Jesucristo Evanhélio Ojehesarekóva Ogaygua rehe

Pe Jesucristo Tupao Santokuéra Ára Pahapegua doctrina ojehesareko ogaygua rehe. Hekotevẽpýva ñande doctrina ogaygua rehegua ha’e pe templo. Umi ordenánsa upépe ojehupytýva oheja jaha jey ogaygua ijapyra’ỹva ramo ñande Ru Yvagagua rendápe.

Abril 2025-pegua conferencia general-pe, Presidente Russell M. Nelson omomarandúkuri 200 templo pyahu ñemopu’ã. Ha’e ohayhuetéva omomarandu hag̃ua umi templo pyahu opa conferencia general opakuévo, ha opavave javy’áva hendive. Upéicharõ jepe, oĩ rupi heta templo ñembosako’i ha ñemopu’ã guata ñepyrũme, iporã ñamombegue hag̃ua umi templo pyahu ñemomarandu. Upévare, umi Doce Apóstol Kórum ñemoneĩ reheve, noromomarandumo’ãi templo pyahu ko conferencia-pe. Ko’ág̃a rohóta tenonde gotyo rome’ẽvo umi templogua ordenánsa Tupao miembro-kuérape opa yvórape, oikehápe araka’e ha moõpa oñemomarandu umi templo pyahu ñemopu’ã.

Che discurso pehẽ ame’ẽ ramóva ojehaíkuri omano rire ñande Presidente jahayhuetéva Russell M. Nelson. Upe ko’ág̃a oúva ojehai ha oñemoneĩkuri semána mboyve, ha katu omoha’anga gueteri che mbo’epykuéra, Ñandejára rupi oñemoapytu’ũrokýva.

Pe ogaygua ñemomarandu, oñemoherakuãva ojapo 30 ary, omombe’u “ogaygua oñeordenaha Tupã rupive” ha “hekotevẽpyha pe Apohára plan-pe Ita’yrakuéra jehoha ijapyra’ỹvape g̃uarã”. Avei omombe’u “oho mbarete gueteriha hese pe Tupã rembiapoukapy Ita’yrakuérape g̃uarã ombohetave ha omyenyhẽva’erãha ko yvy”. Ha “romomarandu Tupã omandahague umi pu’aka sagrado oñemoheñói hag̃ua ojeiporuva’erãha kuimba’e ha kuña apytépente, omendáva léi rupive ména ha tembireko ramo”. Upérõ Elder Russell M. Nelson ombo’e haguéicha peteĩ audiencia Universidad Brigham Young-peguápe, ogaygua ha’eha “hekotevẽpýva Tupã plan-pe g̃uarã. … Añetehápe, peteĩ propósito oguerekóva pe plan ha’e oexaltávo ogaygua”.

Jesucristo Tupao ojekuaa jepi sapy’ánte peteĩ tupao ojehesarekóva ramo ogaygua rehe. Upeichaite! Ñane relasiõ Tupã ndive ha ñande rekove tekovemanómegua propósito oñemyesakã umi término ogayguápe g̃uarãme. Jesucristo evanhélio ha’e ñande Ru Yvagagua plan Ita’yrakuéra espiritual ñeimeporãrã. Añetehápe ikatu ja’e pe plan evanhelioregua oñembo’e raẽhague ñandéve peteĩ ogaygua ijapyra’ỹva consejo-pe, oñemboguatáva ñande rogaygua tekovemanómegua rupive, ha upe ijehoha oñeha’arõva ha’e toje’exalta Tupã ra’ykuéra umi ogaygua ijapyra’ỹva peve.

Upe contexto doctrinal jepevéramo, oĩ ohapejokóva. Estados Unidos-pe rohasa’asyroína peteĩ mba’e oñembyaíva ñemendapy ha mitã ñemoheñói rehe. Haimete cien ary pukukue javeve oguejy hetakue umi ogapy omyakãva umi pareja omendáva, ha upéicha avei upe ñemoheñói. Umi omendáva ha ñemoheñói ñane miembro-kuéra Tupaopegua apytépe tuicha iporãve, ha katu tuicha oguejy avei. Hekotevẽpy Santokuéra Ára Pahapegua ani okañy chuguikuéra ñeikumby upe propósito oguerekóvagui ñemendapy ha ovaléva mitãnguéra. Upéva ha’e pe tenonderã ñañeha’ãva rehe. “Pe exaltasiõ ha’e peteĩ asunto ogaygua”, ñanembo’e Presidente Nelson. “Jesucristo evanhélio ordenansakuéra salvadora rupive añoite ikatu oje’exalta ogayguakuéra”.

Umi ñemendapy ha mitã ñemoheñói tetãmegua sa’iveha oñentende umi mba’e histórica rupi, ha katu Santokuéra Ára Pahapegua rekorepy ha mba’e ojapóva oñemehorava’erã—ani ojesegi—umi ko’ág̃a ojejapóva.

Chemitãkuimba’épe ojapo 80 ary, aiko che taita ha jarýi granja-pe peteĩ apu’ápe haimete opa mba’e oikóva ára pukukue jave oĩháme ogaygua sãmbyhyguýpe. Ndaiporiva’ekue televisión ni ambue aparato electrónico ohesamboykéva ogaygua umi hembiaporãgui. Upéva rovakerã, ko’ág̃agua sociedad urbana-pe, mbovy miembro ohasa umi actividad jepivegua ojehesarekóva ogaygua rehe. Pe tekove urbana ha transporte ko’ág̃agua, entretenimiento oñemohendáva, ha ñemongeta ipya’etereíva ombohape pya’eve mitãrusukuérape otrata hag̃ua hogakuéra ha’erõguáicha pensión, moõ ohohápe oke ha okaru sapy’apy’a ha katu tuicha sa’ive oĩháme tuvakuéra ñesãmbyhy hembiapokuéra ári.

Tuvakuéra pokatu ikangyve avei upe mba’éichapa hetave umi miembro Tupaopegua ko’ág̃agua ogana oikove hag̃ua. Ára ymave, peteĩva umi pokatu tuichavéva umi ogayguápe ombojoajúva ha’eva’erã jepi ohasa oñeha’ãvo oñondive peteĩ meta komu rapykuéri—ha’évaicha odoma pe naturaleza térã ogana oikove hag̃ua. Pe ogaygua ha’e jepi peteĩ pirapire apopy rendateĩ oñemohenda ha oñemboguatáva. Ko’ág̃a, hetave ogaygua ha’ehína pirapire uha rendateĩ, noikotevẽiva peteĩ ñemohenda ha ogaygua ñepytyvõ ijyvate tuichaitereíva.

Tuvakuéra pokatu oguejyvévo ohóvo, Santokuéra Ára Pahapegua oguereko gueteri hembiaporã Tupã ome’ẽva’ekue ombo’eva’erãha imitanguérape oñembosako’i hag̃ua ñande rogaygua jehohápe g̃uarã ara’apyra’ỹ meve (tojehecha Doctrina ha Konveniokuéra 68:25). Heta ñande apytépe jajapova’erã péva opavave ñande rogaygua ndaha’éiramo ojejepokuaaháicha. Jepoi, ñemano ha jeheja ha’e mba’e añeteguáva. Ahasa upéva rehe che rogaygua akakuaa haguépe.

Che ru omano arekórõguare siete ary, upe mba’ére che ryvy ha che reindy ha che roñemongakuaa peteĩ sy viuda rupive. Umi situasiõ ijetuʼuvévape, haʼe oho hese tenonde. Oĩ ha’eño ha iku´ipa, ha katu Ñandejára pytyvõ reheve, imbo’epy ipu’akapáva Tupao restaurado doctrina oremboguata. Mba’eichaitépa oñemboʼe ojerurévo ñepytyvõ yvágape omongakuaa hag̃ua imembykuéra, ha ojehovasa chupe! Roñemongakuaa peteĩ óga ojevyʼahápe upe ore ru omanómava akóinte ha’eha peteĩ añetegua. Ha’e orembo’e roguerekoha peteĩ túva ha ha’e oguerekoha peteĩ iména ha akóinte ore haʼetaha peteĩ ogaygua omenda rupi hikuái templo-pe. Ore ru iporeʼỹ sapy’amínte Ñandejára ohenói rupi chupe ambue tembiaporãme.

Aikuaa heta ambue ogaygua ndovy’aieteha, ha katu opa sy haʼeñóva ikatu ombo’e peteĩ Túva Yvagagua mborayhu ha umi jehovasa ikatúva ojehupyty templo-pe oñemendáramo. Peẽ avei ikatu pejapo upéva! Túva yvagagua plan omoañete ko ikatukaaitéva oiko opavavépe g̃uarã. Opavave ñande aguyjemeʼẽ templo-pe ñemenda rehe ha umi jehovasa ikatúva oiko ojejesella haguére peteĩ ogaygua ijapyraʼỹva ramo. Che sýicha, igusto oreve rorrecita Lehi ñeʼẽmeʼẽ ita’ýra Jacob-pe Tupã “okonsagrataha nde jeikoʼasykuéra nde reko porãrã” (2 Nefi 2:2). Upéva ojeporu opa ogaygua Santokuéra Ára Pahapegua rehe, oĩmba térã ko’ág̃a oĩmba’ỹva. Ñande ha’e tupaopegua ogaygua.

Ñane doctrina ha jaguejeroviáva ogaygua ijapyra’ỹva rehe ñanemombarete ha ñanembojoaju. Ndacheresaraichéne che sy ladoguigua Taita Harris ñe’eme’ẽ rehe, oremitãme roikorõguare i-granja-pe Payson, Utah ypýpe. Ome’ẽ chéve pe marandu vaiete che ru omanohague Denver, Colorado mombyryetépe. Añani pe koty peve ha añesũ tupa ykére, cherasẽ soróvo. Taita oho che rapykuéri ha oñesũ che ykére ha he’i: “Che ha’éta nde ru.” Upe ñe’ẽme’ẽ kyrỹimi ha’e peteĩ techapyrã ipu’akapáva umi taita ha jarýi ikatúva ojapo omyenyhẽ hag̃ua inandiha umi ogaygua operde térã ndaipóriramo peteĩ upepeguáva.

Sy ha túva, ha’eño térã omendáva—ha ambuéva, umi taita ha jarýicha, máva omyenyhẽva upe tembiaporã mitãnguéra ndive g̃uarã—ha’e umi mbo’ehára tuichavéva. Haʼekuéra omboʼe porãvehahína techapyrã rupive. Ogaygua ryepýpe ha’e upe tenda iporãvéva jahechauka ha jaikuaa hag̃ua umi tekorepy opave´ỹva, ha’évaicha imba’eguasuha pe ñemenda ha mitã jeguereko, pe tekove propósito, ha pe vy’apavẽ osẽ añeteha. Avei ha’e pe tenda iporãvéva jaikuaa hag̃ua ambue mbo’epy tekovepegua hekotevẽpýva, ha’évaicha py’aporã, perdón, jajejoko ñandejupe ha mba’éichapa ovale ñehekombo’e ha tembiapo hekoporãva.

Añetehápe, heta miembro Tupaopegua oreko hogayguapeguakuéra ojehayhúva noñañuáiva umi tekorepy ha ñema’ẽ pe evanheliopegua. Ko’ãichagua miembro oikotevẽ ñane mborayhu ha jejahei’ỹ. Ñañerrelacionávo ojuehe, ñanemandu’ava’erã upe mba’e iporãmbáva jahekáva noñemohu’ãiha umi circunstancia estresante tekovemanóme añónte. Pe mbo’epy guasu Doctrina ha Konveniokuéra 138:57–59 oguerekóva omoañete ñandéve pe arrepentimiento ha jekakuaa espiritual ikatuha oho heseve pe mundo espiritual oúvape tekovemano rire. Imba’eguasuve voi katu, ogayguakuéra oñembojoajúvo oñomombarete hag̃ua, opavave ñanemandu’ava’erã umi angaipa ha mba’e oĩ porãmba’ỹva ojejokokuaa’ỹva opavave jahasáva tekovemanóme ikatuha oñeperdona arrepentimiento rupi oguerúva Jesucristo Expiasiõ glorioso ha salvadora.

Ñande Salvador, Jesucristo ha’e ñande modelo tuichavéva. Jajehovasáta ñambojojáramo ñande rekove umi Imbo’epy ha Hekome’ẽ tee rehe. Jasegi Cristo-pe ha ñañeme’ẽ ojupe servicio-pe ha’e pe pohã iporãvéva pe ha’enteséva ha hekoañosévape g̃uarã ko’ág̃a rupi ha’etévaicha jepiveguaha.

Tuvakuéra oreko avei tembiaporã ombo’eva’erãha imitãnguérape umi kuaapy apokuaa ha’eñóva umi principio evanheliopeguágui. Ogayguakuéra oñembojoaju ojapo jave oñondive umi mbaʼe he’isetéva. Umi yvotyty ogaygua omopu’ã ogaygua relasiõ. Umi ogaygua jehasa ojevy’aveha omombarete ogaygua joaju. Campamento, actividad deportiva ha ambue ñembosarái ovale ko’ýteve oñembojoaju hag̃ua ogayguakuéra. Ogayguakuéra omohendava’erã ogaygua ñembyaty imandu’a hag̃ua ypykuérare, oporogueraháva templo-pe.

Tuvakuéra ombo’eva’erã mitãnguérape umi katupyry tenondegua tekovepegua, umíva apytépe tomba’apo korapy ha ogapýpe. Ojeikuaa opáichagua ñe’ẽ ha’e peteĩ ñembosako’i ideprovéchova servicio misional-rã ha tekove ko’ág̃aguápe g̃uarã. Umi mbo’ehára ko’ã materia-pegua ikatu ha’e tuvakuéra térã taita ha jarýi térã ogayguapeguakuéra ojeipysóva. Ogayguakuéra oñakãrapu’ã oñemoarandúramo peteĩ atýicha ha oñemoñe’ẽvo oñondive opa mba’e oipy’apýva ogaygua ha umi ipypeguápe.

Ikatu oĩ heʼíva: “Ha katu ndoroguerekói tiempo ni peteĩva umi mba’erã.” Ojejuhu hag̃ua tiempo ojapo hag̃ua pe añetehápe ovaléva, heta sy ha túva ojuhúta ikatuha omyandy hogaygua opavave ombogue ramo i-tecnología. Ha tuvakuéra, penemandu’áke, upe oipotáva añetehápe umi mitã osena hag̃ua ha’e upe tiempo penendive.

Tuicha jehovasa ou ogayguakuérape oñembo’éramo oñondive, oñesũvo ​​pyhare ha pyhareve oaguyjeme’ẽ hag̃ua jehovasapy rehe ha oñembo’e umi jepy’apy jepiveguáre. Ogayguakuéra ojehovasa avei otupaitũvo oñondive umi servicio Tupaopeguápe ha ambue devocional atyhápe. Umi ogaygua joaju oñemombarete avei umi ogaygua ñemombe’upy rupive, omoheñóivo ogaygua jepokuaa reko ha tembiasa sagrada ñemoambue oñondive. Presidente Spencer W. Kimball ñanemomandu’a “umi ñemombe’upy oporomoapytu’ũrokýva ñande rekove tee ha ñande ypykuéra rekovépegua … ha’eha tembiporu ipu’akapáva porombo’e hag̃ua.” Umíva ha’e jepi moapytu’ũroky osyryha iporãvéva ñandéve ha ñane ñemoñaréme g̃uarã.

Atestifika Ñandejára Jesucristo-gui, ha’éva Tupã Ra’y Unihénito, ñande Ru Ijapyra’ỹva. Ha’e ñanekombida jasegi hag̃ua pe konvénio rape ogueraháva peteĩ ogaygua ñembyaty yvagapeguápe. Umi pu’aka sellador sacerdocio-pegua, oñemboguatáva umi llave oñemoĩjeyva’ekue rupi Kirtland Templo pe, ombojoaju ogayguakuérape ara’apyra’ỹ meve (tojehecha Doctrina ha Koveniokuéra 110:13–16). Ko’ág̃aite oñemomba’apohína umi Ñandejára templo okakuaávape ko yvóra tuichakue javeve. Péva añete. Jaiko umívaregua ramo, añembo’e, Jesucristo rérape, amén.