

Hermana ha hermano-kuéra tajajogua umi ñemombe’upypegua espectador-pe ha ñañomokyre’ỹ ñande discipulado rapépe taha’eha’éva mba’éichapa ñaime! Pevarã natekotevẽi jajapyhara umi norma térã ñamboguejy umi estándar. Añetehápe ha’e mokõiha tembiapoukapy guasu—jahayhu hag̃ua ñande rapichápe ñande jajehayhuháicha. Ha ñande Salvador he’i haguéicha, “Pejapógui péicha peteĩ ko’ãvagui michĩvéva rehe … , cherehe pejapókuri”, iporãva térã ivaívape g̃uarã. Ha’e avei he’i ñandéve, “Napeñemopeteĩriramo, ndaha’éi chemba’e”.

Oĩta ára peteĩteĩ ñande rekovépe ñandéta umi ñaikotevẽva pytyvõ ha ñemokyre’ỹ. Ñañekompromete ko’ág̃a akói jajapo hag̃ua upéva ojuehe. Jajapóramo, ñamongakuaáta tuichave ñemopeteĩ ha ñamoĩta peteĩ tenda Salvador-pe ojapo hag̃ua hembiapo marangatu ñanemonguera ha ñanemoambue hag̃ua peteĩteĩme.

Peteĩteĩ peẽ peñandúvape g̃uarã mombyry pendetapykuehague ko tekovegua ñeñaníme, ko tekove yvy arigua je’óipe, pehomíke tenonde gotyo. Salvador añoite ikatu ohusga porãmba moõpa peimeva’erã ko’ág̃aite, ha Ha’e iporiahuvereko ha ijoja. Ha’e pe tekove ñeñanimegua Hue Guasu ha ha’e añoite oikũmbypa mba’erasy pohyikue peñaníva térã peguatáva térã pendepytyryrýva reheve. Ha’e ohechakuaáta porãmba’ỹ peguerekóva, pende katupyrykue, umi pende rekovepegua tembiasa, ha umi mba’epohýi ñemi pegueraháva, upéicha avei umi pene korasõ oipotáva. Nde avei ikatu rejapo umi record mundial simbólico. Animíke peha’ãrõpoi. Pehomíke tenonde gotyo! Pepytamíke! Peẽ ha’e ko’apegua! Ñandejára oikotevẽ penderehe, ha ore roikotevẽ penderehe!

Peiko peikohápe múndope, taha’e mombyryete jepe, penemandu’amíke pende Ru Yvagagua ha pende Salvador pendeikuaa porã ha penderayhu porãmbaha. Peẽ araka’eve ndaha’éi tesaraipyre Chupekuéra. Ha’ekuéra pendegueruse ógape.

Pejesareko pende Salvador rehe. Ha’e pende barra de hierro. Ani pepoi Chugui. Atestifika Ha’e oikoveha ha peẽ ikatuha pejerovia Hese. Avei atestifika Ha’e penemokyre’ỹhahína.

Tajasegi opavave Salvador rembiecharã ha ñañomongyre’ỹ ojupe ha’e che ñembo’e Jesucristo rérape, amén.