Mormón Kuatiañe’ẽ—peteĩ Mba’ereta Ijojaha’ỹva Ñande Je’óipe

Elder Ozani Farias rupive

Setenta-gua

Ñanderorývo Cristo ñe’ẽme ojejuhúva Mormón Kuatiañe’ẽme, pe Espíritu ñanepytyvõta ñaikũmby hag̃ua apyra’ỹmegua añeteguakuéra.

Ikatúpa penemandu’a peteĩ áragui peteĩ tapicha ome’ẽhápe peẽme jopói omombuéva pende rekove? Ko octubre-pe ojapo 40 ary amog̃uahẽ hague peteĩ umi jopói tuichavéva che rekovépe. Aĩ aja mbo’ehao secundario-pe, ahechakuaa peteĩ ore mbo’esyrygua irũ orekókuri peteĩ tesape iñambuéva hetave umi ambue mitãrusúgui. Che avy’a ahasávo ára hendive. Peteĩ ára ha’e omombe’u chéve ha’e ha’eha peteĩ Jesucristo Tupao Santokuéra Ára Pahapegua miembro. Upéi ome’ẽ chéve peteĩ jopói: peteĩ Mormón Kuatiañe’ẽ kópia. Ha’e chekombida amoñe’ẽ hag̃ua mbovy página ha añembyaty hag̃ua mokõi angirũ ikatútava ombohovái che porandukuéra ndive. Umi angirũ ha’ékuri misionero-kuéra.

Añembyaty vove umi misionero ndive, ha’ekuéra chembo’e pe Cristo doctrina ha chekombida asegi hag̃ua proféta Moroni ñekombida: “Ha pehupyty vove koʼã mbaʼe, che haʼese peẽme peporandu hag̃ua Tupã, pe Túva Ijapyraʼỹvape, Cristo rérape, añeteguápa koʼã mbaʼe; ha pejeruréramo korasõ añetépe, peipotáramo añetehápe, peguerekóvo jerovia Cristo rehe, haʼe ohechaukáta peẽme koʼãva añeteguaha, Espíritu Santo puʼaka rupive” (Moroni 10:4).

Amoñe’ẽ heta Mormón Kuatiañe’ẽ páhina ha añembo’e. Jepe naikũmbýi pypuku gueteri opa mba’e umi misionero chembo’éva hína, añandu che korasõme umi mba’e amoñe’ẽva iporãha ha ouha Tupãgui. Ahupyty pe Moroni ñe’ẽme’ẽ ñemoañete: “Ha Espíritu Santo pu’aka rupive ikatúta peikuaa añetegua opa mba’e rehegua.” (Moroni 10:5).

Añemongarai rire Jesucristo Tupao Santokuéra Ára Pahapeguápe, oĩ angirũnguéra oñeha’ãva oroviauka hag̃ua chéve ajapo hague peteĩ jeiporavo vai. Ha katu peteĩteĩ jey ambohovakévo umichagua py’amokõi térã py’ara’ã, ahupyty jey moañete añemoarandúvo umi escritura-pe ha añembo’évo che jeroviareko meme hag̃ua umi konvénio ajapova’ekuépe Tupã ndive. Upe guive, Mormón Kuatiañe’ẽ ha’ékuri che irũ ha oiko chugui peteĩ mba’ereta ijojaha’ỹva che rekove je’óipe.

Mormón Kuatiañe’ẽ ha’e hetave peteĩ kuatiañe’ẽguinte. Ha’e ambue Jesucristo testamento, ojehaiva’ekue heta proféta ymaguare rupi upe profesía espíritu ha rrevelasiõ rupive.

Pe jehasa tuichavéva ojehaíva Mormón Kuatiañeʼẽme haʼe pe Ñandejára Jesucristo ministério personal Nefita-kuéra apytépe oikovejey riremi. Mormón Kuatiañeʼẽme ”oñemoĩ pe evanhélio doctrina, oñemombeʼu pe plan salvasiõ rehegua, ha ojeʼe yvyporakuérape mbaʼépa ojapovaʼerã hikuái ohupyty hag̃ua pyʼaguapy kóva ko jeikovépe ha pe salvasiõ ijapyraʼỹva pe tekove oúvape” (Mormón Kuatiañeʼẽ ñepyrũmby).

Pe Mormón Kuatiañe’ẽ: Ambue Jesucristo Testamento edición peteĩha ojepublika peteĩ tava’ípe Estado de Nueva York, marzo 1830-pe. Proféta José Smith orekókuri 23 arýnte ojapopa vove pe kuatiañe’ẽ ñe’ẽasa 1829-pe. Ha’e ombohasa haimete opa pe aranduka 75 ára mboyve, ha pe ñemoherakuã rembiapo ipuku siete mése rupi.

Ko’ã árape, 80.000 rupi misionero de tiempo completo ome’ẽ servicio voluntario ramo hetave 150 tetãme ha odedika hekove ome’ẽvo testimonio Mormón Kuatiañe’ẽ añeteguaha ha otestifikaha Jesucristo-gui.

Pe seminario ramoitegua umi presidente de misión pyahúpe g̃uarã junio-pe ko arýpegua, Presidente Russell M. Nelson, omboja’o itestimonio ipu’akapáva Mormón Kuatiañe’ẽgui: “Mormón Kuatiañe’ẽ ha’e … Tupã ñe’ẽ. Ipype oñembo’e pe Cristo doctrina ha oñemohesakãve pe Salvador Expiasiõ oimeraẽ ambue kuatiañe’ẽmegui”.

Ame’ẽse mbohapy suherénsia oipytyvõkuaáva ombopypukuve ñane conversión Jesucristo-pe Mormón Kuatiañe’ẽ ñehesa’ỹijo rupive:

1. Penekyre’ỹ ha Peñemova’ỹ Pene Ñemoarandu Ára ha Araguápe

Alma ha Mosíah ta’yrakuéraicha, “[ñahesaʼỹijova’erã] umi escritura jesarekópe, [jaikuaa] hag̃ua Tupã ñeʼẽ” ha ñañemombarete pe añeteguápe (Alma 17:2).

Roservívo misión sãmbyhyhára ramo Misión Atlanta Georgia-pe, che rembireko ha che romokyre’ỹ peteĩteĩ misionero-pe oñemoarandu hag̃ua Mormón Kuatiañe’ẽme taha’e 30 minutos jepe opa ára. Pe jejokua omongakuaa ore jerovia ha oreipytyvõ roheka ha roha’arõ hag̃ua umi milagro.

Ikatu pe misión rire ndajarekói heta ára disponible ñañemoarandu hag̃ua escritura-pe ára ha ára, ha katu apromete peẽme pemotenondérõ añete Mormón Kuatiañe’ẽme ñemoarandu, ñembo’épe ára ha ára, pejuhúta tuichave mbarete espiritual ha jerovia Ñandejára ha Iñe’ẽme’ẽnguérare.

2. Pejapo Pene Ñemoarandu Torekove He’iséva Penderorývo Cristo Ñeʼẽme

Nefi ombo’e, “Penderory Cristo ñeʼẽme; ha péina ápe, Cristo ñeʼẽ heʼíta peẽme opa mbaʼe pejapovaʼerã” (2 Nefi 32:3).

Ñanderory he’iseve ñemoñe’ẽreíguinte—he’ise jeguerohorývo, jajepy’amongetávo, ha ñamoĩvo mba’e’apópe. Peñemoarandu aja Mormón Kuatiañe’ẽme, pehechami mba’éichapa ikatu pejapo pene ñemoarandu escritura-pe taimba’eguasuve. Techapyrãro:

Peiporu umi ñemoarandu tembiporu Biblioteca del Evangelio aplicación-pe oĩva.
Pehechakuaa umi añetegua apyra’ỹmegua ñanepytyvõva ñaikũmby hag̃ua Tupã plan ha ñandegueraháva jajapo ha ñañongatu hag̃ua konvénio ñande Ru Yvagagua ndive.
Pembosa’y umi ñe’ẽjoaju imba’eguasúva ha pehai umi mbaʼe peñandúva peñongatu hag̃ua umi mbaʼe peikuaáva pe ñemoarandu aja.

Mormón Kuatiañe’ẽ oguereko pu’aka ombohovái hag̃ua umi ñane ángapegua porandu. Nefi he’i haguéicha, “[ñamoĩva’erã] mayma escritura-kuéra [ñande] rehe, haʼe hag̃ua [ñandéve] mbaʼe porã ha [ñane] rekomboʼe hag̃ua” (1 Nefi 19:23).

Ñanderorývo Cristo ñe’ẽme, umíva oipe’áta rrevelasiõ rokẽ ha ohechaukáta ñandéve mba’épa jajapova’erã opaichagua jehasa ñande rekovépe ñañemoag̃uive hag̃ua Hese.

3. Peme’ẽ Pene Testimonio Mormón Kuatiañe’ẽ Añeteguaha

Lehi omboja’ose haguéicha pe yvyramáta tekove rehegua yva hogaygua ndive (tojehecha 1 Nefi 8:12), jahupyty vove peteĩ testimonio Mormón Kuatiañe’ẽgui, ñamoheñói peteĩ potapy ñamboja’o hag̃ua pe vy’apavẽ oúva jaikuaávo Jesucristo evanhélio.

Peteĩ ore misionera, Hermana Benson, oĩvahína ñanendive ko sesiõme, omboja’o chendive oipytyvõseha ikyvýpe. Upérõ, ha’e oñemobsako’íkuri hína oho hag̃ua facultad-pe ha ndoikuaaporãi oservisépa peteĩ misión-pe. Añandu py’a atõi akombida hag̃ua hermana Benson-pe omoñe’ẽ hag̃ua Mormón Kuatiañe’ẽ umi irundy mes ñepyrũha imisiõme, ombosa’ývo umi escritura oguerohorýva, ha upéi oguerahauka hag̃ua upe kuatiañe’ẽ ikyvýpe.

Hermana Benson oguerahauka pe Mormón Kuatiañe’ẽ ombosa’ýva’ekue ha okombida ikyvýpe omoñe’ẽ hag̃ua upévagui ñavõ pyhare. Upe rire omboja’o chendive: “Che misiõ mboyve, che kyvy noĩri seguro oservisépa peteĩ misión de tiempo completo. Mbeguekatu, ára ohasávo, omoñe’ẽvo Mormón Kuatiañe’ẽ, ojuhu vy’apavẽ okakuaáva hekovépe ha oñepyrũ ojepy’amongeta oservi hag̃ua peteĩ misiõ”.

Mokõi semana hermana Benson omohu’ã mboyve imisiõ, ijoyke’y ohupyty iñehenói misional. Ko’ág̃a ha’e oservi hína Misión México Tuxtla Gutiérrez-pe. Mormón Kuatiañe’ẽ rupive, élder Benson ohechakuaa hekove tesakã espiritual reheve, ogueraháva chupe oiporavo hag̃ua oservi Ñandejárape ha ojerovia umi mba’e osẽ porãtaha. Pe jeiporavo peteĩ milagro—oñemyañáva Cristo ñe’ẽ pu’aka rupive.

Hermano ha hermana-kuéra pohayhuetéva, pomongyre’ỹ peteĩteĩ peẽme pembopypuku hag̃ua pene ñemoarandu Mormón Kuatiañe’ẽme. Aikuaa ñanderorývo Cristo ñe’ẽme oĩva Mormón Kuatiañe’ẽme, pe Espíritu ñanepytyvõta ñaikũmby hag̃ua umi añetegua ijapyra’ỹva ha ñamboja’o ñane testimonio jerovia reheve umi Ñandejára ombosako’iva’ekue ndive ohendu hag̃ua Imarandu. Ñandejára he’iva’ekue, “Umi aiporavova’ekue ohendu che ñe’ẽpu ha nomohatãi ikorasõ” (Doctrina ha Konveniokuéra 29:7). Atestifika umi ojeruréva Tupãme jerovia reheve ohupytytaha peteĩ testimonio pe Mormón Kuatiañe’ẽ añetegua ha divinidágui Espíritu Santo pu’aka rupive. Upévagui che atestifika, Jesucristo rérape. Amén.