Ejapo Ne Rembiapo Opa Ne Korasõ Reheve

Che jehasa jeveve simulador-pe ha’e peteĩ mandu’arã iporãva oiko hag̃ua ñandehegui ikatupyrýva peteĩ oimeraẽ mba’épe—taha’e jeveve, ñerrema, ñemono’õ, térã jeikuaa—oikotevẽha autodisciplina ha jejapo meme jepi.

Ikatu reiporu heta ary reguereko hag̃ua peteĩ katupyry térã remongakuaa hag̃ua talento. Ikatu remba’apo mbarete upéva oiko hag̃ua ndéve g̃uarã mba’e natural. Ha katu reimo’ãramo upévare ikatuha repyta reñeha’ã’ỹre ha reñemoarandu’ỹre, mbeguekatu ndereguerekomo’ãvéima umi kuaapy ha katupyry rejuhuva’ekue hasyetépe rehupytyva’ekue.

Kóva oiko katupyrykuérape ha’évaicha ñe’ẽ ñemoarandu, pumbasy tembiporu ñembopu ha avión ñembovevépe. Oiko avei oikóvo ñandehegui Cristo remimbo’e.

Ja’e hag̃ua mbykymi, temimbo’e reko oikotevẽ autodisciplina.

Ndaha’éi tembiapo manterei ojejapóvante, ha ndoikói accidente rupive.

Jerovia Jesucristo-pe ha’e peteĩ jopói, ha katu ojehupytývo ha’e jeiporavo oikotevẽva jajokua opa ñane “ánga, apytu’ũ ha mbarete”. Ha’e ára ha aragua ñeha’ã. Opa aravo. Oikotevẽ ñemoarandu meme ha jejokua ojeipotáva. Ñande jerovia, ha’éva ñande jeroviareko Salvador rehe, oñemombarete oñeha’ã aja joavýre ñambohovakéva ko yvy ape ári. Ipu’aka ñamongaru memégui, jaiporu memégui, ha araka’eve ndajahejareíri.

Ambue hendáicha, ndajaiporúiramo jerovia ha ipu’aka ombogueroviáva ñamba’e’apóvo hese, ndajaikuaaporãvéima umi mba’e areve ñamomarangatuva’ekue—ndajajeroviavéima umi mba’e jaikuaava’ekue añeteguaha.

Umi jeipy’ara’ã araka’eve ndaikatúiva’ekue ñanderesarenói oñepyrũ ojehecha vai’ỹve ha oñepyrũ iporãve.

Tata kuehe testimonio rehegua ikatu ñanembyaku sa’i aja añónte. Oikotevẽ ñemongakuaa meme hendy porã hag̃ua.

Testamento Pyahúpe, pe Salvador ombo’e peteĩ ñemombe’u peteĩ ruvicha rehegua ome’ẽva’ekue peteĩteĩ hembiguáipe peteĩ jerovia marangatu—peteĩ viru ojeheróva talento. Umi tembiguái oiporuporãva italento-kuéra ombohetave. Pe tembiguái oñotỹva italento ipahaitépe operde.

Pe ñehekombo’e? Tupã ome’ẽ ñandéve jopói—kuaapy, katupyry, poja rehegua—ha Ha’e oipota jaiporu ha ñambotuicha umíva ñanderovasa ha ohovasa hag̃ua ambue Ita’yrakuéra. Upéva ndoikói ñamoĩramo ko’ã jopói yvate estante ári peteĩ trofeo ramo ñamañávarente sapy’a sapy’a. Ñande jopói oñembotuicha ha oñembohetave jaiporu jave añónte.

”Ha katu Élder Uchtdorf”, ikatu ere, “che ndaguerekói mba’eveichagua jopói térã talento—ndaguerekói imba’eguasúva jepe”. Ikatu rehecha ambue tapicha ijopói ojehechaporã ha oporojurujáiva ha reñeñandu nde ha’eha jepiguávante embojojávo. Ikatu reimo’ã tekove yvy ári mboyvépe, tuicha jopói ha talento ára buffet-pe, nde plato-pe ha’ete sa’iete ojeservíva—ko’ýte oñembojojávo ambue plato rehe, henyhẽ ha oñehẽmbáva.

Oh, mba’eichaitépa roañuase ha roipytyvõse reikũmby hag̃ua ko añetegua tuichaite: Nde ha’e peteĩ tapicha tesape rehegua ojehovasáva, peteĩ Tupã apyra’ỹva ta’ýra espiritual! Ha regueraha nde ryepýpe peteĩ jehupytykuaa ndete reimo’ãkuaa’ỹva.

Ñe’ẽpotyharakuéra he’iháicha, reju ko yvy ape ári “gloria arai rupi”!

Nde ñepyrũ ñemombe’u ha’e divino, ha upéicha avei nde jehupytyrã. Resẽ yvágagui reju hag̃ua ko’ápe, ha katu yvága araka’eve nosẽi ndehegui!

Nde ikatu oimeraẽmba’e, ha katu jepiguávante nahániri.

Nde reguereko jopói!

Doctrina ha Konveniokuérape, Tupã omomarandu:

“Oĩ heta don, ha opa [tapichápe] oñeme’ẽ peteĩ don Tupã Espíritu rupive.

“Oĩ oñeme’ẽvape peteĩ, ha ambuévape ambue, [ha] péicha opavave oĩporã hag̃ua”.

Oĩ ñande jopói ojehaívagui escritura-kuérape. Heta katu nahániri.

Pe profeta Moroni heʼi haguéicha: “Ani penega Tupã don, hetágui; ha oúgui Tupãitégui voi”. Umíva ikatu ojehechauka “heta tape [rupi] … ; ha katu peteĩnte pe Tupã ojapopáva opa mbaʼe”.

Ikatu añetegua ñande jopói espiritual ndaha’éi akói oporohesarenóiva, ha katu upéva ndahe’iséi imba’eguasu’ỹveha. Ikatúpa amboja’o penendive mbovy jopói espiritual ahecháva hetaite miembro-kuéra apytépe opaite ko yvy ape ári? Ejepy’amongetami rejehovasápa peteĩ térã hetave jopói ko’ãichagua reheve:

• Ehechauka poriahuvereko.

• Ehecha tapichakuéra oñemboykéva.

• Ejuhu mba’érepa evy’a hag̃ua.

• Ha’évo py’aguapy’apohára.

• Ehechakuaa umi milagro michĩ.

• Eme’ẽ elogio añetegua.

• Eñyrõ.

• Eñearrepenti.

• Egueropu’aka.

• Emyesakã mba’ekuéra hasy’ỹháicha.

• Ejoaju mitãnguérandi.

• Emombarete Tupao sãmbyhyhára.

• Eipytyvõ ambue tapichápe oikuaa hag̃ua ojehe’a porãha hikuái.

Ikatu araka’eve nderehechái ko’ã jopói ojehechaukávo barrio talento show-pe. Ha katu aha’arõ rehecha mba’éichapa hepy umíva Ñandejára rembiapópe g̃uarã ha mba’éichapa ikatúma repoko, rehovasa, térã resalva jepe peteĩ Tupã ra’y nde jopoikuéra rupive. Nemandu’áke: “Mbaʼe michĩ ha mbaʼe ndahaʼéivaicha mbaʼeve rupive ojejapo tuicha mbaʼe”.

Upéicharõ peteĩteĩ ñande tajajapo ñane rembiapo pehẽ.

Che hermano ha hermana-kuéra pohayhúva, che angirũnguéra ahayhúva, añembo’e pe Espíritu ñanepytyvõ hag̃ua jahechakuaa umi jopói ha talento Tupã ome’ẽva’ekue peẽme. Upéi, taikatu, umi tembiguái hekojojávaicha Ñandejára ñemombe’úpe, ñambotuicha ha ñambohetave umíva.

Ára oúta ñañembo’ytahápe ñande Ru Yvagagua renondépe ñame’ẽ hag̃ua ñane rembiapo rehegua ñemombe’u. Ha’e oikuaaséta mba’épa jajapókuri umi jopói ome’ẽva’ekue ñandéve reheve—ko’ýte, mba’éichapa jaiporuva’ekue umíva jahovasa hag̃ua Ita’yrakuérape. Tupã oikuaa mávapa añetehápe ñande, mávapa oikova’erã ñandehegui, ha upéicha Ha’e oha’arõ ñandehegui tuicha mba’e.

Ha katu noha’arõi jajapóvo peteĩ ñeha’ã tuicha, heroico térã sobrehumano ñag̃uahẽ hag̃ua upépe. Yvóra Ha’e ojapóvape, omoheñoiva’ekue, jekakuaa oiko mbegue ha ha’arõkuaa reheve—ha katu oiko meme ha ndojepytái.

Nemandu’áke, Jesucristo ha’e pe ojapómava tembiapo sobrehumano Ha’e ipu’akávo ñemano ha angaipáre.

Ñane rembiapo ha’e jasegi Cristo-pe. Ñane rembiapo ha’e tajajehekýi angaipágui, jajere pe Salvador gotyo, ha jaguata Hapépe, peteĩ jeguata ambue rire. Jajapo jave kóva, ñeha’ãporã ha jeroviareko rehe, ipahaitépe jajoráta umi noĩporãmbáiva ha jejavy jejokuakuéra ha mbeguekatu oikóta ñandehegui oĩporãvéva, og̃uahẽ meve pe ára ñañemoĩporãmbaietahápe Cristo-pe.

Umi tovasapy ojehupytykuaa. Umi ñe’ẽme’ẽ oĩ hendag̃uame. Pe okẽ ojepe’aporã. Ha’e ñande jeiporavo tajaike ha tañañepyrũ.

Pe ñepyrũ ikatu michĩ. Ha katu péva OĨPORÃ.

Jerovia ikangyhápe, eñepyrũ peteĩ ta’arõmby reheve Cristo Jesús-pe ha Ipokatúpe omopotĩ ha oipe’apa hag̃ua ky’a.

Ñande Ru ojerure ñambohovake hag̃ua ko ñeha’ã jerovia ha temimbo’e reko rehegua ndaha’éi turista-háicha ha katu ojeroviáva ramo opaite ikorasõ rehe, ombotapykuere ha ohejáva Babilonia ha omoĩva ikorasõ, iñakã, ha ijeguata Sión gotyo.

Jaikuaa ñane ñeha’ã añónte ndaikatuiha ojapo ñandehegui celestial. Ha katu ikatu ojapo ñandehegui hekojojáva ha ojejokuáva Jesús pe Cristo-pe, ha Ha’e ikatu ojapo ñandehegui yvagapegua.

Ñande Salvador jahayhúva rupi, ndaipóri escenario nañaseporãihápe. Ñamoĩramo ñande ra’ãrõmby ha jerovia Hese, ñande pu’aka ojeasegura. Ha’e oñe’ẽme’ẽ ñandéve jahupytytaha Imbarete, Ipokatu, Igrásia hetáva. Jeguata jeguata rire, sa’i sa’i rupi, ñañemoag̃uivéta pe ára tuicha ha iporãmbaitéva rehe jaikovetahápe Hendive ha umi jahayhúva ndive gloria apyra’ỹme.

Ñag̃uahẽ hag̃ua upépe, tekotevẽ jajapo ñane rembiapo ko ára ha opa ára jave. Ñandeaguyje umi jeguata jajapóvare kuehe, ha katu ndajapytái upépe. Ha jaikuaa jaguerekoha gueteri tape puku jaguata hag̃ua, ha katu ndajahejái upéva ñane ñembyasy.

Upéva ha’e esencia mávapa ñande ha’e rehegua—Cristo segihára ramo.

Ajerure ha ahovasa opa Tupaogua miembro-pe, ha opa umi ipype oikesévape, pejerovia hag̃ua Salvador rehe ha pejapo, ta’ãrõmby ha ñeha’ã meme reheve, pejapóvo pene rembiapo opa pene korasõ reheve—pende vy’a henyhẽ hag̃ua ha, peteĩ ára, pehupyty hag̃ua opa mba’e Túva oguerekóva. Kóvare che atestifika, Jesucristo rérape. Amén.