ຄວາມໃຈບຸນ—ສັນຍານຂອງການເປັນສານຸສິດທີ່ແທ້ຈິງ
ຈຸດໝາຍປາຍທາງທີ່ແທ້ຈິງຂອງການເປັນສານຸສິດຄືການກາຍເປັນເໝືອນດັ່ງທີ່ພຣະເຢຊູຄຣິດເປັນຢູ່ແທ້ໆ.
ປະທານຣະໂຊ ເອັມ ແນວສັນ ເມື່ອບໍ່ດົນມານີ້ໄດ້ເຊື້ອເຊີນເຮົາໃຫ້ “ເຮັດໃຫ້ການເປັນສານຸສິດຂອງເຮົາມີຄວາມສຳຄັນອັນດັບສູງສຸດ.” ຄຳເຊື້ອເຊີນທີ່ມີພະລັງນັ້ນໄດ້ດົນໃຈຂ້າພະເຈົ້າໃຫ້ໄຕ່ຕອງຢ່າງເລິກເຊິ່ງກ່ຽວກັບການເປັນສານຸສິດຂອງພຣະເຢຊູຄຣິດເປັນການສ່ວນຕົວຂອງຂ້າພະເຈົ້າ.
ການເປັນສານຸສິດແມ່ນຮອບຄອບຖີ່ຖ້ວນ
ສານຸສິດຄືຜູ້ຕິດຕາມ ຫລື ລູກສິດຂອງອີກຄົນ. ສານຸສິດຄື “ຜູ້ຝຶກງານ” ທີ່ອຸທິດຊີວິດຂອງຕົນເພື່ອຈະກາຍເປັນເໝືອນຄູສອນຂອງເຂົາເຈົ້າ. ດັ່ງນັ້ນ, ການເປັນສານຸສິດຂອງພຣະເຢຊູຄຣິດ ມີຄວາມໝາຍຫລາຍກວ່າການເຊື່ອການສັ່ງສອນ ແລະ ຄຳສອນຂອງພຣະອົງ. ມັນມີຄວາມໝາຍແມ່ນແຕ່ຫລາຍກວ່າການຮັບຮູ້ຄວາມສູງສົ່ງຂອງພຣະອົງ ແລະ ການຍອມຮັບພຣະອົງໃນຖານະພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ, ຊຶ່ງສິ່ງນັ້ນມີຄວາມສຳຄັນຢ່າງຍິ່ງ.
ປະທານດາລິນ ເອັຈ ໂອກສ໌ ໄດ້ອະທິບາຍວ່າ: “ການຕິດຕາມພຣະຄຣິດບໍ່ແມ່ນການປະຕິບັດແບບທຳມະດາ ຫລື ເປັນບາງຄັ້ງບາງຄາວ. ມັນເປັນຄວາມມຸ່ງໝັ້ນຢ່າງຕໍ່ເນື່ອງ ແລະ ເປັນວິຖີຊີວິດທີ່ຄວນນຳພາເຮົາຕະຫລອດເວລາ ແລະ ໃນທຸກບ່ອນ.” ການເປັນສານຸສິດຄືການເດີນທາງທີ່ຮອບຄອບຖີ່ຖ້ວນ ທີ່ເຮົາເດີນໄປເພື່ອຈະໄດ້ຮັບການປ່ຽນແປງຜ່ານທາງການເສຍສະລະຊົດໃຊ້ຂອງພຣະຜູ້ເປັນເຈົ້າ ແລະ ອຳນາດທີ່ເຮັດໃຫ້ເປັນໄປໄດ້ຂອງພຣະອົງ. ຈຸດໝາຍປາຍທາງທີ່ແທ້ຈິງຂອງການເປັນສານຸສິດຄືການກາຍເປັນເໝືອນດັ່ງທີ່ພຣະເຢຊູຄຣິດເປັນຢູ່ແທ້ໆ—ຈົນເຖິງຈຸດທີ່ເຮົາໄດ້ຮັບ “ເງົາຂອງພຣະອົງໄວ້ໃນໃບໜ້າ [ຂອງເຮົາ].”
ເພື່ອຈະເປັນສານຸສິດຂອງພຣະຜູ້ເປັນເຈົ້າ, ເຮົາຕ້ອງຮຽນແບບຄວາມຄິດ ແລະ ການກະທຳຂອງພຣະອົງຢ່າງຕັ້ງໃຈທຸກໆວັນ—ຍົກຕົວຢ່າງ, ການເຊື່ອຟັງ, ຄວາມຖ່ອມຕົວ, ແລະ ຄວາມອົດທົນຂອງພຣະອົງ. ຂະນະທີ່ເຮົາຄ່ອຍໆລວມເອົາຄຸນສົມບັດເຫລົ່ານີ້ເຂົ້າມາໃນເອກະລັກຂອງເຮົາເອງ, ເຮົາກໍກາຍເປັນຜູ້ “ຮັບສ່ວນໃນສະພາບ [ຂອງພຣະອົງ].” ການເຮັດຕາມແບບຢ່າງຂອງບຸກຄະລິກລັກສະນະຂອງພຣະຜູ້ຊ່ວຍໃຫ້ລອດນີ້ຄືຈຸດທີ່ສຳຄັນທີ່ສຸດໃນການນະມັດສະການພຣະອົງ. ດັ່ງທີ່ປະທານແນວສັນໄດ້ສິດສອນວ່າ, “ຄວາມຮັກຂອງເຮົາທີ່ມີຕໍ່ພຣະເຢຊູແມ່ນສະແດງອອກຢ່າງດີທີ່ສຸດໂດຍການທີ່ເຮົາເຮັດຕາມແບບຢ່າງຂອງພຣະເຢຊູ.”
ສັນຍານຂອງການເປັນສານຸສິດທີ່ແທ້ຈິງ
ໃນຈຳນວນຄຸນລັກສະນະອັນສູງສົ່ງຢ່າງຫລວງຫລາຍຂອງພຣະເຢຊູຄຣິດທີ່ເຮົາຕ້ອງເຮັດຕາມ, ຢ່າງໜຶ່ງແມ່ນສຳຄັນເໜືອທຸກຢ່າງ ແລະ ປະກອບດ້ວຍຢ່າງອື່ນໆທັງໝົດ. ຄຸນລັກສະນະນັ້ນຄືຄວາມຮັກອັນບໍລິສຸດຂອງພຣະອົງ, ຫລື ຄວາມໃຈບຸນ. ທັງສາດສະດາມໍມອນ ແລະ ອັກຄະສາວົກໂປໂລເຕືອນໃຈເຮົາວ່າ ປາດສະຈາກຄວາມໃຈບຸນ, “[ເຮົາ] ກໍບໍ່ມີຄ່າອັນໃດເລີຍ.” ຫລື, ດັ່ງທີ່ຖືກເປີດເຜີຍຕໍ່ສາດສະດາໂຈເຊັບ ສະມິດ ວ່າ, ປາດສະຈາກ “ຄວາມໃຈບຸນ, [ເຮົາ] ຈະ ເຮັດ ຫຍັງບໍ່ໄດ້ເລີຍ.”
ພຣະຜູ້ຊ່ວຍໃຫ້ລອດເອງ ໄດ້ລະບຸຄວາມຮັກວ່າເປັນເຄື່ອງໝາຍ ຫລື ສັນຍານ ຊຶ່ງໂດຍທາງນີ້ ສານຸສິດທີ່ແທ້ຈິງຂອງພຣະອົງຈະເປັນທີ່ຮັບຮູ້ເມື່ອພຣະອົງໄດ້ປະກາດວ່າ:
“ເຮົາມອບກົດບັນຍັດຂໍ້ໃໝ່ໃຫ້ພວກເຈົ້າຄື, ຈົ່ງຮັກຊຶ່ງກັນແລະກັນ; ເຮົາຮັກພວກເຈົ້າຢ່າງໃດ, ພວກເຈົ້າກໍຈົ່ງຮັກຊຶ່ງກັນແລະກັນຢ່າງນັ້ນ.
“ຖ້າພວກເຈົ້າຮັກຊຶ່ງກັນແລະກັນ, ທຸກຄົນກໍຈະຮູ້ວ່າພວກເຈົ້າເປັນສາວົກຂອງເຮົາ.”
ຄວາມໃຈບຸນເປັນແນວຄິດທີ່ມີຄວາມໝາຍ ທີ່ໃຫ້ນິຍາມໄດ້ຍາກ ແຕ່ຮັບຮູ້ໄດ້ງ່າຍໂດຍທຸກຄົນທີ່ມັນໄດ້ສຳຜັດ. ປຶ້ມ ຈົ່ງສັ່ງສອນພຣະກິດຕິຄຸນຂອງເຮົາ ສິດສອນວ່າ “ຄວາມໃຈບຸນ, ເຊັ່ນດຽວກັບສັດທາ, ນຳໄປສູ່ການກະທຳ.” ແທ້ຈິງແລ້ວ, ຄວາມໃຈບຸນອາດຖືກບັນຍາຍວ່າ “ຄວາມຮັກທີ່ກະທຳຢູ່.” ຄຳບັນຍາຍນີ້ໃຫ້ຄວາມຮູ້ແຈ້ງອັນສຳຄັນເຂົ້າສູ່ຂໍ້ສະຫລຸບການຖະແຫລງເຖິງພຣະຊົນຊີບຂອງພຣະຜູ້ຊ່ວຍໃຫ້ລອດ—ພຣະອົງ “ໄດ້ໄປທຸກຫົນທຸກແຫ່ງເຮັດຄຸນງາມຄວາມດີ.”
ໃນຖານະຜູ້ຕິດຕາມຂອງພຣະເຢຊູຄຣິດ, ເຮົາຄວນສະແຫວງຫາທີ່ຈະເຮັດຕາມວິທີທີ່ພຣະອາຈານຂອງເຮົາໄດ້ສະແດງຄວາມຮັກອັນບໍລິສຸດຂອງພຣະອົງຕໍ່ຄົນອື່ນ. ເຖິງແມ່ນວ່າພຣະຜູ້ຊ່ວຍໃຫ້ລອດສະແດງຄວາມໃຈບຸນໃຫ້ປະຈັກໃນຫລາຍໆວິທີທາງ, ຂ້າພະເຈົ້າຢາກຈະສຸມໃສ່ແບບແຜນແຫ່ງຄວາມໃຈບຸນຂອງພຣະອົງສາມຢ່າງໂດຍສະເພາະ ທີ່ເຫັນໄດ້ງ່າຍໃນສານຸສິດທີ່ແທ້ຈິງຂອງພຣະອົງ.
ຄວາມໃຈບຸນຄືການສະແດງໃຫ້ເຫັນຄວາມເມດຕາ
ທຳອິດ, ພຣະຜູ້ຊ່ວຍໃຫ້ລອດໄດ້ສະແດງຄວາມໃຈບຸນໂດຍການມີເມດຕາ. ລະຫວ່າງການປະຕິບັດສາດສະໜາກິດຂອງພຣະອົງທ່າມກາງຊາວນີໄຟ ດັ່ງທີ່ຖືກບັນທຶກໄວ້ຢູ່ໃນພຣະຄຳພີມໍມອນ, ພຣະຜູ້ເປັນເຈົ້າໄດ້ເຊື້ອເຊີນຜູ້ຄົນໃຫ້ກັບບ້ານໄປ ແລະ ໄຕ່ຕອງເຖິງສິ່ງທີ່ພຣະອົງໄດ້ສິດສອນ ແລະ ໃຫ້ກະກຽມສຳລັບການສະເດັດກັບມາຂອງພຣະອົງໃນມື້ຕໍ່ໄປ. ແລ້ວບັນທຶກລະບຸວ່າ:
“ພວກເຂົາຫລັ່ງນ້ຳຕາ, ແລະ ໄດ້ຫລຽວເບິ່ງພຣະອົງຄືກັບວ່າຈະທູນຂໍໃຫ້ພຣະອົງຢູ່ກັບພວກເຂົາຕື່ມອີກໜ້ອຍໜຶ່ງ.
“ແລະ ພຣະອົງໄດ້ກ່າວກັບພວກເຂົາວ່າ: ຈົ່ງເບິ່ງ, ອຸທອນຂອງເຮົາເຕັມໄປດ້ວຍຄວາມເມດຕາສົງສານເຈົ້າ.”
ຄວາມເມດຕາຄືສ່ວນນັ້ນຂອງຄວາມໃຈບຸນ ທີ່ສະແຫວງຫາເພື່ອບັນເທົາຄວາມທຸກທໍລະມານ. ເຕັມໄປໄດ້ຄວາມເມດຕາ, ພຣະຜູ້ເປັນເຈົ້າໄດ້ປິ່ນປົວຄົນທີ່ເຈັບປ່ວຍ ແລະ ເປັນທຸກໃນບັນດາຜູ້ຄົນໃຫ້ຫາຍດີ. ຫລັງຈາກນັ້ນ, ພຣະອົງໄດ້ອວຍພອນເດັກນ້ອຍໃນຂະນະທີ່ເຫລົ່າທູດໄດ້ລົງມາຈາກສະຫວັນ ແລະ ອ້ອມຮອບພວກເຂົາໄວ້. ພຣະອົງໄດ້ປະຕິບັດການກະທຳທີ່ອ່ອນໂຍນ ແລະ ຊົງຮັກເຫລົ່ານີ້, ແລະ ອີກຫລາຍໆຢ່າງ, ເພາະພຣະອົງ “ມີໃຈສົງສານ.”
ຂະນະທີ່ຮັບໃຊ້ເປັນຜູ້ສອນສາດສະໜາໜຸ່ມທີ່ເຂດອາເມຣິກາໃຕ້, ຂ້າພະເຈົ້າກໍໄດ້ຮັບຜົນປະໂຫຍດຈາກຄວາມເມດຕາຂອງເພື່ອນທີ່ຮັກຄົນໜຶ່ງຄືກັນ. ຄ່ຳຄືນໜຶ່ງຂະນະທີ່ຂັບລົດໄປກັບຄູ່ສອນຂອງຂ້າພະເຈົ້າ ໄປບ້ານຂອງປະທານເຜີຍແຜ່, ຊາຍໜຸ່ມຄົນໜຶ່ງທີ່ຂີ່ລົດຖີບໄດ້ລ້ຽວຢ່າງກະທັນຫັນຢູ່ຂ້າງໜ້າລົດ. ມັນໄດ້ເກີດຂຶ້ນຢ່າງໄວວາຈົນຂ້າພະເຈົ້າບໍ່ສາມາດຫລີກລ້ຽງການຕຳກັນ. ໜ້າໂສກເສົ້າ, ຊາຍໜຸ່ມຄົນນັ້ນໄດ້ເສຍຊີວິດຈາກການກະທົບນັ້ນ. ຂ້າພະເຈົ້າເສຍໃຈຫລາຍຈາກການເສຍຊີວິດຂອງລາວ. ຢ້ານ ແລະ ຕົກໃຈເມື່ອຄວາມເປັນຈິງທີ່ໂຫດຮ້າຍເຖິງສິ່ງທີ່ຫາກໍໄດ້ເກີດຂຶ້ນໄດ້ເຮັດໃຫ້ຂ້າພະເຈົ້າໜັກໃຈຫລາຍ, ຂ້າພະເຈົ້າຖືກຈັບໄປເຂົ້າຄຸກ. ຂ້າພະເຈົ້າບໍ່ເຄີຍຮູ້ສຶກຢ້ານກົວ ແລະ ໂດດດ່ຽວເຊັ່ນນີ້ມາກ່ອນ. ຂ້າພະເຈົ້າໄດ້ເຕັມໄປດ້ວຍຄວາມສິ້ນຫວັງ ແລະ ຄວາມຢ້ານກົວວ່າ ຂ້າພະເຈົ້າຈະໄດ້ຈຳຄຸກໄປຕະຫລອດຊີວິດຂອງຂ້າພະເຈົ້າ.
ເພື່ອນຜູ້ສອນສາດສະໜາຄົນໜຶ່ງ, ແອວເດີ ບຣາຍແອນ ໂຄແຊວາ, ໄດ້ຮຽນຮູ້ເຖິງອຸປະຕິເຫດນັ້ນ ແລະ ໄດ້ມີຄວາມເມດຕາສົງສານ. ລາວໄດ້ໄປທີ່ຄຸກ ແລະ ໄດ້ອ້ອນວອນກັບເຈົ້າໜ້າທີ່ໃຫ້ອະນຸຍາດໃຫ້ລາວຢູ່ກັບຂ້າພະເຈົ້າຢູ່ໃນຄຸກເພື່ອວ່າຂ້າພະເຈົ້າຈະບໍ່ໄດ້ຢູ່ຄົນດຽວ. ຊ່າງອັດສະຈັນແທ້ໆ, ເຂົາເຈົ້າໄດ້ອະນຸຍາດ. ຈົນເຖິງມື້ນີ້, ຂ້າພະເຈົ້າຮູ້ສຶກກະຕັນຍູຫລາຍສຳລັບການກະທຳແຫ່ງຄວາມຮັກເໝືອນດັ່ງພຣະຄຣິດຂອງສານຸສິດຄົນນີ້, ທີ່ໄດ້ເຮັດໃຫ້ຂ້າພະເຈົ້າສະຫງົບລົງ, ໄດ້ຮັບການປອບໂຍນ, ແລະ ການເລົ່າໂລມໃຈລະຫວ່າງເວລາທີ່ຫຍຸ້ງຍາກທີ່ສຸດໃນຊີວິດຂອງຂ້າພະເຈົ້າ. ຄວາມເມດຕາແຫ່ງຄວາມໃຈບຸນຂອງລາວໄດ້ເປັນສັນຍານທີ່ເຫັນໄດ້ຊັດເຖິງການເປັນສານຸສິດຂອງລາວ. ດັ່ງທີ່ປະທານແນວສັນໄດ້ສັງເກດເຫັນວ່າ, “ວິທີທີ່ງ່າຍທີ່ສຸດໃນການລະບຸ ຜູ້ຕິດຕາມທີ່ແທ້ຈິງ ຂອງພຣະເຢຊູຄຣິດຄື ວິທີທີ່ບຸກຄົນນັ້ນປະຕິບັດຕໍ່ຄົນອື່ນດ້ວຍຄວາມເຫັນອົກເຫັນໃຈ.”
ຄວາມໃຈບຸນຄືການປະຕິບັດສາດສະໜາກິດຕໍ່ຄວາມຕ້ອງການທີ່ບໍ່ຖືກກ່າວອອກມາ.
ອີກໜຶ່ງຕົວຢ່າງເຖິງວິທີທີ່ພຣະຜູ້ຊ່ວຍໃຫ້ລອດສະແດງຄວາມຮັກຂອງພຣະອົງແມ່ນຜ່ານທາງການສັງເກດຂອງພຣະອົງ ແລະ ການປະຕິບັດສາດສະໜາກິດຕໍ່ຄວາມຕ້ອງການຂອງຄົນອື່ນທີ່ບໍ່ຖືກກ່າວອອກມາ. ຕໍ່ຜູ້ຊາຍທີ່ປ່ວຍໄດ້ສາມສິບແປດປີມາແລ້ວ ທີ່ບໍ່ມີຜູ້ໃດຊ່ວຍລາວ, ພຣະຜູ້ເປັນເຈົ້າໄດ້ໂຜດລາວໃຫ້ຫາຍດີ ແລະ ໄດ້ຊຸກຍູ້ໃຫ້ລາວດຳລົງຊີວິດຢ່າງຊອບທຳ. ຕໍ່ຜູ້ຍິງທີ່ຖືກຈັບໄດ້ໃນຖານຫລິ້ນຊູ້, ພຣະອົງໄດ້ສະເໜີມອບຄວາມຫວັງ ແລະ ການປອບໂຍນແທນການກ່າວໂທດ. ສຳລັບຜູ້ຊາຍທີ່ເປັນເປ້ຍທີ່ຖືກຢ່ອນລົງຈາກຫລັງຄາເຮືອນ, ພຣະຜູ້ເປັນເຈົ້າໄດ້ມອບການອະໄພບາບ, ບໍ່ພຽງແຕ່ການປິ່ນປົວຮ່າງກາຍເທົ່ານັ້ນ.
ຕອນຂ້າພະເຈົ້າໄດ້ຮັບການເອີ້ນໃຫ້ຮັບໃຊ້ເປັນອະທິການ, ລູກນ້ອຍຂອງພວກເຮົາຫົກຄົນໄດ້ເຮັດໃຫ້ກອງປະຊຸມສິນລະລຶກເປັນການທ້າທາຍສຳລັບພັນລະຍາຂອງຂ້າພະເຈົ້າ, ຄຣິສຕິນ, ທີ່ຕ້ອງຈັດການພວກເຂົາຄົນດຽວ ຂະນະທີ່ຂ້າພະເຈົ້ານັ່ງຢູ່ເທິງເວທີ. ທ່ານສາມາດຈິນຕະນາການໄດ້ວ່າ, ລູກໆຂອງພວກເຮົາສ່ວນຫລາຍແລ້ວຈະບໍ່ມີຄວາມຄາລະວະເລີຍ. ເມື່ອສັງເກດເຫັນສະພາບຂອງນາງ, ສະມາຊິກສອງຄົນໃນຫວອດຂອງພວກເຮົາ, ຈອນ ແລະ ແດບບີ້ ບີນິກ, ເລີ່ມນັ່ງກັບນາງທຸກໆວັນອາທິດເພື່ອຊ່ວຍເຫລືອນາງ. ຄວາມເມດຕາກະລຸນາຂອງເຂົາເຈົ້າໄດ້ສືບຕໍ່ຫລາຍປີ, ແລະ ເຂົາເຈົ້າໄດ້ກາຍເປັນພໍ່ຕູ້ແມ່ຕູ້ແທນ ໃຫ້ແກ່ຄອບຄົວຂອງພວກເຮົາ. ເໝືອນດັ່ງພຣະຜູ້ເປັນເຈົ້າ, ສານຸສິດເຫລົ່ານີ້ໄດ້ສັງເກດເຫັນຄວາມຕ້ອງການທີ່ບໍ່ຖືກກ່າວອອກມາ ແລະ ໄດ້ກະທຳດ້ວຍຄວາມຮັກ—ສັນຍານທີ່ສຳຄັນຂອງການເປັນສານຸສິດຂອງເຂົາເຈົ້າ.
ຄວາມໃຈບຸນຄືການຊ່ວຍເຫລືອຄົນອື່ນຕາມເສັ້ນທາງແຫ່ງພັນທະສັນຍາ
ສຸດທ້າຍ, ຄວາມຮັກອັນສົມບູນແບບຂອງພຣະຜູ້ຊ່ວຍໃຫ້ລອດແມ່ນສຸມໃສ່ການຊ່ວຍໃຫ້ລູກໆຂອງພຣະເຈົ້າທຸກຄົນສາມາດເຕີມເຕັມສັກກະຍະພາບແຫ່ງສະຫວັນຂອງເຮົາ ເພື່ອວ່າເຮົາຈະສາມາດ “ຮັບສ່ວນຄວາມລອດຈາກພຣະອົງ, ແລະ ອຳນາດແຫ່ງການໄຖ່ຂອງພຣະອົງ.” ເມື່ອເຮົາກາຍເປັນເໝືອນດັ່ງພຣະອາຈານຂອງເຮົາ, ຄວາມປາດຖະໜາຂອງເຮົາທີ່ຈະຊ່ວຍອ້າຍເອື້ອຍນ້ອງຂອງເຮົາຕາມເສັ້ນທາງແຫ່ງພັນທະສັນຍາຈະເພີ່ມທະວີຂຶ້ນຕາມທຳມະຊາດ.
ຍົກຕົວຢ່າງ, ເຮົາສາມາດຍົກລະດັບ ແລະ ຜູກມິດກັບຜູ້ຄົນທີ່ຮູ້ສຶກຂຸ່ນເຄືອງໃຈ ຫລື ຖືກຫລົງລືມ, ຊ່ວຍຜູ້ທີ່ມາຮ່ວມໃໝ່ ທີ່ບ່ອນຊຸມນຸມຂອງເຮົາ ໃຫ້ຮູ້ສຶກວ່າໄດ້ຮັບການຕ້ອນຮັບ, ຫລື ເຊື້ອເຊີນໝູ່ເພື່ອນໃຫ້ມານະມັດສະການກັບພວກເຮົາທີ່ກອງປະຊຸມສິນລະລຶກ—ບາງທີໃນວັນອີດສະເຕີທີ່ຈະມາເຖິງນີ້. ມີຫລາຍວິທີນັບບໍ່ຖ້ວນ ທີ່ຈະຊຸກຍູ້ ແລະ ຊ່ວຍເຫລືອຄົນອື່ນໃນຄວາມກ້າວໜ້າຂອງເຂົາເຈົ້າຖ້າຫາກເຮົາສະແຫວງຫາຄວາມຊ່ວຍເຫລືອຈາກສະຫວັນດ້ວຍຄວາມຕັ້ງໃຈ ແລະ ການອະທິຖານ ເພື່ອຈະມີຕາທີ່ເຫັນໄດ້ ແລະ ຫົວໃຈທີ່ຈະຮູ້ສຶກວ່າພຣະເຢຊູຄຣິດມອງເຫັນ ແລະ ຮູ້ສຶກຕໍ່ເຂົາເຈົ້າແນວໃດ.
ການຊ່ວຍເຫລືອຄົນອື່ນຕາມເສັ້ນທາງແຫ່ງພັນທະສັນຍາອາດເປັນຕາມຮູບແບບຂອງການຮັບໃຊ້ທີ່ບໍ່ທຳມະດາ. ຍົກຕົວຢ່າງ, ລະຫວ່າງໜ້າທີ່ມອບໝາຍປະຈຸບັນທີ່ປະເທດຟີລິບປິນ, ຂ້າພະເຈົ້າໄດ້ຮຽນຮູ້ກ່ຽວກັບຄອບຄົວອາກາມາຕາ. ເຂົາເຈົ້າໄດ້ຮັບບັບຕິສະມາໃນປີ 2023, ແລະ ແລ້ວເຂົາເຈົ້າໄດ້ຈັດວັນທີ່ນັດໝາຍທີ່ຈະຜະນຶກເຂົ້າກັນເປັນຄອບຄົວດ້ວຍຄວາມຕື່ນເຕັ້ນ ທີ່ພຣະວິຫານເອີດາເນັດຕາ ຟີລິບປິນ ທີ່ຢູ່ໃກ້. ເຖິງຢ່າງໃດກໍຕາມ, ກ່ອນການນັດໝາຍຂອງຄອບຄົວ, ພະຍຸໄຕ້ຝຸ່ນໄດ້ເກີດຂຶ້ນໃນເຂດນັ້ນ. ບຣາເດີ ອາກາມາຕາ, ຊາວນາ, ບໍ່ສາມາດປູກພືດພັນຂອງລາວລະຫວ່າງພະຍຸຮ້າຍ. ໃນທີ່ສຸດເມື່ອພະຍຸໄດ້ຜ່ານໄປ, ລາວຈຳເປັນຕ້ອງປູກເຂົ້າຂອງລາວໃນຂະນະທີ່ພື້ນດິນນັ້ນເຕັມໄປດ້ວຍນ້ຳ—ສະພາບທີ່ເໝາະສົມດີສຳລັບການປູກຝັງ. ໜ້າເສຍດາຍ, ການເດີນທາງໄປພຣະວິຫານຕ້ອງຖືກເລື່ອນໄປກ່ອນ.
ສານຸສິດສອງຄົນ, ແອວເດີ ແລະ ຊິດສະເຕີ ຄໍອີລານ, ພ້ອມດ້ວຍຜູ້ສອນສາດສະໜາໜຸ່ມຝ່າຍໃຫ້ບໍລິການສາມຄົນ, ໄດ້ຍິນເລື່ອງລາວການດີ້ນລົນຂອງຄອບຄົວອາກາມາຕາ ແລະ ໄດ້ສະເໜີໃຫ້ຄວາມຊ່ວຍເຫລືອ ເຖິງແມ່ນວ່າບໍ່ເຄີຍມີປະສົບການເລື່ອງການປູກຝັງມາກ່ອນ. ທຳງານພາຍໃຕ້ແສງແດດທີ່ຮ້ອນຈັດ, ເຂົາເຈົ້າໄດ້ຊ່ວຍປູກກ້າ, ຊຶ່ງຊ່ວຍໃຫ້ຄອບຄົວອາກາມາຕາສຳເລັດວຽກງານຂອງເຂົາເຈົ້າ ແລະ ໄປຜະນຶກຢູ່ພຣະວິຫານຕາມທີ່ໄດ້ນັດໝາຍໄວ້. ແອວເດີ ຄໍອີລານ ໄດ້ສັງເກດເຫັນວ່າ “ໃບໜ້າ [ຂອງຄອບຄົວອາກາມາຕາ] ກະຈາຍຄວາມຊື່ນຊົມ ຂະນະທີ່ພວກເຮົາໄດ້ເຫັນເຂົາເຈົ້ານຸ່ງເສື້ອຜ້າສີຂາວໃນບ້ານຂອງພຣະຜູ້ເປັນເຈົ້າ. ຄວາມຊື່ນຊົມທີ່ພວກເຮົາໄດ້ຮູ້ສຶກໃນການປະຕິບັດສາດສະໜາກິດຕໍ່ຄົນໆໜຶ່ງຄືຄວາມຊື່ນຊົມທີ່ເໜືອຄຳບັນຍາຍ!”
ບັດນີ້ຄອບຄົວອາກາມາຕາໄດ້ຮັບພອນປະເສີດຂອງການຜະນຶກເປັນຄອບຄົວນິລັນດອນ ຍ້ອນວ່າເພື່ອນສານຸສິດສີ່ຫ້າຄົນ ຜູ້ທີ່ປ່ຽມໄປດ້ວຍຄວາມໃຈບຸນ—ສັນຍານຂອງການເປັນສານຸສິດຂອງເຂົາເຈົ້າ—ຕັ້ງໃຈທີ່ຈະຊ່ວຍອ້າຍເອື້ອຍນ້ອງຂອງເຂົາເຈົ້າກ້າວໄປໜ້າຕາມເສັ້ນທາງແຫ່ງພັນທະສັນຍາ.
ອ້າຍເອື້ອຍນ້ອງທັງຫລາຍ, ການເປັນສານຸສິດຂອງພຣະເຢຊູຄຣິດຄືທາງດຽວເທົ່ານັ້ນ ທີ່ຈະໄດ້ຮັບຄວາມສຸກທີ່ຍືນຍົງ. ມັນເປັນເສັ້ນທາງທີ່ເຕັມໄປດ້ວຍການກະທຳແຫ່ງຄວາມຮັກທີ່ຮອບຄອບຖີ່ຖ້ວນ ແລະ ມີຈຸດປະສົງຕໍ່ຄົນອື່ນ. ຂະນະທີ່ເສັ້ນທາງຂອງການເປັນສານຸສິດອາດລຳບາກ ແລະ ທ້າທາຍ, ແລະ ຂະນະທີ່ບາງເທື່ອເຮົາອາດດີ້ນລົນ ແລະ ລົ້ມເຫລວ, ເຮົາສາມາດໄດ້ຮັບການປອບໂຍນວ່າ ພຣະເຈົ້າຮັບຮູ້ເຮົາແຕ່ລະຄົນ ແລະ ປາດຖະໜາທີ່ຈະຊ່ວຍເຫລືອເຮົາທຸກໆເທື່ອທີ່ເຮົາພະຍາຍາມ. ເອຊາຢາເຕືອນໃຈເຮົາວ່າ “ພຣະເຈົ້າຈະໜຸນກຳລັງ [ຂອງເຮົາ], ວ່າ… , ຢ່າສູ່ຢ້ານ, ເພາະເຮົາຈະຊ່ວຍເຈົ້າ.”
ດ້ວຍການຮັບຮອງນີ້ຈາກພຣະບິດາຜູ້ສະຖິດຢູ່ໃນສະຫວັນຂອງເຮົາຢູ່ໃນໃຈ, ຂ້າພະເຈົ້າອະທິຖານຢ່າງຕັ້ງໃຈວ່າ ເຮົາຈະເຮັດຕາມຄຳເຊື້ອເຊີນຂອງປະທານແນວສັນ ທີ່ຈະຈັດລຳດັບຄວາມສຳຄັນຂອງການເປັນສານຸສິດຂອງເຮົາ. ຂໍໃຫ້ເຮົາຈົ່ງ “ອະທິຖານຫາພຣະບິດາດ້ວຍສຸດພະລັງແຫ່ງໃຈ” ເພື່ອ “ຈະເຕັມໄປດ້ວຍຄວາມຮັກນີ້, ຊຶ່ງພຣະອົງປະທານໃຫ້ທຸກຄົນຊຶ່ງເປັນຜູ້ຕິດຕາມທີ່ແທ້ຈິງຂອງພຣະບຸດຂອງພຣະອົງ, ພຣະເຢຊູຄຣິດ; … ເພື່ອວ່າ ເມື່ອພຣະອົງສະເດັດມາ ເຮົາຈະເປັນເໝືອນດັ່ງພຣະອົງ” ເພາະເຮົາຖືສັນຍານຂອງການເປັນສານຸສິດທີ່ແທ້ຈິງ, ຊຶ່ງແມ່ນ “ຄວາມໃຈບຸນ … ຄວາມຮັກອັນບໍລິສຸດຂອງພຣະຄຣິດ.”
ຂ້າພະເຈົ້າເປັນພະຍານວ່າ ພຣະເຢຊູຄຣິດເປັນພຣະຜູ້ຊ່ວຍໃຫ້ລອດ, ພຣະຜູ້ໄຖ່, ເປັນຕົວຢ່າງ, ແລະ ເພື່ອນທີ່ຊົງພຣະຊົນ ແລະ ຮຸ່ງໂລດຂອງເຮົາ. ໃນພຣະນາມຂອງພຣະເຢຊູຄຣິດ, ອາແມນ.