ບໍລິບູນທາງວິນຍານໃນພຣະອົງ
ຄວາມບໍລິບູນບໍ່ໄດ້ໝາຍເຖິງການຟື້ນຟູທາງຮ່າງກາຍ ແລະ ທາງຈິດໃຈໃນຊີວິດນີ້. ຄວາມບໍລິບູນໄດ້ເກີດຈາກສັດທາໃນ ແລະ ການປ່ຽນໃຈເຫລື້ອມໃສຕໍ່ພຣະເຢຊູຄຣິດ.
ຄົນຂີ້ທູດສິບຄົນໄດ້ຮ້ອງທູນຕໍ່ພຣະຜູ້ຊ່ວຍໃຫ້ລອດວ່າ, “ໂຜດເມດຕາພວກຂ້ານ້ອຍແດ່ທ້ອນ.” ແລະ ພຣະເຢຊູກໍໄດ້ເຮັດ. ພຣະອົງໄດ້ບອກໃຫ້ພວກເຂົາໄປສະແດງຕົວຕໍ່ປະໂລຫິດ, ແລະ ເມື່ອພວກເຂົາໄປ, ພວກເຂົາກໍໄດ້ສະອາດຈາກພະຍາດ.
ແລະ ຄົນໜຶ່ງໃນພວກເຂົາ, ເມື່ອເຫັນວ່າຕົນດີສະອາດແລ້ວ, ກໍໄດ້ຮ້ອງຂຶ້ນສັນລະເສີນພຣະເຈົ້າ. ລາວໄດ້ກັບໄປຫາພຣະຜູ້ຊ່ວຍໃຫ້ລອດ, ກາບລົງທີ່ພຣະບາດຂອງພຣະອົງ, ແລະ ສະແດງຄວາມກະຕັນຍູ.
ແລະ ພຣະຜູ້ຊ່ວຍໃຫ້ລອດໄດ້ກ່າວກັບລາວຜູ້ຂອບຄຸນວ່າ, “[ສັດທາ] ຂອງເຈົ້າໄດ້ເຮັດໃຫ້ເຈົ້າດີແລ້ວ.”
ພຣະເຢຊູຄຣິດໄດ້ປິ່ນປົວຄົນຂີ້ທູດສິບຄົນ. ແຕ່ຜູ້ໜຶ່ງ, ທີ່ໄດ້ກັບຄືນມາຫາພຣະຜູ້ຊ່ວຍໃຫ້ລອດ, ໄດ້ຮັບບາງສິ່ງເພີ່ມເຕີມ. ລາວຖືກເຮັດໃຫ້ບໍລິບູນ.
ຄົນຂີ້ທູດເກົ້າຄົນໄດ້ຮັບການປິ່ນປົວທາງຮ່າງກາຍ.
ຄົນໜຶ່ງໄດ້ຮັບການປິ່ນປົວທາງຮ່າງກາຍ ແລະ ບໍລິບູນທາງວິນຍານ.
ເມື່ອພິຈາລະນາກ່ຽວກັບເລື່ອງນີ້, ຂ້າພະເຈົ້າສົງໄສວ່າ ສິ່ງທີ່ກົງກັນຂ້າມເປັນຄວາມຈິງຫລືບໍ່. ຖ້າຫາກການປິ່ນປົວ ແລະ ຄວາມບໍລິບູນບໍ່ແມ່ນສິ່ງດຽວກັນ, ບຸກຄົນສາມາດຖືກເຮັດໃຫ້ບໍລິບູນທາງວິນຍານໂດຍພຣະອົງ ແຕ່ຍັງບໍ່ສາມາດຮັບການປິ່ນປົວທາງຮ່າງກາຍ ແລະ ທາງຈິດໃຈໄດ້ຫລືບໍ່?
ພຣະອາຈານຜູ້ປິ່ນປົວຈະປິ່ນປົວຄວາມທຸກທັງໝົດຂອງເຮົາ—ທັງທາງຮ່າງກາຍ ແລະ ຈິດໃຈ—ໃນເວລາຂອງພຣະອົງ. ແຕ່ໃນຂະນະທີ່ລໍຖ້າການປິ່ນປົວ, ບຸກຄົນສາມາດບໍລິບູນໄດ້ຫລືບໍ່?
ການມີຄວາມບໍລິບູນທາງວິນຍານໝາຍຄວາມວ່າແນວໃດ?
ເຮົາມີຄວາມບໍລິບູນໃນພຣະເຢຊູຄຣິດເມື່ອເຮົາໃຊ້ອຳເພີໃຈຂອງເຮົາ ທີ່ຈະຕິດຕາມພຣະອົງດ້ວຍສັດທາ, ຍອມຈຳນົນໃຈຂອງເຮົາຕໍ່ພຣະອົງ ເພື່ອໃຫ້ພຣະອົງສາມາດປ່ຽນແປງມັນ, ຮັກສາພຣະບັນຍັດຂອງພຣະອົງ, ແລະ ເຂົ້າສູ່ພັນທະສັນຍາກັບພຣະອົງ, ອົດທົນຢ່າງອ່ອນໂຍນ ແລະ ຮຽນຮູ້ຈາກຄວາມທ້າທາຍຂອງສະຖານະທາງໂລກ ຈົນກວ່າເຮົາຈະກັບຄືນສູ່ທີ່ປະທັບຂອງພຣະອົງ ແລະ ໄດ້ຮັບການປິ່ນປົວໃນທຸກວິທີທາງ. ຂ້າພະເຈົ້າສາມາດບໍລິບູນ ໃນຂະນະທີ່ຂ້າພະເຈົ້າລໍຖ້າສຳລັບການປິ່ນປົວ ຖ້າຫາກວ່າຂ້າພະເຈົ້າມີຄວາມສຳພັນກັບພຣະອົງດ້ວຍສຸດໃຈ.
ສັດທາໃນພຣະເຢຊູຄຣິດກໍ່ໃຫ້ເກີດຄວາມຫວັງ. ຂ້າພະເຈົ້າສາມາດພົບຄວາມຫວັງໃນການພະຍາຍາມເປັນຄົນບໍລິບູນ—ຄວາມບໍລິບູນທີ່ເກີດຈາກສັດທາໃນພຣະເຢຊູຄຣິດ. ສັດທາໃນພຣະອົງເພີ່ມຄວາມຫວັງໃຫ້ຂ້າພະເຈົ້າສຳລັບການປິ່ນປົວ, ແລະ ວ່າຄວາມຫວັງນັ້ນເສີມສັດທາຂອງຂ້າພະເຈົ້າໃນພຣະເຢຊູຄຣິດ. ມັນເປັນວົງວຽນທີ່ມີພະລັງ.
ພຣະຜູ້ເປັນເຈົ້າໄດ້ບອກກັບເອໂນດວ່າ ສັດທາຂອງເພິ່ນໄດ້ເຮັດໃຫ້ເພິ່ນ “ບໍລິບູນ.” ຄວາມບໍລິບູນໄດ້ເກີດຂຶ້ນເມື່ອເອໂນດໄຕ່ຕອງຄຳເວົ້າຂອງຢາໂຄບ ບິດາຂອງເພິ່ນທີ່ເປັນສາດສະດາ, ຂະນະທີ່ເພິ່ນຫິວໂຫຍທີ່ຈະເຂົ້າໃຈໂອກາດສຳລັບຊີວິດນິລັນດອນ, ຂະນະທີ່ເພິ່ນຮ້ອງຫາພຣະຜູ້ເປັນເຈົ້າໃນການອະທິຖານທີ່ມີພະລັງ. ແລະ ໃນສະພາວະແຫ່ງຄວາມປາດຖະໜາ ແລະ ຄວາມຖ່ອມຕົນນັ້ນ, ສຸລະສຽງຂອງພຣະຜູ້ເປັນເຈົ້າໄດ້ມາເຖິງເພິ່ນ, ປະກາດວ່າບາບຂອງເພິ່ນໄດ້ຮັບການອະໄພແລ້ວ. ແລະ ເອໂນດໄດ້ທູນຖາມພຣະຜູ້ເປັນເຈົ້າ, “ມັນເປັນໄປໄດ້ແນວໃດ?” ແລະ ພຣະຜູ້ເປັນເຈົ້າໄດ້ຕອບວ່າ, “ເພາະສັດທາຂອງເຈົ້າໃນພຣະຄຣິດ, … ສັດທາຂອງເຈົ້າເຮັດໃຫ້ເຈົ້າບໍລິບູນແລ້ວ.”
ຜ່ານທາງສັດທາຂອງເຮົາໃນພຣະເຢຊູຄຣິດ, ເຮົາສາມາດສະແຫວງຫາຄວາມບໍລິບູນທາງວິນຍານໃນຂະນະທີ່ເຮົາລໍຖ້າ ແລະ ຫວັງວ່າຈະໄດ້ຮັບການປິ່ນປົວທາງຮ່າງກາຍ ແລະ ທາງຈິດໃຈ.
ດ້ວຍຄຸນນະທຳຂອງການເສຍສະລະຊົດໃຊ້ຂອງພຣະອົງ, ແລະ ເມື່ອເຮົາກັບໃຈຢ່າງຈິງໃຈ, ພຣະຜູ້ຊ່ວຍໃຫ້ລອດຈະປິ່ນປົວເຮົາຈາກບາບ, ເຊັ່ນດຽວກັບທີ່ພຣະອົງໄດ້ກະທຳກັບເອໂນດ. ການຊົດໃຊ້ອັນບໍ່ມີຂອບເຂດຂອງພຣະອົງ ກໍຍັງເຂົ້າເຖິງຄວາມໂສກເສົ້າ ແລະ ຄວາມເສຍໃຈຂອງເຮົານຳອີກ.
ແຕ່ພຣະອົງອາດບໍ່ໃຫ້ການປິ່ນປົວຈາກຄວາມເຈັບປ່ວຍ ແລະ ພະຍາດ—ຄວາມເຈັບປວດຊຳເຮື້ອ, ຄວາມຜິດປົກກະຕິຂອງພູມຕ້ານທານ ເຊັ່ນ ໂຣກປອກປະສາດເສື່ອມ, ມະເລັງ, ຄວາມວິຕົກກັງວົນ, ພາວະຊຶມເສົ້າ, ແລະ ອື່ນໆ. ການຮັກສາແບບນັ້ນຢູ່ໃນເວລາຂອງພຣະຜູ້ເປັນເຈົ້າ. ແລະ ໃນລະຫວ່າງນີ້, ເຮົາສາມາດເລືອກທີ່ຈະຮັບການປິ່ນປົວໃຫ້ບໍລິບູນ ໂດຍການໃຊ້ສັດທາໃນພຣະອົງ!
ການເປັນຄົນບໍລິບູນໝາຍເຖິງການເປັນຄົນສົມບູນ ແລະ ເຕັມປ່ຽມ. ເໝືອນດັ່ງຍິງສາວບໍລິສຸດຫ້າຄົນ ທີ່ມີໂຄມໄຟເຕັມດ້ວຍນ້ຳມັນ ເມື່ອເຈົ້າບ່າວມາ, ເຮົາກໍສາມາດບໍລິບູນໄດ້ໃນພຣະເຢຊູຄຣິດ ເມື່ອເຮົາຕື່ມນ້ຳມັນບຳລຸງໂຄມໄຟຂອງເຮົາ ດ້ວຍນ້ຳມັນແຫ່ງການປ່ຽນໃຈເຫລື້ອມໃສໃນພຣະອົງ. ດ້ວຍວິທີນັ້ນ, ເຮົາໄດ້ກຽມພ້ອມສຳລັບງານລ້ຽງສົມຣົດ ຊຶ່ງເປັນສັນຍາລັກຂອງການສະເດັດມາຄັ້ງທີສອງຂອງພຣະອົງ.
ໃນຄຳອຸປະມາ ຍິງສາວບໍລິສຸດທັງສິບຄົນໄດ້ຢູ່ໃນບ່ອນທີ່ເໝາະສົມ, ກຳລັງລໍຖ້າເຈົ້າບ່າວ. ແຕ່ລະຄົນໄດ້ມາກັບໂຄມໄຟຂອງຕົນ.
ແຕ່ເມື່ອພຣະອົງສະເດັດມາ, ໃນເວລາທ່ຽງຄືນທີ່ບໍ່ຄາດຄິດ, ຄົນໂງ່ຫ້າຄົນບໍ່ມີນ້ຳມັນພຽງພໍສຳລັບໂຄມໄຟຂອງຕົນ. ພວກເຂົາບໍ່ໄດ້ຖືກບັນຍາຍວ່າເປັນຄົນຊົ່ວຮ້າຍ ແຕ່ກັບເປັນຄົນໂງ່. ຄົນໂງ່ບໍ່ໄດ້ກະກຽມຢ່າງພຽງພໍ ເພື່ອຮັກສາໂຄມໄຟຂອງຕົນດ້ວຍນ້ຳມັນແຫ່ງການປ່ຽນໃຈເຫລື້ອມໃສ.
ແລະ ສະນັ້ນ, ໃນຄຳຕອບຕໍ່ການຂໍອະນຸຍາດໃຫ້ເຂົ້າໄປຮ່ວມງານລ້ຽງສົມຣົດ, ເຈົ້າບ່າວໄດ້ຕອບວ່າ, “ເຈົ້າບໍ່ຮູ້ຈັກເຮົາ.”
ດັ່ງນັ້ນ, ຈຶ່ງໝາຍຄວາມວ່າ ຍິງສາວບໍລິສຸດທີ່ສະຫລາດຫ້າຄົນ ໄດ້ ຮູ້ຈັກພຣະອົງ. ພວກເຂົາຖືກເຮັດໃຫ້ບໍລິບູນໃນພຣະອົງ.
ໂຄມໄຟຂອງພວກເຂົາເຕັມດ້ວຍນ້ຳມັນອັນລ້ຳຄ່າແຫ່ງການປ່ຽນໃຈເຫລື້ອມໃສ ຊຶ່ງອະນຸຍາດໃຫ້ຍິງສາວບໍລິສຸດທີ່ສະຫລາດເຂົ້າໄປໃນງານລ້ຽງສົມຣົດ ຢູ່ເບື້ອງຂວາຂອງເຈົ້າບ່າວ.
ດັ່ງທີ່ກ່າວໂດຍພຣະຜູ້ຊ່ວຍໃຫ້ລອດ, “ຈົ່ງຊື່ສັດ, ຈົ່ງອະທິຖານສະເໝີ, ຕັດໄສ້ຕະກຽງຂອງເຈົ້າ ແລະ ໃຫ້ມັນລຸກຢູ່, ແລະ ມີນ້ຳມັນຢູ່ນຳເຈົ້າ, ເພື່ອວ່າເຈົ້າຈະຕຽມພ້ອມໃນການສະເດັດມາຂອງ ເຈົ້າບ່າວ.”
Five Wise Virgins [ຍິງສາວບໍລິສຸດທີ່ສະຫລາດຫ້າຄົນ], ໂດຍ ເບັນ ແຮມມອນ
ເມື່ອບໍ່ດົນມານີ້ ຮູບປັ້ນທີ່ສວຍງາມທີ່ພັນລະນາເຖິງ ຍິງສາວບໍລິສຸດທີ່ສະຫລາດຫ້າຄົນ ໄດ້ຖືກວາງໄວ້ທີ່ບໍລິເວນພຣະວິຫານ ຢູ່ນອກປະຕູອາຄານສະມາຄົມສະຕີສົງເຄາະ ແລະ ໃນຮົ່ມເງົາຂອງພຣະວິຫານເຊົາເລັກ.
ມັນເປັນສະຖານທີ່ທີ່ເໝາະສົມທີ່ຈະໃຊ້ຄຳອຸປະມາໄດ້. ເພາະວ່າເມື່ອເຮົາເຮັດ ແລະ ຮັກສາພັນທະສັນຍາ, ໂດຍສະເພາະສິ່ງທີ່ມີຢູ່ໃນບ້ານຂອງພຣະຜູ້ເປັນເຈົ້າ, ເຮົາຈະເຕີມນ້ຳມັນແຫ່ງການປ່ຽນໃຈເຫລື້ອມໃສລົງໃນໂຄມໄຟຂອງເຮົາ.
ເຖິງແມ່ນຜູ້ຍິງທີ່ເປັນຕົວແທນໃຫ້ແກ່ຍິງສາວບໍລິສຸດທີ່ສະຫລາດຫ້າຄົນ ບໍ່ໄດ້ແບ່ງປັນນ້ຳມັນແຫ່ງການປ່ຽນໃຈເຫລື້ອມໃສຂອງຕົນ, ແຕ່ພວກເຂົາໄດ້ແບ່ງປັນຄວາມສະຫວ່າງຂອງພວກເຂົາ ໃນຂະນະທີ່ພວກເຂົາຖືໂຄມໄຟ, ຊຶ່ງເຕັມໄປດ້ວຍນ້ຳມັນ ແລະ ສ່ອງສະຫວ່າງຢ່າງສົດໃສ. ທີ່ສຳຄັນ ພວກເຂົາຖືກພັນລະນາເຖິງການສະໜັບສະໜູນກັນແລະກັນ—ຢືນຄຽງຂ້າງກັນ, ໂອບແຂນກັນ, ສົບຕາກັນ ແລະ ກວັກມືໃຫ້ຄົນອື່ນມາຫາແສງສະຫວ່າງ.
ແນ່ນອນ, “[ເຮົາ] ເປັນແສງສະຫວ່າງສຳລັບໂລກນີ້.” ພຣະຜູ້ຊ່ວຍໃຫ້ລອດໄດ້ປະກາດວ່າ:
“ເຮົາບັນຊາໃຫ້ເຈົ້າເປັນແສງສະຫວ່າງໃຫ້ແກ່ຜູ້ຄົນພວກນີ້. ເມືອງຊຶ່ງຕັ້ງຢູ່ເທິງໂນນພູກໍເປັນທີ່ບັງໄວ້ບໍ່ໄດ້.
“… [ເຮົາ] ໄຕ້ທຽນແລ້ວຈະເອົາກະບຸງມາກວມໄວ້ບໍ? ບໍ່ເລີຍ, ມີແຕ່ຈະຕັ້ງມັນໄວ້ເທິງບ່ອນຕັ້ງທຽນ ແລະ ມັນຈະສ່ອງແຈ້ງໄປທົ່ວທຸກຄົນທີ່ຢູ່ໃນເຮືອນນັ້ນ;
“ສະນັ້ນຈົ່ງໃຫ້ຄວາມສະຫວ່າງຂອງເຈົ້າສ່ອງເຊັ່ນນັ້ນຕໍ່ໜ້າຜູ້ຄົນພວກນີ້, ເພື່ອວ່າພວກເຂົາຈະເຫັນການດີຂອງເຈົ້າ ແລະ ຖວາຍບາລະມີແດ່ພຣະບິດາຂອງເຈົ້າຜູ້ສະຖິດຢູ່ໃນສະຫວັນ.”
ເຮົາຖືກບັນຊາໃຫ້ແບ່ງປັນຄວາມສະຫວ່າງຂອງພຣະອົງ. ສະນັ້ນ ຈົ່ງຮັກສາໂຄມໄຟຂອງທ່ານເຕັມດ້ວຍນ້ຳມັນແຫ່ງການປ່ຽນໃຈເຫລື້ອມໃສຕໍ່ພຣະເຢຊູຄຣິດ ແລະ ກຽມໂຄມໄຟຂອງທ່ານໃຫ້ພ້ອມ ແລະ ສ່ອງສະຫວ່າງຢູ່ສະເໝີ. ແລ້ວໃຫ້ແສງສະຫວ່າງສ່ອງແສງ. ເມື່ອເຮົາແບ່ງປັນແສງສະຫວ່າງຂອງເຮົາ, ເຮົາຈະນຳຄວາມບັນເທົາທຸກຂອງພຣະເຢຊູຄຣິດມາໃຫ້ຄົນອື່ນ, ການປ່ຽນໃຈເຫລື້ອມໃສຂອງເຮົາຕໍ່ພຣະອົງຈະເລິກເຊິ່ງຫລາຍຍິ່ງຂຶ້ນ, ແລະ ເຮົາຈະສາມາດບໍລິບູນ ແມ່ນແຕ່ໃນຂະນະທີ່ເຮົາລໍຖ້າການປິ່ນປົວ. ແລະ ເມື່ອເຮົາປ່ອຍໃຫ້ແສງສະຫວ່າງຂອງເຮົາສ່ອງແສງ, ເຮົາຈະສາມາດຊື່ນຊົມສະເໝີໃນຂະນະທີ່ເຮົາລໍຖ້າ.
ຕົວຢ່າງໜຶ່ງຈາກພຣະຄຳພີເປັນປະໂຫຍດໃນການເສີມສ້າງຫລັກທຳທີ່ເຮົາສາມາດບໍລິບູນ ໃນຂະນະທີ່ເຮົາປ່ຽນໃຈເຫລື້ອມໃສໃນພຣະເຢຊູຄຣິດ ແລະ ດຶງດູດຄວາມເຂັ້ມແຂງຈາກພຣະອົງ, ແມ່ນແຕ່ໃນຂະນະທີ່ເຮົາລໍຖ້າການປິ່ນປົວ.
ອັກຄະສາວົກໂປໂລໄດ້ມີຄວາມທຸກທໍລະມານບາງຢ່າງ—ສິ່ງທີ່ເພິ່ນບັນຍາຍວ່າເປັນ “ສ້ຽນໜາມໃນເນື້ອກາຍ,” ຊຶ່ງເພິ່ນໄດ້ທູນສາມຄັ້ງ ເພື່ອຂໍໃຫ້ພຣະຜູ້ເປັນເຈົ້າກຳຈັດມັນອອກໄປ. ແລະ ພຣະຜູ້ເປັນເຈົ້າໄດ້ກ່າວກັບໂປໂລວ່າ, “ພຣະຄຸນຂອງເຮົາກໍມີພໍແລ້ວສຳລັບເຈົ້າ: ດ້ວຍວ່າ ເມື່ອໃດທີ່ເຈົ້າອ່ອນແຮງ ເມື່ອນັ້ນລິດອຳນາດຂອງເຮົາກໍສະແດງອອກຢ່າງລົ້ນເຫລືອ.” ຕໍ່ສິ່ງນັ້ນໂປໂລໄດ້ປະກາດວ່າ:
“ດັ່ງນັ້ນ ເຮົາຈຶ່ງ … ພາກພູມໃຈໃນບັນດາຄວາມອ່ອນແຮງຂອງເຮົາກໍດີກວ່າ ເພື່ອວ່າລິດອຳນາດຂອງພຣະຄຣິດຈະຄຸ້ມຄອງປ້ອງກັນເຮົາໄວ້.
“ດ້ວຍເຫດນີ້ເຮົາຈຶ່ງຊື່ນໃຈໃນຄວາມອ່ອນແຮງ, … ໃນຄວາມຍາກລຳບາກ, ໃນການຖືກຂົ່ມເຫັງ, ແລະ ໃນຄວາມຍາກຈົນເພື່ອເຫັນແກ່ພຣະຄຣິດ: ດ້ວຍວ່າເຮົາອ່ອນແຮງເມື່ອໃດ, ເຮົາກໍເຂັ້ມແຂງຂຶ້ນເມື່ອນັ້ນ.”
ຕົວຢ່າງຂອງໂປໂລແນະນຳວ່າ ແມ່ນແຕ່ໃນຄວາມອ່ອນແອຂອງເຮົາ, ຄວາມເຂັ້ມແຂງຂອງເຮົາໃນພຣະເຢຊູຄຣິດກໍສາມາດດີພ້ອມໄດ້—ນັ້ນຄື, ສົມບູນ ແລະ ບໍລິບູນ. ຜູ້ທີ່ຕໍ່ສູ້ກັບການດີ້ນລົນໃນຊີວິດ ແລະ ຫັນມາຫາພຣະເຈົ້າໃນສັດທາຄືກັບໂປໂລ, ສາມາດໄດ້ຮັບພອນຂອງການໄດ້ຮູ້ຈັກກັບພຣະເຈົ້າ.
ໂປໂລບໍ່ໄດ້ຮັບການປິ່ນປົວຈາກຄວາມທຸກທໍລະມານຂອງເພິ່ນ, ແຕ່ເພິ່ນໄດ້ບໍລິບູນທາງວິນຍານໃນພຣະເຢຊູຄຣິດ. ແລະ ແມ່ນແຕ່ໃນຄວາມຍາກລຳບາກຂອງເພິ່ນ, ຄວາມສະຫວ່າງຂອງການປ່ຽນໃຈເຫລື້ອມໃສຕໍ່ ແລະ ຄວາມເຂັ້ມແຂງຂອງເພິ່ນຈາກພຣະເຢຊູຄຣິດກໍສ່ອງແສງ, ແລະ ເພິ່ນກໍມີຄວາມສຸກ. ໃນສານຂອງເພິ່ນເຖິງຊາວຟີລິບປອຍ, ເພິ່ນໄດ້ປະກາດວ່າ, “ຈົ່ງຊົມຊື່ນຍິນດີໃນພຣະຜູ້ເປັນເຈົ້າທຸກເວລາ: ເຮົາຂໍຢ້ຳອີກວ່າ ຈົ່ງຊົມຊື່ນຍິນດີ.”
ອ້າຍເອື້ອຍນ້ອງທັງຫລາຍ, ຄຳຕອບຄື ແມ່ນແລ້ວ, ເຮົາສາມາດບໍລິບູນທາງວິນຍານໄດ້, ແມ່ນແຕ່ໃນຂະນະທີ່ເຮົາລໍຖ້າການປິ່ນປົວທາງຮ່າງກາຍ ແລະ ທາງຈິດໃຈ. ຄວາມບໍລິບູນບໍ່ໄດ້ໝາຍເຖິງການຟື້ນຟູທາງຮ່າງກາຍ ແລະ ທາງຈິດໃຈໃນຊີວິດນີ້. ຄວາມບໍລິບູນໄດ້ເກີດຈາກສັດທາໃນ ແລະ ການປ່ຽນໃຈເຫລື້ອມໃສຕໍ່ພຣະເຢຊູຄຣິດ ແລະ ໃນການປ່ອຍໃຫ້ແສງສະຫວ່າງຂອງການປ່ຽນໃຈເຫລື້ອມໃສນັ້ນສ່ອງແສງ.
“ຫລາຍຄົນໄດ້ຖືກເອີ້ນ, ແຕ່ມີໜ້ອຍຄົນ [ທີ່ເລືອກທີ່ຈະ] ຖືກເລືອກ.”
ທຸກຄົນຈະໄດ້ຮັບການປິ່ນປົວທາງຮ່າງກາຍ ແລະ ທາງຈິດໃຈ ໃນການຟື້ນຄືນພຣະຊົນ. ແຕ່ທ່ານຈະເລືອກທີ່ຈະບໍລິບູນໃນພຣະອົງ ຕອນນີ້ ຫລືບໍ່?
ຂ້າພະເຈົ້າປະກາດດ້ວຍຄວາມຊື່ນຊົມວ່າຂ້າພະເຈົ້າໄດ້ປ່ຽນໃຈເຫລື້ອມໃສຕໍ່ອົງພຣະເຢຊູຄຣິດເຈົ້າ. ຂ້າພະເຈົ້າກຳລັງພະຍາຍາມໃຫ້ບໍລິບູນໃນພຣະອົງ. ຂ້າພະເຈົ້າແນ່ໃຈວ່າ ທຸກສິ່ງຈະຖືກຟື້ນຟູ ແລະ ການປິ່ນປົວຈະມາເຖິງ, ໃນເວລາຂອງພຣະອົງ, ເພາະພຣະອົງຊົງພຣະຊົນຢູ່.
ນາງມາຣີໄທມັກດາລາເປັນຜູ້ຍິງທີ່ໄດ້ຮັບການປິ່ນປົວຈາກພຣະເຢຊູຄຣິດ. ແລະ ນາງກໍເປັນຄົນທີ່ບໍລິບູນໃນພຣະເຢຊູຄຣິດ. ໃນຖານະສານຸສິດຂອງພຣະອົງ, ນາງໄດ້ຕິດຕາມພຣະຜູ້ຊ່ວຍໃຫ້ລອດໄປທຸກຫົນທຸກແຫ່ງໃນຄາລີເລ ແລະ ໄດ້ປະຕິບັດສາດສະໜາກິດຕໍ່ພຣະອົງ.
ນາງໄດ້ຢູ່ທີ່ຕີນໄມ້ກາງແຂນ, ເປັນພະຍານເຖິງການສິ້ນພຣະຊົນຂອງພຣະອົງ.
ນາງໄດ້ໄປທີ່ອຸບມຸງຂອງພຣະອົງ ເພື່ອກຽມການຝັງພຣະສົບໃຫ້ສຳເລັດ ແລະ ພົບວ່າກ້ອນຫີນທີ່ປິດປາກອຸບມຸງໄດ້ຖືກເອົາອອກໄປແລ້ວ, ແລະ ພຣະສົບຂອງພຣະຜູ້ເປັນເຈົ້າກໍຫາຍໄປ. ນາງມາຣີໄດ້ຢູ່ທີ່ອຸບມຸງຮ້ອງໄຫ້ ເມື່ອນາງຖືກຖາມໂດຍທູດສະຫວັນກ່ອນ ແລະ ຈາກນັ້ນໂດຍພຣະຜູ້ຊ່ວຍໃຫ້ລອດເອງ, “ນາງເອີຍ, ເປັນຫຍັງເຈົ້າຈຶ່ງຮ້ອງໄຫ້? ເຈົ້າຊອກຫາຜູ້ໃດ?”
ນາງມາຣີໄດ້ຮ້ອງວ່າ, “ພວກເຂົາໄດ້ເອົາພຣະສົບຂອງພຣະອົງຂອງຂ້ານ້ອຍໄປແລ້ວ ແລະ ຂ້ານ້ອຍບໍ່ຮູ້ວ່າພວກເຂົາເອົາໄປໄວ້ໃສ.”
ແລະ ພຣະເຢຊູໄດ້ເອີ້ນຊື່ນາງຢ່າງອ່ອນໂຍນວ່າ, “ມາຣີ.” ແລະ ນາງຈື່ພຣະອົງໄດ້ ແລະ ໄດ້ຕອບດ້ວຍຄວາມຄາລະວະວ່າ, “ຣັບໂບນີ; … ພຣະອາຈານ.”
ໃນການທຳນາຍເຖິງພຣະຜູ້ຊ່ວຍໃຫ້ລອດ, ເອຊາຢາໄດ້ກ່າວວ່າ, “ພຣະອົງຈະທຳລາຍຄວາມຕາຍຕະຫລອດໄປ; [ແລະ ອົງພຣະຜູ້ເປັນເຈົ້າ] ຈະເຊັດນ້ຳຕາໃຫ້ໝົດທຸກຄົນ.”
ການຟື້ນຄືນພຣະຊົນຂອງພຣະອົງໄດ້ເຮັດໃຫ້ນ້ຳຕາຂອງນາງມາຣີຖືກເຊັດອອກ. ແນ່ນອນ ພຣະອົງຈະເຊັດນ້ຳຕາຂອງທ່ານເຊັ່ນກັນ.
ນາງມາຣີໄດ້ເປັນພະຍານຄົນທຳອິດເຖິງພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນ. ແລະ ນາງໄດ້ເປັນຄົນທຳອິດທີ່ເປັນພະຍານກັບຄົນອື່ນໃນສິ່ງທີ່ນາງໄດ້ເຫັນ.
ຂ້າພະເຈົ້າຂໍເພີ່ມປະຈັກພະຍານຂອງຂ້າພະເຈົ້າໃສ່ກັບຂອງນາງມາຣີດ້ວຍຄວາມຖ່ອມຕົວ. ພຣະອົງໄດ້ຟື້ນຄືນພຣະຊົນແລ້ວ. ພຣະເຢຊູຄຣິດຊົງພຣະຊົນຢູ່. ໃນທີ່ສຸດ ທຸກຄົນຈະໄດ້ຮັບການປິ່ນປົວ, ທາງຮ່າງກາຍ ແລະ ທາງຈິດໃຈ, ໃນພຣະອົງ. ແລະ ໃນຂະນະທີ່ລໍຖ້າການປິ່ນປົວນັ້ນ, ສັດທາໃນພຣະອາຈານຜູ້ປິ່ນປົວຈະເຮັດໃຫ້ເຮົາບໍລິບູນທາງວິນຍານ. ໃນພຣະນາມຂອງພຣະເຢຊູຄຣິດ, ອາແມນ.