Embojoaju Ne Korasõ Jesucristo rehe: Pe Jopói Marangatu Primaria-gua Purahéi
Umi Primaria-gua purahéi ha’e sermón Jesucristo remimbo’ekuérape g̃uarã, testimonio evanhélio oñemoijeyva’ekue añeteguágui, ha ñembo’e purahéi reheve.
Peteĩ jehovasa che servicio-gui Primaria-pe ha’e che korasõ oikuaahague aporohayhu hag̃ua umi ñe’ẽ che juru noñe’ẽivape. Ajuhúkuri vy’a ajoajúvo Santokuéra ndive purahéi marangaru ñe’ẽ rokompatíva rupive. Ha ko’ýte umi Primaria-gua purahéi hasy’ỹva rupive, pe Espíritu Santo ñe’ẽ ohasákuri ñe’ẽnguéra jokoha ha omyenyhẽ che korasõ Iñe’ẽ mbeguemíme. Mitãnguéra ñe’ẽpúpe, Tupã ha Ita’ýra, Jesucristo mborayhu, oñemomarandu peteĩ añetegua hesakã ha oike pypukúvape.
Ndakakuaáirõ jepe Primaria-pe, Espíritu pya’e cherekombo’e umi ipurahéi marangatukue, ha umívagui oiko che ñetupãitũ tee pehẽ. Umi primaria-gua purahéi omomýi marangatuva’ekue che rekove ha omopu’ã che ánga, chembo’e umi añetegua ijapyra’ỹva, ha chemoag̃ui Salvador ha Iñevanhéliore.
Presidente Dallin H. Oaks peteĩ jey ombo’e “umi himno jepurahéi ha’eha tape iporãvéva jaikuaa hag̃ua evanhélio oñemoĩpyréva doctrina”. Ko’ã ñe’ẽ añetegua opa ñandéve g̃uarã ha katu ko’ýte mitãnguérape g̃uarã. Primaria-gua purahéi ha’e peteĩva Tupã rembiporu kyrỹive oñotỹ hag̃ua testimonio ra’ỹi Salvador remimbo’ekuéra imitãvéva korasõme. Umi sy/túva, líder ha mbo’ehára omongakuaa umi semilla otestifika jave hikuái ha okombida mitãnguérape ome’ẽ itestimónio opa mba’e oikuaávagui hikuái Túva Yvagagua; Ita’ýra, Jesucristo; ha Espíritu Santo rehegua.
Ko’ã che servicio ary pahápe, ahasáva ára apurahéi ha aikuaávo umi Primaria-gua purahéi ajepy’amongetávo mbovy porandu rehe:
-
Mba’éichapa ikatu umi Primaria-gua purahéi imitãme oikuaava’ekuégui oiko pe ñe’ẽ espiritual mitãnguéra oiporúva otestifika hag̃ua hekove pupukue aja?
-
Mba’éichapa evanhélio añetegua jepurahéi oipytvõ mitãnguérape imandu’a hag̃ua Ñandejárare ikonvénio pehẽ ramo ha ombosako’i chupekuéra umi Hi’ordenánsape g̃uarã?
-
Ha mba’éichapa ikatu umi Primaria-gua purahéi oipytvõ tojehai Tupã léi umi temimbo’e imitãvéva korasõme?
Primaria oñepyrurõguare 1878-pe, ipresidenta peteĩha, Aurelia Spencer Rogers, ohechakuaa “jepurahéi tekotevẽha”. Purahéi akói oĩva mitãnguéra evanhélio mbo’epy mbytépe. Primaria-gua purahéigui ikatu oiko peteĩ mitã ñe’ẽ ypy espiritual, umi ipuporãngue ndahasýiva ome’ẽ rupi ñe’ẽpu umi evanhélio añeteguápe. Ko’ã purahéi oreko pu’aka opyta hag̃ua mitãnguéra ndive hekove pukukue javeve, ha’évo hemimbo’ereko pehẽ ha peteĩ tape hasy’ỹva ha oikuaáva rupi otestifika hag̃ua Salvador-gui.
Oñembo’évo Jesucristo Doctrina Purahéi Rupive
Umi purahéi Primaria-gua ikatu avei ha’e ipu’akapáva tembiporu mbo’epy doctrinal rehegua. Oĩ umi purahéi omombe’úva Salvador rekove ha ministerio ñemombe’upy. Ambuéva ombo’e umi Heko rehegua, ha’éva Ijerovia, Iñeha’arõmby, ha Iministério. Ha umi purahéi imarangatuvéva otestifika Iñexpiasiõ ijapyra’ỹvagui ha mborayhu osyrýva upe salvasiõ rehegua mba’e’apógui.
Peteĩ Ñandejára profeta, Presidente Russell M. Nelson, ombo’e: “[Purahéi] ikatu omoĩ peteĩ influénsia porã meme oho mombyryvéva umi ára mitanguéra michĩ ajágui. … [O]reko [pe] pu’aka ome’ẽ hag̃ua tembi’u espiritual. Oreko pu’aka omonguera hag̃ua. Oreko [pe] pu’aka ombohasy’ỹ hag̃ua ñetupãitũ; ha oheja ñandéve jajepy’amongeta hag̃ua [Salvador] Expiasiõre ha evanhélio Ñemoĩjeýre umi iprincipio oporosalváva ha hi’ordenánsa oporoexaltáva reheve. Purahéi ome’ẽ ñandéve pu’aka ja’e hag̃ua akãremiandu ñembo’e ha ñame’ẽ testimonio umi añetegua marangatúgui”.
Sy/túva, líder ha mbo’ehára ramo, ñane ñeha’ãme oike ñaipytyvõ umi mitãme tohupyty ko’ã jehovasa oñeñe’ẽme’ẽpyre kyre’ỹme ñambo’évo umi evanhélio añetegua purahéipe ojejuhúva. Presidente Nelson avei ombo’e “mitãnguéra ikatu oikuaa doctrina oñemoarandu jave hikuái opurahéi hag̃ua oikuaaháicha doctrina peteĩ clase-pe”. Ko’ã purahéi ikatu ome’ẽ peteĩ sermón ñongatupyre henyhẽva jeroviágui omboguatáva mitãnguérape Salvador gotyo ha oipytyvõ chupekuéra omongakuaa marangatupy Iñevanhélio rehe.
Escritura-kuéra ombo’e umi hekojojáva purahéi oúva korasõgui ha’eha tory Salvador-pe g̃uarã. Ikatúnte aimo’ã pe tory oguerúva umi Salvador remimbo’e imitãvéva ñe’ẽpu. Aikuaa iñembo’e purahéi ohupytyha yvága jerovia rechauka ramo okombidáva Espíritu Santo omoañete hag̃ua umi ijapyra’ỹva añetegua ha okombida ambue tapichakuérape mbeguekatu ha kyrỹime omboaje hag̃ua Salvador ñehenói osegi hag̃ua Chupe ha ou ógape. Elder Henry B. Eyring ñanemomandu’aháicha, ha’e ko’ã ára mbykýpe ñañandúvo pe Espíritu jarekoha jeikuaaporã Salvador Expiasiõ omba’apoha ñande rekovépe.
Oñemoha’ãngávo Añetegua Korasõme
Primaria-gua purahéi ikatu peteĩ milagro oikóva discipulado rape pukukue javeve ñane mitãnguéra oguatátava. Peteĩ purahéi jaikuaáva jarekóvo séi ary oreko pu’aka opyta hag̃ua ñanendive—ha ikatu ou jey hetaite ary rire umi jeiporavo, jepy’ara’ã, vy’a’ỹ, térã vy’a ára mbykýpe. Ikatu ñande ára pahakuévo, pe “Asegíta Tupã Plan” ñe’ẽgui toiko peteĩ ancla espiritual ombopúva Apóstol Pablo testimonio Tupã ñe’ẽme’ẽ ikatueteha ñandéve g̃uarã. Térã ikatu ñanemomandu’a Tupã okumpli rupi Iñe’ẽme’ẽ, Ikonveniokuéra oikuave’ẽha peteĩ angapyhy mbarete ha peteĩ ñemo’ãha renda ha ñanekombida ñamoĩ hag̃ua ñane ra’arõmby ha jeroviapy ñemova’ỹme Jesucristo-pe ha Ipokatu expiatóriope.
Miembro-kuéra kakuaa opa yvoragua, umi ára ijetu’úvape, py’ỹi imandu’a ha ojere Primaria-gua puhareikuéra gotyo oikuaava’ekue imitãrõguare. Heta tapichápe g̃uarã, ko’ã purahéi oipytyvõ ijerovia ypy ñemopu’ã Jesucristo-pe ha py’ỹi ha’ékuri tenda peteĩha Iñevanhéliope konversiõ oñepyrũhague. Umi sy/túva, líder ha mbo’eharakuéra omongakuaákuri pe jerovia ary pukukue javeve ombo’évo, opurahéivo ha otestifikávo mitãnguérape jesarekópe.
Peteĩ hermana okomparti chendive ohayhueteha Primaria purahéi, ha 20 ary rire he’i, upéva ha’ehague pe ombopya’éva ikonversiõ meme Jesucristo evanhéliope. Ambue miembro otestifika Primaria oñotỹhague peteĩ jerovia rehegua mostaza ra’ỹi ha’e imitarõguare ha upéva rupi ikatuhague oujey Ñandejára Tupaópe orekópe 30 ary. Salvador oñe’ẽme’ẽ, “Pe Moangapyhyhára …. penembo’éta opaite mba’e, ha penemomandu’áta opaite mba’e”. Primaria purahéi ikatu ha’e mba’éicha oñekumpli upe ñe’ẽme’ẽ.
Ambue Primaria purahéi ahayhúva ojapyhy pe jerovia ndahasýiva ha testimonio hi’aréva pu’aka:
Mitãnguéra opurahéi jave, ha’ekuéra ohechauka ha’eseha peteĩ temimbo’e ha oñemoarandu konvéniope jeiko rechaukarãme. Pe Espíritu ikatu oiporu purahéi ohai hag̃ua umi añetegua ijapyra’ỹva ikorasõ kyrýime. Ha ára ohasávo, umi mitã ikatu oiporavo ombojoaju ha ombojere hag̃ua ikorasõ ha hekove Jesucristo rehe ojapo ha oñongatúvo konveniokuéra marangatu Hendive.
Ñanemandu’ávo Ñande Konveniokuéra ha Ñañembosako’ívo Ordenansakuérarã
Purahéi marangatu ikatu oipytyvõ tojehai Cristo doctrina ñane ángape ha ñanembosako’i jahupyty hag̃ua Iñordenansakuéra. Ombojoaju Salvador doctrina ñane mandu’a rehe ha upe mandu’a ñande discipulado rehe Hendive.
Primaria-gua líder ramo, jareko jehupytyrã ha marangatúpe ho’a ñande ári ñambojerovia hag̃ua toñembo’e Primaria-gua purahéi vy’ápe, doctrina ñeikũmby ha Espíritu reheve. Pévape oike ñakombida mitãnguérape tojapysaka mba’épa oñandu hikuái opurahéi aja ha ñaipytyvõ chupekuéra tohechakuaa umi temiandu ouha Espíritu Santo-gui. Ko’ã ñeha’ã oipytyvõ ombosako’i ñane mitãnguérape umi ordenánsa marangaturã, ha’éva ñemongarai ha konfirmasiõ, upéicha avei omokyre’ỹ ikonvéniore mandu’a py’ỹi ombopyahúvo hikuái umi iñe’ẽme’ẽ Tupãme.
Séna Pahápe, Salvador omoĩ rire Santa Cena, Mateo ohai “opuraheipa rire, osẽ ha oho hikuái Olívo yvytýpe”. Opaite semana, miembro-kuéra oñemongarai ha oñekonfirmava’ekue Ñandejára Tupao oñemoijeypyrévape, oikehápe mitãnguéra oñemongaraíva orekópe ocho ary, oñembosako’i ho’u hag̃ua Ñandejára sacramento. Purahéi marangatu jepurahéi rupive, Tupã ra’ykuéra atýpe ija ombosako’i hag̃ua ikorasõ upe ordenánsa marangaturã omoĩ hag̃ua ijehe Héra, tapiaite imanduʼa hag̃ua Hese, ha oñongatu hag̃ua Hembiapoukapykuéra.
Testimónio Oñembotykuévo
Angirũnguéra ahayhúva, atestifika umi Primaria-gua purahéi ombo’eha añetegua ijapyra’ỹva ha dcotrina ñanemboguatáva Jesucristo ha Iñevanhéliope. Pokombida pema’ẽmi hag̃ua mba’e añetegua imba’eguasúvapa ojehaíra’e pene korasõme ko’ã purahéi hasy’ỹva ombo’epy rupi ha petestifika hag̃ua umi añeteguágui Salvador remimbo’ekuéra imitãvévape pembo’e jave chupekuéra evanhélio marandu porã umi purahéi rupive.
Che aikuaa Tupã ñande Ru, Imborayhu opa’ỹvape, ombouhague yvy ári Ita’ýra Ohayhuetéva ñanembo’e hag̃ua, ohechauka hag̃ua ñandéve pe tape, ha ñanerredimi hag̃ua Inexpiasiõ rupive.
Aikuaa Salvador rekove ha ministério añetegua ha peteĩteĩme g̃uarãiteha. Umi escritura henyhẽ Iñemonguera ñemombe’upy, Ipy’aporã, ha Imilagrokuéragui.
Aikuaa Túva Yvagagua ohendu ha ombohovaiha Ita’yrakuéra ñembo’e añete, taha’eha’e ijeda, mba’éicha oiko térã iñe’ẽ. Ha’e ohendu umi ñane korasõ jerure’asy kirirĩmegua.
Atestifika Getsemaní-pe, Jesucristo ogueropu’akahague umi ñane angaipa, ñane ñembyasy, ha ñane mba’erasy pohyikue. Ha’e ohasa’asy péicha oipotágui Imborayhu rupi ñanderehe ha ojapo ikatu hag̃uáicha ñañeperdona ha jahajey ógape.
Aikuaa ñande ha’eha Tupã ra’ykuéra tee, ojejapóva Ha’angáicha, oñeme’ẽvape katupyry divino, ha oñekombidáva jaha jey hag̃ua jaiko Hendive jaiporavóramo jasegi Jesucristo-pe.
Aikuaa Jesucristo ha’eha ñane rembiecharã hekoporãmbáva, ha jasegíramo Chupe jaservi, ñaperdona, ha jahayhúvo ambue tapichápe, Ha’eichavéta ñande ára ha ára.
Ha aikuaa umi Ñandejára templo sagrado ha’eha Hóga ko’ápe yvy ape ári. Umíva ryepýpe, jajapo konveniokuéra, jahupyty jehovasa ijapyra’ỹva, ha jaikuaave Hesegua ha ñañanduve Iñeime. Pe templo peteĩ ñemoarandu, py’aguapy, ha ñembosako’i renda ñande rekovépe g̃uarã.
Atestifika umi ñeha’ã jajapóva ñambo’e ha japurahéi hag̃ua ko’ã Primaria purahéi ñane mitãnguérape ndaha’eiha peteĩ pehẽ porãnte ñande religión jepokuaapegua. Umíva ha’e mbo’epy Jesucristo remimbo’ekuérape g̃uarã, testimonio evanhélio oñemoĩjeyva’ekue añeteguágui, ha ñembo’e purahéi. Pe purahéi marangatu ikatu ombojajái Cristo resape umi ohendúvape ha oñohẽ pe opurahéiva korasõme. Angirunguéra ahayhúva, Jesús ñandepota gueteri peteĩ kuarahy jajairã. Péicha atestifika, Jesucristo réra marangatúpe. Amén