Peñemoĩporã Tupã ndive

Añemoarandúvo escritura-kuérape, ajuhúva umi ñe’ẽ añetehápe chembohesarekóva, he’isetéva umi jehasa aguerekova’ekue rupi che rekove aja. Ahasa che carrera amba’apóvo contador forense ramo. Upéicha rupi, pe ñe’ẽ ñemoĩporã chembohesareko amoñe’ẽramo umi escritura. Che rembiapo ha’ékuri amoĩporãva hagua umi monto oñemombe’úva umi registro financiero ndive aiporúvo contabilidad, auditoría ha jeporeka katupyry. Ambue ñe’ẽme, ahupytyséva ha’ékuri ambojoja umi reporte financiero umi documento financiero rehe amoañete hag̃ua umíva hekopete ha oikóvaramo. Añeha’ã mbaretéva amyatyrõ hag̃ua umi jejavy, ha jepivegua ojeiporu hag̃ua heta ára oñemyatyrõvo umi joavy michĩmi jepe.

Apóstol Pablo ojerure’asy Corinto-peguakuérape “peñemoĩ porã Tupã ndive”. Ñañemoĩ porã Tupã ndive he’ise jaikoporã jey Tupã ndive térã ñamoĩ jey peteĩ joaju Tupã ndive ikangy térã oñembyaiva’ekue umi ñane angaipa térã ñane rembiapo rupi. Hasy’ỹháicha, ñañemoĩporã Tupã ndive he’ise ñambojoaju ñane rembipota ha ñane rembiapo Tupã rembipota rehe, térã Presidente Russell M. Nelson ombo’e haguéicha, jaheja Tupã taipu’akapa ñande rekovépe.

Oñembo’eháicha escritura-kuérape, ñane sãso ñamba’e’apo hag̃ua ñandejehegui, “jaiporavo hag̃ua pe ñemano opaveʼỹva rape térã pe jeikove ijapyraʼỹva rape”. Ha katu ndajajehesarekóiramo, ko sãso ñamba’e’apo hag̃ua ñandejehegui ikatu ñandereraha ñahundi pe ñane ñembojoaju Tupã ndive.

Proféta Jacob ombo’e jajejuhu jave jeikoporã’ỹ térã joaju’ỹme Tupã ndive, peteĩete tape jahupyty hag̃ua ñemoĩporã ha’e “ñañemoĩporã [Tupã] ndive Cristo expiasiõ rupive”. Jahechakuaava’erã pe ñemoĩporã odependeha poriahuvereko rehe, he’iséva Jesucristo expiasiõ grásia mba’e’apo ohejaha toiko ñemoĩporã.

Pejepy’amongetávo pende rekove tee rehe, peimo’ãmi peteĩ ára peñandurõguare penemombyryha Túva Yvagaguágui peñemboyke rupi Chugui. Péicha, ikatu pejehesareko’ive pene ñembo’épe Chupe térã peñongatu hag̃ua Hembiapoukapykuéra. Jaiporavoháicha ñañemomombyry Tupãgui, jaiporavova’erã ñañepyrũ ñeha’ã ñañemoĩporã hag̃ua. Ñandejára ohechauka ñande responsabilidad He’írõguare, “Peñemboja cherehe, ha Che añembojáta penderehe; chereka jesarekópe ha chejuhúta; pejerure ha oñeme’ẽta peẽme; pembota ha ojepe’áta peẽme”.

Mba’éichapa Salvador ñanepytyvõ oñemoĩjey ha oñemoĩpora hag̃ua ko imba’eguasúva joaju? Chéve g̃uarã, ajapo tuicha ñemotenonde che rape añemoiporã hag̃uáme Tupã ndive asegi jave ñemoñe’ẽ Presidente Nelson ombo’eva’ekue ha añearrepenti opaite ára. Upévare pe ñemoĩporã he’ise peteĩ joaju oñembyaiva’ekue ñemoĩjey, ko’ýte Tupã ha yvyporakuéra apytépe, ojepe’ávo angaipa jokoha.

Peteĩ tuichavéva ñemoĩporã ñamoñe’ẽva escritura-kuérape ha’e Enós rehegua. Peteĩ mba’e hekovepegua ndojoaju porãikuri Tupã ndive. Hembiecharãme ohechauka jajerovia Jesucristo Expiasiõre ñañemoĩporã hag̃ua Tupã ndive. Omyesakã ipotapy oñearrepenti hag̃ua, hekomirĩ, ijehesareko, ha ipy’aguasukue. Iñemoĩporã Tupã ndive oñemoañetékuri oúrõguare chupe peteĩ ñe’ẽpu, he’íva, “Enós, oñeperdona ndéve ne angaipakuéra, ha rejehovasáta”. Enós ohechakuaa pe arrepentimiento ha ñemoĩporã hese ojapóva he’írõguare, “Ha che, Enós, aikuaa Tupã ndaikatuiha ijapu; upévare, che rembiapovaikuéra oñemopotĩ”.

Ñemoĩporã ndaha’éi oguerúnteva py’avevúi kúlpa andúgui ha katu avei py’aguapy ñande pype ha ambuekuéra ndive. Omonguera umi joaju, omohu’ũ korasõ, ha omombarete ñande discipulado, oguerúvo tuichave jerovia Tupã renondépe. Oguerúva chéve tuicha ta’ãromby ha jerovia ha’e ambue mba’e ñemoĩporãgui oúva Enós omysakãva’ekue he’írõguare, “Ha che, Enós, ahendu rire koʼã ñeʼẽ, che jerovia Ñandejárare oñepyrũ omyikuaa’ỹ”.

Che mitãkuimba’épe, che sy gotyogua taita guasu oreko peteĩ tuicha cereza ty. Ijákuri chéve amba’apo hag̃ua cereza týpe, ko’ýte ára hakúpe umi cereza oñemono’õ jave. Mitãkuimba’e michĩvaicha, ajuhu che jeike ha’ehague oñeme’ẽ chéve peteĩ válde ha upéi añemondo peteĩ yvyramátape ambyaty hag̃ua umi cereza.

Tuicha iñambue cereza ñemo’õ che taita ojoguávo peteĩ máquina ojeheróva cereza momyiha. Ko máquina ojapyhy pe yvyramáta rakã ha ombokacha, ojapóva umi cereza ho’a pe yvyramátagui umi red ári ojeporúva oñembyaty hag̃ua umi cereza. Ahechakuaa pe momyiha oñepyrũvo ombokacha pe yvyramáta, haimete opa mi cereza ho’a yvyramátagui peteĩ tesa pirĩme. Ahechakuaa avei peteĩchante pe yvyramáta oñemomýirõ 10 aravo’i térã peteĩ aravo pukukue, oĩ umi cereza ndo’áiva. Umíva añetehápe omyikuaa’ỹ.

Cereza ñembokacha yvyramátagui oiko osẽ rupi etileno. Ko hormona ojapo umi célula ape oĩva cereza rakã ha yvyramáta mbytépe ikangy hag̃ua. Upévare, peteĩ cereza rakã hi’ajúva hasy’ỹve ojei hag̃ua yvyramátagui pe joaju oñemokangýva rupi.

Umi escritura-pe, ñañemoarandu Isaí rakã ha’eha peteĩ mbojoguaha Mesías, Jesucristo rehegua, ojeprofetisava’ekue outaha Isaí ñemoñarégui, Rey David ru. Pe etileno omokangyháicha peteĩ cereza rakã hi’ajúva joaju, pe ñe’ẽrendu’ỹ, umi py’amokõi, ha kyhyje ikatu omokangy ñande joaju Isaí rakã rehe, térã Jesucristo rehe, ombohasy’ỹvo ñamýi ha jajei hag̃ua Chugui. Ñaneñe’ẽrenduvéramo jepe, ñañangarekova’erã ani ikangy ñande joaju Jesucristo rehe.

Doctrina ha Konveniokuérape, jepe umi iñe’ẽrendúvape oñeme’ẽ peteĩ momarandu: “Ha katu, ikatu pe yvypóra ho’a grásiagui ha oñemomombyry Tupã oikovévagui”. Ñandejára he’ive, “Héẽ, … umi oñesantifikapyréva jepeve tojesareko avei”. Ani hag̃ua oje’a, Ñandejára oñemoñe’ẽ, “Upévare, tojesareko ha akóinte toñembo’e upe tupao, ani ho’a hikuái jeipy’ara’ãme”.

Ikatu oñembojoja pe hasy’ỹme ñemomýi ñeime escritura-kuéra oñe’ẽvare hi’ajúma ñehundirã ramo, umi mba’e’apo rupi oiko potámava rehe. Pe ñe’ẽ ikatu avei ojeporu tuichaveháicha ojehechauka hag̃ua kangy, ñembyai, térã je’ápe ñeime, ojapóva peteĩva ikatu hag̃ua ikyre’ỹpoi térã oñehundi.

Mba’épa omoha’anga ko hi’ajúma? He’isépa ikatuha ñag̃uahẽ peteĩ tenda ndaikatuvéima ñañemoambuévo? Nahániri, arovia he’ise ikatuha ñag̃uahẽ peteĩ tenda árape nañañemoambuesevéima. Ani hag̃ua ñandeaju ñehundirã jajapova’erã umi mba’e omombaretétava ñande joaju Jesucristo rehe. Oje’e haguéicha, arrepentimiento ogueraha Enós-pe peteĩ jerovia omyikuaa’ỹvape. Oĩ mbarete arrepentimiéntope—vokói, pya’e ha py’ỹigua arrepentimiénto. Presidente Nelson ñanembo’e haguéicha, “Ndaipóri mba’e ñanemosasõvéva, ñanemopu’ãvéva, téra imba’eguasuvéva ñande jekakuaa individual-pe g̃uarã, vokói jajesarekóvo ára ha aragua arrepentimiéntope”.

Opredika reheve arrepentimiento, proféta Jacob ombo’e jahechakuaáramo Tupã po ñande rekovépe, jaheka ha jahupytývo rrevelasiõ, ha ñahendu Tupãme Ha’e oñe’ẽ jave, opa umíva ñanepytyvõ ani hag̃ua ñañemomýi. Jacob avei ombo’e, “Upévare, rohesaʼỹijo profetakuérape, ha roguereko heta rrevelasiõ ha espíritu de profesía; ha roguerekóvo opa koʼã testimónio rohupyty peteĩ ñehaʼarõ, ha oiko ore jeroviágui omyikuaa’ỹva”. Ñahendu ha ñamba’e’apóramo umi profeta ha apóstol ñe’ẽme he’iháicha ikatu ñanerenyhẽ ta’arõmby, jerovia ha mbarete reheve, ojapóva ñande jeroviágui omyikuaa’ỹva.

Aikuaava’ekue Tupã ndive ñemoĩporã potapýpe omoirũva’erãha peteĩ ñearrepenti potapy. Ñañearrepenti ha ñañandu umi Jesucristo Expiasiõ jehovasapy ñande reraha jerovia omyikuaa’ỹvape. Jerovia omyi’ỹva akói oporogueraha peteĩ Tupã ndive ñemoĩporãsépe. Péva peteĩ techaukarã ojeréva, térã jeyjeygua.

Hermano ha hermana-kuéra, che pokombida peñemoĩporã hag̃ua Tupã ndive Jesucristo Expiasiõ rupive. Atestifika jajapo ha ñañongatúvo konveniokuéra omombarete ñande joaju Salvador ndive, péicha ani hag̃ua ñandeaju ñehundirã. Atestifika ko Tupã ndive ñemoĩporã, Jesucristo Expiasiõ rupive, oporogueraha jerovia omyikuaa’ỹvape.

Aikuaa Túva Yvagagua penderayhu ha cherayhu, ha Ha’e ombou Ita’ýra Ohayhuetéva, Jesucristo, ha’e hag̃ua ñande Salvahára, Jorahára, ha Moingoporãha guasu. Atestifika Jesucristo-gui ha péva ajapo Jesucristo rérape, amén.