Ha Ko’ág̃a Ahecha

Mborayhu japu’ỹre opavave ñande ja’ejey Presidente Oaks ñemomorã Presidente Russell M. Nelson ñemano rehe. Ha peichagua mborayhu ha ñembyasy pypuku rehe, opavave ñande jahechakuaa umi mba’e vaiete ojehuramóva Michigan-pe ha haimete peteĩteĩ ára yvóra jerére. Jahechakuaa ko’ã mba’e mborayhu ha jerovia Ñandejára Jesucristo-re.

Pe noveno capítulo Juan-pegua omombe’u Jesús ha Hemimbo’ekuéra ohasa hague peteĩ ojeruréva yképe, ndohecháiva heñói guive. Péva ogueraha umi temimbo’ekuérape oporandu hag̃ua Jesús-pe heta porandu religioso hasýva moõgui ou ha mba’eicha ohupyty mba’asy pe kuimba’épe. Pe Mbo’ehára ombohovái ojapóvo peteĩ mba’e ndahasýi ha oporopy’andýiva. Ha’e ondyvu yvyku’ípe ha ojapo tuju michĩmi. Upéi Ha’e omoĩ upéva pe kuimba’e resa rehe, he’ívo chupe ojejohéi hag̃ua Siloé ykuápe. Opa kóva ojapo ko kuimba’e ohecha’ỹva ha ”ou ohechakuévo”, he’i pe escritura. Imba’eguasuetépa jehechauka, ojoavýva jeipotarei térã ñe’ẽapi térã ñañágui jepe oñemoĩva añetére.

Néi, okyhyjégui ko milagro ombojoapyvéta pe amenása Jesús ha’émava voi ipu’aka oimo’ãvape g̃uarã, umi oñemoĩva pe Salvador-re oñemoĩ pe karai ohecharamóvare ha he’i pochýpe: ”Roikuaa [Jesús] ha’eha angaipa apohára”. Pe kuimba’e ohendu sapy’ami, upéi he’i: ”Ha’érõ angaipa apohára … ], ndaikuaái: [ha katu] peteĩ mba’e aikuaa, che ndahecháikuri, ko’ág̃a katu ahecha”.

Jesús ome’ẽ he’iséva peteĩha ko jehasápe, he’ívo Hemimbo’ekuérape kóva oikoha ”Tupã rembiapo ojehechauka hag̃ua”. Penemandu’áke mokõi jey ko ñemombe’úpe pe Salvador rembiapo oñehenói ”ungimiento” pe kuimba’e ohecha’ỹva resápe, peteĩ tembiapo oñemohu’ãva jejohéi rehe. Ko ñemyesakã ”Tupã rembiapo ojehechauk[ávo]” ikatu osuheri peteĩ ordenánsa jejapo.

Ambue añetegua ojehechaukáva ko’ápe ha’e umi tembiporu pe yvága ha yvy Apohára oiporúva ome’ẽ hag̃ua ko milagro: tendy ha yvyku’i! Ko’ã ingrediente oñeimo’ã’ỹva he’i Tupã ikatuha ñanderovasa oimeraẽ tape Ha’e oiporavóva rupive. Naamán ndohoséivaicha Ysyry Jordán-pe térã mbovy umi Israel ra’ykuéra noma’ẽséivaicha pe mbói yvyra ári, ndahasýi ñandéve ñamboyke ñane redención ykua umi tembiporu ohechaukáva upéva rupi ha’etégui imirĩetereiha.

Ha katu ñanemandu’a Mormón Kuatiañe’ẽgui oĩha mba’e hasy’ỹ ha hepyetereíva ha Jesús heñói mboyve, ojeprofetisaha ha’e ”[ndoguerekomo’ãiha] mba’e ojehechaséva térã porãngue; ha [jahechávo] chupe, ndaipori hese porãngue jaipota hag̃uáicha chupe”. Mboy jeýpa Tupã ombou Imarandu tuichaite peteĩ Sociedad de Socorro sãmbyhyhára oñehenoiramóva ha ojaposéva hembiapo, térã peteĩ mitãkaria’y iñarandu’ỹva kokuepegua Nueva York-pe, térã misionero pyahu rupi térã peteĩ mitãmi pesebre-pe rupive.

Mba’éiko oreko ñande ñembo’e ñembohovái oúrõ hasy’ỹ térã tape isarambíva rupi? Ñaĩpa jagueropu’aka hag̃ua, ñañeha’ã meme hag̃uáicha jaiko Cristo evanhélio taha’e mboy tendy ha tuju oikotevẽva? Ikatu nahesakãi ñandéve mba’épa térã mba’ére ojejapo, ha, sapy’a py’a, opaite ñande ñañeñandúta peteĩ hermana g̃uaig̃uimícha he’iva’ekue: ”Ñandejára, mba’etekópa emboúrõ peteĩ jehovasa ndaha’éiva disfrazado?”

Pehesa’ỹijomi peteĩ evidencia ambue añeteguágui, kóva sacerdocio marangatu rehe. Ohaívo Tupao meridiano ñemohendágui, Lucas ñe’ẽjoaju peteĩháme he’i: ”Upéi ohenói umi doce hemimbo’épe oñondive, ha ome’ẽ chupekuéra pu’aka ha autoridad”, jopói ndoúiva credencial oporojurujáiva ni oñeme’ẽva jepokuaa térã teñói derecho rupi. Ndoñeme’ẽi divinidad mbo’ehao térã seminario teológico rupive. Oñeme’ẽ po ñemoĩ rupive añónte, peteĩgui oñemoĩvare po autorizado rupi peteĩ jejokua oso’ỹvape ohóva pe autoridad divina ykua peve, Ñandejára Jesucristo.

Ha peteĩ tupao oikũmbýva poriahuvereko jopóipe, ndaha’éipa evidencia hechapyrãva pe tupao añeteguágui tojehecha ko’ã jehovasa ha konvénio ohóvo ñande ypykue omanóvape, ñande rogaygua ohomava’ekue ñande mboyve? Ojehavirava’erãpa chupekuéra ndoguerekóigui evanhéliope jehupytykuaa térã heñói rupi peteĩ ára térã tendápe umi ordenánsa divina ha konvénio ndaipórivo chupekuérape g̃uarã? Jesucristo Tupao Santokuéra Ára Pahapegua oguereko Ñandejára róga marangatu ha ojededikáva, ojejapohápe tembiapo oporosalváva umi omanóva rehe, ha avei ome’ẽvo ñetupãitũkuaa ha ordenánsa umi oikovévape g̃uarã? Che aikuaaháicha, ko Tupã añetegua evidencia, Imborayhu oikovéva ha omanóvare ndojehechái mamove yvórape—ỹrõ peteĩ tupao añoite ohechaukáva añetegua ko mba’ére: Jesucristo Tupao Santokuéra Ára Pahapegua.

Che ñug̃uaitĩ peteĩha evidencia añetegua ndive ome’ẽva’ekue chéve jehecha ha tekove ndoúi ñeunhi tuju reheve térã Siloé ykuápe. Nahániri, pe tembiporu añetegua rehegua ogueruva’ekue ñemonguera Ñandejáragui oúkuri chéve kuatiañe’ẽ rogue ramo, héẽ, Mormón Kuatiañe’ẽ: Ambue Jesucristo Testamento! Ko kuatiañe’ẽ rehegua ñemombe’u oñeñe’ẽ’api ha oñemboyke pochýre umi oguerovi’ỹvagui, jepe ojoja peve ñe’ẽ’api ojapóva umi he’iva’ekue pe kuimba’e okueráva ndaikatuiha araka’eve ohasa pe ha’e oikuaáva ohasahaguére.

Chéve oje’éma umi tembiporu ko kuatiañe’ẽ ou rupi ha’e ojeporukuaa’ỹ, ojeguerovia’ỹ, pomotĩ, imarangatu’ỹva jepe. Kó’ãva ñe’ẽ pochyeterei peteĩ oimo’ãvanguinte oikuaaha pe kuatiañe’ẽ jegueru rembiporu, pe ñemyesakã oñeme’ẽva jave umívagui ha’énte oñembohasahague ”Tupã don ha pu’aka rupive.” Upévante. Upéva ha’e. Jepeve, pe jepoko oguerekóva Mormón Kuatiañe’ẽ che rekovépe ndaha’éi imilagroso’ỹvéva chéve guarã pe tendy ha yvyku’i ñemoĩgui pe kuimba’e ohecha’ỹva resa ári. Ha’ékuri, chéve g̃uarã, peteĩ ñemo’ã barra, peteĩ tesape ohasa ha oikepáva revelación rehegua, tesape tape aguatava’erãme oúvo ypytũ tatatĩ. Ha umíva oúma katuete, ha katuete oúta gueteri.

Ha pe jehecha ome’ẽva’ekue chéve che Salvador mborayhu ha gracia redentora opavapépe g̃uarã rupi, amboja’o penendive che testimonio, oñembojojáva ko’ápe pe kuimba’e ojehovasaramóva túva ha sy he’i oñehenduva’erãicha ita’ýra ”ijedáma” rupi. Néi, che avei. Ha’e itujaporãma oñepena hag̃uáicha hese, he’i hikuái. Néi, che avei. Mokõi mes-pe ambotýta 85 ary. Che aĩma kuri ñemano rembe’ýpe ha aju jey. Aguatáma umi rréi ha profeta ndive, presidente ha apostol-kuérandi. Iporãvéva, sapy’a ipu’akapa cherehe pe Tupã Espíritu Santo. Ajerovia oñeme’ẽva’erã che testimonio-pe ñema’ẽporãmi jepe.

Ko’ág̃a, hermano ha hermana-kuéra, aju che kuaaporã opa che ánga rehe Jesucristo Tupao Santokuéra Ára Pahapegua ha’eha pe Testamento Pyahu tupao ñemoĩ jey—ha hetave— ndaikatúigui anega pe ñemoĩ jey evidencia. Upe jehasa peteĩha guive, aimo’ã aguerekoha mil—diez mil?—ambueevidencia upe ha’eva’ekue ko ára añeteguaha. Upévare, avy’a ko’ág̃a amoirũvo che angirũ Jerusalén rapekuérape, apuraheiha rupi che ñe’ẽpu kangy reheve:

Jesucristo rérape, amén.