ສິດອຳນາດແຫ່ງສະຫວັນ, ຊາຍໜຸ່ມຜູ້ສູງສັກ
ຂ້າພະເຈົ້າມີຄວາມກະຕັນຍູຕະຫລອດໄປທີ່ວ່າຜູ້ດຳລົງຖານະປະໂລຫິດແຫ່ງອາໂຣນ, ດ້ວຍອຳນາດ, ພິທີການ, ແລະ ໜ້າທີ່, ຕ່າງກໍເປັນພອນໃຫ້ແກ່ເຮົາທຸກຄົນ.
ຂໍຂອບໃຈ, ແອວເດີ ແອນເດີເຊັນ, ສຳລັບການສະແດງອອກອັນໜ້າອັດສະຈັນໃຈຂອງອຳນາດຂອງຖານະປະໂລຫິດ ແລະ ອຳນາດຂອງການຊົດໃຊ້ຂອງພຣະຜູ້ຊ່ວຍໃຫ້ລອດ.
ເຊົ້າວັນອາທິດມື້ໜຶ່ງ ໃນເດືອນມັງກອນຜ່ານມານີ້, ໃນຂະນະທີ່ຂ້າພະເຈົ້ານັ່ງຢູ່ໃນກອງປະຊຸມສິນລະລຶກ, ມີຊາຍໜຸ່ມຫລາຍກວ່າສິບຄົນໄດ້ຮັບການສະໜັບສະໜູນໃຫ້ເລື່ອນຕຳແໜ່ງໃນຖານະປະໂລຫິດແຫ່ງອາໂຣນ. ຂ້າພະເຈົ້າຮູ້ສຶກວ່າ ໂລກກຳລັງປ່ຽນໄປ ພາຍໃຕ້ຕີນຂອງເຮົາ.
ຂ້າພະເຈົ້າຮູ້ສຶກຄືກັບວ່າທົ່ວໂລກ, ໃນແຕ່ລະເຂດເວລາ, ໃນກອງປະຊຸມສິນລະລຶກເຊັ່ນນັ້ນ, ມີມັກຄະນາຍົກ, ຄູສອນ, ແລະ ປະໂລຫິດຫລາຍສິບພັນຄົນ—ເຊັ່ນດຽວກັບເພື່ອນຂອງປະທານຮໍແລນມື້ເຊົ້ານີ້, ອີສະຕັນ—ໄດ້ຮັບການສະໜັບສະໜູນ ໃຫ້ຮັບຕຳແໜ່ງໃນການປະຕິບັດສາດສະໜາກິດຂອງຖານະປະໂລຫິດຕະຫລອດຊີວິດ ຊຶ່ງຈະເກີດຂຶ້ນໃນທຸກບ່ອນຕະຫລອດທົ່ວສາດສະໜາຈັກ.
ທຸກເດືອນມັງກອນ, ຈະມີການວາງມືໃສ່ເທິງຫົວຂອງຊາຍໜຸ່ມປະມານ 100,000 ຄົນ, ເຊື່ອມໂຍງພວກເຂົາເຂົ້າກັນ ຜ່ານທາງພິທີການສາຍອຳນາດທີ່ສົດໃສ ຊຶ່ງຢ້ອນກັບໄປເຖິງຍຸກການຟື້ນຟູ ເຖິງໂຈເຊັບ ແລະ ອໍລີເວີ, ເຖິງໂຢຮັນບັບຕິສະໂຕ ແລະ ເຖິງພຣະເຢຊູຄຣິດ.
ບັດນີ້, ສ່ວນຫລາຍສາດສະໜາຈັກຂອງເຮົາບໍ່ໄດ້ສະແດງອອກຢ່າງຊັດເຈນ. ກັບເລື່ອງນີ້, ພວກເຮົາເຂົ້າໃຈ.
ແຕ່ເຖິງຢ່າງໃດກໍຕາມ, ເມື່ອໄດ້ເຫັນຄວາມມະຫາສານຂອງຜູ້ດຳລົງຖານະປະໂລຫິດທີ່ຫາກໍໄດ້ຮັບການແຕ່ງຕັ້ງໃໝ່ທີ່ກຳລັງຂະຫຍາຍໄປທົ່ວໂລກ, ຂ້າພະເຈົ້າສົງໄສວ່າ—ໃນລັກສະນະດຽວກັນ “ສາດສະໜາຈັກແຫ່ງຄວາມຊື່ນຊົມ” ຄວນຈະຮ້ອງຈາກຫລັງຄາບ້ານຫລືບໍ່. “ມື້ນີ້,” ຂ້າພະເຈົ້າໄດ້ຄິດ, “ຄວນມີສຽງແກ ແລະ ສຽງຄ້ອງທີ່ດັງໆ ແລະ ຈູດໝາກກະໂພກຫລືບໍ່. ມັນຄວນມີຂະບວນແຫ່!”
ໂດຍທີ່ຮູ້ຈັກເຖິງອຳນາດຂອງພຣະເຈົ້າຢ່າງແທ້ຈິງ, ເຮົາໄດ້ເປັນພະຍານເຖິງການຂັດແຍ້ງຂອງແບບແຜນຂອງໂລກນີ້ ໂດຍສິດອຳນາດຂອງພຣະເຈົ້າທີ່ກຳລັງຂະຫຍາຍໄປທົ່ວໂລກ.
ການແຕ່ງຕັ້ງເຫລົ່ານີ້ຈະນຳຊາຍໜຸ່ມເຫລົ່ານີ້ເຂົ້າສູ່ການຮັບໃຊ້ຕະຫລອດຊີວິດ ເມື່ອພວກເຂົາຈະຕ້ອງພົບກັບຊ່ວງເວລາ ແລະ ສະຖານທີ່ອັນສຳຄັນ ຊຶ່ງການເປັນຢູ່ ແລະ ການອະທິຖານ ແລະ ຖານະປະໂລຫິດຂອງພຣະເຈົ້າທີ່ພວກເຂົາດຳລົງຢູ່ ຈະມີຄວາມສຳຄັນຢ່າງຍິ່ງ.
ປະຕິກິລິຍາຕ່ອງໂສ້ທີ່ຄວບຄຸມໄດ້ນີ້ ເລີ່ມຕົ້ນຈາກທູດສະຫວັນຜູ້ປະຕິບັດສາດສະໜາກິດ ທີ່ຖືກພຣະເຈົ້າສົ່ງມາ. ໂຢຮັນບັບຕິສະໂຕໃນສະໄໝບູຮານ ທີ່ຟື້ນຄືນຊີວິດແລ້ວ ໄດ້ມາປະກົດຕົວຕໍ່ໂຈເຊັບ ແລະ ອໍລີເວີ, ໄດ້ວາງມືໃສ່ເທິງຫົວຂອງພວກເພິ່ນ, ແລະ ກ່າວວ່າ, “ແກ່ພວກທ່ານ ເພື່ອນຜູ້ຮັບໃຊ້ຮ່ວມກັບຂ້າພະເຈົ້າ, ໃນພຣະນາມຂອງພຣະເມຊີອາ ຂ້າພະເຈົ້າຂໍມອບຖານະປະໂລຫິດແຫ່ງອາໂຣນ, ຊຶ່ງຖືຂໍກະແຈແຫ່ງການປະຕິບັດຂອງເຫລົ່າທູດ, ແລະ ຂອງພຣະກິດຕິຄຸນແຫ່ງການກັບໃຈ, ແລະ ຂອງການບັບຕິສະມາ ໂດຍການລົງໄປໃນນ້ຳໝົດທັງຕົວເພື່ອການປົດບາບ” (ຄຳສອນ ແລະ ພັນທະສັນຍາ 13:1).
ໂຢຮັນໄດ້ເອີ້ນສິດອຳນາດນີ້ວ່າ “ຖານະປະໂລຫິດແຫ່ງອາໂຣນ,” ຕາມຊື່ອ້າຍຂອງໂມເຊ ແລະ ເພື່ອນຖານະປະໂລຫິດ. ໃນສະໄໝບູຮານ, ຜູ້ດຳລົງຖານະປະໂລຫິດແຫ່ງອາໂຣນຕ້ອງສິດສອນ ແລະ ຊ່ວຍເຫລືອໃນພິທີການ—ພິທີການທີ່ເນັ້ນໃສ່ການເປັນສານຸສິດຕໍ່ພຣະເມຊີອາໃນອະນາຄົດ, ອົງພຣະເຢຊູຄຣິດເຈົ້າ (ເບິ່ງ ພຣະບັນຍັດສອງ 33:10).
ພຣະທຳຈົດບັນຊີໄດ້ມອບໝາຍໜ້າທີ່ຢ່າງຊັດເຈນ ວ່າໃຫ້ຜູ້ດຳລົງຖານະປະໂລຫິດແຫ່ງອາໂຣນຈັດແຈງພາຊະນະຂອງພິທີການ. “ເຈົ້າຈະຕ້ອງສະຖາປະນາອາໂຣນ ແລະ ພວກລູກຊາຍຂອງລາວ … ຮັບຜິດຊອບ … ໂຕະ … ພາຊະນະຕ່າງໆ … ວຽກງານທຸກຢ່າງທີ່ກ່ຽວຂ້ອງກັບສິ່ງເຫລົ່ານີ້” (ຈົດບັນຊີ 3:10, 31).
ພິທີການໃນພຣະຄຳພີເດີມກ່ຽວກັບການຖວາຍສັດນັ້ນໄດ້ສຳເລັດແລ້ວ ແລະ ຖືກປ່ຽນແທນຜ່ານທາງພຣະຊົນຊີບ ແລະ ການຊົດໃຊ້ຂອງພຣະຜູ້ຊ່ວຍໃຫ້ລອດ ບັດນີ້ ພິທີການບູຮານນັ້ນຖືກແທນທີ່ດ້ວຍພິທີການທີ່ເຮົາເອີ້ນວ່າ ສິນລະລຶກແຫ່ງເຂົ້າແລງຂອງພຣະຜູ້ເປັນເຈົ້າ.
ປະຈຸບັນ, ພຣະຜູ້ເປັນເຈົ້າໄດ້ມອບໝາຍໃຫ້ຜູ້ດຳລົງຖານະປະໂລຫິດແຫ່ງອາໂຣນ ໃຫ້ເຮັດສິ່ງດຽວກັນ ທີ່ພວກເຂົາໄດ້ເຮັດໃນສະໄໝບູຮານ: ເພື່ອສິດສອນ ແລະ ປະຕິບັດພິທີການ—ທັງໝົດນີ້ ເພື່ອເຕືອນເຮົາເຖິງການຊົດໃຊ້ຂອງພຣະອົງ.
ເມື່ອມັກຄະນາຍົກ, ຄູສອນ, ແລະ ປະໂລຫິດຊ່ວຍໃນສິນລະລຶກ, ພວກເຂົາຈະໄດ້ຮັບພອນ ຄືກັນກັບຄົນອື່ນໆ: ໂດຍການຮັກສາພັນທະສັນຍາທີ່ພວກເຂົາໄດ້ເຮັດ ຂະນະທີ່ແຕ່ລະຄົນຮັບສ່ວນເຂົ້າຈີ່ ແລະ ນ້ຳ. ແຕ່ໃນການປະຕິບັດໜ້າທີ່ອັນສັກສິດເຫລົ່ານີ້, ພວກເຂົາຍັງຮຽນຮູ້ເພີ່ມເຕີມກ່ຽວກັບບົດບາດ ແລະ ໜ້າທີ່ຮັບຜິດຊອບໃນຖານະປະໂລຫິດຂອງຕົນນຳອີກ.
ຖານະປະໂລຫິດແຫ່ງອາໂຣນຖືກເອີ້ນວ່າ ຖານະປະໂລຫິດການກຽມ ເພາະພິທີການຂອງມັນເຮັດໃຫ້ພວກເຂົາມີປະສົບການກັບພາລະ ແລະ ຄວາມຊື່ນຊົມໃນການຢູ່ໃນວຽກງານຂອງພຣະຜູ້ເປັນເຈົ້າ, ກະກຽມພວກເຂົາສຳລັບການຮັບໃຊ້ຖານະປະໂລຫິດໃນອະນາຄົດ, ເມື່ອພວກເຂົາອາດຈະຖືກເອີ້ນໃຫ້ຮັບໃຊ້ໃນວິທີທີ່ບໍ່ຄາດຄິດ—ລວມທັງການປະກາດພອນທີ່ດົນໃຈ ໃນຊ່ວງເວລາທີ່ຄວາມຫວັງ ແລະ ຄວາມຝັນ, ແລະ ແມ່ນແຕ່ຊີວິດ ແລະ ຄວາມຕາຍ, ແຂວນຢູ່ຢ່າງບໍ່ແນ່ນອນ.
ຄວາມຄາດຫວັງອັນຈິງຈັງດັ່ງກ່າວ ຮຽກຮ້ອງໃຫ້ມີການກະກຽມທີ່ຈິງຈັງ.
ຄຳສອນ ແລະ ພັນທະສັນຍາອະທິບາຍວ່າ ມັກຄະນາຍົກ ແລະ ຄູສອນ “ຈະເຕືອນ, ຊີ້ແຈງ, ແນະນຳ, ແລະ ສິດສອນ, ແລະ ເຊື້ອເຊີນທຸກຄົນໃຫ້ມາຫາພຣະຄຣິດ” (ຄຳສອນ ແລະ ພັນທະສັນຍາ 20:59). ນອກເໜືອຈາກໂອກາດເຫລົ່ານີ້, ຈະ “ສັ່ງສອນ … ແລະ ໃຫ້ບັບຕິສະມາ” (ຄຳສອນ ແລະ ພັນທະສັນຍາ 20:50).
ເອີ, ທັງໝົດນີ້ຟັງຄືວ່າຫລວງຫລາຍ, ແຕ່ໃນໂລກແຫ່ງຄວາມເປັນຈິງ, ສິ່ງເຫລົ່ານີ້ເກີດຂຶ້ນຕາມທຳມະຊາດ ແລະ ໃນທົ່ວໂລກ.
ອະທິການຄົນໜຶ່ງໄດ້ສິດສອນຝ່າຍປະທານກຸ່ມມັກຄະນາຍົກຊຸດໃໝ່ຂອງລາວເຖິງໜ້າທີ່ເຫລົ່ານີ້. ສະນັ້ນ ຝ່າຍປະທານທີ່ໜຸ່ມນ້ອຍໄດ້ເລີ່ມຕົ້ນເວົ້າເຖິງສິ່ງທີ່ຈະເປັນແນວໃດໃນກຸ່ມຂອງພວກເຂົາ ແລະ ໃນຫວອດຂອງພວກເຂົາ. ພວກເຂົາໄດ້ຕັດສິນໃຈວ່າ ພວກເຂົາຄວນເລີ່ມໄປຢ້ຽມຢາມສະມາຊິກອາວຸໂສຢູ່ໃນຫວອດ ເພື່ອຈະໄດ້ເຫັນວ່າເຂົາເຈົ້າຕ້ອງການຫຍັງແດ່ ແລະ ແລ້ວຈຶ່ງເຮັດສິ່ງນັ້ນ.
ໃນບັນດາຄົນທີ່ພວກເຂົາໄດ້ຮັບໃຊ້ແມ່ນ ອາລັນ, ເປັນຄົນຫຍາບຄາຍ, ມັກເວົ້າດ່າ, ແລະ ບາງຄັ້ງກໍເປັນສັດຕູກັບເພື່ອນບ້ານ. ວັນດາ, ພັນລະຍາຂອງອາລັນ, ໄດ້ກາຍເປັນສະມາຊິກຂອງສາດສະໜາຈັກ, ແຕ່ອາລັນ, ຕາມທີ່ພວກເຮົາເວົ້າ, ແມ່ນສິ່ງທີ່ຍາກຫລາຍ.
ແຕ່, ກຸ່ມມັກຄະນາຍົກໄດ້ໄປເຮັດວຽກ, ໂດຍບໍ່ສົນໃຈກັບຄຳເວົ້າດູຖູກຂອງລາວ, ຂະນະທີ່ພວກເຂົາຊ້ວນຫິມະ ແລະ ເອົາຖັງຂີ້ເຫຍື້ອອອກ. ເປັນເລື່ອງຍາກທີ່ຈະຊັງກຸ່ມມັກຄະນາຍົກໄດ້, ແລະ ໃນທີ່ສຸດ ອາລັນກໍເລີ່ມຮັກແພງພວກເຂົາ. ໃນຕອນໜຶ່ງ ພວກເຂົາໄດ້ເຊື້ອເຊີນລາວໄປໂບດ.
“ຂ້ອຍບໍ່ມັກໂບດ,” ລາວຕອບ.
“ເອີ, ເຈົ້າຮັກແພງພວກເຮົາ,” ພວກເຂົາເວົ້າ. “ສະນັ້ນ ໃຫ້ໄປກັບພວກເຮົາ. ເຈົ້າພຽງໄປຮ່ວມການປະຊຸມກຸ່ມຂອງພວກເຮົາເທົ່ານັ້ນກໍໄດ້ ຖ້າເຈົ້າຢາກໄປ.”
ແລະ ດ້ວຍການອະນຸມັດຂອງອະທິການ, ລາວໄດ້ມາ—ແລະ ລາວໄດ້ກັບມາເລື້ອຍໆ.
ກຸ່ມມັກຄະນາຍົກໄດ້ກາຍເປັນຄູສອນ, ແລະ ໃນຂະນະທີ່ພວກເຂົາສືບຕໍ່ຮັບໃຊ້ລາວ, ລາວໄດ້ສິດສອນພວກເຂົາວິທີສ້ອມແປງລົດ ແລະ ສ້າງສິ່ງຂອງຕ່າງໆ. ເມື່ອເຖິງເວລາທີ່ຄູສອນເຫລົ່ານີ້ກາຍເປັນປະໂລຫິດ, ອາລັນໄດ້ເອີ້ນພວກເຂົາວ່າ “ພວກລູກຊາຍຂອງຂ້ອຍ.”
ພວກເຂົາໄດ້ກຽມພ້ອມຢ່າງຕັ້ງໃຈສຳລັບການເຜີຍແຜ່ ແລະ ໄດ້ຖາມລາວວ່າ ພວກເຂົາຈະຝຶກບົດຮຽນຂອງຜູ້ສອນສາດສະໜາກັບລາວໄດ້ບໍ. ລາວໄດ້ສາບານວ່າ ລາວຈະບໍ່ຟັງ ແລະ ຈະບໍ່ເຊື່ອ, ແຕ່, ເອີ, ພວກເຂົາສາມາດຝຶກຊ້ອມຢູ່ເຮືອນຂອງລາວໄດ້.
ແລະ ແລ້ວອາລັນໄດ້ລົ້ມປ່ວຍ. ແລະ ລາວໄດ້ອ່ອນໂຍນ.
ແລະ ມື້ໜຶ່ງ ໃນການປະຊຸມກຸ່ມ, ດ້ວຍຄວາມອ່ອນໂຍນ ລາວໄດ້ຂໍໃຫ້ພວກເຂົາອະທິຖານເພື່ອລາວ ໃຫ້ສາມາດເຊົາສູບຢາ, ແລະ ພວກເຂົາກໍໄດ້ເຮັດ. ແຕ່ແລ້ວພວກເຂົາກໍຕາມລາວໄປເຮືອນ ແລະ ຍຶດຢາສູບຂອງລາວໄປ.
ເມື່ອສຸຂະພາບທີ່ອ່ອນແອຂອງລາວ ໄດ້ເຮັດໃຫ້ອາລັນໄດ້ເຂົ້າໂຮງໝໍ ແລະ ເຂົ້າສູນບຳບັດ, “ພວກລູກຊາຍຂອງລາວ” ໄດ້ຮັບໃຊ້ລາວ, ໂດຍແຜ່ອຳນາດຂອງຖານະປະໂລຫິດ ແລະ ຄວາມຮັກທີ່ບໍ່ເສແສ້ງຢ່າງງຽບໆ (ເບິ່ງ ຄຳສອນ ແລະ ພັນທະສັນຍາ 121:41).
ການອັດສະຈັນໄດ້ສືບຕໍ່ເມື່ອອາລັນຂໍຮັບບັບຕິສະມາ—ແຕ່ແລ້ວລາວໄດ້ເສຍຊີວິດກ່ອນທີ່ມັນຈະເກີດຂຶ້ນ. ຕາມຄຳຂໍຮ້ອງຂອງລາວ, ກຸ່ມມັກຄະນາຍົກທີ່ກາຍເປັນປະໂລຫິດ ເປັນຜູ້ຫາມໂລງສົບ ແລະ ກ່າວປາໄສໃນງານສົ່ງສະການຂອງລາວ, ຊຶ່ງພວກເຂົາໄດ້ເຕືອນໃຈ, ອະທິບາຍ, ຕັກເຕືອນ, ແລະ ສິດສອນ—ຢ່າງເໝາະສົມ—ແລະ ເຊື້ອເຊີນທຸກຄົນໃຫ້ມາຫາພຣະຄຣິດ.
ແລະ ຕໍ່ມາ, ໃນພຣະວິຫານ, ແມ່ນຄົນໜຶ່ງໃນ “ພວກລູກຊາຍຂອງອາລັນ” ທີ່ໄດ້ໃຫ້ບັບຕິສະມາ ຂະນະທີ່ປະທານກຸ່ມມັກຄະນາຍົກເປັນຕົວແທນໃຫ້ອາລັນ.
ທຸກສິ່ງທີ່ໂຢຮັນບັບຕິສະໂຕໄດ້ບອກໃຫ້ເຮັດ, ພວກເຂົາກໍໄດ້ເຮັດ. ພວກເຂົາໄດ້ເຮັດສິ່ງທີ່ມັກຄະນາຍົກ, ຄູສອນ, ແລະ ປະໂລຫິດເຮັດທົ່ວສາດສະໜາຈັກນີ້ ແລະ ທົ່ວໂລກນີ້.
ສິ່ງໜຶ່ງທີ່ຜູ້ດຳລົງຖານະປະໂລຫິດແຫ່ງອາໂຣນຖືກສັ່ງໃຫ້ເຮັດແມ່ນກ່ຽວກັບພິທີສິນລະລຶກ.
ປີກາຍນີ້ ຂ້າພະເຈົ້າໄດ້ພົບກັບອະທິການທີ່ເປັນແຮງດົນໃຈຄົນໜຶ່ງກັບພັນລະຍາທີ່ແສນປະເສີດຂອງລາວ. ໃນຕອນເຊົ້າວັນເສົາເມື່ອບໍ່ດົນມານີ້, ເຂົາເຈົ້າໄດ້ຂັບລົດໄປບ່ອນທີ່ລູກຊາຍຂອງເຂົາເຈົ້າຈະຮັບບັບຕິສະມາ ແລະ ໄດ້ປະສົບກັບຄວາມໂສກເສົ້າ ແລະ ການສູນເສຍນາງເທັດສ໌ ລູກສາວອາຍຸສອງປີທີ່ຮັກຂອງເຂົາເຈົ້າ ຢ່າງກະທັນຫັນ.
ເຊົ້າມື້ຕໍ່ມາ, ສະມາຊິກຫວອດຂອງເຂົາເຈົ້າໄດ້ເຕົ້າໂຮມກັນສຳລັບກອງປະຊຸມສິນລະລຶກ ທີ່ເຕັມດ້ວຍຄວາມເຫັນອົກເຫັນໃຈ, ທັງຮັບທຸກທໍລະມານກັບການສູນເສຍນາງນ້ອຍທີ່ດີພ້ອມຄົນນີ້. ບໍ່ມີໃຜຄາດວ່າ ຄອບຄົວອະທິການຈະໄປໂບດໃນຕອນເຊົ້າມື້ນັ້ນ, ແຕ່ສອງສາມນາທີກ່ອນກອງປະຊຸມເລີ່ມຕົ້ນ, ເຂົາເຈົ້າໄດ້ເຂົ້າມາຢ່າງງຽບໆ ແລະ ນັ່ງລົງໃນບ່ອນຂອງເຂົາເຈົ້າ.
ອະທິການໄດ້ຍ່າງໄປທີ່ເວທີ ແລະ ຍ່າງຜ່ານບ່ອນນັ່ງປະຈຳຂອງເພິ່ນ ແລະ ນັ່ງລົງກັບພວກປະໂລຫິດຢູ່ທີ່ໂຕະສິນລະລຶກ.
ໃນຄືນຜ່ານມາທີ່ໂສກເສົ້າ ແລະ ນອນບໍ່ຫລັບຂອງການຊອກຫາຄວາມເຂົ້າໃຈ ແລະ ຄວາມສະຫງົບ, ເພິ່ນໄດ້ຮັບຄວາມປະທັບໃຈອັນແຮງກ້າເຖິງສິ່ງທີ່ຄອບຄົວຂອງເພິ່ນຕ້ອງການຫລາຍທີ່ສຸດ—ແລະ ສິ່ງທີ່ຫວອດຂອງເພິ່ນຕ້ອງການຫລາຍທີ່ສຸດ. ນັ້ນຄືການໄດ້ຍິນສຽງຂອງອະທິການ, ປະທານຖານະປະໂລຫິດແຫ່ງອາໂຣນ ໃນຫວອດຂອງເຂົາເຈົ້າ, ແລະ ພໍ່ທີ່ໂສກເສົ້າ, ປະກາດຄຳສັນຍາແຫ່ງພັນທະສັນຍາຂອງສິນລະລຶກ.
ສະນັ້ນ, ຕາມເວລາກຳນົດ, ເພິ່ນໄດ້ຄຸເຂົ່າລົງກັບປະໂລຫິດເຫລົ່ານັ້ນ ແລະ ກ່າວກັບພຣະບິດາຂອງພຣະອົງ. ດ້ວຍຄວາມໂສກເສົ້າຂອງໂອກາດນັ້ນ, ເພິ່ນໄດ້ກ່າວຄຳທີ່ມີພະລັງທີ່ສຸດບາງຄຳ ທີ່ໃຜກໍຕາມເຄີຍໄດ້ຮັບອະນຸຍາດໃຫ້ເວົ້າອອກສຽງໃນຊີວິດນີ້.
ຄຳເວົ້າຂອງຜົນສະທ້ອນນິລັນດອນ.
ຄຳເວົ້າແຫ່ງພິທີການ.
ຄຳເວົ້າແຫ່ງພັນທະສັນຍາ.
ຄຳແນະນຳທີ່ເຊື່ອມຕໍ່ເຮົາເຂົ້າກັບຈຸດປະສົງຂອງຊີວິດນີ້—ແລະ ກັບຜົນໄດ້ຮັບທີ່ສວຍງາມທີ່ສຸດ ຂອງແຜນຂອງພຣະບິດາເທິງສະຫວັນສຳລັບເຮົາ.
ລອງຈິນຕະນາການເບິ່ງດູວ່າ ບ່ອນປະຊຸມໄດ້ຍິນຫຍັງໃນໂບດນັ້ນ ໃນມື້ນັ້ນ—ເຖິງສິ່ງທີ່ເຂົາເຈົ້າຮູ້ສຶກ ໃນຖ້ອຍຄຳທີ່ເຮົາໄດ້ຍິນທຸກອາທິດຢູ່ໃນໂບດຂອງເຮົາ?
“ໂອ້ ພຣະອົງເຈົ້າ, ພຣະບິດາຜູ້ສະຖິດນິລັນດອນ, ພວກຂ້າພຣະອົງ ທູນຂໍພຣະອົງໃນພຣະນາມຂອງພຣະບຸດຂອງພຣະອົງ, ພຣະເຢຊູຄຣິດ ໂປດປະທານພອນ ແລະ ເຮັດໃຫ້ເຂົ້າຈີ່ນີ້ສັກສິດ ແກ່ຈິດວິນຍານຂອງເຂົາທັງຫລາຍ ຜູ້ທີ່ຮັບສ່ວນ, ເພື່ອເຂົາຈະໄດ້ຮັບປະທານດ້ວຍຄວາມລະນຶກເຖິງພຣະກາຍຂອງພຣະບຸດຂອງພຣະອົງ, ແລະ ເປັນສັກຂີພະຍານຕໍ່ພຣະອົງ, ໂອ້ ພຣະອົງເຈົ້າ, ພຣະບິດາຜູ້ສະຖິດນິລັນດອນ, ວ່າເຂົາເຕັມໃຈຮັບພຣະນາມຂອງພຣະບຸດຂອງພຣະອົງ ແລະ ລະນຶກເຖິງພຣະອົງຕະຫລອດເວລາ ແລະ ຮັກສາພຣະບັນຍັດຂອງພຣະອົງ ຊຶ່ງປະທານໃຫ້ເຂົາ; ເພື່ອເຂົາຈະມີພຣະວິນຍານຂອງພຣະອົງຢູ່ດ້ວຍຕະຫລອດເວລາ. ອາແມນ” (ຄຳສອນ ແລະ ພັນທະສັນຍາ 20:77).
ແລະ ຈາກນັ້ນ: “ໂອ້ ພຣະອົງເຈົ້າ, ພຣະບິດາຜູ້ສະຖິດນິລັນດອນ, ພວກຂ້າພຣະອົງ ທູນຂໍພຣະອົງໃນພຣະນາມຂອງພຣະບຸດຂອງພຣະອົງ, ພຣະເຢຊູຄຣິດ, ໂປດປະທານພອນ ແລະ ເຮັດໃຫ້ນ້ຳນີ້ສັກສິດ ແກ່ຈິດວິນຍານຂອງເຂົາທັງຫລາຍຜູ້ທີ່ດື່ມ, ເພື່ອເຂົາຈະເຮັດດ້ວຍຄວາມລະນຶກເຖິງໂລຫິດຂອງພຣະບຸດຂອງພຣະອົງ, ຊຶ່ງຫລັ່ງເພື່ອເຂົາ; ເພື່ອເຂົາຈະເປັນສັກຂີພະຍານຕໍ່ພຣະອົງ, ໂອ້ ພຣະອົງເຈົ້າ, ພຣະບິດາຜູ້ສະຖິດນິລັນດອນ, ວ່າເຂົາລະນຶກເຖິງພຣະອົງຕະຫລອດເວລາ, ເພື່ອເຂົາຈະມີພຣະວິນຍານຂອງພຣະອົງຢູ່ດ້ວຍ. ອາແມນ” (ຄຳສອນ ແລະ ພັນທະສັນຍາ 20:79).
ພໍ່ ແລະ ແມ່ທີ່ດີຄົນນີ້ໄດ້ເປັນພະຍານວ່າ ຄຳສັນຍານັ້ນໄດ້ສຳເລັດແລ້ວ. ແທ້ຈິງແລ້ວ, ເຂົາເຈົ້າຮັບການປອບໂຍນອັນເປັນນິດ, “ເພື່ອເຂົາຈະມີພຣະວິນຍານຂອງພຣະອົງຢູ່ດ້ວຍ.”
ຂ້າພະເຈົ້າມີຄວາມກະຕັນຍູຕະຫລອດໄປທີ່ວ່າ ຜູ້ດຳລົງຖານະປະໂລຫິດແຫ່ງອາໂຣນ, ພ້ອມດ້ວຍອຳນາດ, ພິທີການ, ແລະ ໜ້າທີ່, ເປັນພອນໃຫ້ເຮົາທຸກຄົນແທ້ໆ ຜ່ານທາງຂໍກະແຈແຫ່ງ “ການປະຕິບັດຂອງເຫລົ່າທູດ, ແລະ ຂອງພຣະກິດຕິຄຸນແຫ່ງການກັບໃຈ, ແລະ ຂອງການບັບຕິສະມາໂດຍການລົງໄປໃນນ້ຳໝົດທັງຕົວເພື່ອການປົດບາບ” (ຄຳສອນ ແລະ ພັນທະສັນຍາ 13:1). ໃນພຣະນາມຂອງພຣະເຢຊູຄຣິດ, ອາແມນ.