ລະບົບການຊີ້ນຳຈາກສະຫວັນຂອງເຮົາ
ເມື່ອເຮົາສຸມຊີວິດຂອງເຮົາໃສ່ທີ່ພຣະເຢຊູຄຣິດ, ເຮົາຈະພົບເຫັນເສັ້ນທາງກັບບ້ານຂອງເຮົາ, ອົດທົນຈົນເຖິງທີ່ສຸດ ແລະ ປິຕິຍິນດີຈົນເຖິງທີ່ສຸດ.
ພຣະເຢຊູຄຣິດໄດ້ປ່ຽນຊີວິດຂອງຂ້າພະເຈົ້າເມື່ອຂ້າພະເຈົ້າໄດ້ຮັບບັບຕິສະມາໃນໄວ 26 ປີ ທີ່ ເມືອງຟະຣູຕີຢາ, ຈີເລ, ປະເທດທີ່ຮັກຂອງຂ້າພະເຈົ້າ. ໃນເວລານັ້ນ, ວຽກງານຂອງຂ້າພະເຈົ້າໄດ້ນຳຂ້າພະເຈົ້າຂ້າມມະຫາສະໝຸດ, ແມ່ນ້ຳ, ແລະ ທະເລສາບພາຕາໂກເນຍທີ່ສວຍງາມຂອງປະເທດຈີເລ. ຫລັງຈາກການບັບຕິສະມາຂອງຂ້າພະເຈົ້າ, ຂ້າພະເຈົ້າໄດ້ເຫັນວຽກງານ ແລະ ຊີວິດຂອງຂ້າພະເຈົ້າໃນທາງທີ່ໃໝ່ ແລະ ແຕກຕ່າງ, ຮັບຮູ້ຢ່າງແທ້ຈິງວ່າ “ທຸກສິ່ງທຸກຢ່າງຊີ້ໃຫ້ເຫັນວ່າ ມັນມີພຣະເຈົ້າ.”
ໃນທຳມະຊາດ, ປາແຊມມອນແມ່ນເກີດໃນແຫລ່ງຂອງແມ່ນ້ຳລຳທານ. ໃນຈຸດໃດຈຸດໜຶ່ງຂອງຊີວິດມັນ, ມັນຕ້ອງລອຍລ່ອງລົງຕາມແມ່ນ້ຳເພື່ອອອກໄປເຖິງມະຫາສະໝຸດ, ບ່ອນທີ່ມັນຈະພົບເຫັນອາຫານ ແລະ ສະພາບການທີ່ຈຳເປັນເພື່ອການພັດທະນາການຂອງມັນ.
ແຕ່ມະຫາສະໝຸດກໍຍັງເປັນສະຖານທີ່ອັນຕະລາຍດ້ວຍ ບ່ອນທີ່ສັດລ່າລີ້ຕົວ ແລະ ບ່ອນທີ່ຊາວປະມົງພະຍາຍາມຕຶກເອົາປາແຊມມອນດ້ວຍຂໍເບັດທີ່ມີແສງແວບປອມເປັນອາຫານແຕ່ຈະບໍ່ບຳລຸງລ້ຽງມັນ. ຖ້າຫາກປາແຊມມອນລອດຊີວິດຈາກໄພຂົ່ມຂູ່ເຫລົ່ານີ້ໄດ້, ມັນກໍພ້ອມຈະໃຊ້ລະບົບການຊີ້ນຳອັນມີພະລັງຂອງມັນ ເພື່ອກັບຂຶ້ນແມ່ນ້ຳໄປສູ່ບ່ອນທີ່ມັນເກີດ, ປະເຊີນໜ້າກັບສິ່ງທີ່ທ້າທາຍອັນໃໝ່ ແລະ ບາງສິ່ງທີ່ຄຸ້ນເຄີຍ. ນັກວິທະຍາສາດໄດ້ສຶກສາພຶດຕິກຳການເຄື່ອນຍ້າຍຂອງມັນເປັນເວລາຫລາຍປີ ແລະ ໄດ້ຄົ້ນພົບວ່າມັນໃຊ້ແຜນທີ່ປະເພດແມ່ເຫລັກ, ຄ້າຍຄືກັນກັບລະບົບ GPS, ເພື່ອນຳພາມັນໄປສູ່ຈຸດໝາຍປາຍທາງສຸດທ້າຍຂອງມັນດ້ວຍຄວາມຄັກແນ່ທີ່ບໍ່ໜ້າເຊື່ອ.
ມື້ໃດມື້ໜຶ່ງ ເຮົາທຸກຄົນກໍສາມາດກັບຄືນໄປສູ່ບ້ານແຫ່ງສະຫວັນຂອງເຮົາ ບ່ອນທີ່ເຮົາໄດ້ຈາກມາ. ແລະ ເໝືອນດັ່ງປາແຊມມອນ, ເຮົາກໍມີແຜນທີ່ແມ່ເຫລັກຂອງເຮົາເອງ ຫລື ຄວາມສະຫວ່າງຂອງພຣະຄຣິດ, ເພື່ອຊີ້ນຳເຮົາໄປສູ່ທີ່ນັ້ນ. ພຣະເຢຊູໄດ້ສິດສອນສານຸສິດຂອງພຣະອົງວ່າ “ເຮົານີ້ແຫລະເປັນທາງນັ້ນ, ເປັນຄວາມຈິງ, ແລະ ເປັນຊີວິດ: ບໍ່ມີຜູ້ໃດມາເຖິງພຣະບິດາໄດ້ນອກຈາກມາທາງເຮົາ.”
ເມື່ອເຮົາສຸມຊີວິດຂອງເຮົາໃສ່ທີ່ພຣະເຢຊູຄຣິດ, ເຮົາຈະພົບເຫັນເສັ້ນທາງກັບບ້ານຂອງເຮົາ, ອົດທົນຈົນເຖິງທີ່ສຸດ ແລະ ປິຕິຍິນດີຈົນເຖິງທີ່ສຸດ. ປະທານຣະໂຊ ເອັມ ແນວສັນ ໄດ້ສິດສອນວ່າ, “ຄວາມສຸກທີ່ເຮົາຮູ້ສຶກ ບໍ່ຂຶ້ນກັບສະຖານະການໃນຊີວິດຂອງເຮົາ ແຕ່ມັນຂຶ້ນກັບວ່າ ເຮົາເອົາໃຈໃສ່ຕໍ່ສິ່ງໃດ ໃນຊີວິດຂອງເຮົາ.”
ທຳມະຊາດແຫ່ງສະຫວັນ ແລະ ຈຸດໝາຍປາຍທາງຂອງເຮົາ
ຈາກການປະກາດເລື່ອງຄອບຄົວເຮົາອ່ານວ່າ “[ເຮົາ] ແຕ່ລະຄົນກໍເປັນບຸດ ຫລື ທິດາທາງວິນຍານທີ່ຮັກຫອມຂອງພຣະບິດາມານດາແຫ່ງສະຫວັນ ແລະ ເມື່ອເປັນເຊັ່ນນັ້ນ, ເຮົາແຕ່ລະຄົນ ຈຶ່ງມີທຳມະຊາດແຫ່ງສະຫວັນ ແລະ ມີຈຸດໝາຍປາຍທາງ. … ໃນໂລກກ່ອນເກີດ, ບຸດ ແລະ ທິດາທາງວິນຍານທຸກຄົນຮູ້ຈັກ ແລະ ນະມັດສະການພຣະເຈົ້າ ວ່າເປັນພຣະບິດານິລັນດອນຂອງເຂົາເຈົ້າ ແລະ ຍອມຮັບເອົາແຜນຂອງພຣະອົງ ຊຶ່ງໃນແຜນນັ້ນ ລູກໆຂອງພຣະອົງຈະໄດ້ຮັບຮ່າງກາຍ ແລະ ມີປະສົບການຕ່າງໆຢູ່ໃນໂລກ ເພື່ອຈະໄດ້ພັດທະນາຕົນ ຈົນເຖິງຂັ້ນດີພ້ອມທຸກຢ່າງ ແລະ ຮັບເອົາມໍລະດົກຂອງຕົນທີ່ເປັນຊີວິດນິລັນດອນ.”
ກ່ອນການກຳເນີດຂອງພຣະອົງໃນຊີວິດມະຕະ, ພຣະເຢຊູຄຣິດ ໄດ້ປະກົດຕົວຕໍ່ ໂມເຊ ແລະ ໄດ້ກ່າວກັບເພິ່ນເປັນຕົວແທນພຣະບິດາ. ພຣະອົງໄດ້ບອກໂມເຊວ່າ ພຣະອົງມີວຽກງານອັນຍິ່ງໃຫຍ່ໃຫ້ເພິ່ນເຮັດ. ລະຫວ່າງການພົບປະນັ້ນ, ພຣະຜູ້ເປັນເຈົ້າໄດ້ເອີ້ນເພິ່ນວ່າ “ບຸດຂອງເຮົາ” ຫລາຍເທື່ອ.
ຫລັງຈາກປະສົບການນັ້ນ, ຊາຕານໄດ້ມາລໍ້ລວງເພິ່ນ, ໂດຍກ່າວວ່າ, “ໂມເຊ, ບຸດມະນຸດ, ຈົ່ງນະມັດສະການເຮົາ.”
ໂມເຊໄດ້ໂຕ້ຕອບຕໍ່ການລໍ້ລວງໂດຍການລະນຶກເຖິງທຳມະຊາດແຫ່ງສະຫວັນຂອງເພິ່ນ, ໂດຍກ່າວວ່າ, “ທ່ານເປັນໃຜ? ເພາະຈົ່ງເບິ່ງ, ຂ້າພະເຈົ້າເປັນບຸດຂອງພຣະເຈົ້າ.” ຄວາມຈິງໄດ້ປົດປ່ອຍ ໂມເຊ ໃຫ້ເປັນອິດສະລະຈາກການໂຈມຕີຂອງຜູ້ປໍລະປັກ.
ອ້າຍເອື້ອຍນ້ອງທັງຫລາຍ, ຂໍເບັດຂອງຄວາມເປັນມະຕະມີຈິງ. ມັນມັກຈະດຶງດູດໃຈ, ແຕ່ມັນສະແຫວງຫາເປົ້າໝາຍດຽວເທົ່ານັ້ນ: ເພື່ອຈະດຶງເຮົາໃຫ້ອອກນອກສາຍນ້ຳທີ່ປ່ຽມດ້ວຍຊີວິດ ທີ່ນຳເຮົາໄປຫາພຣະບິດາ ແລະ ສູ່ຊີວິດນິລັນດອນ.
ຂ້າພະເຈົ້າຮູ້ວ່າຂໍເບັດຂອງຄວາມເປັນມະຕະນັ້ນເປັນແນວໃດ. ວັນອາທິດໜຶ່ງ, ຕອນເປັນຜູ້ປ່ຽນໃຈເຫລື້ອມໃສໃໝ່, ຂ້າພະເຈົ້າໄດ້ສິດສອນຫ້ອງຮຽນຖານະປະໂລຫິດເມື່ອມີການສົນທະນາທີ່ບໍ່ສະຫງົບໄດ້ເກີດຂຶ້ນ. ຂ້າພະເຈົ້າໄດ້ດີ້ນລົນເພື່ອຈະສອນບົດຮຽນໃຫ້ຈົບ. ຂ້າພະເຈົ້າຂຸ່ນເຄືອງໃຈ ແລະ ໄດ້ຮູ້ສຶກວ່າຂ້າພະເຈົ້າໄດ້ເປັນຜູ້ຮັບເຄາະ. ໂດຍບໍ່ໄດ້ເວົ້າຫຍັງເລີຍ, ຂ້າພະເຈົ້າກຳລັງຈະຍ່າງອອກໄປ ດ້ວຍຄວາມຄິດທີ່ວ່າຂ້າພະເຈົ້າຈະບໍ່ກັບຄືນມາໂບດອີກເປັນເວລານານ.
ໃນວິນາທີ່ນັ້ນເອງ, ຜູ້ດຳລົງຖານະປະໂລຫິດທີ່ເປັນຫ່ວງໄດ້ຢືນຕັນໜ້າຂ້າພະເຈົ້າ. ດ້ວຍຄວາມຮັກເພິ່ນໄດ້ເຊື້ອເຊີນໃຫ້ຂ້າພະເຈົ້າສຸມໃຈໃສ່ທີ່ພຣະຄຣິດ ແລະ ບໍ່ແມ່ນໃສ່ທີ່ສະຖານະການທີ່ພວກເຮົາໄດ້ປະສົບຢູ່ໃນຫ້ອງຮຽນ. ເມື່ອຫວນຄິດຄືນຫລັງເຖິງປະສົບການນັ້ນກັບເພິ່ນ, ເພິ່ນໄດ້ແບ່ງປັນກັບຂ້າພະເຈົ້າວ່າ ເພິ່ນໄດ້ຍິນສຸລະສຽງບອກເພິ່ນວ່າ, “ຕາມລາວໄປ; ລາວສຳຄັນຕໍ່ເຮົາ.”
ເພື່ອນທີ່ຮັກແພງຂອງຂ້າພະເຈົ້າ, ພວກເຮົາ ທຸກຄົນ ສຳຄັນຕໍ່ພຣະອົງ. ປະທານແນວສັນໄດ້ສິດສອນວ່າ “ຍ້ອນພັນທະສັນຍາຂອງເຮົາກັບພຣະເຈົ້າ, ພຣະອົງຈະບໍ່ມີວັນອິດເມື່ອຍໃນຄວາມພະຍາຍາມຂອງພຣະອົງທີ່ຈະຊ່ວຍເຫລືອເຮົາ, ແລະ ເຮົາຈະບໍ່ເຮັດໃຫ້ຄວາມອົດທົນທີ່ເມດຕາຂອງພຣະອົງສຳລັບເຮົາໝົດໄປ.” ທຳມະຊາດແຫ່ງສະຫວັນ ແລະ ຄວາມສຳພັນແຫ່ງພັນທະສັນຍາຂອງເຮົາກັບພຣະເຈົ້າອະນຸຍາດໃຫ້ເຮົາໄດ້ຮັບຄວາມຊ່ວຍເຫລືອຈາກສະຫວັນ.
ຄວາມຕ້ອງການການບຳລຸງລ້ຽງ
ເຊັ່ນດຽວກັນທີ່ປາແຊມມອນຕ້ອງການການບຳລຸງລ້ຽງໃນມະຫາສະໝຸດເພື່ອຈະເຕີບໂຕ, ເຮົາກໍຈຳເປັນຕ້ອງບຳລຸງລ້ຽງຕົວເຮົາເອງທາງວິນຍານ ເພື່ອຈະຫລີກລ້ຽງການຕາຍຍ້ອນການຂາດສານອາຫານທາງວິນຍານເຊັ່ນກັນ. ການອະທິຖານ, ພຣະຄຳພີ, ພຣະວິຫານ, ແລະ ການໄປຮ່ວມການປະຊຸມໃນວັນອາທິດເປັນປະຈຳແມ່ນຈຳເປັນໃນລາຍການອາຫານທາງວິນຍານຂອງເຮົາ.
ໃນເດືອນພະຈິກປີ 1956, ຣີຄາໂດ ກາຊີອາ ໄດ້ຮັບບັບຕິສະມາໃນປະເທດຈີເລ, ກາຍເປັນສະມາຊິກຄົນທຳອິດຂອງສາດສະໜາຈັກໃນປະເທດຂອງຂ້າພະເຈົ້າ. ພຽງແຕ່ມື້ດຽວກ່ອນລາວໄດ້ເສຍຊີວິດ, ລາວໄດ້ປະກາດຕໍ່ຄອບຄົວ ແລະ ໝູ່ເພື່ອນຂອງລາວວ່າ, “ເມື່ອຫລາຍປີກ່ອນ, ຜູ້ສອນສາດສະໜາໄດ້ເຊື້ອເຊີນຂ້ອຍໃຫ້ມີຄວາມສຸກພ້ອມກັບຄອບຄົວຂອງຂ້ອຍ. ຂ້ອຍມີຄວາມສຸກ. ຈົ່ງບອກທຸກຄົນວ່າ ໃນຈີເລ ພຣະກິດຕິຄຸນແມ່ນຄວາມສຸກ.”
ຫລັງຈາກໄດ້ຮັບການບຳລຸງລ້ຽງດ້ວຍພຣະກິດຕິຄຸນຂອງພຣະເຢຊູຄຣິດ, ຣີຄາໂດໄດ້ອຸທິດຊີວິດທັງໝົດຂອງລາວຕໍ່ການຮັບໃຊ້ພຣະເຈົ້າ ແລະ ເພື່ອນບ້ານຂອງລາວດ້ວຍຄວາມຮັກ. ຕົວຢ່າງແຫ່ງການເປັນສານຸສິດຂອງລາວໄດ້ເປັນພອນໃຫ້ແກ່ຫລາຍໆລຸ້ນຄົນ, ລວມທັງຂ້າພະເຈົ້າດ້ວຍ. ສາດສະດາໂຈເຊັບ ສະມິດ ໄດ້ສິດສອນວ່າ “ຄົນທີ່ເຕັມປ່ຽມໄປດ້ວຍຄວາມຮັກຂອງພຣະເຈົ້າ, ຈະບໍ່ພໍໃຈພຽງແຕ່ເປັນພອນໃຫ້ແກ່ຄອບຄົວຂອງຕົນເທົ່ານັ້ນ, ແຕ່ຈະຂະຫຍາຍຂອບເຂດໄປທົ່ວໂລກ, ເພາະເຂົາປາດຖະໜາຈະເປັນພອນໃຫ້ແກ່ມວນມະນຸດທັງປວງ.”
ກັບຄືນສູ່ບ້ານແຫ່ງສະຫວັນຂອງເຮົາ
ເລິກໆພາຍໃນຕົວເຮົາແຕ່ລະຄົນກໍມີຄວາມປາດຖະໜາທີ່ຈະກັບຄືນສູ່ບ້ານແຫ່ງສະຫວັນຂອງເຮົາ, ແລະ ພຣະເຢຊູຄຣິດກໍເປັນລະບົບການຊີ້ນຳຈາກສະຫວັນຂອງເຮົາ. ພຣະອົງເປັນຫົນທາງນັ້ນ. ການເສຍສະລະຊົດໃຊ້ຂອງພຣະອົງເຮັດໃຫ້ເປັນໄປໄດ້ສຳລັບເຮົາທີ່ຈະເຮັດພັນທະສັນຍາສັກສິດກັບພຣະເຈົ້າ. ເມື່ອເຮົາເຮັດພັນທະສັນຍາແລ້ວ, ເປັນບາງຄັ້ງເຮົາຈະພົບເຫັນຕົວເອງດີ້ນລົນຕໍ່ສູ້ກັບກະແສທີ່ພະຍາຍາມແຍກເຮົາອອກໄປຈາກອິດທິພົນຂອງພຣະເຈົ້າ. ອັນຕະລາຍ, ຄວາມຜິດຫວັງ, ການລໍ້ລວງ, ແລະ ຄວາມຍາກລຳບາກຈະທົດລອງສັດທາ ແລະ ຄວາມເຂັ້ມແຂງທາງວິນຍານຂອງເຮົາ. ຈົ່ງຂໍຄວາມຊ່ວຍເຫລືອ. ພຣະເຢຊູຄຣິດເຂົ້າພຣະໄທ ແລະ ກະຕືລືລົ້ນສະເໝີທີ່ຈະຊ່ວຍແບກຫາບພາລະໜັກຂອງເຮົາ.
ຂໍໃຫ້ຈຳໄວ້ວ່າ ພຣະອົງເປັນທີ່ຮູ້ຈັກກັນວ່າ, “ທ່ານໄດ້ທົນທຸກນາໆ ແລະ ທົນຕໍ່ຄວາມເຈັບປວດ.” ພຣະຜູ້ຊ່ວຍໃຫ້ລອດໄດ້ສິດສອນວ່າ, “ໃນໂລກນີ້ພວກເຈົ້າຈະມີຄວາມທຸກລຳບາກ: ແຕ່ຈົ່ງຊື່ນໃຈເທາະ; ເພາະຝ່າຍເຮົາໄດ້ຊະນະໂລກແລ້ວ.” ການເສຍສະລະຊົດໃຊ້ຂອງພຣະອົງ ຍອມໃຫ້ບາບຂອງເຮົາຮັບການອະໄພ, ຈົນເຖິງຈຸດທີ່ພຣະອົງບໍ່ຈື່ຈຳມັນອີກເລີຍ.
ເຮົາອາດບໍ່ສາມາດລືມບາບຂອງເຮົາທັງໝົດ ເພາະເປັນພາກສ່ວນຂອງການຮຽນຮູ້ຂອງຊີວິດມະຕະຂອງເຮົາ ເພື່ອວ່າເຮົາຈະຈື່ຈຳຈະບໍ່ເຮັດບາບນັ້ນຊ້ຳອີກ. ແທນທີ່, ເຮົາຈະຈື່ຈຳພຣະອົງຂະນະທີ່ເຮົາຮັບສ່ວນສິນລະລຶກຢູ່ທີ່ໂບດທຸກໆວັນອາທິດ. ພິທີການນີ້ເປັນພາກສ່ວນທີ່ຈຳເປັນຂອງການນະມັດສະການ ແລະ ພັດທະນາການທາງວິນຍານ. ຄວາມຊື່ນຊົມຈະມີມາເມື່ອເຮົາເຂົ້າໃຈວ່າ ນີ້ບໍ່ໄດ້ເປັນພຽງແຕ່ອີກມື້ໜຶ່ງເທົ່ານັ້ນ. “ວັນຊະບາໂຕຖືກຕັ້ງໄວ້ເພື່ອປະໂຫຍດອັນນຳຄວາມສຸກມາສູ່ມະນຸດ” ດ້ວຍເຈດຕະນາທີ່ຈະໃຫ້ເຮົາພັກຜ່ອນຈາກໂລກ ແລະ ຟື້ນຟູຮ່າງກາຍ ແລະ ວິນຍານຂອງເຮົາ.
ເຮົາຍັງຈື່ຈຳພຣະອົງເມື່ອເຮົາໄປພຣະວິຫານ—ບ້ານຂອງພຣະຜູ້ເປັນເຈົ້າ. ພຣະວິຫານໃຫ້ຄວາມຮູ້ທີ່ລະອຽດຫລາຍຂຶ້ນເຖິງພຣະເຢຊູຄຣິດໃຫ້ແກ່ເຮົາ ທີ່ເປັນສູນກາງແຫ່ງພັນທະສັນຍາ ທີ່ນຳເຮົາໄປສູ່ຊີວິດນິລັນດອນ, ຊຶ່ງເປັນຂອງປະທານອັນຍິ່ງໃຫຍ່ທີ່ສຸດ … ໃນຂອງປະທານທັງໝົດຂອງພຣະເຈົ້າ.
ການໄປພຣະວິຫານໄດ້ໃຫ້ການປອບໂຍນແກ່ຂ້າພະເຈົ້າ ແລະ ຄວາມຫວັງອັນຍິ່ງໃຫຍ່ກ່ຽວກັບຈຸດໝາຍປາຍທາງນິລັນດອນຂອງເຮົາ. ຂ້າພະເຈົ້າໄດ້ປະສົບການເຊື່ອມຕໍ່ແຫ່ງສະຫວັນກັບຜູ້ຄົນຢູ່ທັງສອງຟາກມ່ານ. ຂ້າພະເຈົ້າໄດ້ເຫັນການມະຫັດສະຈັນທີ່ປິ່ນປົວໃນຊີວິດຂອງລູກໆທີ່ຍັງນ້ອຍຂອງຂ້າພະເຈົ້າ, ທີ່ສອງຄົນມີຊີວິດຢູ່ກັບການເຈັບປ່ວຍທີ່ມອງບໍ່ເຫັນ ທີ່ຮຽກຮ້ອງການດູແລປະຈຳວັນຕະຫລອດຊີວິດຂອງພວກເຂົາ.
ຄອບຄົວຂອງພວກເຮົາປິຕິຍິນດີຂະນະທີ່ພວກເຮົາແບ່ງປັນກ່ຽວກັບແຜນແຫ່ງຄວາມສຸກ. ໃບໜ້າຂອງລູກໆຂອງຂ້າພະເຈົ້າເບີກບານຂຶ້ນເມື່ອພວກເຂົາໄດ້ຍິນວ່າ ເປັນເພາະພຣະເຢຊູຄຣິດ, “ຄວາມທຸກທໍລະມານຂອງ [ພວກເຂົາ] ຈະເປັນຢູ່ພຽງຊົ່ວຄາວ.” ພວກເຮົາຮັກລູກໆຂອງພວກເຮົາຢ່າງເລິກເຊິ່ງ, ແລະ ພວກເຮົາຮູ້ວ່າມື້ໜຶ່ງ, ດັ່ງທີ່ປະທານແຈັບຟະຣີ ອາ ຮໍແລນ ໄດ້ສິດສອນວ່າ, ພວກເຂົາ “ຈະຢືນຢູ່ຕໍ່ໜ້າເຮົາ ຮຸ່ງໂລດ ແລະ ສະຫງ່າງາມ, ສວຍງາມຢ່າງສົມບູນແບບ ໃນຮ່າງກາຍ ແລະ ຈິດໃຈ.” ພັນທະສັນຍາຂອງເຮົານຳເຮົາເຂົ້າໃກ້ພຣະເຈົ້າຫລາຍຂຶ້ນ ເຖິງຈຸດທີ່ເຮັດໃຫ້ສິ່ງທີ່ເປັນໄປບໍ່ໄດ້ເປັນໄປໄດ້, ເຕີມເຕັມຊ່ອງວ່າງຂອງຄວາມມືດ ແລະ ຄວາມສົງໄສ ດ້ວຍຄວາມສະຫວ່າງ ແລະ ຄວາມສະຫງົບສຸກ.
ເປັນເພາະພຣະເຢຊູຄຣິດ, ຍັງມີຄວາມຫວັງ ແລະ ເຫດຜົນທີ່ມີພື້ນຖານດີໆ ເພື່ອຈະຮັກ, ອະທິຖານ, ແລະ ສະໜັບສະໜູນຜູ້ຄົນທີ່ເຮົາຫ່ວງໃຍຕໍ່ໄປ.
ຂ້າພະເຈົ້າຮູ້ວ່າພຣະອົງຊົງພຣະຊົນ. ພຣະອົງຮູ້ຈັກເຮົາ ແລະ ຮັກເຮົາ. ພຣະອົງເປັນທາງນັ້ນ, ເປັນຄວາມຈິງ, ແລະ ເປັນຊີວິດຂອງໂລກ.
ຂ້າພະເຈົ້າຂໍເຊື້ອເຊີນເຮົາທຸກຄົນໃນມື້ນີ້ໃຫ້ ສຸມຊີວິດຂອງເຮົາໃສ່ທີ່ພຣະເຢຊູຄຣິດ ແລະ ຄຳສອນຂອງພຣະອົງ. ການເຮັດເຊັ່ນນີ້ຈະຊ່ວຍໃຫ້ເຮົາຫລີກລ້ຽງຈາກການຍອມຕໍ່ການລໍ້ລວງ, ການຂຸ່ນເຄືອງໃຈ, ແລະ ການສົງສານຕົວເອງ. ເຮົາຈະຄົງຢູ່ດັ່ງພຣະວິຫານ—ບໍລິສຸດ, ໝັ້ນຄົງ, ແລະ ແນ່ວແນ່. ເຮົາຈະອົດທົນຕໍ່ການທົດລອງ ແລະ ຄວາມທ້າທາຍ, ແລະ ເຮົາຈະກັບເຖິງບ້ານ, ອົດທົນຈົນເຖິງທີ່ສຸດ ແລະ ປິຕິຍິນດີຈົນເຖິງທີ່ສຸດ. ໃນພຣະນາມຂອງພຣະເຢຊູຄຣິດ, ອາແມນ.