ການທະນຸຖະໜອມຊີວິດ
ຊີວິດເປັນພາກສ່ວນທີ່ລໍ້າຄ່າທີ່ສຸດຂອງແຜນອັນສົມບູນແບບຂອງພຣະບິດາຂອງເຮົາ, ແລະ ໂດຍດຳລັດຂອງພຣະອົງ ເຮົາທະນຸຖະໜອມຊີວິດ ແລະ ສະຫງວນຊີວິດ.
ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ໄດ້ສິດສອນເຮົາວ່່າ, “ຖ້າພວກເຈົ້າຮັກຊຶ່ງກັນແລະກັນ ທຸກຄົນກໍຈະຮູ້ວ່າພວກເຈົ້າເປັນສາວົກຂອງເຮົາ.”
ອະທິການຄົນໜຶ່ງໃນລັດຢູທາໄດ້ແບ່ງປັນກັບຂ້າພະເຈົ້າເມື່ອບໍ່ດົນມານີ້ ເຖິງຄວາມຮັກທີ່ຫລັ່ງໄຫລອອກມາໃນຫວອດຂອງເພິ່ນເພື່ອຍິງໜຸ່ມຄົນໜຶ່ງ ແລະ ຄອບຄົວຂອງນາງ. ຜ່ານຫລາຍໆເຫດການທີ່ງົດງາມ, ຜູ້ເປັນພໍ່ແມ່ໄດ້ຕັ້ງໃຈທີ່ຈະກັບຄືນມາຫາພຣະຜູ້ຊ່ວຍໃຫ້ລອດ ແລະ ສາດສະໜາຈັກຂອງພຣະອົງ. ໃນຊ່ວງເວລາທີ່ເຂົາເຈົ້າຫ່າງໄກຈາກສາດສະໜາຈັກນັ້ນ, ລູກສາວໄວລຸ້ນຂອງເຂົາເຈົ້າໄດ້ມີຄວາມສຳພັນກັບຊາຍໜຸ່ມຄົນໜຶ່ງ. ໃນການກັບຄືນມາ, ລູກສາວທີ່ລໍ້າຄ່າຄົນນີ້ໄດ້ຮູ້ສຶກເຖິງຄວາມຮັກອັນລົ້ນເຫລືອຈາກພຣະບິດາເທິງສະຫວັນຂອງນາງ ໃນລະຫວ່າງກອງປະຊຸມປະຈັກພະຍານ ນາງໄດ້ຕັ້ງໃຈທີ່ຈະດຳລົງຊີວິດຕາມພຣະບັນຍັດຢ່າງເຕັມທີ່ກວ່າເກົ່າ. ນາງໄດ້ຂຽນວ່າ, “ຂ້ານ້ອຍໄດ້ເລີ່ມຂະບວນການການກັບໃຈກັບອະທິການຂອງຂ້ານ້ອຍ.”
ບໍ່ດົນຫລັງຈາກນັ້ນ, ນາງບໍ່ສະບາຍ. ຕາມຄຳເວົ້າຂອງນາງ: “ຜົນກວດໄດ້ສະແດງວ່າ … ຂ້ານ້ອຍຖືພາ. ຂ້ານ້ອຍ … ໄດ້ເລີ່ມຮ້ອງໄຫ້. … ພໍ່ຂອງຂ້ານ້ອຍໄດ້ໂອບກອດຂ້ານ້ອຍໄວ້ໃນອ້ອມແຂນຂອງເພິ່ນ ແລະ ຮັບຮອງກັບຂ້ານ້ອຍວ່າ ທຸກຢ່າງຈະເປັນໄປດ້ວຍດີ. … ແຟນຂອງຂ້ານ້ອຍ … ໄດ້ຂໍໃຫ້ຂ້ານ້ອຍເອົາລູກອອກ. … ຂ້ານ້ອຍໄດ້ປະຕິເສດ.”
ດູແລຄົນຂັດສົນ
ນາງໄດ້ເວົ້າຕໍ່ວ່າ: “ຂ້ານ້ອຍໄດ້ຮັບຄວາມຮັກ ແລະ ການສະໜັບສະໜູນຢ່າງຫລວງຫລາຍຈາກຄອບຄົວຫວອດຂອງພວກເຮົາ. ມັນຈົນເຕັມລົ້ນ. ອະທິການ [ຂອງຂ້ານ້ອຍ] ແລະ ປະທານຍິງໜຸ່ມ ໄດ້ເຮັດເກີນຄວາມຄາດຫວັງໃນການສະແດງຄວາມຮັກ ແລະ ການສະໜັບສະໜູນຂອງພວກເພິ່ນ. … ຂ້ານ້ອຍໄດ້ເຫັນພຣະຫັດຂອງພຣະຜູ້ເປັນເຈົ້າ … ກຳລັງນຳພາຂ້ານ້ອຍ ແລະ ຄອບຄົວຂອງຂ້ານ້ອຍ. … ຫວອດດັ່ງເຊັ່ນຂອງຂ້ານ້ອຍ ເປັນຄອບຄົວທີ່ທຸກຄົນຕ້ອງການ, ໂດຍສະເພາະຍິງໜຸ່ມຄົນໜຶ່ງທີ່ຢູ່ໃນສະພາບດຽວກັນກັບຂ້ານ້ອຍ.”
ນາງ ແລະ ຄອບຄົວຂອງນາງ ແລະ ຄອບຄົວຫວອດຂອງນາງ ໄດ້ຕ້ອນຮັບລູກຊາຍນ້ອຍຂອງນາງໃນເດືອນກຸມພາຜ່ານມານີ້.
ປະທານຣະໂຊ ເອັມ ແນວສັນ ໄດ້ກ່າວວ່າ, “ຄວາມດີເດັ່ນຂອງສາດສະໜາຈັກທີ່ແທ້ຈິງ ແລະ ດຳລົງຢູ່ຂອງພຣະຜູ້ເປັນເຈົ້າ ຈະເປັນຄວາມພະຍາຍາມທີ່ … ເປັນລະບຽບສະເໝີ ໃນການປະຕິບັດສາດສະໜາກິດຕໍ່ລູກໆຂອງພຣະເຈົ້າທຸກຄົນ … [ປະຕິບັດສາດສະໜາກິດດ້ວຍຄວາມເມດຕາທີ່ມີຄວາມຮັກ] ຕໍ່ຄົນໜຶ່ງ, ດັ່ງທີ່ພຣະອົງໄດ້ກະທຳ.”
ການຊ່ວຍເຫລືອການເລືອກທີ່ຖືກຕ້ອງ
ເມື່ອຍິງໂສດຄົນໜຶ່ງຄົ້ນພົບວ່າ ນາງກຳລັງຖືພາໂດຍບໍ່ຄາດຄິດ, ຄວາມກັງວົນດ້ານສຸຂະພາບ, ຄວາມວຸ້ນວາຍທາງວິນຍານ, ຄວາມອັບອາຍ, ຄວາມກັງວົນດ້ານການເງິນ, ຄຳຖາມດ້ານການສຶກສາ, ຄວາມບໍ່ແນ່ນອນຂອງການແຕ່ງງານ, ແລະ ຄວາມໂສກເສົ້າຂອງຄວາມຝັນທີ່ພັງທະລາຍ, ໃນຊ່ວງເວລາແຫ່ງຄວາມເຈັບປວດ ແລະ ຄວາມສັບສົນງົງງັນ, ຈະນຳຜູ້ຍິງທີ່ຊ່າງຄິດໃຫ້ຕັດສິນໃຈກ້າວໄປໃນທາງທີ່ຈະນຳຄວາມເຈັບປວດອັນເລິກເຊິ່ງ ແລະ ຄວາມກິນແໜງໃຈມາໃຫ້.
ສຳລັບຜູ້ໃດກໍຕາມທີ່ກຳລັງຟັງຢູ່ ທີ່ເຄີຍປະສົບກັບຄວາມເຈັບປວດອັນເລິກເຊິ່ງ ແລະ ຄວາມກິນແໜງໃຈຈາກການເຮັດ ຫລື ມີສ່ວນຮ່ວມໃນການເຮັດແທ້ງ, ກະລຸນາຈື່ໄວ້ວ່າ: ເຖິງແມ່ນວ່າ ເຮົາຈະບໍ່ສາມາດປ່ຽນອະດີດໄດ້ກໍຕາມ, ແຕ່ພຣະເຈົ້າສາມາດປິ່ນປົວອະດີດຂອງເຮົາໄດ້. ການໃຫ້ອະໄພສາມາດເກີດຂຶ້ນໄດ້ຜ່ານທາງຄວາມອັດສະຈັນແຫ່ງພຣະຄຸນທີ່ຊົດໃຊ້ຂອງພຣະອົງ, ເມື່ອທ່ານຫັນໄປຫາພຣະອົງດ້ວຍໃຈທີ່ຖ່ອມ ແລະ ກັບໃຈ.
ຄຳສອງຄຳມັກຈະຕິດມານຳຄວາມສັກສິດຂອງການເກີດທາງມະຕະຄື: ຊີວິດ ແລະ ການເລືອກ. ຊີວິດເປັນພາກສ່ວນທີ່ລໍ້າຄ່າທີ່ສຸດຂອງແຜນອັນສົມບູນແບບຂອງພຣະບິດາຂອງເຮົາ, ແລະ ໂດຍດຳລັດຂອງພຣະອົງ ເຮົາທະນຸຖະໜອມ ແລະ ສະຫງວນຊີວິດ; ແລະ ເຮົາເລືອກການດຳເນີນຕໍ່ໄປຂອງຊີວິດເມື່ອຕັ້ງຄັນ. ເຮົາຍັງຫວງແຫນຂອງປະທານແຫ່ງການເລືອກ, ແຫ່ງອຳເພີໃຈທາງມະຕະນຳອີກ—ໂດຍຊ່ວຍເຫລືອການເສີມສ້າງການເລືອກທີ່ຊອບທຳ, ການເລືອກທີ່ນຳຄວາມສຸກນິລັນດອນມາໃຫ້, ການເລືອກທີ່ພຣະເຈົ້າອະນຸມັດ.
ເມື່ອຍິງ ແລະ ຊາຍຢູ່ໃນຊ່ວງເວລາທີ່ເປາະບາງເຊັ່ນນີ້, ໂດຍປະເຊີນກັບການເລືອກທີ່ສຳຄັນ, ຄຳເວົ້າຂອງເຮົາ, ມືຂອງເຮົາ, ໃຈຂອງເຮົາ—ທາງວິນຍານ, ທາງອາລົມ, ແລະ ທາງການເງິນ—ສາມາດຊ່ວຍໃຫ້ພວກເຂົາຮູ້ສຶກເຖິງຄວາມຮັກຂອງພຣະຜູ້ຊ່ວຍໃຫ້ລອດ ແລະ, ດັ່ງທີ່ປະທານເຮັນຣີ ບີ ໄອຣິງ ໄດ້ກ່າວ, ນຳຄວາມເຂົ້າໃຈມາສູ່ຕາທາງວິນຍານຂອງພວກເຂົາຈາກ “ສິ່ງທີ່ພວກເຂົາຄິດວ່າພວກເຂົາເຫັນ” ສູ່ “ສິ່ງທີ່ພວກເຂົາຍັງບໍ່ທັນເຫັນເທື່ອ.”
ຄຳສອນເລື່ອງຊີວິດມະຕະ
ປະທານດາລິນ ເອັຈ ໂອກສ໌ ໄດ້ກ່າວວ່າ: “ທັດສະນະຄະຕິຂອງເຮົາຕໍ່ການເຮັດແທ້ງ ບໍ່ໄດ້ອີງຕາມຄວາມຮູ້ຂອງເຮົາທີ່ວ່າ ຊີວິດມະຕະເລີ່ມຕົ້ນເມື່ອໃດ. … ມັນຖືກກຳນົດຕາຍຕົວໂດຍຄວາມຮູ້ຂອງເຮົາທີ່ວ່າ … ລູກໆທາງວິນຍານທຸກຄົນຂອງພຣະເຈົ້າ ຕ້ອງມາສູ່ແຜ່ນດິນໂລກເພື່ອຈຸດປະສົງທີ່ສະຫງ່າລາສີ, ແລະ ວ່າເອກະລັກຂອງບຸກຄົນໄດ້ເລີ່ມຕົ້ນດົນນານກ່ອນການຕັ້ງຄັນ ແລະ ຈະສືບຕໍ່ໄປຊົ່ວນິລັນດອນທີ່ຈະມາເຖິງ.”
ພຣະຄຳຂອງພຣະຜູ້ເປັນເຈົ້າກ່ຽວກັບເດັກທີ່ຍັງບໍ່ທັນເກີດ, ໂດຍໄດ້ກ່າວດ້ວຍສຽງຜ່ານທາງຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ, ບໍ່ເຄີຍປ່ຽນແປງ ແລະ ສະທ້ອນຖ້ອຍຄຳຂອງບັນດາສາດສະດາຕະຫລອດທຸກຍຸກທຸກສະໄໝ, ໂດຍໃຫ້ຄວາມກະຈ່າງແຈ້ງແຫ່ງສະຫວັນກັບສິ່ງທີ່ພຣະຜູ້ເປັນເຈົ້າໄດ້ຂໍຈາກເຮົາ.
“ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເຊື່ອໃນຄວາມສັກສິດຂອງຊີວິດຂອງມະນຸດ. ດັ່ງນັ້ນ, ສາດສະໜາຈັກຈຶ່ງຕໍ່ຕ້ານການເລືອກແທ້ງລູກສຳລັບຄວາມສະດວກສ່ວນຕົວ ຫລື ສັງຄົມ, ແລະ ແນະນຳສະມາຊິກວ່າບໍ່ໃຫ້ຍິນຍອມຕໍ່, ກະທຳ, ຊຸກຍູ້, ຈ່າຍຄ່າ, ຫລື ຈັດຫາການແທ້ງລູກດັ່ງກ່າວນີ້.
“[ພຣະຜູ້ເປັນເຈົ້າ] ອະນຸຍາດໃຫ້ມີການຍົກເວັ້ນທີ່ເປັນໄປໄດ້ … ເມື່ອ:
-
ການຕັ້ງທ້ອງນັ້ນເປັນຜົນຈາກການຂົ່ມຂືນ ຫລື ການມີເພດສຳພັນລະຫວ່າງຄົນໃນຄອບຄົວ, ຫລື
-
ແພດທີ່ມີຄວາມສາມາດກຳນົດວ່າຊີວິດ ຫລື ສຸຂະພາບຂອງຜູ້ເປັນແມ່ຕົກຢູ່ໃນຂັ້ນອັນຕະລາຍທີ່ຮ້າຍແຮງ, ຫລື
-
ແພດທີ່ມີຄວາມສາມາດກຳນົດວ່າເດັກທີ່ຢູ່ໃນທ້ອງນັ້ນມີສະພາບທີ່ສາຫັດຫລາຍ ຈົນເດັກຈະບໍ່ລອດຫລັງການຄອດ.”
ຝ່າຍປະທານສູງສຸດກ່າວຕໍ່ໄປວ່າ: “ການແທ້ງລູກເປັນເລື່ອງຮ້າຍແຮງທີ່ສຸດ. [ແມ່ນແຕ່ໃນສະຖານະການທີ່ເກີດຂຶ້ນຍາກເຫລົ່ານີ້] ຄວນເຮັດພຽງແຕ່ເມື່ອຫລັງຈາກບຸກຄົນທີ່ຮັບຜິດຊອບໄດ້ຮັບການຢືນຢັນຜ່ານທາງການອະທິຖານແລ້ວເທົ່ານັ້ນ” ແລະ ປຶກສາກັບຄົນອື່ນ.
ເມື່ອສາມສິບປີກ່ອນ, ສາດສະດາຂອງພຣະຜູ້ເປັນເຈົ້າໄດ້ອອກຄຳປະກາດຕໍ່ໂລກ. ໂດຍມີຄຳຕໍ່ໄປນີ້:
“ພວກເຮົາຂໍປະກາດ … ວ່າພຣະເຈົ້າໄດ້ບັນຊາວ່າ ອຳນາດທີ່ສັກສິດຂອງການໃຫ້ກຳເນີດແມ່ນຕ້ອງເກີດຂຶ້ນລະຫວ່າງຊາຍ ແລະ ຍິງ, ຜູ້ແຕ່ງງານກັນຢ່າງຖືກຕ້ອງຕາມກົດໝາຍໃນຖານະສາມີ ແລະ ພັນລະຍາເທົ່ານັ້ນ.
“ພວກເຮົາຂໍປະກາດວ່າມະນຸດຖືກສ້າງຂຶ້ນມາຕາມທີ່ພຣະເຈົ້າໄດ້ຈັດແຕ່ງໄວ້. ພວກເຮົາຂໍຢືນຢັນເຖິງຄວາມສັກສິດຂອງຊີວິດ ແລະ ເຖິງຄວາມສຳຄັນຂອງມັນໃນແຜນນິລັນດອນຂອງພຣະເຈົ້າ.”
ການບຳລຸງລ້ຽງ ແລະ ການປົກປ້ອງຊີວິດທີ່ຍັງບໍ່ທັນເກີດນັ້ນ ບໍ່ແມ່ນຈຸດຢືນທາງການເມືອງ. ມັນເປັນກົດທາງສິນທຳທີ່ໄດ້ຮັບການຢືນຢັນຈາກພຣະຜູ້ເປັນເຈົ້າຜ່ານທາງສາດສະດາຂອງພຣະອົງ.
ການເວົ້າຢ່າງເປີດເຜີຍຫລາຍຂຶ້ນ
ຄຳຖະແຫລງໂດຍປະທານເຈ ຣູເບັນ ຄລາກ ຜູ້ລູກ, ຜູ້ທີ່ໄດ້ຮັບໃຊ້ໃນຝ່າຍປະທານສູງສຸດ, ພັນລະນາຄົນໜຸ່ມຂອງເຮົາສະໄໝນີ້ຢ່າງງົດງາມ: “ຄົນໜຸ່ມຂອງສາດສະໜາຈັກຫິວໂຫຍສິ່ງທີ່ເປັນຂອງພຣະວິນຍານ; ພວກເຂົາກະຕືລືລົ້ນທີ່ຈະຮຽນຮູ້ພຣະກິດຕິຄຸນ, ແລະ ພວກເຂົາຕ້ອງການໃຫ້ມັນກົງໄປກົງມາ, ບໍ່ເຈືອຈາງ. ພວກເຂົາຢາກຮູ້ກ່ຽວກັບ … ຄວາມເຊື່ອຂອງເຮົາ; ພວກເຂົາຢາກຮັບປະຈັກພະຍານກ່ຽວກັບຄວາມຈິງ. ພວກເຂົາເປັນ … ຜູ້ສືບຖາມ, ຜູ້ສະແຫວງຫາຄວາມຈິງ.” ຂໍໃຫ້ເຮົາເວົ້າຫລາຍຂຶ້ນດ້ວຍສັດທາ ແລະ ຄວາມເຫັນອົກເຫັນໃຈຕໍ່ຊາວໜຸ່ມຂອງເຮົາຢູ່ໃນບ້ານຂອງເຮົາ, ແລະ ຕໍ່ກັນແລະກັນໃນການປະຊຸມສະມາຄົມສະຕີສົງເຄາະ ແລະ ການປະຊຸມກຸ່ມແອວເດີຂອງເຮົາ ກ່ຽວກັບກົດພົມມະຈັນຂອງພຣະຜູ້ເປັນເຈົ້າ, ຄວາມສັກສິດຂອງຊີວິດ, ແລະ ການດູແລເດັກທີ່ຍັງບໍ່ທັນເກີດ ແລະ ແມ່ຂອງເຂົາ.
ເອື້ອຍນ້ອງຜູ້ເປັນທີ່ຮັກຄົນໜຶ່ງໄດ້ຂຽນຈົດໝາຍຫາຂ້າພະເຈົ້າກ່ຽວກັບປະສົບການຂອງນາງ ເມື່ອຫລາຍທົດສະວັດກ່ອນ: “ຕອນມີອາຍຸ 17 ປີ … , ຂ້ານ້ອຍພົບວ່າຕົນເອງຖືພາ ໂດຍເກືອບວ່າບໍ່ມີການສະໜັບສະໜູນໃດໆຈາກແຟນຂອງຂ້ານ້ອຍເລີຍ. ຂ້ານ້ອຍຮູ້ສຶກອັບອາຍ ແລະ ໂດດດ່ຽວ [ແຕ່ຂ້ານ້ອຍ] ບໍ່ເຄີຍຄິດທີ່ຈະ [ເຮັດແທ້ງເລີຍ]. … ຂ້ານ້ອຍ [ໄດ້ມີ] ຄອບຄົວທີ່ມີຄວາມຮັກ ແລະ ອະທິການຂອງຂ້ານ້ອຍ, ພ້ອມກັບຜູ້ທີ່ຂ້ານ້ອຍໄດ້ພົບເປັນປະຈຳເພື່ອຂໍການນຳທາງ. … ຂ້ານ້ອຍໄດ້ຫັນໄປຫາພຣະເຈົ້າ. ຂ້ານ້ອຍໄດ້ສຶກສາພຣະຄຳພີ … ແລະ ໄດ້ອະທິຖານ [ແລະ] ໄດ້ພົບຄວາມເຂັ້ມແຂງຜ່ານທາງພຣະຜູ້ຊ່ວຍໃຫ້ລອດຂອງຂ້ານ້ອຍ ແລະ ຂະບວນການການກັບໃຈ. … ຂ້ານ້ອຍໄດ້ຮັບຄຳຕອບ [ຕໍ່ຄຳອະທິຖານຂອງຂ້ານ້ອຍ] ທີ່ຂ້ານ້ອຍບໍ່ອາດປະຕິເສດໄດ້. … ມັນຊ່າງເຈັບປວດໃຈຫລາຍ, ແຕ່ຂ້ານ້ອຍຮູ້ວ່າ ຂ້ານ້ອຍຈະຕ້ອງສົ່ງລູກສາວຂອງຂ້ານ້ອຍໃຫ້ຄົນອື່ນຮັບໄປລ້ຽງ. … ຂ້ານ້ອຍໄດ້ອະທິຖານຂໍຄວາມກ້າຫານ [ແລະ] ໄດ້ຮູ້ສຶກເຖິງຄວາມຮັກຂອງພຣະຜູ້ຊ່ວຍໃຫ້ລອດຢ່າງຊັດເຈນ ຜ່ານທາງການກັບໃຈ, ຂ້ານ້ອຍຮູ້ວ່າພຣະເຈົ້າ … ຕອບຄຳອະທິຖານ ແລະ ຊ່ວຍໃຫ້ເຮົາເຂັ້ມແຂງຂຶ້ນ.”
ຄູ່ສາມີພັນລະຍາທີ່ໜ້າຮັກຄູ່ໜຶ່ງໄດ້ຮັບແອນ້ອຍໄປລ້ຽງເປັນລູກບຸນທຳ ແລະ ໄດ້ສິດສອນພຣະກິດຕິຄຸນໃຫ້ແກ່ນາງ. ຕອນນີ້ ນາງໄດ້ແຕ່ງງານ ແລະ ມີຄອບຄົວທີ່ສວຍງາມເປັນຂອງຕົນເອງ.
ບາງເວລາ, ຄວາມບໍ່ແນ່ນອນທີ່ຍາກລຳບາກ ແລະ ທໍລະມານຢ່າງຍິ່ງ ສາມາດໄປນຳກັນໄດ້ກັບການປົກປ້ອງຊີວິດ.
ເມື່ອບໍ່ດົນມານີ້ ສາມີພັນລະຍາໜຸ່ມທີ່ ແຄຕີ້ ແລະ ຂ້າພະເຈົ້າຮັກແພງ ໄດ້ຂຽນຈົດໝາຍເຖິງຂ້າພະເຈົ້າກ່ຽວກັບແອນ້ອຍຜູ້ລ້ຳຄ່າ ທີ່ເຂົາເຈົ້າກຳລັງລໍຖ້າ.
ຜູ້ເປັນພໍ່ໄດ້ຂຽນວ່າ: “[ເມື່ອພັນລະຍາຂອງຂ້ານ້ອຍ] ຖືພາໄດ້ 10 ອາທິດ ພວກເຮົາໄດ້ພົບວ່າ ລູກຈາກຄວາມອັດສະຈັນຂອງພວກເຮົາມີພາວະທາງພັນທຸກຳ ທີ່ມີໂຄຣໂມໂຊມຄູ່ທີ 21 ເພີ່ມມາອີກຄູ່ໜຶ່ງ, ຊຶ່ງເປັນທີ່ຮູ້ຈັກກັນດີວ່າ ດາວຊິນໂດຣມ. ພວກເຮົາຮູ້ສຶກເຖິງຄວາມກົດດັນ … ຈາກວົງການການແພດໃຫ້ຄິດທີ່ຈະຢຸດຕິການຕັ້ງຄັນ. ສອງສາມອາທິດຕໍ່ມາ ພວກເຮົາໄດ້ຄົ້ນພົບວ່າ … ລູກທີ່ຍັງບໍ່ທັນເກີດຂອງພວກເຮົາ … ຈະຕ້ອງໄດ້ຮັບການຜ່າຕັດຫົວໃຈຫລາຍເທື່ອໃນປີທຳອິດຂອງຊີວິດນາງ. ຕະຫລອດຂະບວນການນີ້ ຂະນະທີ່ພວກເຮົາໄດ້ອະທິຖານຢ່າງແຮງກ້າເພື່ອຂໍຄວາມຊ່ວຍເຫລືອຈາກສະຫວັນ, … ພວກເຮົາໄດ້ຮູ້ສຶກວ່າພຣະວິນຍານໄດ້ປະທານການປອບໂຍນໃຫ້ແກ່ພວກເຮົາ. ພວກເຮົາໄດ້ຮັບການເປີດເຜີຍ ແລະ ຄວາມເຂົ້າໃຈວ່າ ລູກສາວຂອງພວກເຮົາເປັນທິດາຊັ້ນນຳຂອງພຣະບິດາເທິງສະຫວັນ ແລະ ມີຄວາມປາດຖະໜາຢ່າງແຮງກ້າທີ່ຈະຢູ່ໃນຄອບຄົວຂອງພວກເຮົາ ແລະ ທີ່ຈະມາສູ່ໂລກ.”
ແມ່ຂອງເດັກນ້ອຍໄດ້ຂຽນວ່າ: “[ພວກເຮົາ] ຕົກໃຈ, ສັບສົນ, ແລະ ເສຍໃຈຫລາຍກັບຂ່າວນີ້. … ຕອນທີ່ຂ້ານ້ອຍຖືພາໄດ້ 14 ອາທິດ, ພວກເຮົາໄດ້ພົບວ່າ ລູກຂອງພວກເຮົາມີຂໍ້ບົກພ່ອງທາງຫົວໃຈແຕ່ກຳເນີດຫລາຍຢ່າງ, ຊຶ່ງໜຶ່ງໃນນັ້ນສາມາດເຖິງແກ່ຊີວິດໄດ້. ພວກເຮົາໄດ້ພົບກັບໝໍ ແລະ ຜູ້ຊ່ຽວຊານຫລາຍຄົນຕັ້ງແຕ່ຕອນອາຍຸຄັນໄດ້ 10–18 ອາທິດ. … ໃນການນັດໝາຍແຕ່ລະຄັ້ງ, ພວກເຮົາໄດ້ຖືກຖາມວ່າ ພວກເຮົາຢາກສືບຕໍ່ການຕັ້ງຄັນ ຫລື ຢຸດຕິການຕັ້ງຄັນ. … ພຣະຜູ້ຊ່ວຍໃຫ້ລອດໄດ້ປິ່ນປົວຫົວໃຈຂອງຂ້ານ້ອຍ ແລະ ໄດ້ໃຫ້ຂ້ານ້ອຍຮູ້ສຶກສະຫງົບສຸກ ແລະ ຕື່ນເຕັ້ນກັບລູກສາວຂອງພວກເຮົາ. … [ພຣະບິດາເທິງສະຫວັນ] ໄດ້ສະແດງໃຫ້ຂ້ານ້ອຍເຫັນເທື່ອແລ້ວເທື່ອອີກວ່າ ພຣະອົງມີແຜນທີ່ສົມບູນແບບສຳລັບຂ້ານ້ອຍ [ແລະ] ຂ້ານ້ອຍໄວ້ວາງໃຈພຣະອົງ.”
ເຂົາເຈົ້າໄດ້ຕ້ອນຮັບລູກນ້ອຍຂອງເຂົາເຈົ້າດ້ວຍຄວາມຕື່ນເຕັ້ນ ເມື່ອໜຶ່ງອາທິດຜ່ານມານີ້. ນາງເປັນຂອງເຂົາເຈົ້າ ແລະ ເຂົາເຈົ້າເປັນຂອງນາງຕະຫລອດໄປ.
ສັດທາທີ່ບໍ່ທໍ້ຖອຍ ແລະ ຄວາມກ້າຫານທີ່ໂດດເດັ່ນ ເປັນຈຸດເດັ່ນຂອງສານຸສິດຂອງພຣະເຢຊູຄຣິດ.
ຕົວຢ່າງແຫ່ງສັດທາທີ່ໜ້າອັດສະຈັນໃຈ
ຕະຫລອດຫລາຍປີ, ຂ້າພະເຈົ້າໄດ້ຮັບສິດທິພິເສດໃນການພົບກັບຊາຍ ແລະ ຍິງຜູ້ທີ່ໄດ້ສະແຫວງຫາຢ່າງຖ່ອມຕົວທີ່ຈະກັບຄືນສູ່ເສັ້ນທາງແຫ່ງພັນທະສັນຍາ ແລະ ສູ່ພອນຖານະປະໂລຫິດ ແລະ ພອນພຣະວິຫານຂອງເຂົາເຈົ້າ ຫລາຍປີຫລັງຈາກການສູນເສຍຄວາມເປັນສະມາຊິກຂອງເຂົາເຈົ້າ.
ໃນໂອກາດໜຶ່ງ, ຂ້າພະເຈົ້າຕ້ອງສຳພາດຊາຍຄົນໜຶ່ງແທນຝ່າຍປະທານສູງສຸດ ເພື່ອຟື້ນຟູພອນຖານະປະໂລຫິດ ແລະ ພອນພຣະວິຫານຂອງລາວ.
ຫລັງຈາກການແຕ່ງງານຂອງລາວໃນພຣະວິຫານທີ່ສັກສິດ, ແລະ ຫລັງຈາກທີ່ມີລູກທີ່ດີເລີດສາມຄົນ, ຊາຍຄົນນັ້ນບໍ່ຊື່ສັດກັບພັນລະຍາຂອງລາວ ແລະ ພັນທະສັນຍາອັນສັກສິດຂອງລາວ. ຍິງໂສດຄົນໜຶ່ງໄດ້ຖືພາ ແລະ ຢາກເຮັດແທ້ງ.
ພັນລະຍາທີ່ໃຈບຸນຂອງສາມີຜູ້ນີ້ໄດ້ຂໍຮ້ອງຜູ້ຍິງຄົນນັ້ນໃຫ້ເກັບລູກໄວ້ ແລະ ສັນຍາວ່າ ນາງຈະລ້ຽງເດັກຄົນນີ້ກັບລູກໆຂອງນາງເອງ, ເມື່ອລາວເກີດມາ.
ຍິງໂສດຄົນນີ້ໄດ້ຕົກລົງໂດຍຄິດດີແລ້ວວ່າຈະບໍ່ຢຸດຕິການຕັ້ງຄັນ.
ຕອນນີ້ ເວລາໄດ້ຜ່ານໄປເປັນ 10 ປີແລ້ວ. ເອື້ອນນ້ອງທີ່ຖ່ອມຕົວຜູ້ນີ້ທີ່ກຳລັງນັ່ງຢູ່ຕໍ່ໜ້າຂ້າພະເຈົ້າ ຮັກເດັກຊາຍຄົນນີ້ຄືກັບລູກຂອງຕົນເອງ ແລະ ໄດ້ບອກຂ້າພະເຈົ້າກ່ຽວກັບຄວາມພະຍາຍາມຂອງສາມີຂອງນາງທີ່ຈະຊົດເຊີຍຄວາມຜິດ ແລະ ທີ່ຈະຮັກ ແລະ ດູແລນາງ ແລະ ຄອບຄົວ. ຜູ້ເປັນພໍ່ໄດ້ຫລັ່ງນໍ້າຕາຂະນະທີ່ນາງກ່າວ.
ຍິງທີ່ສູງສົ່ງຄົນນີ້ຂອງພຣະເຈົ້າສາມາດຮັບເດັກນ້ອຍຄົນໜຶ່ງໄປເປັນລູກຂອງຕົນເອງ ຜູ້ທີ່ເປັນເຄື່ອງເຕືອນໃຈປະຈຳວັນເຖິງຄວາມບໍ່ຊື່ສັດຂອງສາມີຂອງຕົນໄດ້ແນວໃດ? ນາງເຮັດໄດ້ແນວໃດ? ຍ້ອນວ່າ ນາງໄດ້ພົບຄວາມເຂັ້ມແຂງຜ່ານທາງພຣະເຢຊູຄຣິດ ແລະ ນາງໄດ້ເຊື່ອໃນຄວາມສັກສິດຂອງຊີວິດ, ຄວາມບໍລິສຸດຂອງຊີວິດ. ນາງຮູ້ວ່າ ເດັກທີ່ຍັງບໍ່ທັນເກີດເປັນລູກຂອງພຣະເຈົ້າ, ໄຮ້ດຽງສາ ແລະ ບໍລິສຸດ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຄວາມຮັກທີ່ຫລຸດໜ້ອຍຖອຍລົງທີ່ມີຕໍ່ເດັກນ້ອຍທີ່ຍັງບໍ່ທັນເກີດທົ່ວໂລກ ເປັນເລື່ອງທີ່ໜ້າກັງວົນຢ່າງຍິ່ງ. ພຣະເຈົ້າທະນຸຖະໜອມຊີວິດ. ການນຳຄວາມເປັນອະມະຕະ ແລະ ຊີວິດນິລັນດອນມາສູ່ລູກໆຂອງພຣະອົງ ເປັນວຽກງານຂອງພຣະອົງ ແລະ ລັດສະໝີພາບຂອງພຣະອົງ. ໃນຖານະທີ່ເປັນສານຸສິດຂອງພຣະເຢຊູຄຣິດ, ເຮົາທະນຸຖະໜອມຊີວິດ. “ຖ້າພວກເຈົ້າຮັກຊຶ່ງກັນແລະກັນ ທຸກຄົນກໍຈະຮູ້ວ່າພວກເຈົ້າເປັນສາວົກຂອງເຮົາ.” ຂໍໃຫ້ເຮົາແບ່ງປັນຄວາມຮັກຂອງເຮົາຢ່າງລົ້ນເຫລືອກວ່າເກົ່າກັບຜູ້ທີ່ຕ້ອງການເຮົາຫລາຍທີ່ສຸດ. ຂ້າພະເຈົ້າຂໍສະແດງຄວາມຮັກຂອງຂ້າພະເຈົ້າທີ່ມີຕໍ່ທ່ານ ແລະ ຄວາມຮັກຂອງພຣະບິດາເທິງສະຫວັນຂອງເຮົາທີ່ມີຕໍ່ລູກໆຂອງພຣະອົງທີ່ກຳລັງຈະມາສູ່ໂລກນີ້. ໃນພຣະນາມຂອງພຣະເຢຊູຄຣິດ, ອາແມນ.