Opavave Ojeedifika Hag̃ua

Jesucristo Tupao Santokuéra Ára Pahapeguáva ramo, jajehovasáva peteĩ Deidad miembro ñemoirũ reheve, ikatu jareko pe Mbo’ehára hekoporãmbáva pytyvõ. Pe Espíritu Santo oikuaa opaite mba’e, otestifika añeteguágui, ha “[ñane]momandu’áta opaite mba’e”. Presidente Russell M. Nelson py’ỹi oñe’ẽ imba’eguasuháre ñahendu hag̃ua Ñandejára ñe’ẽpu. Ha’e ñanembo’e mba’éichapa ñakombida Espíritu Santo ñemboguata ha ojerure jeyjeyva’ekue ñandéve ñambotuichave hag̃ua ñande katupyry espiritual jahupyty hag̃ua rrevelasiõ.

Ko árape che pokombida pema’ẽmi hag̃ua Espíritu Santo rembiapo rehe, ko’ýte ha’éva evanhéliope ñemoarandu ha ñehekombo’e ógape ha tupaópe rehe. Pe Espíritu Santo oñeme’ẽ jerovia ñembo’e rupi ha ñañeha’ã jave jaiko tekomarangatúpe jareko hag̃ua ko jopói porãite. Tupao manual inspirado Enseñar a la manera del Salvador omysãka ambue umi principio Ñandejára omoĩva’ekue oipytyvõtava oñekombida hag̃ua Espíritu Santo influénsia.

Peteĩva ko’ã principio ha’e oñekombida hag̃ua jesarekópe ñemoarandu. Ymave, ikatu ñaimo’arã’e ñehekombo’e ha’eha poja peteĩ sy/túva térã mbo’ehára okombida hag̃ua pe Espíritu iñembosako’i teépe ha upéi okomparti pe ha’ekuéra oikuaava’ekue umi mitã térã clase-guakuéra ndive, hembiapo ha’éva ohendu hag̃ua. Ha katu iporãveta jepe ñande, temimbo’e ramo, jajúramo avei ñembosako’ípe ha umi mbo’ehára omoĩramo ñemoarandu rembiasa oñemohenóiva rrevelasiõ personal ñane korasõite ha ñane akãme. Upéi, oñeme’ẽvo ñandéve poja ñakomparti hag̃ua umi jaikuaavahína ñemoarandu ha Espíritu Santo rupive, ñañopytyvõ ñañohekombo’e ha jajoedifika hag̃ua. Jaiporúvo mi evanhélio principio, pe Espíritu ome’ẽ jey testimónio añeteguaha.

Opa mba’épeicha, Jesucristo pe techapyrã porãmba. Ha’e peteĩteĩme ñanekombida ha’e hag̃ua temimbo’e ojesarekóva ha ñañemomba’e hag̃ua ñande testimónio tee rehe. Ha’e okombida Hemimbo’ekuérape toñembosako’i oñemoarandu hag̃ua tomboja’o umi mba’e oikuaavahína, ha tomba’apo jeroviápe. Ha’e oñembo’e hesekuéra, ohecha ikatupyrykue divíno, ohendu chupekuéra, ha oipytyvõ chupekuéra toikuaa ojehayhu ha oñeikotẽveha hesekuéra.

Mbo’ehára ramo, ikatu jajesarekove umi temimbo’e ñakãrapu’ã rehe, ñamyenyhevõ umi hemitekotevẽ, ha ñaipytyvõ chupekuéra omongakuaa hag̃ua umi jepokuaa espiritual discipulado tekove pukukue javevegua. Temimbo’e ramo, ñamomba’apo jave ñane sãso jaiporavo hag̃ua ñemoarandu apópe, jahechauka Espíritu Santo-pe jaipotaha Ha’e ñanerekombo’e.

Cheaguyje peteĩ mbo’ehára ndive chekombidava’ekue ha’e hag̃ua temimbo’e porãve. Añepyrũrõguare universidad, jejavýpe aimo’ãva pe mbo’ehao ha’eha peteĩ mba’e agueropu’akava’erã ikatu hag̃uáicha ajapo deporte. Peteĩ ára, omoñe’ẽ rire peteĩ mba’e ahaiva’ekue, che mbo’ehára he’i chéve ha’e oroviaha che arekoha tuicha katupyry ñehesa’ỹijóme apensa hag̃ua. Ndaikuaáikuri ni mba’épa péva he’ise. Ha’e he’i peteĩ ñeha’ã ojesarekovévape ikatuha oiko chehegui temimbo’e porã. Upe akãremiandu araka’eve ndoúiva che apyty’ũme. Ijepy’apy, ñemokyre’ỹ, ha ñekombida omoambue che ñemoarandu rape ha tuicha ohovasa che rekove.

Ambue principio tuicháva ñakombida hag̃ua Espíritu Santo-pe ha’e ñambo’e pe doctrina añetegua. Péva he’ise ñande evanhéliope ñemoarandu ha ñehekombo’e oñemombareteha Tupã ñe’ẽme ha nañambotuichái ni nañaimo’ãi pe Ñandejára oikuaauka’ỹva. Upéva rangue, jajesareko umi evanhélio principio tekotevẽ ha ijapyra’ỹvare, ohejáva pe Espíritu otestifika hag̃ua añeteguágui. Avei, jasegi Salvador rembiacharã. Ha’e he’i, “Nachemba’éi che doctrina, pe chembouva’ekue mba’e katu”.

Doctrina añetegua ojejuhu umi escritura ha profeta ko’aragua mbo’epykuérape. Ñandejára jerure’asy escritura-kuérape ñemoarandu peteĩteĩ ha ogaygua ramo ha tupaópe jeho opa semána ñañemorandu hag̃ua Iñevanhéliope ome’ẽ peteĩ hechapyrãva tape jaikuaa hag̃ua Idoctrina ha ñahendu hag̃ua Iñe’ẽpu. Jaheka umi escritura ñaikũmby hag̃ua pe omombe’úva, umi principio ombo’éva, ha mba’éicha jaiporukuaa ko’ã añetegua ñande rekovépe. Tuichaite jehovasa jareko hag̃ua umi escritura jahupyty hag̃uáme. Peimo’ãmi Adán ha Eva, Abinadí, térã pe Mbo’eharakuéra Mbo’eha, Jesucristo jepe, oúvo ñande róga térã ñande clase-pe ñanembo’e hag̃ua. Ikatu ou hikuái ñanderory jave Tupã ñe’ẽme. Ñeha’ã mante reheve, ikatu ñañemoarandu ñaikũmby ha jahayhu hag̃ua escritura-kuéra ha jajerovia umíva orekoha angapegua porandu ñembohovái.

Oĩkuri peteĩ ára romenda mboyve che rembireko, Kristi-pe, hasyhague oñandu hag̃ua Túva Yvagagua mborayhu ha oikũmby hag̃ua Iplan chupe g̃uarã. Oñembo’évo ñemboguata rehe, ou peteĩ impresión ohova’erãha instituto-pe, upéicha oñeanota peteĩ Nuevo Testamento clase-pe. Imbo’ehára instituto-pegua ombo’eháicha escritura-kuéra, jepe mba’éicha ojakóra’e ipópe, ohechauka ohayhueteha Tupã ñe’ẽ. Oho jave, pe Espíritu Santo oñe’ẽ mbegue chupe oĩha peteĩ mba’e umi escritura-pe ha’e oikotevẽva. Mborayhu imbo’ehára orekóva umi escritura-re ha umi Espíritu Santo impresiõ ome’ẽ chupe potapy oñepyrũ hag̃ua peteĩ ñemoarandu añete Tupã ñe’ẽme—oikóvagui peteĩ tekove pukukue je’ói konversiõ pypuku ha servicio konsagrádo.

Ipahápe, Enseñando a la manera del Salvador ojerureháicha, ñane ñehekombo’e ha ñemoarandu akói oma’ẽva’erã Jesucristo gotyo. Ikatu ñañe’ẽ Hese py’ỹive ha momorãve reheve ha jahekave poja ñame’ẽ hag̃ua ñande testimonio, aguyjeme’ẽ, ha mborayhu Hese. Taha’eha’e mba’éicha, ñanemandu’áramo Hese, ikatu jareko “Ijespíritu [ña]nendive”.

Peteĩ tape ñamoĩ hag̃ua Jesucristo-pe umi ñane mbo’epy mbytépe ha’e ja’e mbaretevérõ Ha’e ha’eha pe techapyrã porãmba, opa evanhélio principio mboheko ha jehechauka. Noñeñe’eirõ jepe hesete peteĩ escritura mombe’upýpe, ikatu gueteri ñama’ẽ Hese tembiecharã ramo upe principio oñembo’évape. Ikatu ñaporandúnte, “Ikatúpa reimo’ã peteĩ ára Jesucristo ohechaukárõguare ko principio?”

Ikatu avei jajesareko hese jaikuaávo umi Héra, hembiapo, ha heko, jahekávo ndaha’éi jaikuaánte hag̃ua upe Ha’e ojapova’ekue ha katu ñaikũmby porãve mávapa Ha’e. Tembiecharã, ñañemoarandu jave arrepentimiento principio-pe, imba’eguasu ñaikũmby hag̃ua mba’éichapa ñañearrepenti. Ha katu imba’eguasu avei ñanemandu’a hag̃ua mba’épa Jesucristo ojapova’ekue ikatu hag̃ua oĩ arrepentimiento ha ñaikũmby mba’épa arrepentimiento ñanembo’e Hese, Inaturalésa añete ha umi hekopy rehegua. Mba’épa he’i poja jarekóva ñañearrepenti hag̃ua Imborayhu, iñeha’arõkuaa ha iporiahuvereko rehe, Ijerovia ñande katupyrykue divínore, Hembipota oexpia hag̃ua ñane angaipa, ha vy’a Ha’e ojuhúva ñeperdonápe? Ha ñaikũmbývo umi Héra—ha’éva Tupã Cordero, Redentor, ha Pohãnohára—ñanepytyvõ jahecha arrepentimiento ha’eha iñemkombida ñanemopotĩ, ñanemoambue, ha ñanemonguera hag̃ua. Jajesarekóramo pe Ha’e ojapova’ekue rehe ñanderehe ha mba’épa péva he’i mávapa Ha’e rehe ñanepytyvõkuaa jareko hag̃ua “jerovia arrepentimientorã”.

Sapy’ánte ndajahecha pya’éi pe Salvador reko oĩva peteĩ escritura ñemombe’úpe. Tembiecharã, ñamoñe’ẽ jave Nefi rehe ojapóvo peteĩ yga, ikatu jajesareko Nefi rehe añónte. Ha katu jajesarekóramo Salvador rehe ikatu ñanepytyvõ jahecha hag̃ua ko jehaipyre noñeñongatuihague ñanembo’e hag̃ua Nefi tuichakue rehe ha katu ohechauka hag̃ua ñandéve Tupã tuichakue—Ha’e ñanemombareteha ñañongatu hag̃ua Hembipoukapykuéra ha ome’ẽha ñandéve ára tekotevẽte jave.

Ikatu avei jajesareko Jesucristo rembiapo mbyte rehe Túva Yvagagua plan vy’a reheguápe. Omoambuekuaa ñande rekove rape jahecha hag̃ua umi jahasavahína ojehechaháicha Tupã plan ijapyra’ỹva rupive jahecharangue upe plan ojehechaháicha umi yvy ári jahasavahína rupive. Pe evanhélio ndaha’éi peteĩ mba’ejerure lísta; ha’e mba’eporã pyahu Jesucristo ipu’akahague angaipa ha ñemanóre. He’ise jahupytývo Igrásia rechapyrãite ñañongatu rupi umi ñane konvénio Tupã ndive ikatuha jaiko vy’ápe ko’ág̃a ha ñañembosako’i jaiko hag̃ua ñande Ru Yvagagua ndive ára apyra’ỹme. Ñañemoarandúramo jahecha hag̃ua Túva Yvagagua ha Salvador-pe escritura-kuérape, jaikuaa porãveta Chupekuéra ha jahecháta mborayhu ha influénsia Ha’ekuéra orekóva py’ỹive ha pu’akapavépe ñande rekove teépe.

Akói chemandu’áne Espíritu añanduva’ekue chemitãsurúpe ore mbo’ehára ombo’e jave Salvador ára rekove paha rehe. Ha’e orepytyvõ rohecha hag̃ua umi mba’e oikova’ekue Getsemaní, Gólgota ru’ãme, ha pe te’õngue ryru nandi. Okomparti hi’aguyjeme’ẽ pypuku Salvador rehe ha ipotapy rendy osegi hag̃ua Chupe. Imbo’epykuéra ha’ékuri peteĩ ñekombida Espíritu Santo otestifika hag̃ua Jesucristo-gui. Ha pe Espíritu añaduva’ekue upe clase-pe ombombarete che jerovia ha ombotuichave che mborayhu ha jehechakuaa Salvador rehe. Upe mbo’ehára influénsia opytáva chendive che rekove pukukue javeve. Oje’e haguéicha ambue mbo’ehárare, “Ikatúkuri rombyaku ore po ijerovia ratápe”.

Ñande rogapy ha Tupao atýpe, jajesarekóramo Jesucristo rehe, ñambo’e Idoctrina, ha ñañemoarandu jasarekópe, ñakombida Espíritu Santo omombarete hag̃ua ñande jerovia Jesucristo-pe ha ñanepytyvõ Ha’eichave hag̃ua ñande, ha’éva opa evanhélio mbo’epy ha ñemoarandu jehupytyrã.

Cheaguyje umi mbo’ehára che rekovepeguáre, umi túva/sy mba’eporã ha líder local ha mbo’eharakuéra guive kuimba’e ha kuñanguéra peve oñehenoiva’ekue ombo’e ha otestifika hag̃ua ko púlpitogui, ñanepytyvõva jaikuaa ha jasegi hag̃ua Jesucristo-pe. Ha cheaguyje Espíritu Santo rehe, pe Tutor hekoporãmbáva. Ha Espíritu Santo rupive che aikuaa Túva Yvagagua ñanderayhu ha oguerekoha peteĩ plan oĩporambáva ñandéve g̃uarã; Jesús ha’eha pe Cristo, yvóra Salvador ha Redentor; ha Iñevanhélio ha Tupao oñemoĩjeyhague. Aguyjeme’ẽme atestifika ko’ã mba’égui, Jesucristo rérape. Amén.