Ñamoĩvo Jesucristo Réra Ñandejehe

Ary 2018-pe, Universidad de Utah-pe, ojejapo peteĩ cátedra especial hérava “Doctor Russell M. Nelson ha Dantzel W. Nelson Cátedra Presidencial Cirugía Cardiotorácica-pe”—cardio he’iséva “korasõ”, ha torácico he’iséva “pyti’a”. Omomba’eguasu Presidente Nelson rembiapo mba’eguasuete cirujano korasõme g̃uarã ramo ha pe pytyvõ ohupytývakue hembireko amyrỹigui, Dantzel. Ko cátedra ojehepyme’ẽ peteĩ fondo ojejapóvagui hi’are hag̃uáicha tenonderãme g̃uarã. Pe tapicha ojeporavóva ko’ãichagua cátedra prestigioso-pe g̃uarã ohupyty jehechakuaa, ñepytyvõ salarial ha fondo investigación-rã.

Cirujano ypy ojeporavova’ekue oñemohenda hag̃ua upe cátedra-pe ha’e Doctor Craig H. Selzman, peteĩ cirujano korasõme g̃uarã katupyry ndaha’éiva ñande tupaogua. Pe ceremonia oñeme’ẽrõguare ko cátedra Doctor Selzman-pe, heta invitado importante oĩkuri upépe, ijapytépe Presidente Nelson ha hembireko Hermana Wendy W. Nelson. Pe aty oiko aja, Presidente Nelson oñe’ẽ ojejapo’ỹre upe icarrera quirúrgica pionera rehe.

Upéi Doctor Selzman omombe’u mba’épa he’ise ichupe g̃uarã oñehenóivo ko cátedra-pe g̃uarã. Haʼe omombeʼu irundy ára upe mboyve, ohasa rire peteĩ ára pukuete pe operación kotýpe, ojuhuhague peteĩva umi hasýva oikotevẽha ojeopera jey. Ha’e ikane’õ ha oñedesilusionáma, oikuaágui ohasava’erãha ambue pyhare hospital-pe.

Ko ka’aru, Doctor Selzman oguereko peteĩ ñomongeta ijehe omoambuéva hekove. Upe javete, ipy’aho: “Pe viernes, añehenóita peteĩ cátedra-pe hérava Doctor Nelson. Ha´e ojekuaa tapiaite peteĩ tapicha ojokóva ramo hemiandu, otratáva opavavépe ñemomorã reheve, ha araka’eve ndohejáiva ipochykue ipu’aka hese. Koʼág̃a upe che réra ojoajútamavo imbaʼe rehe, tekotevẽ añehaʼã ajoguave ichupe.” Doctor Selzman ha’émava’ekue peteĩ cirujano ohechakuaaitereímava. Ha katu haʼe omehoraseve.

Ymave, ijequipo quirúrgico ikatúneraka’e oikuaa ikane’õ ha ipo’a’ỹha ohejágui ojehechauka upe heko ha oñe’ẽ lája rehe. Ha katu upe pyhare pe operación kotýpe, Doctor Selzman oñeha’ã hesãimeporã ome´ẽvo ñeipytyvõ poravopy ha ohechakuaa upe ijequípope. Oñandu ojapoha peteĩ mba’e iñambuéva ha oiporavo osegi oñeha’ã ojoguavévo Doctor Nelson-pe.

Cinco ary rire, Presidente Nelson ome’ẽkuri ijeheka jejuhu kuatia profesional Universidad de Utah-pe. Umi ruvicha universidad-gua ou oaguyjeme’ẽvo hekopete Presidente Nelson-pe. Ko evento aja, Doctor Selzman oñe’ẽ jey. Oñe’ẽvo Presidente Nelson inicial rehe, RMN, he’i: “Oĩ peteĩ espíritu ‘RMN’ ko’ág̃a omyanyhẽva pe División de Cirugía Cardiotorácica Universidad de Utah-pe”.

Umi situación po’a’ỹme, Doctor Selzman omyesakã: “Ajapo pe ko’ág̃a rombo’éva ore remimbo’ekuérape ojapo hag̃ua—tojehesareko, togueropu’aka ha tojapo iporãvéva ikatumiháicha. Ko espíritu oiko ñandepype ko’ẽko’ẽvére. Rome’ẽ umi pin aóre g̃uarã opavave miembro división-guápe ha peteĩteĩ umi oñemoarandu pyahúvape Pe pin guýpe oĩ umi tai ‘RMN.’ Pe espíritu RMN ikotevẽpy ore capacitación-pe g̃uarã; rombo’e opavavépe”. Doctor Selzman omoambue upe heko ha umi hembipota mboyveguáva ojaposetégui héra ko’ág̃a oñembojoajúmagui Presidente Nelson réra ndive.

Koã jehu aty oikehápe Doctor Selzman chemoĩ amba’eporandumi: “Mba’éichapa cheambue ambojoaju guive che réra Jesucristo réra ndive? Amoguahẽmapa peteĩ espíritu Cristiano ojejuhupyréva ramo? Añeha’ãpa añetehápe ajoguavévo Ichupe?”

Pe Doctor Selzman ohasava’ekuére, ikatu jahecha peteĩ cinco ñembojojaha rupi upe ñemboguata jajapyhyha rupive ñandejehe Jesucristo réra. Upe ñemboguata oñepyrũramo jepe ñemongarai reheve, nahenyhẽmbái ñane potĩ ha ñanemarangatuve peve ha jajoguavévo Ichupe.

Ñembojojaha peteĩha ha’e máva rehe ñembojoja. Doctor Selzman ñehenói upe cátedra Nelson-pe g̃uarã ramo ombojoaju héra Presidente Nelson ndive, ha Doctor Selzman oñepyrũ oñembojoja Presidente Nelson ndive. Jajapyhývo ñandejehe Jesucristo réra, ñambojoaju ñande réra Héra ndive. Ñañembojoja Hendive. Vyʼápe jajekuaauka cristiano ramo. Jahechakuaa pe Salvador-pe ha ñañembo’y mba’eve ñambyasy’ỹre jajeipapa hag̃uáicha Imba’éva ramo.

Ojoaju porãitéva máva rehe ñañembojoja ndive oĩ ambue ñembojojaha—upe mandu’apy. Pe Doctor Selzman oike jave iñofisína-pe, hesaho katuete pe medallón ohupytýva rehe oñehenóirõguare upe cátedra Nelson-pe. Ko medallón ogueromandu’a ichupe ko’ẽko’ẽvére pe espíritu RMN rehe. Ñandéve g̃uarã, japarticipávo pe Santa Cena opaite semana jave ñanepytyvõ ñanemandu’a hag̃ua Jesucristo rehe semana pukukue javeve. Japarticipávo pe Santa Cena, jajapo upéva ñanemandu’ávo pe precio Ha’e ohepyme’ẽva’ekue rehe ñanerredimi hag̃ua. Jajapo peteĩ konvénio pyahu ñanemandu’ataha Hese, jahechakuaataha Hekoguasu ha ñamomba’eguasutaha Imba’eporã. Jahechakuaa jeyjey Igrásiape ha rupive añoite jajesalvaha pe ñemano tetepegua ha espiritual-gui.

Pe mandu’apy he’ise jajapoha umi ñemoñe’ẽ ome’ẽva’ekue Alma upe proféta Mormón Kuatiañe’ẽmegua. “Jaheja opa [ñane] rembiapo taha’e Ñandejárape, ha opa tenda [jahahápe, jaheja] taha’e Ñandejárape; … [jaheja] opa [ñane] remiandu toho Ñandejára gotyo; … ha jaheja [ñane] korasõ mborayhukuéra toĩ Ñandejára ndive tapiate peve”. Ñanerembiapóramo jepe ambue mba’épe, jareko meme ñane akãme Ichupe, ñanemandu’aháicha ñande réra tee rehe, taha’eha’éva mba’e ambue rehepa jajehesarekojáina.

Peteĩ mba’e osẽva ñanemandu’ávo pe Salvador ojapova’ekuére ñanderehe ha’e peteĩ mbohapyha ñembojojaha—mávape ñamoha’ã. Doctor Selzman oñepyrũ omoha’ãvo Presidente Nelson ojapóva ha upe espíritu RMN. Che arovia Presidente Nelson espíritu ha’eha peteĩ ohechaukánteva Jesucristo discípulo hekove pukukue javeve. Ñandéve g̃uarã, ñañembojojavévo Jesucristo ndive ha jagueromandu’a ichupe, jaikoseve Ha’éicha. Idiscipulo-kuéraicha, ñaneambue iporãvépe g̃uarã jajehesarekóvo Hese, hetave jajehesarekóvagui ñandejehe. Ñañeha’ã jaiko Ha’éicha ha jaheka jajehovasa umi atributo Ha’e orekóva reheve. Roñembo’e kyre’ỹme ñanerenyhẽ hag̃ua karidágui, upe Cristo mborayhu potĩ.

Presidente Nelson abril-pe ombo’e haguéicha: “Karidágui oikóramo ñande reko tapiagua, ojeíta ñandehegui impulso japoro’apo’i hag̃ua. Ndajahusgamo’ãvéima ambuekuérape. Jarekóta karida opaichagua tekovépe g̃uarã. Karida opa yvyporakuérare tekotevẽterei jakakuaa hag̃ua. Karida ha’e peteĩ py’aporã rekopy pyenda”. Karida ykére avei, jaheka,ñañemitỹ, … jaipuru ha ñambotuichave” ambue don espiritual Salvador-gui oúva, umíva apytépe virtu, tekopeteĩ, ñeha’arõkuaa, tekomirĩ ha jehesareko.

Ñamoha’ãvo Jesucristo ñandegueraha irundyha ñembojojahápe—Ñañembohysýi Ipropósito-kuéra ndive. Ñañemoirũ Hendive Hembiapópe. Peteĩ cirujano ramo, Doctor Nelson-pe ojekuaáva mbo’ehára, pohanohára ha investigador ramo. Pe pin aóre g̃uarã oiporúva Doctor Selzman división omomba’eguasu ko’ã ñeha’ã, oguerekóva ko’ã ñe’ẽ mbo’e, ñemonguera ha jejuhu. Ñandéve g̃uarã, jajapyhy ñandejehe Jesucristo réra apytépe oike jajapose, jaipota ha kyre’ỹme ñañembohysýi umi ñane meta Imba’éva ndive. Ñañemoirũ Hendive Hembiapópe “jahayhu, ñamboja’o ha ñakombida jave”. Ñañemoirũ Hendive Hembiapópe ñaministra jave ambue tapichápe, ko’ýte umi ikangyvéva ha umi ojepy’akutúvape, umi oñembyai térã ojejopýva tekove jehasa rupive.

Jajapyhypaite ñandejehe Jesucristo réra máva rehe ñembojoja, mandu’apy, ñemoha’ã ha ñembohysýi rupive. Jajapóvo ko’ã irundy ñandegueraha peteĩ quinto-ha ñembojojahápe—pu’akapyreko. Jahupyty Tupã pu’aka ha jehovasapy ñande rekovépe. Pe cátedra Nelson ome’ẽ Doctor Selzman-pe jehechakuaapy ha omoĩru umi fondo rehe ojeiporúva oñemoambue hag̃ua upe cultura idivisión-pe. Haʼe oipuru ko “pu’akapy investidura” oipytyvõ hag̃ua ambuépe. Upéicha avei, jajapyhývo ñandejehe pe Salvador réra, ñande Ru Yvagagua ñanderovasa Ipu’aka reheve ñanepytyvõ hag̃uáicha ñakumpli ñane misión rehe tekomanokuaa javeve.

Jajapóvo konvénio mive Tupã ndive, ñamoĩmbaite ñandejehe Jesucristo réra. Upéicha rupi, Tupã ñanderovasa hetave Ipokatu reheve. Presidente Nelson ombo’e haguéicha: “Opavave tapicha ojapóva konvénio umi pila ñemongarai rehegua ha templo-pe—ha oñongatu umíva—ohupytykuaaiteve Jesucristo pu’akapy … ”Jehepyme’ẽ ñañongatu haguére umi konvénio Tupã ndive ha’e pu’aka yvagagua … pu’aka ñanemombaretéva jarresisti porãve hag̃ua ñande pruéva, jeipy’ara’ã ha ñembyasykuéra”.

Ñamog̃uahẽ porãkuaave espiritualmente. Ñande py’aguasuve ñambohovake hag̃ua umi circunstancia ha’etévaicha ikatukuaa’ỹva. Ñañemombareteve ñande jeiporavópe jasegitaha Jesucristo-pe. Pya’eve ñañearrepenti ha jajevy Hendápe jajavy jave. Ñañembokatupyryve ñakomparti hag̃ua Iñevanhélio Ipu’aka ha autorida reheve. Ñaipytyvõ umi oikotevẽvape sa’ive jahusgáramo, tuicha sa’ive jahusgáramo. Ñambopyta ñanendive ñande angaipa remisión. Jaguereko tuichave py’aguapy, ha javy’ave ikatúgui akóinte javy’a. Iglória ojeréta ñanderehe, ha umi Hi’ánhel oñangarekóta ñanderehe.

Pe Salvador ñanekombida: “Peju Túva rendápe che rérape, ha hi’árape pehupyty hag̃ua iplenitúgui”. Ajerure peẽme pejapo hag̃ua kóva. Peju ñande Ru Yvagagua rendápe. Pemoĩ Jesucristo réra pendejehe. Peñembojoja Hendive. Akóinte penemandu’áke Hese. Peñeha’ã peiko Ha’éicha. Pejoaju Hendive Hembiapópe. Pehupyty Ipu’aka ha jehovasapy pende rekovépe. Pehai Héra pene korasõme, pejaposégui ha peipotágui. Kóva “penemoñembo’y” Tupã renondépe ha penemoĩporã pe Salvador omo’ã hag̃uáicha pende rehehápe. Oikóta pendehegui peteĩ jehejapyre rupytyha yvate ñande Ru Yvagagua rréinope, jehejapyre rupytyha oñondive Ita’ýra Ypykue ndive, ñande Salvador ha Redentor jahayhuetéva.

Ha’e oikove. Che aikuaa porãiterei upéva. Ha’e penderayhu. Ha’e ome’ẽ hekove penderehehápe. Ha’e ojerure’asy peẽme peju hag̃ua Túva rendápe Ha’e rupive. Jesucristo rérape, amén.