Pe Testimonio Jopói Ijapyra’ỹva

Ha’e oikuaapa ha ipu’akapa. Cristo Resape ha Espíritu Santo ministrasiõ rupive Iñinfluensia oĩ oparupiete. Hekoitépe oĩ tañanderovasa.

Ha’e ohecha ñande jehupytyrã ymaguare, ko’ág̃agua ha pe opave’ỹva. Mba’eve ndaikatúi oñeñomi Chugui.

Presidente Russell M. Nelson ñekuave’ẽ “ñapensa hag̃ua celestial-háicha” ñanemokyre’ỹ ñaha’ã hag̃ua ñande Ru Yvagagua jehecha ha naturaleza.

Hekoporãnguéra rupi, ñande Ru Yvagagua ome’ẽ ñandéve opaite umi jopói porã, peteĩteĩ Ijehecha tenonderã ha ijapyra’ỹva reheve iñakãme.

Ha’e avei rresponsabilida jaiporavo porã hag̃ua.

Jesucristo ohepyme’ẽ upe priviléhio repykue paha Huguy ijojaha’ỹva reheve.

Sapy’ánte ikatu jaguerovia sãso jaiporavo hag̃ua he’iseha tajajapo jajaposéva. Ha katu ojehepyme’ẽ haguére hepykue upéva he’ise sãso jaiporavo hag̃ua ha’eha peteĩ jopói marangatu.

Ñande ha’e agente ha agente-kuéra oĩ rresponsable peteĩ mba’ére. Kóvape, ñande ñaĩ rresponsable umi jeiporavo jajapóvare jajesegívo umi jeikuaa jarekóvare ha umi jopói oñeme’ẽva ñandéve. Ndaikatúi jaiporavo peteĩ mba’e ha’e’ỹre rresponsable ojehútavare upéva rupi.

Mba’érepa jaguereko sãso jaiporavo hag̃ua?

Jaiporavo hag̃ua iporãva.

Jaiporavo hag̃ua Cristo-pe.

Jaiporavo hag̃ua tekove ijapyra’ỹva—jey jey.

Pe Espíritu Santo testimonio tuichave pe jehechágui. Ha’e pe testigo imba’eguasuvéva Túva ha Ta’ýragui. Presidente Nelson ombo’e: “Umi ára oúvape, ndaikatumo’ãi jaikove espiritualmente Espiritu Santo influencia oporogia, oporaperechauka, opomoangapyhy ha meme’ỹvare”.

Hermano ha hermana-kuéra, upéva ha’e mba’érepa peteĩ teĩ ñande ñaikotevẽ pe Espíritu Santo pu’aka ko árape.

Peteĩ testimonio Espíritu Santo rupive ikatu ou hetaichagua. Peteĩ fókoicha peteĩ koty iñypytũvape, ikatu hendypaite ha sapyʼaitépe. Ikatu ou kuarahy resẽicha mbeguekatúpe ha ára ohasávo. Ikatu ou umi tesape mimbícha, ojehechauka sapy’apya arandu potĩme. Taha’e ha’e ouháicha, ou Espíritu Santo rupive.

Che akakuaa Jamaica porãitépe; upéva hetia’e ha hechapyrãitékuri. Ha katu, añepyrũvo pe mbo’ehao secundario, añepyrũ ambohovake umi porandu hasýva che clase-gua irũnguéra ha angirũnguéragui ndaikatúiva oikũmby che jeiporavo ha’e hag̃ua Jesucristo Tupaopegua miembro. “Mba’éicha piko rejoaju ra’e upe tupaóre?”, oporandu hikuái. “Mba’éicha piko regueroviakuaa upe ñemombe’u?”—oñe’ẽvo hikuái pe Primera Visión rehe. “Mba’éicha piko ikatu remoñe’ẽ upe kuatiañe’ẽ?”—oñe’ẽvo Mormón Kuatiañe’ẽ rehe. “Anetehápe piko reguerovia opa umíva”? Ha “Mba’ére piko rehundi reihína nde rekove”?

Upéva hasýkuri, ko’ýte oúrõ umi tapichágui cherakate’ỹvare.

Ha katu ha’ekuéra ndoikuaái kóva: che aguerekohague peteĩ tembiasa Espíritu Santo ndive. Upe testimonio omyanyhẽháicha che korasõ, ombogue pe py’arasy, ha “sapy’ami aja, pe yvága jehecha [ojehechauka] che resa renondépe.”

Ikatu ojejapo ra’e peẽme ko’ã porandu ambue apytépe. Ikatu, ko’ag̃aite peve pejejapi hína chéicha umíva reheve.

Pe Espíritu Santo jopói ha testimonio oĩ opavavete ohupyty hag̃uáicha.

Jamaica ha’e chéve g̃uarã Palmyra ha’eva’ekue José Smith-pe g̃uarã. Ha’e che Yvyramataty Marangatu. Ndaikuaái moõitépa oĩ raka’e Josẽ Smith oñesũrõguare oñembo’e hag̃ua pe Yvyramataty Marangatúpe, ha katu aikuaa porã moõpa aĩkuri che Yvyramataty Marangatúgui oiko haguépe añetegua. Oiko Four Grove Road, Mandeville, Jamaica-pe, baño-pe, peteĩ miércoles 6 horas pyhareve, mbohapy ary che ñemongarai rire. Upe jehasa marangatu oikókuri peteĩ misionera inspirada, mokõi semana upemboyve, chekombida haguére amoñe’ẽ hag̃ua Mormón Kuatiañe’ẽ. Hermana Audrey Krauss oĩhína conferencia-pe ko árape hogaygua ndive, ha ahayhu chupe tapaite g̃uarã.

Upe jehasa chemoambue.

Hermano ha hermana-kuéra, peteĩ testimonio noñeme’ẽi ojeiporu hag̃ua sapy’arãnte. Pe jopói ñande Ru Yvagagua ñanderayhuetévagui ha’e ijapyra’ỹva upe ome’ẽva ha’égui ijapyra’ỹva. Peteĩ testimonio ndoguerekoiva’erã ára oñehundi hag̃ua. Naikangýi ni noñemomichĩriva’erã peteĩ mba’e oñemoambuéva rupi che rekovépe térã peteĩ mba’e ko yvórape oñemoambuégui. Imbareteveva’erã, pe tembiguái talentoicha oĩva talentos ñemombe’úpe, che testimonio personal ha’égui peteĩ jopói oñembohetaveva’erã—ndaha’éi oñeñotỹva’erã.

Chemandu’ávo umi ára hasýva jeipy’ara’ã ha ñemuñágui ahasava’ekue che mitãme chepytyvõ ag̃uahẽ hag̃ua pe tenda ko’ág̃a aikuaahápe chejeheguiete. Ndaha’éi aguerovia, aha’arõ térã ajeroviáva añónte, jepe ko’ãva ha’e jerovia rehegua pehẽ imba’eguasúva pe tapére peteĩ testimonio seguro-pe g̃uarã. Pomomba’eguasu pejapo haguére pende rape tee peporandu, peñemoarandu, peñembo’e, peajuna ha pejepy’amongetávo. Aníkena pepyta. Iporã opa ñeha’ã jasegi hag̃ua ko tape testimonio-pe g̃uarãme. Mávape térã mbaʼépepa pehejáta oipeʼa upéva pendehegui? “Mba’e testimonio tuichavéva reguerekokuaa pe oúva Tupãgui?”

Mayma Tupã ra’y térã rajy ikatu ohupyty peteĩ kuaapy ipypukuvéva, imbaretevéva ha isegurovéva ijeheguiete. José Smith-icha, omoañeteva’ekue itestimonio oĩrõ jepe oñemoĩva hese, ikatu ja’e py’aguasúpe: “Che aikuaa, ha aikuaa Ñandejára oikuaaha, ha ndaikatúi anega, ni nañanimái ajapóvo.”

Che hermano ha hermana-kuéra pohayhuetéva, peheja tomba’apo pendepype pe testimonio ra’ỹi michĩva heñói peve peteĩ jeikuaa seguro ha glorioso ijapyra’ỹvape.

Reñemongaraiva’ekuéramo ha reñekonfirma miembro Jesucristo Tupao Santokuéra Ára Pahapeguáva, ha katu reñorairõ gueteri upe “ndaikuaaporãi gueteri aikuaápa” reheve, penemandu’amíke ko ñe’ẽme’ẽ rehe Santa Cena ñembo’épe: “Oguereko hag̃ua hikuái tapiaite Ijespíritu hendivekuéra.” Ko promesa rupi, peteĩ teĩ ñande ikatu jasegi pe tape ñandegueraháva testimonio ha peteĩ kuaapy isegúrovape.

Ko’ág̃a, ko’ápe oĩ peteĩ añetegua tuichaitereíva: Taha’e ha’e mba’éichapa oñeme’ẽva peteĩ testimonio—taha’e og̃uahẽ kuarahy resẽicha térã oúva peteĩ visiõ glorioso-pe—oñeikotevẽ gueteri peteĩ jeiporavo oñemog̃uahẽ hag̃ua ko jopói hepyetéva.

Ja’évo “Che aiporavo aguerovia hag̃ua” ojapo tahasy’ỹve jahupyty peteĩ testimonio Tupãgui. Jahechakuaáramo ñane testimonio ikangyha, penemandu’áke ha’eha umi poravo jajapóva omomichĩva pe testimonio pu’aka. Ha katu pe testimonio ndohói moõve. Tekotevẽnte jaiporavo jajoaju jey hag̃ua hese.

Peiporavórõ peguerovia ha’e peteĩ tape arandu ha ipoderósova jaipuru hag̃ua upe sãso jaiporavo hag̃ua.

Ndahechái peteĩ iporãvehaicha aiporu hag̃ua che sãso aiporavo hag̃ua ỹrõ amo’ã che testimonio.

Presidente Nelson ombo’e: “Ajerure’asy peẽme peñenkarga hag̃ua pene testimónio rehe. Pemba’apo pehupyty hag̃ua. Peñemomba’e hese. Peñangareko hese. Pemongaru okakuaa hag̃uáicha. Pemongaru añetegua reheve.”

Chéve g̃uarã, umi ñe’ẽ peñenkarga, pemba’apo, peñangareko, peñemomba’e, ha pemongaru ipu peteĩ agente ramo oñeme’ẽvape mayordomía peteĩ mba’e hepy ha imba’eguasúva rehe.

Tupao ñepyrũme, Parley P. Pratt noĩri de acuerdo Profeta José Smith ndive ha oiporavo okaguai hese ha Tupaóre. John Taylor, Parley ombo’eva’ekuépe pe evanhélio, oúrõguare távape, Parley omboyke chupe ha he’i chupe ani hag̃ua osegi José-pe. John Taylor he’i Parley-pe:

“Resẽ mboyve Canadá-gui, reme’ẽkuri peteĩ testimonio mbarete José Smith ha’eha peteĩ Tupã profeta, … ha erékuri reikuaaha ko’ã mba’e rrevelasiõ ha Espíritu Santo jopói rupive.

“… Che ko’ág̃a aguereko pe testimonio nde reguerovy’ava’ekue upérõ. Pe tembiapo añetéramokuri ojapo seis meses, añete avei ko’ág̃aite. José Smith ha’éramokuri upérõ peteĩ proféta, ha’e ko’ág̃a peteĩ profeta”.

Chete atestifika José Smith ha’ehague peteĩ Tupã profeta ha pe manto profético ha’e ohupytyva’ekue oĩha gueteri ko dispensación-pe. Jesucristo oisãmbyhy ko tembiapo.

Pokombida pepensa hag̃ua pende rapére peteĩ testimonio seguro gotyo Jesucristo ha iñevanhéliogui. Peñangarekóke pende testimonio rehe; peiporu arandúpe pene sãso peiporavo hag̃ua ha pehechakuaa upe me’ẽhápe ha opa umi Hekoporã glorioso. Che atestifika upe pu’aka oĩha pendepype. Avave ndaikatúi oiporavo penderehe. Avave ndaikatúi oipe’a ko jopói. Nde Ikatu reiporavo regueroviataha.

Añe’ẽme’ẽ peẽme pejapoháicha upéva, pene testimonio ha’etaha peteĩ “ykua y oikovéva heñóiva tekove opave’ỹvape g̃uarã.” Ha’éta peteĩ ancla ha peteĩ motivador, ha pende jokóta umi ára hasýva rupi. Ohejáta pemongakuaa hag̃ua umi jopói espiritual. Penepytyvõta pende ministerio ha servicio personal-pe. Ha’éta peteĩ arma Satana ha pende adversario-kuéra rehe. Pene testimonio ha’éta peteĩ vy’a pehechaháicha ojeipyso jey pende ta’ýra, nieto ha bisnieto-kuérape ha umi pehayhúva ha peservívape. Imbaretéta pekomparti jave ha peiporúramo petestifika hag̃ua.

Peikuaáramo, peikuaa. Che aikuaa aikuaaha. Ñaikotevẽve testigo seguro Jesucristo ha Iñevanhéliogui. Peg̃uahẽ upépe! Peheka upéva! Pya’eva’erã! Kóva ha’e pe dispensación paha—pe dispensación ára oñekumplitahápe.

Jesucristo omomarandu ko añetegua: “Yvága ha yvy ohasáta, ha katu che ñe’ẽ ndohasamo’ãi.”

Hermano ha hermana-kuéra, peteĩ testimonio Jesucristo-gui araka’eve ndaha’emo’ãi peteĩ jopói sapy’arãnte. Mba’eve upéva rehegua ha’e sapy’arã—ndaha’éi pe ome’ẽva, ndaha’éi pe jopói voi, ndaha’éi pe omog̃uahẽva pe jopói, ni máva reheguápa pe jopói. Toñemombe’u pene testimonio peichaiteha avei. Jepe “yvága ha yvy ohasáta”, pene testimonio ha testigo Jesucristo evanhéliogui ndohasamo’ãi. Koʼág̃a haʼe pe ára jajejagarra hag̃ua ko jopói hepyetévare. Jesucristo rérape, amén.