ເໝືອນເດັກນ້ອຍ
ຂ້າພະເຈົ້າເປັນພະຍານວ່າ ແອນ້ອຍ ແລະ ເດັກນ້ອຍ ແລະ ຊາວໜຸ່ມເປັນພາບຂອງອານາຈັກຂອງພຣະເຈົ້າເທິງແຜ່ນດິນໂລກ ຈະເລີນເຕີບໂຕ ທັງໃນຄວາມເຂັ້ມແຂງ ແລະ ຄວາມງາມຂອງມັນ.
ພຣະເຢຊູໄດ້ເລີ່ມປີສຸດທ້າຍຂອງພຣະຊົນຊີບຂອງພຣະອົງໂດຍການເພີ່ມທະວີການອົບຮົມອັກຄະສາວົກຂອງພຣະອົງຫລາຍຂຶ້ນ. ຖ້າຂ່າວສານຂອງພຣະອົງ ແລະ ຂອງສາດສະໜາຈັກຂອງພຣະອົງຈະຄົງຢູ່ຕໍ່ໄປໃນໂລກ, ຄວາມຮູ້ ແລະ ຫລັກທຳອີກຢ່າງຫລວງຫລາຍຈະຕ້ອງຖືກປູກຝັງໄວ້ໃນໃຈຂອງຜູ້ຊາຍທຳມະດາ 12 ຄົນ ຜູ້ທີ່ໄດ້ຮູ້ຈັກພຣະອົງພຽງແຕ່ 24 ເດືອນເທົ່ານັ້ນ.
ມື້ໜຶ່ງພຣະເຢຊູໄດ້ເຫັນອັກຄະສາວົກສິບສອງຖົກຖຽງກັນ ແລະ ຕໍ່ມາໄດ້ຖາມວ່າ, “ພວກເຈົ້າໄດ້ຖົກຖຽງກັນເຖິງເລື່ອງຫຍັງ?” ເບິ່ງຄືຈະອັບອາຍ, ພວກເພິ່ນ “ມິດຢູ່,” ຕາມທີ່ບັນທຶກກ່າວໄວ້. ແຕ່ຄູສອນທີ່ຍິ່ງໃຫຍ່ທີ່ສຸດໃນບັນດາຄູສອນທັງປວງອົງນີ້ ໄດ້ຮູ້ຄວາມຄິດໃນໃຈຂອງພວກເພິ່ນ ແລະ ໄດ້ຮູ້ສຶກການປະກົດຂອງຄວາມທະນົງໃຈສ່ວນຕົວເປັນເທື່ອທຳອິດ. ສະນັ້ນພຣະອົງຈຶ່ງໄດ້ “ເອີ້ນເອົາເດັກນ້ອຍຄົນໜຶ່ງມາຢືນຢູ່ທ່າມກາງພວກເພິ່ນ, …
“ແລະ ກ່າວວ່າ, ເຮົາບອກພວກເຈົ້າຕາມຄວາມຈິງວ່າ, ຖ້າພວກເຈົ້າບໍ່ກັບໃຈ, ແລະ ກາຍເປັນເໝືອນເດັກນ້ອຍ, ພວກເຈົ້າຈະເຂົ້າໄປໃນຣາຊອານາຈັກສະຫວັນບໍ່ໄດ້ຈັກເທື່ອ.
“ຜູ້ເປັນໃຫຍ່ທີ່ສຸດໃນຣາຊອານາຈັກສະຫວັນ ແມ່ນຜູ້ທີ່ຖ່ອມຕົວລົງເໝືອນດັ່ງເດັກນ້ອຍຜູ້ນີ້.”
ຄວນສັງເກດເຫັນໄດ້ວ່າ ແມ່ນແຕ່ກ່ອນການກຳເນີດຂອງພຣະຄຣິດ, ການເທດສະໜາອຳລາຂອງກະສັດເບັນຢາມິນໄດ້ລວມທັງຄວາມຄິດເຫັນທີ່ເລິກເຊິ່ງນີ້ ເຖິງຄວາມຖ່ອມຕົວຂອງເດັກນ້ອຍ. ມັນອ່ານວ່າ: “ມະນຸດທີ່ມີຈິດໃຈທຳມະດາເປັນສັດຕູກັບພຣະເຈົ້າ, … ແລະ ຈະເປັນໄປຕະຫລອດການ ແລະ ຕະຫລອດໄປ, ເວັ້ນເສຍແຕ່ພວກເຂົາ, … ກາຍມາເປັນໄພ່ພົນຂອງພຣະເຈົ້າໂດຍການຊົດໃຊ້ຂອງອົງພຣະຄຣິດ, ແລະ ກາຍເປັນຄືກັນກັບ ເດັກນ້ອຍ, ບອກລອນສອນງ່າຍ, … ຖ່ອມຕົວ, … ເຕັມໄປດ້ວຍຄວາມຮັກ, … ເໝືອນດັ່ງເດັກນ້ອຍ [ຕອບສະໜອງ] ຕໍ່ບິດາຂອງຕົນ.”
ບັດນີ້, ເຫັນໄດ້ຢ່າງຊັດເຈນວ່າ ມີແນວໂນ້ມບາງຢ່າງແບບເດັກທີ່ເຮົາ ບໍ່ ສະໜັບສະໜູນ. ເມື່ອຊາວຫ້າປີກ່ອນ, ຫລານຊາຍອາຍຸສາມປີຂອງຂ້າພະເຈົ້າໄດ້ກັດແຂນເອື້ອຍຂອງລາວ ທີ່ອາຍຸຫ້າປີ. ລູກເຂີຍຂອງຂ້າພະເຈົ້າ, ຊຶ່ງຕ້ອງດູແລລູກໆໃນຄືນນັ້ນ, ໄດ້ສິດສອນລູກສາວຂອງລາວຢ່າງວຸ້ຍວາຍ ໃນບົດຮຽນທັງໝົດກ່ຽວກັບການໃຫ້ອະໄພທີ່ລາວຄິດອອກ, ລວມທັງວ່າ ນ້ອງຊາຍຂອງລາວຄົງບໍ່ຮູ້ຈັກວ່າ ການຖືກກັດນັ້ນຮູ້ສຶກແນວໃດ. ຄວາມຄິດເຫັນຂອງພໍ່ທີ່ຮູ້ສຶກບໍ່ດີນັ້ນໃຊ້ການໄດ້ປະມານໜຶ່ງນາທີ, ບາງທີໜຶ່ງນາທີເຄິ່ງ, ຈົນກວ່າມີສຽງຮ້ອງໄຫ້ດັງແຮງທີ່ເຮັດໃຫ້ປ່ອງຢ້ຽມສັ່ນອອກມາຈາກຫ້ອງນອນພວກເດັກນ້ອຍ ບ່ອນທີ່ຫລານສາວຂອງຂ້າພະເຈົ້າໄດ້ຮ້ອງອອກມາຢ່າງສະຫງົບວ່າ, “ບັດນີ້ລາວຮູ້ແລ້ວ.”
ສະນັ້ນ ເຮົາຄວນເຫັນສິ່ງໃດໃນຄຸນນະທຳຂອງຊີວິດຂອງເດັກນ້ອຍ? ແມ່ນຫຍັງທີ່ໄດ້ເຮັດໃຫ້ພຣະຄຣິດເອງກັນແສງໃນເຫດການທີ່ລະອຽດອ່ອນທີ່ສຸດໃນພຣະຄຳພີມໍມອນທັງໝົດ? ພຣະເຢຊູກຳລັງສິດສອນຫຍັງເມື່ອພຣະອົງໄດ້ເອີ້ນໃຫ້ໄຟ ແລະ ເຫລົ່າທູດທີ່ປົກປ້ອງຈາກສະຫວັນລົງມາອ້ອມຮອບເດັກນ້ອຍເຫລົ່ານັ້ນໄວ້, ບັນຊາຜູ້ໃຫຍ່ໃຫ້ “ເບິ່ງລູກນ້ອຍໆຂອງ [ພວກເຂົາ]”?
ເຮົາບໍ່ຮູ້ວ່າ ແມ່ນຫຍັງທີ່ເປັນແຮງກະຕຸ້ນໃຫ້ເກີດສິ່ງທັງໝົດນັ້ນ, ແຕ່ຂ້າພະເຈົ້າຄິດວ່າ ມັນມີບາງສິ່ງກ່ຽວກັບຄວາມບໍລິສຸດ ແລະ ຄວາມໄຮ້ດຽງສາຂອງພວກເຂົາ, ຄວາມອ່ອນນ້ອມຖ່ອມຕົນແຕ່ກຳເນີດຂອງພວກເຂົາ, ແລະ ສິ່ງທີ່ມັນ ສາມາດ ນຳມາສູ່ຊີວິດຂອງເຮົາໄດ້ ຖ້າເຮົາໄດ້ຮັບມັນ.
ເປັນຫຍັງວັນແຫ່ງຄວາມສິ້ນຫວັງຈຶ່ງຖືກເອີ້ນໂດຍສາດສະດາທ່ານໜຶ່ງວ່າເປັນ “ອະນິຈັງ ອະນິຈັງ”? ເປັນຫຍັງ “ຄວາມຄິດຝັນອັນບໍ່ມີປະໂຫຍດ ແລະ ຄວາມທະນົງໃຈຂອງລູກຫລານມະນຸດ” ແມ່ນຖ້ອຍຄຳທີ່ເປັນລັກສະນະຂອງອາຄານໃຫຍ່ ແລະ ກວ້າງ ທີ່ເປັນຄວາມຕາຍທາງວິນຍານຢູ່ໃນພາບນິມິດຂອງລີໄຮ? ແລະ ເປັນແນວໃດກັບຊາວໂຊຣຳ, ກຸ່ມທີ່ພາກັນອະທິຖານຢ່າງທະນົງຕົວ? ກ່ຽວກັບພວກເຂົາ ແອວມາໄດ້ກ່າວວ່າ, “ໂອ້ ພຣະອົງເຈົ້າ, ພວກເຂົາ [ອະທິຖານ] ຕໍ່ພຣະອົງແຕ່ປາກ ຂະນະທີ່ພວກເຂົາອວດອົ່ງ … ໃນສິ່ງທີ່ບໍ່ມີປະໂຫຍດຂອງໂລກ.”
ກົງກັນຂ້າມ, ມີຫຍັງບໍທີ່ຫວານຊື່ນ, ບໍລິສຸດ, ຫລື ຖ່ອມຕົວກວ່າເດັກນ້ອຍທີ່ອະທິຖານ? ມັນຄືກັບວ່າສະຫວັນຢູ່ໃນຫ້ອງ. ພຣະເຈົ້າ ແລະ ພຣະຄຣິດແມ່ນມີຈິງ, ແຕ່ສຳລັບຜູ້ອື່ນໃນພາຍຫລັງ, ປະສົບການດັ່ງກ່າວສາມາດກາຍເປັນພຽງຜິວເຜີນເທົ່ານັ້ນ.
ຕາມທີ່ແອວເດີ ຣິເຈີດ ແອວ ອີແວນສ໌ ໄດ້ອ້າງອີງປະມານ 60 ປີຜ່ານມາແລ້ວວ່າ: “ພວກເຮົາຫລາຍຄົນອ້າງວ່າເປັນຄຣິດສະຕຽນ, ແຕ່ພວກເຮົາ … ບໍ່ໄດ້ຮັບເອົາພຣະອົງຢ່າງຈິງໃຈ. … ພວກເຮົານັບຖືພຣະອົງ, ແຕ່ພວກເຮົາບໍ່ໄດ້ຕິດຕາມພຣະອົງ. … ພວກເຮົາອ້າງເຖິງພຣະຄຳຂອງພຣະອົງ, ແຕ່ພວກເຮົາບໍ່ໄດ້ດຳລົງຊີວິດຕາມນັ້ນ.” “ພວກເຮົາຊົມເຊີຍພຣະອົງ, ແຕ່ພວກເຮົາບໍ່ໄດ້ນະມັດສະການພຣະອົງ.”
ຊີວິດຈະແຕກຕ່າງຫລາຍພຽງໃດ ຖ້າຫາກໂລກຍົກຍ້ອງພຣະເຢຊູເໜືອກວ່າລະດັບຂອງການສາບານທີ່ຫຍາບຄາຍເປັນບາງຄັ້ງ.
ແຕ່ເດັກນ້ອຍຮັກພຣະອົງແທ້ໆ, ແລະ ຄວາມຮັກນັ້ນສາມາດນຳໄປສູ່ຄວາມສຳພັນອື່ນໆຂອງພວກເຂົາ ໃນສະໜາມຫລິ້ນແຫ່ງຊີວິດໄດ້. ຕາມກົດລະບຽບ, ແມ່ນແຕ່ໃນຊ່ວງໄວເຍົານ້ອຍທີ່ສຸດຂອງພວກເຂົາ, ເດັກນ້ອຍກໍສາມາດສະແດງຄວາມຮັກໄດ້ງ່າຍ, ພວກເຂົາໃຫ້ອະໄພໄດ້ງ່າຍ, ພວກເຂົາຫົວຢ່າງສະໜຸກສະໜານ ແມ່ນແຕ່ຫົວໃຈທີ່ເຍືອກເຢັນທີ່ສຸດ, ແຂງທີ່ສຸດ ກໍຍັງລະລາຍໄດ້.
ເອີ, ລັກສະນະບວກເຫລົ່ານັ້ນກໍຍັງມີອີກຫລາຍ. ຄວາມບໍລິສຸດເດ? ຄວາມໄວ້ວາງໃຈ? ຄວາມກ້າຫານ? ຄວາມຊື່ສັດ ແລະ ກຽດສັກສີ?
ໃຫ້ມາເບິ່ງຄວາມຖ່ອມຕົວຕໍ່ພຣະພັກຂອງພຣະເຈົ້າ ຊຶ່ງສະແດງໂດຍເພື່ອນໜຸ່ມຄົນໜຶ່ງຜູ້ເປັນທີ່ຮັກຂອງຂ້າພະເຈົ້າ.
ໃນວັນທີ 5 ເດືອນມັງກອນ, 2025—ເມື່ອ 91 ວັນທີ່ຜ່ານມາ—ທ້າວອີສະຕັນ ແດຣິນ ຈໍລີ ໄດ້ຮັບຖານະປະໂລຫິດແຫ່ງອາໂຣນ ແລະ ຖືກແຕ່ງຕັ້ງເປັນມັກຄະນາຍົກໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.
ທ້າວອີສະຕັນປາດຖະໜາຈະຢາຍສິນລະລຶກຂອງເຂົ້າແລງຂອງພຣະຜູ້ເປັນເຈົ້າຕັ້ງແຕ່ລາວຈຳຄວາມໄດ້. ແຕ່ໂອກາດສັກສິດນີ້ກໍມາພ້ອມຄວາມຢ້ານກົວທີ່ຮ້າຍແຮງວ່າລາວຈະລົ້ມເຫລວ, ວ່າລາວຈະບໍ່ປະສົບຜົນສຳເລັດ, ວ່າລາວຈະຖືກເຍາະເຍີ້ຍ ຫລື ເຮັດໃຫ້ຕົວລາວເອງ ແລະ ຄອບຄົວຂອງລາວອັບອາຍ.
ທ້າວອີສະຕັນມີຄວາມເຈັບປ່ວຍທີ່ຮ້າຍແຮງ ແລະ ໜ້ອຍຄົນມີ, ຄືໂຣກກ້າມເນື້ອເສື່ອມແຕ່ກຳເນີດຂອງອູນຣິກ. ມັນໄດ້ເຮັດໃຫ້ຊີວິດຂອງລາວເຕັມໄປດ້ວຍຄວາມທ້າທາຍທີ່ເປັນຕາຢ້ານ ໃນຂະນະທີ່ມັນທຳລາຍຄວາມຫວັງ ແລະ ຄວາມຝັນຂອງລາວສຳລັບອະນາຄົດ. ອີກບໍ່ດົນລາວກໍຕ້ອງຢູ່ໃນລົດເຂັນຢ່າງຖາວອນ. ຄອບຄົວຂອງລາວບໍ່ເວົ້າຫຍັງກ່ຽວກັບສິ່ງທີ່ລໍຖ້າລາວຢູ່ຫລັງຈາກນັ້ນ.
ວັນອາທິດຫລັງຈາກການແຕ່ງຕັ້ງຂອງລາວ, ທ້າວອີສະຕັນຈະໄດ້ຢາຍສິນລະລຶກເປັນເທື່ອທຳອິດ. ແຮງບັນດານໃຈສ່ວນຕົວຂອງລາວແມ່ນວ່າ ລາວຈະສາມາດນຳສະເໜີຕົວເອງ ແລະ ສັນຍາລັກສັກສິດເຫລົ່ານີ້ໃຫ້ແກ່ພໍ່ຂອງລາວ, ຜູ້ທີ່ເປັນອະທິການຂອງຫວອດ. ໃນການກຽມຮັບວຽກງານນັ້ນ, ລາວໄດ້ອ້ອນວອນ ແລະ ຮ້ອງຂໍ ແລະ ຮ້ອງໄຫ້ ແລະ ອ້ອນວອນ, ໃຫ້ທຸກຄົນຮັບປະກັນວ່າບໍ່ໃຫ້ໃຜ, ບໍ່ໃຫ້ໃຜເລີຍ, ທີ່ຈະພະຍາຍາມຊ່ວຍລາວ. ດ້ວຍເຫດຜົນຫລາຍຢ່າງ, ຊຶ່ງເປັນສ່ວນຕົວຕໍ່ລາວເອງ, ລາວຕ້ອງການຈະເຮັດສິ່ງນີ້ຄົນດຽວ ແລະ ບໍ່ມີການຊ່ວຍເຫລືອ.
ຫລັງຈາກປະໂລຫິດໄດ້ຫັກເຂົ້າຈີ່ ແລະ ອວຍພອນມັນແລ້ວ—ສັນຍາລັກທີ່ເປັນຕົວແທນໃຫ້ແກ່ພຣະກາຍຂອງພຣະຄຣິດທີ່ແຕກຫັກ—ທ້າວອີສະຕັນ, ດ້ວຍຮ່າງກາຍທີ່ແຕກຫັກຂອງລາວ, ໄດ້ຍ່າງກະເດິກໄປຮັບເອົາຖາດຂອງລາວ. ເຖິງຢ່າງໃດກໍຕາມ, ມີຂັ້ນໃດສາມຂັ້ນທີ່ໃຫຍ່ພໍຈາກພື້ນຂຶ້ນໄປສູ່ບ່ອນນັ່ງຢູ່ເທິງເວທີ. ສະນັ້ນ, ຫລັງຈາກໄດ້ຮັບຖາດຂອງລາວແລ້ວ, ລາວໄດ້ຢຽດຂຶ້ນໄປໃຫ້ສູງເທົ່າທີ່ລາວຈະເຮັດໄດ້ ແລະ ໄດ້ວາງຖາດຂອງລາວໄວ້ຢູ່ພື້ນທີ່ເທິງຮາວຈັບ. ແລ້ວ, ລາວໄດ້ນັ່ງລົງເທິງຂັ້ນທີ່ສູງກວ່າ, ດ້ວຍມືທັງສອງເບື້ອງລາວໄດ້ດຶງຂາຂວາຂອງລາວຂຶ້ນໄປຂັ້ນທີໜຶ່ງ. ແລ້ວລາວໄດ້ດຶງເອົາຂາຊ້າຍຂຶ້ນໄປຂັ້ນດຽວກັນ, ແລະ ຕໍ່ໆໄປຈົນກວ່າ, ດ້ວຍຄວາມຍາກລຳບາກ, ລາວໄດ້ຂຶ້ນໄປເຖິງຍອດຂອງສາມຂັ້ນພູເຂົາແອເວີແຣສ໌ສ່ວນຕົວຂອງລາວ.
ແລ້ວລາວໄດ້ເຄື່ອນຕົວຂອງລາວໄປຫາເສົາບ່ອນທີ່ລາວປີນຂຶ້ນໄປຢືນໄດ້. ລາວໄດ້ກັບໄປຫາຖາດ. ອີກສອງສາມບາດກ້າວ ແລະ ລາວກໍໄດ້ຢືນຢູ່ຕໍ່ໜ້າອະທິການ, ພໍ່ຂອງລາວ, ຜູ້ທີ່, ດ້ວຍນ້ຳຕາເຕັມເບົ້າ ແລະ ໄຫລລົງອາບໜ້າຂອງເພິ່ນ, ໄດ້ຫັກຫ້າມຕົນເອງຈາກການໂອບກອດລູກຊາຍຜູ້ກ້າຫານ ແລະ ຊື່ສັດຢ່າງສົມບູນແບບຄົນນີ້. ແລະ ທ້າວອີສະຕັນ, ດ້ວຍຄວາມໂລ່ງໃຈ ແລະ ດ້ວຍຮອຍຍິ້ມອອກມາກວ້າງໆ, ອາດກ່າວອອກມາວ່າ “ຂ້ານ້ອຍໄດ້ສະແດງໃຫ້ໂລກເຫັນສະຫງ່າລາສີ [ຂອງພໍ່ຂ້ານ້ອຍ ແລະ] ໄດ້ເຮັດພາລະກິດທີ່ [ເພິ່ນໄດ້ມອບໝາຍ] ໃຫ້ຂ້ານ້ອຍເຮັດນັ້ນສຳເລັດແລ້ວ.”
ສັດທາ, ຄວາມຈົ່ງຮັກພັກດີ, ຄວາມບໍລິສຸດ, ຄວາມໄວ້ວາງໃຈ, ກຽດສັກສີ, ແລະ, ໃນທີ່ສຸດ, ຄວາມຮັກທີ່ມີໃຫ້ພໍ່ຜູ້ທີ່ລາວຢາກເຮັດໃຫ້ເພິ່ງພໍໃຈ. ຄຸນສົມບັດເຫລົ່ານີ້ ແລະ ອີກຫລາຍໆຢ່າງເຮັດໃຫ້ ເຮົາ ກ່າວນຳອີກວ່າ, “ຜູ້ເປັນໃຫຍ່ທີ່ສຸດໃນຣາຊອານາຈັກສະຫວັນ … ແມ່ນຜູ້ທີ່ຖ່ອມຕົວລົງເໝືອນດັ່ງເດັກນ້ອຍຜູ້ນີ້.”
ອ້າຍເອື້ອຍນ້ອງ ແລະ ໝູ່ເພື່ອນທັງຫລາຍ, ຂ້າພະເຈົ້າເປັນພະຍານວ່າ ຢູ່ໃນອັນດັບສູງສຸດໃນລາຍການຂອງພາບທີ່ສວຍງາມທີ່ສຸດທີ່ຂ້າພະເຈົ້າຮູ້ແມ່ນ ແອນ້ອຍ ແລະ ເດັກນ້ອຍ ແລະ ຊາວໜຸ່ມດ້ວຍຈິດສຳນຶກ ແລະ ຄວາມລ້ຳຄ່າເທົ່າຜູ້ທີ່ເຮົາໄດ້ອ້າງເຖິງໃນມື້ນີ້. ຂ້າພະເຈົ້າເປັນພະຍານວ່າ ນີ້ເປັນພາບຂອງອານາຈັກຂອງພຣະເຈົ້າທີ່ຈະເລີນເຕີບໂຕເທິງແຜ່ນດິນໂລກ ໃນຄວາມເຂັ້ມແຂງ ແລະ ຄວາມງາມຂອງມັນ.
ດ້ວຍວິນຍານຂອງປະຈັກພະຍານອັນດຽວກັນນັ້ນ, ຂ້າພະເຈົ້າເປັນພະຍານວ່າ ໃນໄວໜຸ່ມຂອງເພິ່ນ, ໂຈເຊັບ ສະມິດ ໄດ້ເຫັນສິ່ງທີ່ເພິ່ນເວົ້າວ່າເພິ່ນໄດ້ເຫັນ ແລະ ໄດ້ສົນທະນາກັບຜູ້ທີ່ເພິ່ນເວົ້າວ່າເພິ່ນໄດ້ເວົ້າເຖິງ. ຂ້າພະເຈົ້າເປັນພະຍານວ່າ ຣະໂຊ ເອັມ ແນວສັນ ທີ່ຖ່ອມຕົວ ແລະ ບໍລິສຸດ ເປັນສາດສະດາ ແລະ ຜູ້ພະຍາກອນທີ່ຖືກແຕ່ງຕັ້ງ ແລະ ໄດ້ຮັບພອນສະຫວັນຂອງພຣະເຈົ້າ. ຈາກການອ່ານພຣະຄຳພີມໍມອນຕະຫລອດຊີວິດ, ຂ້າພະເຈົ້າເປັນພະຍານວ່າ ພຣະຄຳພີມໍມອນເປັນໜັງສືທີ່ໃຫ້ຄຸນຄ່າຫລາຍທີ່ສຸດ ທີ່ຂ້າພະເຈົ້າເຄີຍອ່ານມາ ແລະ ເປັນເສົາເອກໃນການຢູ່ອາໄສເລັກໆນ້ອຍໆຂອງຂ້າພະເຈົ້າ ໃນອານາຈັກແຫ່ງປາສາດຢ່າງຫລວງຫລາຍ. ຂ້າພະເຈົ້າເປັນພະຍານວ່າ ຖານະປະໂລຫິດ ແລະ ການອະທິຖານກຳລັງຟື້ນຟູຊີວິດຂອງຂ້າພະເຈົ້າ—ຖານະປະໂລຫິດຂອງພຣະຄຣິດ ແລະ ຄຳອະທິຖານຂອງທ່ານ. ຂ້າພະເຈົ້າຮູ້ວ່າທັງໝົດນີ້ເປັນຄວາມຈິງ ແລະ ຂໍເປັນພະຍານໃນພຣະນາມຂອງພຣະບຸດຂອງພຣະເຈົ້າ ຜູ້ຊື່ສັດ ແລະ ຖ່ອມຕົວທີ່ສຸດ—ອາລະຟາ ແລະ ໂອເມຄາ, ຜູ້ຍິ່ງໃຫຍ່, ຜູ້ທີ່ຖືກຄຶງ, ພະຍານທີ່ສັດຊື່—ແມ່ນແຕ່ອົງພຣະເຢຊູຄຣິດເຈົ້າ, ອາແມນ.