Tasy’ỹ Cristo-pe

Ojapo treinta ha mbohapy ary, ahupytyva’ekue che llamamiénto aservi hag̃ua misionero ramo Utah Ogden misión-pe. Añetehápe, aju rupi Europa-gui, umi Utah-pegua jepokuaa ha’éva “gelatina verde zanahoria reheve” ha “papa funeral-pegua” iñambue’imíkuri chéve g̃uarã!

Upevére, chemomýi mbarete heta Santokuéra devosiõ ha discipulado, hetaite tapicha oúva umi Tupao atýpe, ha Tupao-pegua programa-kuéra ñemomba’apopaite tuichakue. Che misiõ opávo, che aipotákuri pe vy’a añanduva’ekue ha pe mbarete espiritual ha tyarõ ahechava’ekue toĩ avei che rogaygua oútavape g̃uarã. Ha’éma chejupe pya’e aju jeytaha aiko hag̃ua che rekove “umi yvyty’i opave’ỹva ãme”.

Upéicharõ jepe, Ñandejára orekókuri ambue plan. Che Domingo peteĩha ógape, che obispo arandu cherenói aservi hag̃ua Presidente de Hombres Jóvenes ramo che barrio-pe. Aservívo ko hombres jóvenes aty rechapyrãitépe, pya’e aikuaa pe vy’a oúva ha’e haguére peteĩ Cristo discípulo sa’i oguerekoha joaju umi Tupao-pegua aty térã programa-kuéra tuichakuére.

Upéicha, amendávo che rembireko porãite, Margaret ndive, vy’ápe ro’e ropytataha Europa-pe ha romongakuaa ore rogaygua ore retã tee Alemania-pe. Oñondivepa jahechákuri Presidente Russell M. Nelson ombo’eva’ekue ojapo heta ary: “Pe vy’apavẽ ñañandúva sa’i oguerekoha joaju umi oikóva ñande rekovepegua ndive ha katu opa mba’e ojoajuha ñande rekove enfóke rehe”. Ñamoma’ẽ memévo ñande rekove Cristo ha Iñevanhélio marandu rehe, ikatúta ñañandu opa tovasapy discipulado rehegua jaikojaikohápe.

Upevére, peteĩ múndo irreligion’ỹ, hasýva, ha hi’apañuaivévape ohóvo, marandu ha mba’ejerure hetaichagua ha py’ỹi ojuehe oñemoĩva reheve, mba’éichapa ikatu ndajahejái ñande resa iñypytũ ha ñane korasõ hatã ha opyta oma’ẽvo Jesucristo evanhélio “mbaʼe resakã ha iporãitereíva” rehe? Apañuái árape, Apóstol Pablo ome’ẽ tuicha ñemoñe’ẽ Santokuéra corinto-guápe omomandu’ávo chupekuéra oma’ẽ hag̃ua “mba’e hasy’ỹva Cristo-pe oĩva” rehe.

Pe Cristo doctrina ha evanhélio léi ndahasyiete ha mitã michĩ jepe ikatu oikũmby umíva. Ikatu jaike Jesucristo pokatu opororredimívape ha jahupyty opa tovasapy espiritual ñande Ru Yvagagua ombosako’iva’ekue ñandéve g̃uarã ñamomba’apóramo jerovia Jesucristo-re, ñañearrepenti, ñañemongarai, ñañemomarangatu Espíritu Santo rupi, ha jagueropu’aka ipahaite peve. Presidente Nelson oñe’ẽva’ekue ko jeguata porãitére peteĩ “konvénio rape” ramo ha peteĩ tape ñanderaháva oiko hag̃ua ñandehegui “Jesucristo discípulo ijeroviarekóva”.

Ndahasyietéramo jepe ko marandu, mba’érepa py’ỹi ñañandu hasyeteha jaiko Cristo léi ha jasegi Hembiecharã? Ikatu oime ñaikũmby vai pe hasy’ỹva ha’éramo peteĩ mba’e ndahasýiva jahupyty hag̃ua ñañeha’ã’ỹre térã jajesareko’ỹre. Cristo-pe jasegi oikotevẽ ñeha’ã mante ha ñemoambue meme. Tekotevẽ “[jaipe’a] ñandejehegui pe yvypóra natural ha … [jaiko peteĩ mitã] michĩvaicha”. Pévape oike ñamoĩ ñande “jerovia Ñandejára rehe” ha jaheja pe hasykue, peteĩ mitã michĩ ojapoháicha. Jaiporúramo Cristo doctrina peteĩ mba’e hasy’ỹva ha ñama’ẽvareicha ñanepytyvõta jajuhu hag̃ua vy’a ñande rekove ko’ẽko’ẽreguápe, omboguatáta umi ñane llamamiénto, ombohováita umi tekovegua porandu hasyvéva, ha ñanemombaretéta ñambohovake hag̃ua umi ñaneñembohovái tuichavéva.

Ha katu mba’éichapa añetehápe ikatu jaiporu ko hasy’ỹngue ñande rekove pukukue je’óipe Cristo remimbo’e ramo? Presidente Nelson ñanemomandu’a ñama’ẽ hag̃ua “añetegua potĩ, doctrina potĩ ha rrevelasiõ ipotĩva” rehe jaheka aja jasegi hag̃ua Salvador-pe. Py’ỹi ñaporandu, “Mba’épa oipota Ñandejára Jesucristo che ajapo?” ohechauka peteĩ ñeisãmbyhy pypuku. Jasegi Hechapyrã ome’ẽ peteĩ tape oñemo’ãpyre pe ojeikuaa’ỹva rupive ha peteĩ po oporohayhúva ha oisãmbyhýva ikatúva jajoko ko’ẽko’ẽre. Ha’e pe Py’aguapy Prínsipe ha pe Ovecha rerekua Mba’eporã. Ha’e ñane Moagapyhyhára ha Jorahára. Ha’e ñande Itaguasu ha Mo’ãha. Ha’e peteĩ Angirũ—pene angirũ ha che angirũ! Ha’e opavavépe ñanekombida jahayhu hag̃ua Tupãme, ñañongatu Hembiapoukapykuéra, ha jahayhu ñande rapichápe.

Jaiporavóramo jasegi Hechapyrã ha ñañemotende jerovia reheve Cristo-pe, ñaañua Iñexpiasiõ pokatu, ha ñanemandu’a ñane konveniokuérare, mborayhu omyanyhẽ ñane korasõ, ta’arõmby ha ñemonguera omopu’ã ñande espíritu, ha pe py’aro ha ñembyasy oñemyengovia aguyjeme’ẽ ha ñeha’arõkuaa reheve ñaha’arõ hag̃ua umi tovasapy oñeñe’ẽme’ẽva’ekue. Sapy’ánte tekotevẽ ñañemomombyry peteĩ mba’e ñanemoĩvaívagui térã jaheka pytyvõ profesional. Ha katu opaite kásope, umi evanhélio principio hasy’ỹva jeiporu ñanepytyvõta ñambohovake umi tekovepegua mba’e hasýva Ñandejára oipotaháicha.

Sapy’ánte ñamomichĩ mbarete jahupytýva mba’apo hasy’ỹvagui ha’évaicha ñembo’e, ajúno, escritura-pe ñemoarandu, ára ha aragua arrepentimiento, Santa Cena je’u opa semana, ha ñetupãitũ py’ỹi Ñandejára rógape. Ha katu jahechakuaa vove natekotevẽiha “jajapo mba’e tuicháva” ha ñama’ẽ jaiporu doctrina potĩ ha hasy’ỹva, ñañepyrũ jahecha mba’éichapa pe evanhélio “techapyrãme omba’apo” ñandéve g̃uarã, jepe umi mba’e hasyvéva pa’ũme. Jajuhu mbarete ha “jeroviapy Tupã renondépe” jahasa jave ñembyasy jepe. Élder M. Russell Ballard ñanemomandu’a heta ára, “Upe hasy’ỹvape [ja]juhúta … py’aguapy, tory, ha vy’apavẽ”.

Jaiporúramo pe tasy’ỹ oĩva Cristo-pe ñamotenonde tapichápe umi mba’e oikova’erãháicha ári ha umi joaju ijapyra’ỹva pe tekopy mbykymíva ári. Ñama’ẽ “umi imba’eguasuvéva” rehe Tupã salvasiõ ha exaltasiõ rembiapópe ñande tapykuerangue umi ñane ministrasiõ apo ñemohendápe. Ñañembovevúi ñamotenonde hag̃ua umi mba’e ikatúva jajapo jajepy’apyrangue umi mba’e ikatu’ỹvare jajapo. Ñandejára ñanemomandu’a: “Upévare, ani penekane’õ tembiapo porã’apópe, pemoĩguipeína peteĩ tembiapo guasu pyenda. Ha umi mbaʼe michĩvagui ou umi tuichavéva”. Ajépa ipu’akapa ñemokyre’ỹ ñamba’e’apo hag̃ua tasy’ỹme ha mirĩme, taha’eha’éva upe jahasáva.

Che jarýi Marta Cziesla ha’ékuri peteĩ tembiecharã hechapyrãva ojapóvo “mbaʼe michĩ ha hasy’ỹvagui” oiko hag̃ua tuicha mba’e. Mborayhúpe rohenói chupe Oma Cziesla. Oma oañua pe evanhélio táva michĩmi Selbongen, Prusia Oriental-pe che jarýi guasu ndive Mayo 30, 1926-pe.

Marta Cziesla (akatúa) ára oñemongarairõguare.

Ha’e ohayhu Ñandejára ha Iñevanhélio ha he’i mbarete oñongatutaha umi konvénio ojapova’ekue. Ary 1930-pe omenda che taita guasu ndive, ndaha’éiva Tupaopegua. Upéramo ndaikatuvéima Oma oho Tupao atyhápe che taita guasu róga mombyryete rupi kongregasiõ ag̃uivévagui. Ha katu ha’e oma’ẽ meme umi ikatúvare ojapo. Oma oñembo’e meme, omoñe’ẽ umi escritura, ha opurahéi umi Sion purahéi.

Oiméne oĩ oimo’ãva ha’e nomomba’apovéimaha ijerovia, ha katu péva oĩ mombyry pe añeteguágui. Che tia ha che ru heñóirõguare, sacerdocio’ỹre hógape ha umi Tupaopegua aty’ỹre térã umi ordenánsa hi’ag̃uívape ojeike, ha’e ojapo jeyjey pe ikatumíva ojapo ha oma’ẽ ombo’évo imembykuérape “oñembo’e hag̃ua, ha oguata joja hag̃ua Ñandejára renondépe”. Ha’e omoñe’ẽ chupekuéra umi escritura, opurahéi hendivekuéra Sion purahéi, ha katuete oñembo’e hendivekuéra—opaite ára. Peteĩ Tupaopegua tembiasa ógape ojejapopáva.

1945-pe che taita guasu oserviva’ekue ñorairõ guasúpe mombyry hógagui. Umi enemigo oñemoag̃uívo ikokue rehe, Oma ojapyhy mokõi imemby michĩva ha oheja hóga ohayhuetéva oheka hag̃ua mo’ãha peteĩ tenda iporãvévape. Peteĩ je’ói hasyetéva ha ikatúva ohundi tekove ohasa rire, ha’ekuéra ipahápe ojuhu mo’ãha Mayo 1945, Alemania norte-pe. Nahembýi chupekuéra mba’eve ndaha’éiva umi ijao oguerekóva ijehekuéra. Ha katu Oma oho meme pe ikatumíva reheve ojapo: oñembo’e imembykuéra ndive—opaite ára. Ha’e opurahéi hendivekuéra Sion purahéi oñongatu porãiteva’ekue ikorasõme—opaite ára.

Hasyeterei pe tekove ha heta ary javeve oma’ẽnte oĩmi hag̃ua tembi’u mesa ári. Ha katu 1955-pe che ru, upérõ orekóva 17 ary, ohókuri escuela de oficio-pe tavaguasu Rendsburg-pe. Oguata peteĩ edificio ykére ha ohecha oka gotyo peteĩ techauka michĩmi he’íva “Kirche Jesu Christi der Heiligen der Letzten Tage”—“Jesucristo Tupao Santokuéra Ára Pahapegua”. Ha’e oimo’ã, “Péva imba’eguasu; kóva che Sy tupao”. Upéi og̃uahẽvo hógape, he’i Oma-pe ojuhuhague itupao.

Ikatúpa peimo’ãvo mba’éichapa oñeñandúra’e haimete 25 ary rire oikuaa’ỹre mba’eve pe Tupaógui. Ha’e he’i mbarete ohotaha Domingo oúva ha oipy’amovã che rúpe oho hag̃ua hendive. Rendsburg opytákuri hetave 20 mílla (32 kilómetro) pe táva michĩ ha’ekuéra oikohágui. Ha katu péva ndojokomo’ãi Oma-pe oho hag̃ua tupaópe. Domingo oúvape, ojupi ibicicleta ári che ru ndive ha oho hikuái tupaópe.

Santa Cena oñepyrũvo, che ru oguapy fila pahaitépe, oha’arõvo pya’ete topa. Péva ha’ékuri Oma tupao ha ndaha’éi imba’e. Upe ohecháva ndaha’éikuri omopokyre’ỹpáva: oĩkuri mbovymi kuña ijedáva ha mokõi mitãkaria’y misonero oisãmbyhy porãitéva opaite mba’e pe atýpe. Ha katu upéi oñepyrũ hikuái opurahéi, ha ha’ekuéra opurahéi Sion purahéi che ru ohenduva’ekue imitãite guive: “¡Oh, está todo bien!”, “Oh mi Padre”, “Loor al Profeta”. Ohendúvo ko ovecha’aty michĩ opurahéi Sion puraheikuéra imitã guive oikuaáva opoko mbarete ikorasõre, ha upepete oikuaákuri ha py’amokõi’ỹre pe Tupao añeteguaha.

Peteĩha reunión sacramental che taita guasu ohohague 25 ary rire ha’ékuri pe aty che ru ohupytyhague peteĩ chupeg̃uaraitéva ñemoañete Jesucristo evanhélio añeteguágui. Mbohapy semána rire ha’e oñemongarai, Setiembre 25, 1955-pe, che taita guasu ha che tia ndive.

Ohasáma 70 ary upe reunión sacramental michĩmigui Rendsburg-pe. Py’ỹinte chemandu’a Oma rehe, mba’éichapa oñeñandúnera’e umi pyhare pukuetépe, ojapóvo umi mba’e michĩ ha hasy’ỹva, ha’éva oñembo’e, omoñe’ẽ, ha opurahéi. Añembo’ývo ko ára conferencia general-pe ha añe’ẽvo che Oma rehe, ipy’apeteĩkue oñongatu hag̃ua ikonveniokuéra ha ijerovia Ñandejárare jepe umi mba’e hasy ohasáva omyenyhẽ che korasõ ñemomirĩ ha aguyjeme’ẽgui—ndaha’éi hese rehe añónte ha katu hetaite ñande Santokuéra hechapyrãva rehe yvóra jerére oma’ẽva tasy’ỹ oĩva rehe Cristo-pe umi mba’e hasyvéva pa’ũme, ikatu ohechávo ko’ág̃a sa’i ñemoambue ha katu ojeroviávo tuicha mba’e oikotaha peteĩ ára tenonderãme.

Añemoarandúkuri che jehasa tee rupive pe evanhélio mba’e michĩ ha hasy’ỹva ha jeroviarekópe ñama’ẽ Cristo rehe ñandegueraha vy’a añetépe, ogueru milagro ipu’akapáva, ha ome’ẽ ñandéve tuicha jeroviapy opa tovasapy oñeñe’ẽme’ẽva’ekue oikotaha. Péva añete peẽme g̃uarã ha’eháicha chéve g̃uarã. Élder Jeffrey R. Holland ñe’ẽme: “Oĩ jehovasa oúva pya’e, oĩ oúva uperiréma, ha oĩ ndoúiva yvágape oñeg̃uahẽ meve; ha katu umi omog̃uahẽvape g̃uarã Jesucristo evanhélio, umíva ou.” Upévare avei che atestifika Jesucristo rérape. Amén