ພອນຊົດເຊີຍ
ຂະນະທີ່ຫລາຍໆສະພາບການໃນຊີວິດອາດຢູ່ເໜືອການຄວບຄຸມຂອງເຮົາ, ບໍ່ມີໃຜໃນພວກເຮົາຢູ່ເໜືອການເອື້ອມເຖິງພອນອັນບໍ່ມີຂອບເຂດຂອງພຣະຜູ້ຊ່ວຍໃຫ້ລອດ.
ໂດຍຮັບໃຊ້ໃນຝ່າຍອະທິການຄວບຄຸມ, ຂ້າພະເຈົ້າໄດ້ຮັບສິດທິພິເສດໃນການພົບປະກັບໄພ່ພົນຍຸກສຸດທ້າຍທົ່ວໂລກ ໃນສະຖານທີ່ ແລະ ວັດທະນະທຳທີ່ຫລາກຫລາຍ. ຂ້າພະເຈົ້າໄດ້ຮັບການດົນໃຈຢ່າງຕໍ່ເນື່ອງໂດຍສັດທາທີ່ແນ່ວແນ່ ແລະ ການອຸທິດຕົນຂອງທ່ານຕໍ່ອົງພຣະເຢຊູຄຣິດເຈົ້າ. ແຕ່ຂ້າພະເຈົ້າກໍຍັງໄດ້ປະທັບໃຈກັບສະພາບການທີ່ຫລາກຫລາຍ ແລະ ມັກຈະຍາກລຳບາກ ທີ່ພວກທ່ານຫລາຍຄົນປະເຊີນ—ຄວາມທ້າທາຍຕ່າງໆດັ່ງເຊັ່ນ ຄວາມເຈັບປ່ວຍ, ຄວາມພິການ, ຊັບພະຍາກອນທີ່ມີຈຳກັດ, ໂອກາດທີ່ໜ້ອຍລົງສຳລັບການແຕ່ງງານ ຫລື ການສຶກສາ, ການທາລຸນນະກຳຈາກຄົນອື່ນ, ແລະ ຂໍ້ຈຳກັດອື່ນໆ. ບາງເທື່ອ, ການທົດລອງເຫລົ່ານີ້ອາດເບິ່ງຄືວ່າຂັດຂວາງຄວາມກ້າວໜ້າຂອງທ່ານ ແລະ ທ້າທາຍຄວາມພະຍາຍາມທີ່ຈິງໃຈຂອງທ່ານທີ່ຈະໃຊ້ຊີວິດຕາມພຣະກິດຕິຄຸນຢ່າງເຕັມທີ່, ໂດຍເຮັດໃຫ້ມັນຍາກຂຶ້ນທີ່ຈະຮັບໃຊ້, ນະມັດສະການ, ແລະ ບັນລຸໜ້າທີ່ອັນສັກສິດ.
ເພື່ອນທີ່ຮັກແພງຂອງຂ້າພະເຈົ້າເອີຍ, ຖ້າຫາກທ່ານເຄີຍຮູ້ສຶກຖືກຈຳກັດ ຫລື ເສຍປຽບໂດຍສະພາບການຊີວິດທ່ານ, ຂ້າພະເຈົ້າຢາກໃຫ້ທ່ານຮູ້ສິ່ງນີ້: ພຣະຜູ້ເປັນເຈົ້າຮັກທ່ານເປັນການສ່ວນຕົວ. ພຣະອົງຮູ້ສະພາບການຂອງທ່ານ, ແລະ ປະຕູສູ່ພອນຂອງພຣະອົງຍັງເປີດອອກກວ້າງເພື່ອທ່ານ ບໍ່ວ່າທ່ານຈະປະເຊີນກັບຄວາມທ້າທາຍໃດກໍຕາມ.
ຂ້າພະເຈົ້າໄດ້ຮຽນຮູ້ຄວາມຈິງນີ້ຜ່ານປະສົບການສ່ວນຕົວທີ່, ເຖິງແມ່ນຈະເບິ່ງຄືວ່າບໍ່ສຳຄັນກໍຕາມ, ໄດ້ຝາກຄວາມປະທັບໃຈທີ່ຍືນຍົງກັບຂ້າພະເຈົ້າ. ຕອນອາຍຸ 22 ປີ, ຂະນະທີ່ຮັບໃຊ້ໃນກອງທັບອາກາດຝຣັ່ງ, ຂ້າພະເຈົ້າຕື່ນເຕັ້ນທີ່ໄດ້ຮູ້ວ່າ ແອວເດີ ນຽວ ເອ ແມ໊ກສະແວວ, ອັກຄະສາວົກຂອງພຣະຜູ້ເປັນເຈົ້າ, ຈະກ່າວຄຳປາໄສທີ່ກອງປະຊຸມຢູ່ຊອງ-ເຊລີເຊ. ຢ່າງໃດກໍຕາມ, ບຶດດຽວກ່ອນງານເລີ່ມ, ຂ້າພະເຈົ້າໄດ້ຮັບຄຳສັ່ງໃຫ້ຂັບລົດພາເຈົ້າໜ້າທີ່ອາວຸໂສໄປສະໜາມບິນ ກົງກັບເວລາທີ່ກອງປະຊຸມໄດ້ຖືກກຳນົດໃຫ້ເລີ່ມ.
ຂ້າພະເຈົ້າຜິດຫວັງ. ດ້ວຍຄວາມຕັ້ງໃຈທີ່ຈະເຂົ້າຮ່ວມ, ຂ້າພະເຈົ້າໄປສົ່ງເຈົ້າໜ້າທີ່ແລ້ວ ແລະ ກໍຟ້າວໄປກອງປະຊຸມ. ຫລັງຈາກທີ່ຊອກບ່ອນຈອດລົດໄດ້ແລ້ວ, ຂ້າພະເຈົ້າໄດ້ຟ້າວແລ່ນລົງໄປຖະໜົນຊອງ-ເຊລີເຊ ສູ່ສະຖານທີ່ປະຊຸມ ແລະ ໄດ້ໄປຮອດດ້ວຍຄວາມຫາຍໃຈຫອບ ໂດຍເຫລືອເວລາແຕ່ຫ້ານາທີກ່ອນກອງປະຊຸມຈະສິ້ນສຸດລົງ. ທັນທີທີ່ຂ້າພະເຈົ້າເຂົ້າໄປ, ຂ້າພະເຈົ້າໄດ້ຍິນແອວເດີ ແມ໊ກສະແວວ ກ່າວວ່າ, “ບັດນີ້ ຂ້າພະເຈົ້າຈະໃຫ້ພອນອັກຄະສາວົກແກ່ທ່ານ.” ໃນທັນໃດນັ້ນ, ຂ້າພະເຈົ້າໄດ້ມີປະສົບການທາງວິນຍານທີ່ງົດງາມ ແລະ ບໍ່ມີວັນລືມໄດ້. ຂ້າພະເຈົ້າໄດ້ເຕັມລົ້ນໄປດ້ວຍພຣະວິນຍານ, ແລະ ຖ້ອຍຄຳຂອງພອນນັ້ນ ເບິ່ງຄືວ່າໄດ້ທະລຸເຂົ້າໄປໃນທຸກເສັ້ນໃຍຂອງຈິດວິນຍານຂອງຂ້າພະເຈົ້າ ຄືກັບວ່າ ຖ້ອຍຄຳເຫລົ່ານັ້ນແມ່ນຕັ້ງໃຈກ່າວກັບຂ້າພະເຈົ້າໂດຍສະເພາະ.
ສິ່ງທີ່ຂ້າພະເຈົ້າໄດ້ປະສົບໃນມື້ນັ້ນ ເປັນການສະແດງໃຫ້ປະຈັກທີ່ນ້ອຍແຕ່ມີພະລັງ ເຖິງແງ່ມຸມທີ່ປອບໂຍນຂອງແຜນຂອງພຣະເຈົ້າທີ່ມີສຳລັບລູກໆຂອງພຣະອົງ: ເມື່ອສະພາບການຕ່າງໆທີ່ຢູ່ເໜືອການຄວບຄຸມຂອງເຮົາ ຂັດຂວາງບໍ່ໃຫ້ເຮົາບັນລຸຄວາມປາດຖະໜາອັນຊອບທຳຂອງໃຈເຮົາ, ພຣະຜູ້ເປັນເຈົ້າຈະຊົດເຊີຍໃນວິທີທີ່ອະນຸຍາດໃຫ້ເຮົາໄດ້ຮັບພອນທີ່ພຣະອົງໄດ້ສັນຍາໄວ້.
ຄວາມຈິງທີ່ໃຫ້ຄວາມໝັ້ນໃຈນີ້ ມີພື້ນຖານຢູ່ໃນຫລັກທຳສາມຂໍ້ທີ່ພົບເຫັນໃນພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດ:
-
ພຣະເຈົ້າຮັກເຮົາແຕ່ລະຄົນຢ່າງສົມບູນແບບ. “ພຣະອົງຈະເຊື້ອເຊີນ [ເຮົາ] ທັງໝົດໃຫ້ເຂົ້າມາຫາພຣະອົງ; ແລະ ຮັບສ່ວນພຣະກະລຸນາທິຄຸນຂອງພຣະອົງ.” ແຜນແຫ່ງການໄຖ່ຂອງພຣະອົງເຮັດໃຫ້ແນ່ໃຈວ່າ ທຸກຄົນ, ໂດຍບໍ່ມີຂໍ້ຍົກເວັ້ນ, ຈະໄດ້ຮັບໂອກາດອັນທ່ຽງທຳໃຫ້ຮັບພອນແຫ່ງຄວາມລອດ ແລະ ຄວາມສູງສົ່ງໃນມື້ໜຶ່ງ.
-
ເພາະພຣະເຈົ້າຊົງທ່ຽງທຳ ແລະ ຊົງເມດຕາ ແລະ ແຜນຂອງພຣະອົງນັ້ນ ສົມບູນແບບ, ພຣະອົງຈະບໍ່ໃຫ້ເຮົາຮັບຜິດຊອບສິ່ງທີ່ຢູ່ເໜືອການຄວບຄຸມຂອງເຮົາ. ແອວເດີ ນຽວ ເອ ແມ໊ກສະແວວ ໄດ້ອະທິບາຍວ່າ “ພຣະເຈົ້າ … ຄຳນຶງເຖິງດ້ວຍພຣະເມດຕາ ບໍ່ແມ່ນພຽງແຕ່ຄວາມປາດຖະໜາ ແລະ ຜົນງານຂອງເຮົາເທົ່ານັ້ນ, ແຕ່ຄຳນຶງເຖິງລະດັບຄວາມຍາກ ຊຶ່ງສະພາບການອັນຫລາກຫລາຍຂອງເຮົາບັງຄັບໃຫ້ເຮົາປະເຊີນ.”
-
ຜ່ານທາງພຣະເຢຊູຄຣິດ ແລະ ການຊົດໃຊ້ຂອງພຣະອົງ, ເຮົາສາມາດພົບກຳລັງເພື່ອທີ່ຈະອົດທົນ ແລະ ທ້າຍທີ່ສຸດ ເອົາຊະນະຄວາມທ້າທາຍທັງໝົດຂອງຊີວິດໄດ້. ດັ່ງທີ່ແອວມາໄດ້ສິດສອນ, ພຣະຜູ້ຊ່ວຍໃຫ້ລອດບໍ່ໄດ້ຮັບເອົາພຽງແຕ່ບາບຂອງຄົນກັບໃຈເທົ່ານັ້ນມາໄວ້ກັບພຣະອົງ ແຕ່ຍັງຮັບເອົາ “ຄວາມເຈັບປວດ ແລະ ຄວາມປ່ວຍໄຂ້ຂອງຜູ້ຄົນຂອງພຣະອົງ” ແລະ “ພຣະອົງຈະຮັບເອົາຄວາມບົກພ່ອງຂອງພວກເຂົາ” ນຳອີກ. ດັ່ງນັ້ນ, ນອກເໜືອຈາກການໄຖ່ເຮົາຈາກຄວາມຜິດພາດຂອງເຮົາແລ້ວ, ພຣະເມດຕາ ແລະ ພຣະຄຸນຂອງພຣະຜູ້ເປັນເຈົ້າຄໍ້າຈູນເຮົາຜ່ານຜ່າຄວາມບໍ່ຍຸດຕິທຳ, ຄວາມຂາດຕົກບົກພ່ອງ, ແລະ ຂໍ້ຈຳກັດຕ່າງໆທີ່ບັງຄັບເຮົາໃນປະສົບການມະຕະຂອງເຮົາ.
ການຮັບພອນຊົດເຊີຍເຫລົ່ານີ້ ມາພ້ອມກັບເງື່ອນໄຂໃດໜຶ່ງ. ພຣະຜູ້ເປັນເຈົ້າຂໍໃຫ້ເຮົາເຮັດ “ທຸກຢ່າງໄດ້ແລ້ວ” ແລະ ໃຫ້ “ຖວາຍທັງຈິດວິນຍານຂອງ [ພວກເຮົາ] ເປັນເຄື່ອງບູຊາແດ່ພຣະອົງ.” ສິ່ງນີ້ຮຽກຮ້ອງຄວາມປາດຖະໜາອັນເລິກເຊິ່ງ, ຫົວໃຈທີ່ຈິງໃຈ ແລະ ຊື່ສັດ, ແລະ ຄວາມພາກພຽນສູງສຸດໃນການຮັກສາພຣະບັນຍັດຂອງພຣະອົງ ແລະ ເຮັດໃຫ້ຄວາມປະສົງຂອງເຮົາສອດຄ່ອງກັບພຣະປະສົງຂອງພຣະອົງ.
ເມື່ອຄວາມພະຍາຍາມທີ່ເອົາຈິງເອົາຈັງຂອງເຮົາບໍ່ສຳເລັດຕາມຄວາມປາດຖະໜາຂອງເຮົາ ເນື່ອງຈາກສະພາບການທີ່ຢູ່ເໜືອການຄວບຄຸມຂອງເຮົາ, ພຣະຜູ້ເປັນເຈົ້າຍັງຄົງຍອມຮັບຄວາມປາດຖະໜາຂອງຫົວໃຈເຮົາວ່າເປັນເຄື່ອງບູຊາທີ່ມີຄ່າຄວນ. ປະທານ ດາລິນ ເອັຈ ໂອກສ໌ ໄດ້ສິດສອນວ່າ, “ເຮົາຈະໄດ້ຮັບພອນສຳລັບຄວາມປາດຖະໜາຂອງຫົວໃຈເຮົາ ເຖິງແມ່ນວ່າສະພາບການພາຍນອກຈະເຮັດໃຫ້ມັນເປັນໄປບໍ່ໄດ້ສຳລັບເຮົາທີ່ຈະລົງມືປະຕິບັດຕາມຄວາມປາດຖະໜາເຫລົ່ານັ້ນ.”
ດັ່ງທີ່ສາດສະດາໂຈເຊັບ ສະມິດ ໄດ້ກັງວົນກ່ຽວກັບແອລ໌ວິນ ອ້າຍຂອງເພິ່ນ, ຜູ້ທີ່ໄດ້ຕາຍໄປໂດຍບໍ່ໄດ້ຮັບພິທີການພຣະກິດຕິຄຸນທີ່ສຳຄັນ, ເພິ່ນໄດ້ຮັບການເປີດເຜີຍທີ່ປອບໂຍນນີ້: “ຜູ້ຄົນທັງປວງທີ່ຈະຕາຍນັບແຕ່ນີ້ເປັນຕົ້ນໄປປາດສະຈາກຄວາມຮູ້ເຖິງ [ພຣະກິດຕິຄຸນ] ກໍຄືກັນ, ຜູ້ທີ່ຈະຮັບມັນໄວ້ດ້ວຍສຸດໃຈຂອງພວກເຂົາ, ຈະເປັນທາຍາດຂອງ [ອານາຈັກຊັ້ນສູງຂອງພຣະເຈົ້າ].” ແລ້ວພຣະຜູ້ເປັນເຈົ້າໄດ້ກ່າວຕື່ມອີກວ່າ, “ເພາະເຮົາ, ພຣະຜູ້ເປັນເຈົ້າ, ຈະພິພາກສາມະນຸດທັງປວງຕາມວຽກງານຂອງພວກເຂົາ, ຕາມຄວາມປາດຖະໜາຂອງໃຈຂອງພວກເຂົາ.”
ສິ່ງທີ່ສຳຄັນສຳລັບພຣະຜູ້ເປັນເຈົ້າ ບໍ່ແມ່ນພຽງແຕ່ວ່າ ເຮົາ ສາມາດ ເຮັດໄດ້ຫລືບໍ່, ແຕ່ແມ່ນວ່າເຮົາ ເຕັມໃຈ ທີ່ຈະເຮັດທຸກສິ່ງທີ່ເຮົາເຮັດໄດ້ເພື່ອຕິດຕາມພຣະອົງໃນຖານະພຣະຜູ້ຊ່ວຍໃຫ້ລອດຂອງເຮົາ.
ຄັ້ງໜຶ່ງ ໝູ່ຄົນໜຶ່ງໄດ້ປອບໂຍນຜູ້ສອນສາດສະໜາໜຸ່ມຄົນໜຶ່ງທີ່ໂສກເສົ້າຍ້ອນການປົດກ່ອນກຳນົດ ເນື່ອງຈາກເຫດຜົນທາງສຸຂະພາບ, ເຖິງແມ່ນວ່າລາວຈະອະທິຖານຢ່າງຈິງໃຈ ແລະ ມີຄວາມປາດຖະໜາທີ່ຮ້ອນຮົນທີ່ສຸດທີ່ຈະຮັບໃຊ້. ເພື່ອນຄົນນີ້ໄດ້ແບ່ງປັນຂໍ້ພຣະຄຳພີທີ່ພຣະຜູ້ເປັນເຈົ້າໄດ້ປະກາດວ່າ ເມື່ອລູກໆຂອງພຣະອົງ “ເຮັດດ້ວຍສຸດກຳລັງຂອງພວກເຂົາ” ແລະ “ບໍ່ລົດລະຄວາມພາກພຽນ” ເພື່ອເຮັດໃຫ້ພຣະບັນຍັດຂອງພຣະອົງສຳເລັດຄົບຖ້ວນ, “ແລະ ສັດຕູຂອງພວກເຂົາ [ຊຶ່ງອາດລວມທັງສະພາບການທີ່ບໍ່ພຶງປະສົງໃນຊີວິດເຮົາ] ຂັດຂວາງພວກເຂົາຈາກການເຮັດວຽກງານນັ້ນ, ຈົ່ງເບິ່ງ, ເຮົາເຫັນສົມຄວນທີ່ຈະບໍ່ຮຽກຮ້ອງວຽກງານນັ້ນອີກຕໍ່ໄປຈາກມືຂອງ [ຜູ້ຄົນ] ເຫລົ່ານັ້ນຂອງມະນຸດ, ແຕ່ຈະ ຍອມຮັບເຄື່ອງຖວາຍຂອງພວກເຂົາ.”
ໝູ່ຂອງຂ້າພະເຈົ້າໄດ້ເປັນພະຍານຕໍ່ຊາຍໜຸ່ມຄົນນີ້ວ່າ ພຣະເຈົ້າຮູ້ວ່າ ລາວໄດ້ເຮັດດີທີ່ສຸດແລ້ວ ໃນການຕອບການເອີ້ນໃຫ້ຮັບໃຊ້. ລາວໄດ້ຮັບຮອງກັບລາວວ່າ ພຣະຜູ້ເປັນເຈົ້າໄດ້ຍອມຮັບເຄື່ອງບູຊາຂອງລາວ ແລະ ວ່າພອນຕ່າງໆທີ່ໄດ້ສັນຍາໄວ້ກັບຜູ້ສອນສາດສະໜາທີ່ຊື່ສັດທຸກຄົນຈະບໍ່ຖືກກັກໄວ້.
ພອນຊົດເຊີຍຂອງພຣະຜູ້ເປັນເຈົ້າມັກຈະມາເຖິງຜ່ານທາງຄວາມເມດຕາ ແລະ ການຮັບໃຊ້ຂອງຄົນອື່ນ ຜູ້ທີ່ຊ່ວຍເຮົາບັນລຸສິ່ງທີ່ເຮົາບໍ່ສາມາດເຮັດໄດ້ດ້ວຍຕົວຂອງເຮົາເອງ. ຂ້າພະເຈົ້າຈື່ເວລາໜຶ່ງໄດ້ ຕອນທີ່ອາໄສຢູ່ໄກຈາກລູກສາວຄົນໜຶ່ງຂອງພວກເຮົາໃນປະເທດຝຣັ່ງ, ພວກເຮົາໄດ້ຮູ້ສຶກໝົດຫົນທາງທີ່ຈະຊ່ວຍເຫລືອນາງ ຫລັງຈາກການເກີດລູກທີ່ຍາກລຳບາກ. ໃນອາທິດດຽວກັນນັ້ນ ຫວອດຂອງພວກເຮົາໃນຢູທາໄດ້ຊອກຫາຄວາມຊ່ວຍເຫລືອສຳລັບແມ່ຜູ້ທີ່ຫາກໍເກີດລູກແຝດ. ພັນລະຍາຂອງຂ້າພະເຈົ້າ, ວາເລຣີ, ໄດ້ອາສາສະໝັກທີ່ຈະນຳອາຫານໄປໃຫ້ນາງ, ພ້ອມດ້ວຍຄຳອະທິຖານໃນໃຈຂອງນາງເພື່ອທັງແມ່ມືໃໝ່ຄົນນີ້ ແລະ ລູກສາວຂອງພວກເຮົາທີ່ຂັດສົນ. ບໍ່ດົນຫລັງຈາກນັ້ນ, ພວກເຮົາໄດ້ຮູ້ວ່າ ເອື້ອຍນ້ອງທັງຫລາຍທີ່ຢູ່ໃນຫວອດຂອງລູກສາວຂອງເຮົາໃນປະເທດຝຣັ່ງ ໄດ້ຈັດກຽມອາຫານສຳລັບຄອບຄົວຂອງນາງ. ສຳລັບພວກເຮົາແລ້ວ, ພຣະເຈົ້າໄດ້ຕອບຄຳອະທິຖານຂອງພວກເຮົາ, ໂດຍສົ່ງທູດສະຫວັນຂອງພຣະອົງມາ ເພື່ອນຳເອົາການປອບໂຍນມາໃຫ້ ເມື່ອເຮົາບໍ່ສາມາດເຮັດໄດ້.
ເມື່ອເຮົາປະເຊີນກັບຂໍ້ຈຳກັດ ແລະ ຄວາມທ້າທາຍຕ່າງໆ, ເຮົາອາດຮັບຮູ້ພອນຂອງ ເຮົາເອງ —ພອນສະຫວັນ, ຊັບພະຍາກອນ, ແລະ ເວລາຂອງເຮົາ—ແລະ ໃຊ້ມັນເພື່ອຮັບໃຊ້ຄົນທີ່ຕ້ອງການຄວາມຊ່ວຍເຫລືອ. ໃນການເຮັດເຊັ່ນນັ້ນ, ເຮົາຈະບໍ່ພຽງແຕ່ເປັນພອນໃຫ້ຄົນອື່ນເທົ່ານັ້ນ ແຕ່ຈະເຊື້ອເຊີນການປິ່ນປົວ ແລະ ການຊົດເຊີຍເຂົ້າມາໃນຊີວິດເຮົາ.
ໜຶ່ງໃນວິທີທີ່ຊົງພະລັງທີ່ສຸດທີ່ເຮົາຈະສາມາດປະກອບສ່ວນໃນພອນຊົດເຊີຍຂອງພຣະເຈົ້າ ແມ່ນຜ່ານທາງວຽກງານທີ່ເຮົາເຮັດແທນເພື່ອບັນພະບຸລຸດຂອງເຮົາໃນບ້ານຂອງພຣະຜູ້ເປັນເຈົ້າ. ເມື່ອເຮົາປະກອບພິທີການແທນພວກເພິ່ນ, ເຮົາກໍເຂົ້າຮ່ວມໃນວຽກງານແຫ່ງຄວາມລອດອັນຍິ່ງໃຫຍ່ຂອງພຣະຜູ້ເປັນເຈົ້າ, ໂດຍໃຊ້ພອນສະຫວັນ ແລະ ຄວາມສາມາດຂອງເຮົາເພື່ອເປັນພອນໃຫ້ກັບຜູ້ທີ່ບໍ່ໄດ້ມີໂອກາດທີ່ຈະຮັບມັນໃນຊ່ວງຊີວິດມະຕະຂອງພວກເພິ່ນ.
ການຮັບໃຊ້ທີ່ມີຄວາມຮັກທີ່ເຮົາຖວາຍໃນພຣະວິຫານອັນສັກສິດ ຢໍ້າເຕືອນເຮົາວ່າ ພຣະຄຸນຂອງພຣະຜູ້ຊ່ວຍໃຫ້ລອດຂະຫຍາຍອອກໄປເໜືອຊີວິດນີ້. ໃນຊີວິດທີ່ຈະມາເຖິງ, ເຮົາອາດໄດ້ຮັບໂອກາດໃໝ່ໆທີ່ຈະບັນລຸສິ່ງທີ່ເຮົາບໍ່ສາມາດເຮັດໄດ້ໃນຊີວິດມະຕະນີ້. ເມື່ອກ່າວກັບເອື້ອຍນ້ອງຜູ້ທີ່ບໍ່ທັນໄດ້ພົບກັບຄູ່ຊີວິດນິລັນດອນ, ປະທານໂລເຣັນໂຊ ສະໂນ ໄດ້ກ່າວດ້ວຍຄວາມຮັກວ່າ: “ບໍ່ມີໄພ່ພົນຍຸກສຸດທ້າຍຄົນໃດທີ່ຕາຍໄປຫລັງຈາກທີ່ໄດ້ໃຊ້ຊີວິດຢ່າງຊື່ສັດຈະສູນເສຍສິ່ງໃດ ເພາະບໍ່ມີໂອກາດໄດ້ເຮັດສິ່ງໃດສິ່ງໜຶ່ງ ເມື່ອໂອກາດບໍ່ໄດ້ເອື້ອອຳນວຍສຳລັບພວກເຂົາ. … ພວກເຂົາຈະໄດ້ຮັບພອນທັງໝົດ, ຄວາມສູງສົ່ງ ແລະ ລັດສະໝີພາບທີ່ຊາຍ ຫລື ຍິງຄົນໃດໆທີ່ໄດ້ຮັບໂອກາດນີ້ຈະໄດ້ຮັບ.”
ຂ່າວສານແຫ່ງຄວາມຫວັງ ແລະ ການປອບໂຍນນີ້ ແມ່ນສຳລັບເຮົາທຸກຄົນ, ລູກໆຂອງພຣະເຈົ້າ. ບໍ່ມີໃຜໃນພວກເຮົາທີ່ຈະສາມາດໜີພົ້ນຄວາມທ້າທາຍ ແລະ ຂໍ້ຈຳກັດແຫ່ງຄວາມເປັນມະຕະໄດ້. ເຖິງຢ່າງໃດ, ເຮົາທຸກຄົນຕ່າງກໍເກີດມາພ້ອມກັບຄວາມບໍ່ສາມາດຊ່ວຍຕົວເອງໃຫ້ລອດໄດ້ໂດຍກຳເນີດ. ແຕ່ເຮົາມີພຣະຜູ້ຊ່ວຍໃຫ້ລອດທີ່ມີຄວາມຮັກ, ແລະ “ພວກເຮົາຮູ້ວ່າ ຫລັງຈາກພວກເຮົາເຮັດທຸກຢ່າງໄດ້ແລ້ວ ໂດຍພຣະຄຸນ [ຂອງພຣະອົງ] ພວກເຮົາຈຶ່ງລອດ.”
ຂ້າພະເຈົ້າເປັນພະຍານວ່າ ຂະນະທີ່ຫລາຍໆສະພາບການໃນຊີວິດອາດຢູ່ເໜືອການຄວບຄຸມຂອງເຮົາ, ບໍ່ມີໃຜໃນພວກເຮົາຢູ່ເໜືອການເອື້ອມເຖິງພອນອັນບໍ່ມີຂອບເຂດຂອງພຣະຜູ້ຊ່ວຍໃຫ້ລອດ. ຜ່ານທາງການເສຍສະລະຊົດໃຊ້ຂອງພຣະອົງ, ພຣະຜູ້ຊ່ວຍໃຫ້ລອດຈະຊົດເຊີຍທຸກໆຄວາມບໍ່ສາມາດ ແລະ ຄວາມບໍ່ຍຸດຕິທຳ ຖ້າເຮົາຖວາຍທັງຈິດວິນຍານຂອງເຮົາໃຫ້ແກ່ພຣະອົງ. ໃນພຣະນາມຂອງພຣະເຢຊູຄຣິດ, ອາແມນ.