ຕໍ່ໜ້າຕໍ່ຕາເຮົາ
ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ກຳລັງເຕີບໂຕຂຶ້ນໃນຈຳນວນສະມາຊິກ ແລະ ຄອບຄົວ, ເຂດເຜີຍແຜ່ ແລະ ຜູ້ສອນສາດສະໜາ, ອາຄານປະຊຸມ ແລະ ພຣະວິຫານ.
ອ້າຍເອື້ອຍນ້ອງທັງຫລາຍ, ຂ້າພະເຈົ້າຮູ້ສຶກກະຕັນຍູຫລາຍທີ່ໄດ້ຢູ່ກັບທ່ານ. ພວກເຮົາຮັກທ່ານ; ພວກເຮົາກະຕັນຍູສຳລັບທ່ານ, ແລະ ພວກເຮົາຮູ້ສຶກໄດ້ຮັບພອນໂດຍຄຳອະທິຖານຂອງທ່ານ.
ປະທານຣະໂຊ ເອັມ ແນວສັນ ໄດ້ກ່າວໃນກອງປະຊຸມໃຫຍ່ທີ່ຜ່ານມາວ່າ: “ທ່ານເຫັນເຖິງສິ່ງທີ່ເກີດຂຶ້ນຕໍ່ໜ້າຕໍ່ຕາເຮົາຫລືບໍ່? ຂ້າພະເຈົ້າອະທິຖານວ່າເຮົາຈະບໍ່ພາດຄວາມສະຫງ່າງາມຂອງຊ່ວງເວລານີ້! ພຣະຜູ້ເປັນເຈົ້າກຳລັງເລັ່ງວຽກງານຂອງພຣະອົງແທ້ໆ.”
ກຳລັງເລັ່ງວຽກງານຂອງພຣະອົງ. ຄຳວ່າ “ເລັ່ງ” ແມ່ນຄຳທີ່ສຳຄັນ. ມັນສະແດງເຖິງການເຄື່ອນໄຫວທີ່ວ່ອງໄວ, ເລັ່ງຄວາມໄວ, ແລະ ແມ່ນແຕ່ເລັ່ງດ່ວນ. ໃນການເຕີບໂຕຂອງສາດສະໜາຈັກ ແລະ ແຜນຂອງພຣະຄຣິດ, ການເລັ່ງກຳລັງເກີດຂຶ້ນ. ແລະ ພວກເຮົາທຸກຄົນລ້ວນແຕ່ເປັນສ່ວນໜຶ່ງໃນນັ້ນ.
ໃນເດືອນເມສາ ປີ 1834 ໃນເມືອງເຄີດແລນ, ລັດໂອໄຮໂອ, ສາດສະດາໂຈເຊັບ ສະມິດ ໄດ້ເຕົ້າໂຮມທຸກຄົນຜູ້ທີ່ດຳລົງຖານະປະໂລຫິດໃນເຮືອນໂຮງຮຽນນ້ອຍໆຫລັງໜຶ່ງ, ປະມານ 14 ຕະລາງຟຸດ (4.3 ຕະລາງແມັດ). ເຮົາສາມາດເອົາເຮືອນໂຮງຮຽນເຫລົ່ານັ້ນຫລາຍສິບຫລັງມາໃສ່ໃນສູນກາງປະຊຸມໃຫຍ່ແຫ່ງນີ້, ໂດຍຍັງມີບ່ອນວ່າງເຫລືອ. ໂຈເຊັບ ສະມິດ ໄດ້ກ່າວວ່າ, “ຄ່ຳຄືນນີ້ ມີຜູ້ດຳລົງຖານະປະໂລຫິດພຽງໜ້ອຍດຽວເທົ່ານັ້ນຢູ່ໃນບ່ອນນີ້, ແຕ່ສາດສະໜາຈັກນີ້ຈະເຕັມຢູ່ໃນອາເມຣິກາເໜືອ ແລະ ໃຕ້—ມັນຈະເຕັມຢູ່ໃນໂລກ.”
ຄຳທຳນາຍນັ້ນກຳລັງສຳເລັດຄົບຖ້ວນ “ຕໍ່ໜ້າຕໍ່ຕາເຮົາ.” ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ກຳລັງເຕີບໂຕຂຶ້ນໃນຈຳນວນສະມາຊິກ ແລະ ຄອບຄົວ, ເຂດເຜີຍແຜ່ ແລະ ຜູ້ສອນສາດສະໜາ, ອາຄານປະຊຸມ ແລະ ພຣະວິຫານ, ແລະ ໃນການລົງທະບຽນຮຽນໃນຫ້ອງຮຽນສາດສະໜາ, ສະຖາບັນ, ແລະ ມະຫາວິທະຍາໄລທົ່ວໂລກ.
ພວກເຮົາກະຕັນຍູທີ່ໄດ້ຢູ່ເທິງໂລກນີ້ ເມື່ອສາດສະໜາຈັກກຳລັງເພີ່ມຂຶ້ນໃນຈຳນວນຕົວເລກ ແລະ ອິດທິພົນ, ແຕ່ທີ່ສຳຄັນໄປກວ່ານັ້ນ ໃນໃຈ ແລະ ຊີວິດຂອງສະມາຊິກຂອງສາດສະໜາຈັກ. ເຮົາເປັນທີ່ຮູ້ຈັກກັນວ່າ ເປັນສານຸສິດຂອງພຣະເຢຊູຄຣິດ. ເຮົາແບ່ງປັນປະຈັກພະຍານຂອງເຮົາກ່ຽວກັບພຣະອົງ, ສາດສະໜາຈັກຂອງພຣະອົງ, ວິທີທາງຂອງພຣະອົງ, ແລະ ເສັ້ນທາງແຫ່ງພັນທະສັນຍາຂອງພຣະອົງ. ເຮົາເປັນຄົນຂອງພຣະອົງ, ແລະ ພຣະອົງເປັນພຣະຜູ້ຊ່ວຍໃຫ້ລອດຂອງເຮົາ.
ຂ້າພະເຈົ້າຕົກຕະລຶງກັບສິ່ງທີ່ປະທານແນວສັນເອີ້ນວ່າ “ຄວາມສະຫງ່າງາມຂອງຊ່ວງເວລານີ້” ແລະ ສະແດງອອກເຖິງຄວາມກະຕັນຍູອັນເລິກເຊິ່ງຕໍ່ພຣະຜູ້ເປັນເຈົ້າສຳລັບວຽກງານຂອງພຣະອົງ. ຂ້າພະເຈົ້າຊຸກຍູ້ເຮົາໃຫ້ຢືນຢ່າງສະຫງ່າຜ່າເຜີຍໃນຖານະສານຸສິດຂອງພຣະອົງ, ຜູ້ເຫັນເຫດການການສຳເລັດຄົບຖ້ວນຂອງຄຳທຳນາຍ, ທັງສະໄໝບູຮານ ແລະ ສະໄໝໃໝ່.
ຈະມີຜູ້ຄັດຄ້ານທີ່ຮ້ອງຂຶ້ນວ່າ, “‘ເບິ່ງແມ, ບ່ອນນີ້’ ແລະ … ‘ເບິ່ງແມ, ບ່ອນນັ້ນ!’” ດັ່ງທີ່ພວກເຂົາໄດ້ເຮັດໃນວັນເວລາຂອງສາດສະດາໂຈເຊັບ ສະມິດ. ເຖິງຢ່າງໃດກໍຕາມ, ພວກເຂົາເປັນ ແລະ ຈະເປັນພຽງແຕ່ໝາຍເຫດຢູ່ທາງລຸ່ມໜ້າປຶ້ມເທົ່ານັ້ນ ໃນວຽກງານອັງສູງສົ່ງນີ້. ໃຫ້ຈື່ຖ້ອຍຄຳຂອງໂຈເຊັບ ສະມິດ ທີ່ວ່າ: “ມືທີ່ບໍ່ສັກສິດຈະບໍ່ສາມາດຢຸດຢັ້ງວຽກງານນີ້ຈາກຄວາມກ້າວໜ້າໄດ້; ການຂົ່ມເຫັງອາດເດືອດຂຶ້ນ, … ແຕ່ຄວາມຈິງຂອງພຣະເຈົ້າຈະກ້າວໄປໜ້າຢ່າງອາດຫານ, ສູງສົ່ງ, ແລະ ເປັນເອກະລາດ, ຈົນກວ່າມັນໄດ້ເຂົ້າໄປເຖິງທຸກທະວີບ, ໄດ້ຢ້ຽມຢາມທຸກພາກພື້ນຂອງແຜ່ນດິນ, ໄດ້ຜ່ານໄປໃນທຸກປະເທດ, ແລະ ທຸກຄົນໄດ້ຍິນ, ຈົນກວ່າພຣະປະສົງຂອງພຣະເຈົ້າຈະສຳເລັດຄົບຖ້ວນ, ແລະ ພຣະເຢໂຮວາອົງຍິ່ງໃຫຍ່ຈະກ່າວວ່າ ວຽກງານສຳເລັດແລ້ວ.”
ໃນວຽກງານມອບໝາຍຂອງຂ້າພະເຈົ້າປີນີ້, ຂ້າພະເຈົ້າໄດ້ນັ່ງຢູ່ແຖວໜ້າກັບພຣະຜູ້ເປັນເຈົ້າກຳລັງເລັ່ງວຽກງານຂອງພຣະອົງ. ສາດສະໜາຈັກກຳລັງສ້າງພຣະວິຫານໃນຄວາມໄວທີ່ບໍ່ເຄີຍມີມາກ່ອນ, ໂດຍໃຫ້ສະມາຊິກໄດ້ມີໂອກາດທີ່ຈະນະມັດສະການໃນບ້ານຂອງພຣະຜູ້ເປັນເຈົ້າຫລາຍຍິ່ງຂຶ້ນ. ສອງ, ວຽກງານເຜີຍແຜ່ກຳລັງທ້ອນໂຮມຈຳນວນຄົນສູງສຸດເຂົ້າສູ່ຝູງຂອງຜູ້ລ້ຽງແກະທີ່ດີ, ພຣະເຢຊູຄຣິດ. ແລະ ສາມ, ການສຶກສາຂອງສາດສະໜາຈັກໃນຮູບແບບຕ່າງໆ ແມ່ນຢູ່ໃນລະດັບທີ່ສູງທີ່ສຸດໃນການສິດສອນຜູ້ທີ່ “ສະແຫວງຫາພຣະເຢຊູອົງນີ້.”
ທຸກມື້ນີ້ ສາດສະໜາຈັກມີພຣະວິຫານ 367 ແຫ່ງ ໃນຫລາຍໆຂັ້ນຕອນຂອງການອອກແບບ, ການກໍ່ສ້າງ, ຫລື ການເປີດດຳເນີນການ. ແລະ ເພື່ອຈຸດປະສົງຫຍັງ? ຄຳຕອບໄດ້ຖືກປະກາດເທິງພຣະວິຫານແຕ່ລະແຫ່ງ: “ສັກສິດແດ່ພຣະຜູ້ເປັນເຈົ້າ.” ພຣະວິຫານເປີດຫົນທາງສູ່ພອນສູງສຸດທີ່ພຣະບິດາຜູ້ສະຖິດຢູ່ໃນສະຫວັນມີໄວ້ສຳລັບເຮົາແຕ່ລະຄົນ. ອ້າຍເອື້ອຍນ້ອງທັງຫລາຍເອີຍ, ເຮົາກຳລັງເລັ່ງຄວາມສັກສິດ ເມື່ອເຮົາໃຊ້ຊີວິດຢ່າງມີຄ່າຄວນສຳລັບພຣະວິຫານ, ເມື່ອເຮົານະມັດສະການໃນບ້ານຂອງພຣະຜູ້ເປັນເຈົ້າ, ແລະ ເມື່ອເຮົາເຮັດພັນທະສັນຍາກັບພຣະເຈົ້າເພື່ອຕົວເຮົາເອງ ແລະ ແທນບັນພະບຸລຸດຂອງເຮົາທີ່ຢູ່ຟາກມ່ານອີກເບື້ອງໜຶ່ງ.
ປະທານແນວສັນເຄີຍກ່າວໄວ້ວ່າ: “ການໂຈມຕີຂອງຜູ້ປໍລະປັກ ແມ່ນເພີ່ມທະວີຫລາຍຂຶ້ນ, ໃນຄວາມຮຸນແຮງ ແລະ ໃນຫລາຍຮູບແບບ. ການໄປພຣະວິຫານເປັນປະຈຳຂອງເຮົາ ແມ່ນຈຳເປັນຫລາຍກວ່າທີ່ຜ່ານມາ. ຂ້າພະເຈົ້າຂໍໃຫ້ທ່ານຈົ່ງກວດກາເບິ່ງເວລາທີ່ທ່ານໃຊ້ເຮັດສິ່ງຕ່າງໆ ດ້ວຍການອະທິຖານ.” ໃນບ້ານຂອງພຣະອົງ ເຮົາສາມາດຮູ້ສຶກໄດ້ເຖິງທີ່ປະທັບອັນສັກສິດຂອງພຣະຜູ້ເປັນເຈົ້າ ແລະ ຄວາມສະຫງົບສຸກທີ່ເໜືອທຳມະຊາດ.
ປີກາຍນີ້, ຂ້າພະເຈົ້າໄດ້ຮັບສິດທິພິເສດໃຫ້ຄວບຄຸມການອຸທິດພຣະວິຫານເມັນໂດຊາ ອາກຊັງຕິນ. ໃນຂ່າວສານຂອງຂ້າພະເຈົ້າ, ຂ້າພະເຈົ້າໄດ້ອ້າງອີງເຖິງຄຳທຳນາຍປີ 1926 ຂອງແອວເດີ ເມວວິນ ເຈ ບາເລີດ ວ່າວຽກງານຂອງພຣະຜູ້ເປັນເຈົ້າຈະເຕີບໂຕຂຶ້ນຢ່າງຊ້າໆຊົ່ວໄລຍະໜຶ່ງໃນອາເມຣິກາໃຕ້, “ເໝືອນດັ່ງຕົ້ນໂອກທີ່ເຕີບໂຕຂຶ້ນຢ່າງຊ້າໆຈາກເມັດໝາກໂອກ. ມັນຈະບໍ່ໃຫຍ່ຂຶ້ນບາດດຽວໃນມື້ດຽວ,” ແຕ່ຄົນເປັນພັນໆຄົນຈະເຂົ້າຮ່ວມສາດສະໜາຈັກ, ແລະ ຊົນຊາດແຫ່ງອາເມຣິກາໃຕ້ຈະກາຍເປັນ “ພະລັງໃນສາດສະໜາຈັກ.” ຂ້າພະເຈົ້າໄດ້ເຫັນຄຳທຳນາຍນັ້ນສຳເລັດຄົບຖ້ວນຕໍ່ໜ້າຕໍ່ຕາຂ້າພະເຈົ້າ.
ເມັນໂດຊາ, ທີ່ຄັ້ງໜຶ່ງເຄີຍເປັນເມັດໝາກໂອກນ້ອຍໆ, ໄດ້ກາຍເປັນຕົ້ນໂອກທີ່ຍິ່ງໃຫຍ່. ການເຕີບໂຕນັ້ນໄດ້ເກີດຂຶ້ນຢ່າງຊໍ້າໆທົ່ວທະວີບ ແລະ ເກາະຕ່າງໆໃນທະເລ.
ເຮົາເຫັນພຣະຜູ້ເປັນເຈົ້າກຳລັງເລັ່ງວຽກງານຂອງພຣະອົງໃນເຂດເຜີຍແຜ່. ໃນປີ 2024, ຜູ້ສອນສາດສະໜາ 80,000 ຄົນ ກຳລັງຮັບໃຊ້ໃນເຂດເຜີຍແຜ່ 450 ເຂດ ສາມສິບຫົກເຂດໃນນັ້ນ ແມ່ນເຂດເຜີຍແຜ່ໃໝ່. ປີກາຍນີ້ ວຽກງານເຜີຍແຜ່ໄດ້ນຳສະມາຊິກໃໝ່ຫລາຍກວ່າ 308,000 ຄົນ ເຂົ້າມາສູ່ສາດສະໜາຈັກ. ຫລາຍກວ່າຕົວເລກ, ພຣະວິນຍານແຫ່ງການເຕົ້າໂຮມກໍຄືການນຳຈິດວິນຍານມາຫາພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ.
ຂ້າພະເຈົ້າຄິດເຖິງອັກຄະສາວົກ ບຣິກຳ ຢັງ ແລະ ອັກຄະສາວົກ ຮີເບີ ຊີ ຄິມໂບ, ຜູ້ທີ່ໄດ້ອອກໄປເປັນຜູ້ສອນສາດສະໜາໃນປີ 1839 ສູ່ໝູ່ເກາະອັງກິດ. ພວກເພິ່ນປ່ວຍໂຊ; ພວກເພິ່ນໄດ້ປະຄອບຄົວຂອງພວກເພິ່ນທີ່ກຳລັງປ່ວຍໂຊ ແລະ ອົດຢາກ. ເຖິງຢ່າງໃດກໍຕາມ, ທັງສອງໄດ້ປີນຂຶ້ນກວຽນ, ແລະ ຂະນະທີ່ຍັງຢູ່ໃນສາຍຕາຂອງຄົນທີ່ພວກເພິ່ນຮັກ, ຮີເບີໄດ້ເວົ້າວ່າ, “ພວກເຮົາລຸກຂຶ້ນ ແລະ ໃຫ້ກຳລັງໃຈພວກເຂົາກັນເທາະ.” ທັງສອງພະຍາຍາມລຸກຂຶ້ນຢືນ ແລະ ຮ້ອງວ່າ, “ໄຊໂຢ, ໄຊໂຢ ເພື່ອອິດສະຣາເອນ.”
ຂ້າພະເຈົ້າໄດ້ເຫັນຄວາມກະຕືລືລົ້ນດຽວກັນນີ້ເພື່ອວຽກງານຂອງພຣະຜູ້ເປັນເຈົ້າໃນເມືອງລິມາ, ປະເທດເປຣູ, ເມື່ອຂ້າພະເຈົ້າພົບກັບຜູ້ສອນສາດສະໜາຈາກສູນຝຶກອົບຮົມຜູ້ສອນສາດສະໜາ ແລະ ເຂດເຜີຍແຜ່ໃນເມືອງລິມາ. ຊ່າງເປັນພາບທີ່ເປັນຕາເບິ່ງແທ້ໆ! ຂ້າພະເຈົ້າໄດ້ເຫັນການເລັ່ງຕໍ່ໜ້າຕໍ່ຕາຂ້າພະເຈົ້າ. ຕອນນີ້ ມີເຂດເຜີຍແຜ່ເຈັດເຂດພຽງແຕ່ໃນເມືອງລິມາເມືອງດຽວ.
ໃນຕອນທ້າຍຂອງກອງປະຊຸມຂອງພວກເຮົາ, ຜູ້ສອນສາດສະໜາໄດ້ກຽມເຊີໄພ້ພິເສດສຳລັບຂ້າພະເຈົ້າ. ພວກເຂົາໄດ້ຢືນຂຶ້ນ ແລະ ໂຮ່ຮ້ອງວ່າ, “ໄຊໂຢ ເພື່ອອິດສະຣາເອນ.” ຂ້າພະເຈົ້າຈະບໍ່ມີວັນລືມຊ່ວງເວລານັ້ນ; ຂ້າພະເຈົ້າເສຍດາຍທີ່ພວກທ່ານທຸກຄົນບໍ່ສາມາດໄດ້ຢູ່ທີ່ນັ້ນນຳກັນ. ຕໍ່ໜ້າຕໍ່ຕາຂ້າພະເຈົ້າແມ່ນບັນດາຜູ້ສອນສາດສະໜາທີ່ໄດ້ປະຖິ້ມ “ສິ່ງທີ່ເປັນຂອງໂລກ” ເພື່ອຮັບໃຊ້ພຣະຜູ້ເປັນເຈົ້າ ແລະ ຊ່ວຍເລັ່ງການສະເດັດມາຂອງພຣະອົງ.
ເຮົາເຫັນພຣະຜູ້ເປັນເຈົ້າກຳລັງເລັ່ງໂອກາດທາງການສຶກສາສຳລັບສະມາຊິກຂອງພວກເຮົາ ແລະ ແມ່ນແຕ່ຜູ້ທີ່ບໍ່ແມ່ນສະມາຊິກທົ່ວໂລກ. ໜຶ່ງໃນສິ່ງທີ່ເຮັດໃຫ້ເຮົາແຕກຕ່າງຈາກຄົນອື່ນໃນຖານະສາດສະໜາຈັກກໍຄື ການເນັ້ນເລື່ອງການສຶກສາຂອງພວກເຮົາ. ພຣະຜູ້ເປັນເຈົ້າໄດ້ບັນຊາໃນຊ່ວງຕົ້ນຂອງການຟື້ນຟູໃຫ້ “ສະແຫວງຫາການຮຽນຮູ້, ແມ່ນແຕ່ໂດຍການສຶກສາ ແລະ ໂດຍສັດທານຳອີກ.” ສິ່ງນັ້ນກຳລັງເກີດຂຶ້ນໃນທຸກມື້ນີ້ ແລະ ສົມຄວນໄດ້ຮັບສຽງ “ໄຊໂຢ” ທີ່ດັງກ້ອງ.
ປະຈຸບັນ ນັກຮຽນຫລາຍກວ່າ 800,000 ຄົນທົ່ວໂລກໄດ້ລົງທະບຽນເຂົ້າຮຽນໃນຫ້ອງຮຽນສາດສະໜາ ແລະ ສະຖາບັນ, ຊຶ່ງເປັນຈຳນວນລົງທະບຽນທີ່ສູງທີ່ສຸດໃນປະຫວັດສາດຂອງສາດສະໜາຈັກ. ຄົນໜຸ່ມຂອງເຮົາເຕົ້າໂຮມກັນໃນຮູບແບບທີ່ຫລາກຫລາຍ, ຕັ້ງແຕ່ຫ້ອງຮຽນຕອນເຊົ້າໆ, ຕອນກາງເວັນ, ແລະ ຕອນແລງ ໄປຈົນເຖິງຫ້ອງຮຽນອອນລາຍ ແລະ ການສຶກສາໃນບ້ານ. ພວກເຂົາເປັນກອງທັບທີ່ແຂງແກ່ນ ແລະ ຊອບທຳ, ໂດຍໄດ້ກຳລັງມາຈາກກັນແລະກັນ ຂະນະທີ່ພວກເຂົາຮຽນຮູ້ກ່ຽວກັບພຣະເຢຊູຄຣິດ, ຕິດຕາມ, ແລະ ເປັນພະຍານເຖິງພຣະອົງວ່າເປັນພຣະບຸດຂອງພຣະເຈົ້າ.
ລະດູໃບໄມ້ລົ່ນທີ່ຜ່ານມາ ຂ້າພະເຈົ້າໄດ້ຂຶ້ນກ່າວປາໄສຢູ່ທີ່ກອງປະຊຸມໃຫ້ຄຳດົນໃຈໃຫ້ກັບນັກຮຽນຫ້ອງຮຽນສາດສະໜາ ແລະ ສະຖາບັນ ແລະ ພໍ່ແມ່ຂອງພວກເຂົາ ທີ່ເຕັມສະໜາມກິລາທີ່ມະຫາວິທະຍາໄລຢູທາ. ການມາຮ່ວມງານຂອງພວກເຂົາສະແດງໃຫ້ເຫັນເຖິງຄວາມປາດຖະໜາຂອງພວກເຂົາທີ່ຈະຮູ້ຈັກ ແລະ ຕິດຕາມພຣະເຢຊູຄຣິດ. ຂ່າວສານຂອງຂ້າພະເຈົ້າເຖິງນັກຮຽນເຫລົ່ານັ້ນຊັດເຈນ: ມອບເວລາທີ່ເທົ່າກັນໃຫ້ກັບພຣະຜູ້ເປັນເຈົ້າ. ຂ້າພະເຈົ້າໄດ້ແນະນຳພວກເຂົາວ່າໃຫ້ຄວາມສົມດຸນກັບການສຶກສາຂອງພວກເຂົາ ພ້ອມດ້ວຍການຮຽນຮູ້ທີ່ແທ້ຈິງ ແລະ ສູງກວ່າ, ແມ່ນແຕ່ການສຶກສາກ່ຽວກັບ “ພຣະບຸດຂອງພຣະເຈົ້າທີ່ຊົງພຣະຊົນຢູ່.”
ຂ້າພະເຈົ້າຂໍສິ່ງດຽວກັນຈາກທຸກຄົນໃນມື້ນີ້: ສິ່ງໃດກໍຕາມທີ່ຢູ່ໃນລາຍການ “ຕ້ອງເຮັດ” ຂອງທ່ານ, ຈົ່ງໃຫ້ເວລາທີ່ເທົ່າກັນ, ບໍ່ແມ່ນເວລາທີ່ເຫລືອ, ໃຫ້ກັບພຣະຜູ້ເປັນເຈົ້າ ໃນການສຶກສາພຣະຄຳພີເປັນການສ່ວນຕົວ, ການສຶກສາ ຈົ່ງຕາມເຮົາມາ ເປັນຄອບຄົວ, ການອະທິຖານ, ການເອີ້ນໃນສາດສະໜາຈັກ, ການປະຕິບັດສາດສະໜາກິດ, ການຮັບສ່ວນສິນລະລຶກ, ການນະມັດສະການໃນພຣະວິຫານ, ແລະ ການໄຕ່ຕອງສິ່ງທີ່ເປັນຂອງພຣະເຈົ້າ. ພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາໄດ້ກ່າວໄວ້ວ່າ, “ຮຽນຮູ້ຈາກເຮົາ … ແລ້ວຈິດໃຈຂອງພວກເຈົ້າຈະໄດ້ພົບຄວາມເຊົາເມື່ອຍ.” ຈົ່ງເຮັດຕາມພຣະຄຳຂອງພຣະອົງ. ແລະ ໃຫ້ເວລາພຣະອົງເທົ່າກັນ.
ປະທານແນວສັນໄດ້ກ່າວໄວ້ວ່າ: “ຂ້າພະເຈົ້າອ້ອນວອນກັບທ່ານວ່າໃຫ້ພຣະເຈົ້າໄຊຊະນະໃນຊີວິດຂອງທ່ານ. ຈົ່ງມອບເວລາຂອງທ່ານໃຫ້ພຣະອົງຫລາຍພໍ. ຂະນະທີ່ທ່ານເຮັດ, ໃຫ້ສັງເກດເບິ່ງສິ່ງທີ່ເກີດຂຶ້ນກັບແຮງຜັກດັນທາງວິນຍານໃນທາງບວກຂອງທ່ານ.”
ເຮົາເຫັນແຮງຜັກດັນນັ້ນທີ່ຫ້ອງຮຽນສາດສະໜາ, ສະຖາບັນ, ແລະ ມະຫາວິທະຍາໄລຂອງສາດສະໜາຈັກ. ໃນສະພາບແວດລ້ອມເຫລົ່ານີ້, ພຣະຜູ້ເປັນເຈົ້າເປັນສິ່ງທີ່ສຳຄັນທີ່ສຸດ. ສະນັ້ນ ພຣະອົງຈຶ່ງຄວນຢູ່ໃນຊີວິດຂອງເຮົາແຕ່ລະຄົນ.
ອີກຂົງເຂດໜຶ່ງທີ່ສະແດງໃຫ້ເຫັນເຖິງອິດທິພົນທີ່ກຳລັງເຕີບໂຕຂອງການສຶກສາໃນສາດສະໜາຈັກ ແມ່ນ BYU–Pathway ທົ່ວໂລກ. ທົ່ວໂລກ, ມີຜູ້ລົງທະບຽນເຂົ້າຮຽນເກືອບເຖິງ 75,000 ຄົນ ແລະ ຍັງສືບຕໍ່ເຕີບໂຕຂຶ້ນຢ່າງວ່ອງໄວ. ສ່ວນຫລາຍແມ່ນສະມາຊິກ, ແລະ ຫລາຍກວ່າໜຶ່ງສ່ວນສາມແມ່ນຢູ່ໃນອາຟຣິກາ. Pathway ແມ່ນເລື່ອງກ່ຽວກັບການເຂົ້າເຖິງການສຶກສາ. ການຮຽນຈົບຫລັກສູດໝາຍເຖິງການເຂົ້າເຖິງການຈ້າງງານ, ແລະ ການເຂົ້າເຖິງການຈ້າງງານໝາຍເຖິງຊີວິດທີ່ດີຂຶ້ນສຳລັບຄອບຄົວ ແລະ ມີໂອກາດຫລາຍຂຶ້ນທີ່ຈະຮັບໃຊ້ພຣະຜູ້ເປັນເຈົ້າ.
ຕອນທີ່ຂ້າພະເຈົ້າພົບປະກັບຜູ້ນຳສະເຕກໃນອູກັນດາ, ຂ້າພະເຈົ້າໄດ້ຮຽນຮູ້ວ່າ ຝ່າຍປະທານສະເຕກທັງໝົດເຄີຍເຂົ້າຮຽນໃນ BYU–Pathway. ຍິ່ງເຮົາກຽມພ້ອມທາງໂລກ ແລະ ທາງວິນຍານຫລາຍເທົ່າໃດ, ເຮົາກໍຈະສາມາດຕໍ່ຕ້ານການໂຈມຕີອັນມີເລ່ຫລ່ຽມຂອງຜູ້ປໍລະປັກໄດ້ຫລາຍເທົ່ານັ້ນ. ໃຫ້ຈື່ຖ້ອຍຄຳຂອງເປໂຕທີ່ວ່າ: “ມານທຽວວົນວຽນໄປມາເໝືອນໂຕສິງທີ່ແຜດສຽງ, ຊອກຫາຄົນທີ່ມັນຈະກັດກິນໄດ້.”
ຂ້າພະເຈົ້າຮູ້ຈັກວ່າ ໃນທ່າມກາງຂ່າວດີແຫ່ງພຣະກິດຕິຄຸນ, ມີຜູ້ທີ່ດີ້ນລົ້ນ, ຜູ້ທີ່ມີຄວາມທ້າທາຍດ້ານສັດທາ, ຄວາມສົງໄສ, ແລະ ຄຳຖາມທີ່ເບິ່ງຄືວ່າບໍ່ມີຄຳຕອບ. ອ້າຍເອື້ອຍນ້ອງທັງຫລາຍເອີຍ, ພຣະເຢຊູຄຣິດຄືຄຳຕອບ. ເລີ່ມຕົ້ນຈາກພຣະອົງ. ຊອກຫາພຣະຫັດຂອງພຣະອົງໃນຊີວິດຂອງທ່ານ. ຟັງພຣະອົງ. “ຢ່າວຸ້ນວາຍເປັນທຸກໃຈ,” ພຣະອົງໄດ້ກ່າວຕໍ່ສານຸສິດຂອງພຣະອົງໃນຊ່ວງຊົ່ວໂມງສຸດທ້າຍກ່ອນເຄັດເຊມາເນ, ກ່ອນການແບກໄມ້ກາງແຂນຂອງພຣະອົງຜ່ານຖະໜົນໃນເຢຣູຊາເລັມ, ກ່ອນໂຄລະໂຄທາ, ບ່ອນທີ່ພຣະອົງໄດ້ສຳເລັດການເສຍສະລະຊົດໃຊ້ຂອງພຣະອົງ—ສິ່ງທີ່ມີພຽງແຕ່ພຣະອົງ, ພຣະບຸດອົງດຽວທີ່ຖືກຳເນີດຂອງພຣະເຈົ້າເທົ່ານັ້ນ, ສາມາດເຮັດໄດ້.
ຈົ່ງຮູ້ວ່າ ພຣະອົງເຂົ້າໃຈ. ພຣະອົງໄດ້ຮັບເອົາບາບທັງໝົດຂອງເຮົາໄວ້ກັບພຣະອົງເອງ, ພ້ອມທັງຄວາມຜິດພາດ, ຄວາມທຸກທໍລະມານ, ແລະ ມື້ທີ່ບໍ່ດີຫລາຍ ເພື່ອວ່າເຮົາຈະສາມາດຢູ່ກັບພຣະບິດາຂອງເຮົາຜູ້ສະຖິດຢູ່ໃນສະຫວັນໃນນິລັນດອນອີກຄັ້ງ. ພຣະອົງໄດ້ກ່າວໄວ້ວ່າ, “ຈົ່ງເບິ່ງທີ່ເຮົາໃນຄວາມນຶກຄິດທຸກຢ່າງ; ຢ່າສົງໄສ, ຢ່າສູ່ຢ້ານ.” ສັດທາໃນພຣະເຢຊູຄຣິດສາມາດຍົກທ່ານຂຶ້ນ ແລະ ປິ່ນປົວຈິດວິນຍານຂອງທ່ານທີ່ຖືກບາດເຈັບ. ຈົ່ງໄວ້ວາງໃຈພຣະອົງ ແລະ ທ່ານຈະເລັ່ງການກັບຄືນມາຂອງທ່ານສູ່ “ພຣະພາຫາແຫ່ງຄວາມຮັກຂອງພຣະອົງ.”
ຂ້າພະເຈົ້າຂໍເນັ້ນຖ້ອຍຄຳຂອງສາດສະດາຂອງເຮົາທີ່ມີຊີວິດຢູ່ອີກຄັ້ງໜຶ່ງວ່າ: “ທ່ານເຫັນເຖິງສິ່ງທີ່ເກີດຂຶ້ນ ຕໍ່ໜ້າຕໍ່ຕາເຮົາຫລືບໍ່? ຂ້າພະເຈົ້າອະທິຖານວ່າເຮົາຈະບໍ່ພາດຄວາມສະຫງ່າງາມຂອງຊ່ວງເວລານີ້! ພຣະຜູ້ເປັນເຈົ້າກຳລັງເລັ່ງວຽກງານຂອງພຣະອົງ.” ຂໍໃຫ້ເຮົາ ໃນຖານະສານຸສິດແຫ່ງວັນເວລາຂອງເຮົາ ຮ້ອງຂຶ້ນວ່າ, “ໄຊໂຢ ເພື່ອອິດສະຣາເອນ” ຂະນະທີ່ເຮົາກຽມພ້ອມສຳລັບການກັບຄືນມາຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ. ໃນພຣະນາມຂອງພຣະເຢຊູຄຣິດ, ອາແມນ.