ເວລາທີ່ທຸກສິ່ງຈະຖືກຕັ້ງຂຶ້ນໃໝ່
(ກິດຈະການ 3:21)
“ຂ່າວດີ” ທີ່ສຳຄັນ ແລະ ຮຸ່ງໂລດທີ່ສຸດ ຄືຂ່າວສານທີ່ອົງພຣະເຢຊູຄຣິດເຈົ້າໄດ້ຟື້ນຟູພຣະກິດຕິຄຸນ ແລະ ສາດສະໜາຈັກຂອງພຣະອົງໃນຍຸກສຸດທ້າຍ.
ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ໄດ້ຖືກຈັດຕັ້ງຂຶ້ນເມື່ອ 195 ປີກ່ອນໃນມື້ນີ້, ວັນທີ 6 ເດືອນເມສາ, 1830.
ກຸ່ມຜູ້ມາຮ່ວມຊຸມນຸມນ້ອຍໆຂອງຜູ້ທີ່ເຊື່ອຖື ແລະ ເພື່ອນມິດສະຫາຍມາຮວມຕົວກັນເພື່ອໂອກາດສຳຄັນ ແລະ ໜ້າຊື່ນຊົມຍິນດີນີ້. ພຣະວິນຍານບໍລິສຸດໄດ້ຖອກເທລົງມາຢ່າງຍິ່ງໃຫຍ່ເພື່ອອວຍພອນທຸກຄົນທີ່ເຂົ້າຮ່ວມໃນຂະນະທີ່ເຮັດພິທີສິນລະລຶກ, ຂອງປະທານແຫ່ງພຣະວິນຍານບໍລິສຸດໄດ້ຖືກມອບໃຫ້, ໄດ້ມີການແຕ່ງຕັ້ງຖານະປະໂລຫິດ, ແລະ ຄວາມຈິງຂອງພຣະກິດຕິຄຸນຂອງພຣະເຢຊູຄຣິດໄດ້ຖືກສັ່ງສອນ.
ໃນການສ້າງຕັ້ງສາດສະໜາຈັກຂອງພຣະອົງຄືນມາໃໝ່, ພຣະຜູ້ເປັນເຈົ້າໄດ້ກຳນົດໄວ້ໂດຍການເປີດເຜີຍໃຫ້ກັບໂຈເຊັບ ສະມິດ ຕອນອາຍຸ 24 ປີໃນຖານະຜູ້ນຳໃນທາງໂລກ: “ຜູ້ພະຍາກອນ, ຜູ້ແປ, ສາດສະດາ, ອັກຄະສາວົກຂອງພຣະເຢຊູຄຣິດ, ແອວເດີຂອງສາດສະໜາຈັກຜ່ານທາງ ພຣະປະສົງຂອງພຣະເຈົ້າອົງເປັນພຣະບິດາ, ແລະ ພຣະຄຸນຂອງອົງພຣະເຢຊູຄຣິດເຈົ້າຂອງພວກເຈົ້າ.”
ຂ້າພະເຈົ້າອະທິຖານຢ່າງຈິງຈັງເພື່ອຂໍຄວາມຊ່ວຍເຫລືອຈາກພຣະວິນຍານບໍລິສຸດ ຂະນະທີ່ເຮົາພິຈາລະນາຄວາມສຳຄັນ ແລະ ຜົນກະທົບຕໍ່ເນື່ອງຂອງເຫດການພິເສດຄັ້ງນີ້ໃນປະຫວັດສາດຂອງໂລກ.
ພາບທີ່ມາໃຫ້ເຫັນຄັ້ງທຳອິດ
ການຈັດຕັ້ງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍຢ່າງເປັນທາງການຄືຈຸດສູງສຸດຂອງລຳດັບປະສົບການທີ່ອັດສະຈັນ. ຄັ້ງທຳອິດຂອງປະສົບການເຫລົ່ານີ້ເກີດຂຶ້ນເມື່ອ 10 ປີກ່ອນ ຢູ່ທາງພາກເໜືອຂອງລັດນິວຢອກ.
ໃນລະດູໃບໄມ້ປົ່ງຂອງປີ 1820, ຊາຍໜຸ່ມຄົນໜຶ່ງຊື່ ໂຈເຊັບ ສະມິດ ໄດ້ເຂົ້າໄປໃນປ່າໃກ້ບ້ານຂອງເພິ່ນເພື່ອອະທິຖານ. ເພິ່ນມີຄຳຖາມກ່ຽວກັບຄວາມລອດຂອງຈິດວິນຍານຂອງເພິ່ນ, ແລະ ເພິ່ນໂຫຍຫາ “ທີ່ຈະຮູ້ວ່າ ສາດສະໜາຈັກໃດໃນ [ສາດສະໜາຈັກທັງໝົດ] ນັ້ນຖືກຕ້ອງ, ເພື່ອ [ເພິ່ນ] ຈະໄດ້ຮູ້ວ່າ ສາດສະໜາຈັກແຫ່ງໃດທີ່ຄວນເຂົ້າຮ່ວມ.” ໂຈເຊັບໄວ້ວາງໃຈວ່າພຣະເຈົ້າຈະຕອບຄຳອະທິຖານຂອງເພິ່ນ ແລະ ຊີ້ນຳເພິ່ນ.
ກະລຸນາເຂົ້າໃຈວ່າ ໂຈເຊັບບໍ່ໄດ້ອະທິຖານພຽງເພື່ອທີ່ຈະຮູ້ວ່າແມ່ນຫຍັງຖືກຕ້ອງເທົ່ານັ້ນ. ແຕ່, ເພິ່ນອະທິຖານເພື່ອໃຫ້ຮູ້ວ່າແມ່ນຫຍັງຖືກຕ້ອງ ເພື່ອວ່າເພິ່ນຈະສາມາດເຮັດສິ່ງທີ່ຖືກຕ້ອງ. ໂຈເຊັບໄດ້ທູນຖາມດ້ວຍສັດທາ ແລະ ຕັ້ງໃຈທີ່ຈະກະທຳຕາມຄຳຕອບທີ່ເພິ່ນໄດ້ຮັບ.
“ໃນ [ການຕອບ] ຄຳອະທິຖານທີ່ຈິງໃຈຂອງເພິ່ນ, ພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ມາປະກົດຕໍ່ໂຈເຊັບ ແລະ ໄດ້ເລີ່ມຕົ້ນ ເວລາທີ່ ‘ທຸກສິ່ງຈະຖືກຕັ້ງຂຶ້ນໃໝ່’ (ກິດຈະການ 3:21) ດັ່ງທີ່ຖືກບອກໄວ້ລ່ວງໜ້າຢູ່ໃນພຣະຄຣິສຕະທຳຄຳພີ. ຢູ່ໃນພາບນິມິດນີ້, ເພິ່ນໄດ້ຮຽນຮູ້ວ່າ ຫລັງຈາກການຕາຍຂອງພວກອັກຄະສາວົກລຸ້ນດັ້ງເດີມ, ສາດສະໜາຈັກຂອງພຣະຄຣິດໃນພຣະຄຳພີໃໝ່ໄດ້ສູນຫາຍໄປຈາກໂລກນີ້.” ໂຈເຊັບ ສະມິດ ຈະເປັນເຄື່ອງມືໃນການຟື້ນຟູຄຳສອນ, ສິດອຳນາດ, ແລະ ພັນທະສັນຍາ ແລະ ພິທີການຕ່າງໆຂອງສາດສະໜາຈັກໃນສະໄໝບູຮານຂອງພຣະຜູ້ຊ່ວຍໃຫ້ລອດຄືນມາອີກຄັ້ງ.
ໂຈເຊັບຢືນຢັນວ່າ: “ຂ້າພະເຈົ້າໄດ້ເຫັນສອງພຣະອົງປະທັບຢືນຢູ່ໃນອາກາດ, ຊື່ຫົວຂອງຂ້າພະເຈົ້າ. ອົງໜຶ່ງໄດ້ຮັບສັ່ງກັບຂ້າພະເຈົ້າ, ໂດຍເອີ້ນຊື່ຂອງຂ້າພະເຈົ້າ ແລະ ຊີ້ພຣະຫັດໄປຫາອີກອົງໜຶ່ງ ແລະ ກ່າວວ່າ—ນີ້ຄືບຸດທີ່ຮັກຂອງເຮົາ. ຈົ່ງຟັງທ່ານ!”
ຜ່ານທາງພາບນິມິດນີ້ ແລະ ປະສົບການແຫ່ງສະຫວັນທີ່ຕາມມາ, ໂຈເຊັບ ສະມິດ ໄດ້ເຂົ້າໃຈວ່າ ພຣະເຈົ້າ ແລະ ພຣະເຢຊູຄຣິດຮູ້ຈັກເພິ່ນເປັນການສ່ວນຕົວ, ຊົງຫ່ວງໃຍກ່ຽວກັບຄວາມລອດນິລັນດອນຂອງເພິ່ນ, ແລະ ມີພາລະກິດໃຫ້ເພິ່ນປະຕິບັດ. ເພິ່ນຍັງໄດ້ຮຽນຮູ້ບົດຮຽນທີ່ສຳຄັນຫລາຍກ່ຽວກັບຄຸນລັກສະນະ, ລັກສະນະນິໄສ, ແລະ ຄວາມສົມບູນແບບຂອງຝ່າຍພຣະເຈົ້າ—ແລະ ວ່າພຣະບິດາ ແລະ ພຣະບຸດຊົງເປັນຄົນລະອົງທີ່ແຍກກັນ ແລະ ແຕກຕ່າງກັນ. ພຣະເຢຊູຄຣິດເປັນພຣະບຸດຂອງພຣະເຈົ້າໂດຍແທ້ໃນທາງວິນຍານ ແລະ ທາງເນື້ອໜັງ.
ໂຈເຊັບ ສະມິດ ໄດ້ປະກາດວ່າ ພຣະບິດາເທິງສະຫວັນ ແລະ ພຣະເຢຊູຄຣິດເປັນຜູ້ທີ່ມີພຣະກາຍ. ເພິ່ນໄດ້ເວົ້າວ່າ, “ພຣະບິດາມີພຣະກາຍທີ່ເປັນເນື້ອໜັງ ແລະ ກະດູກ ທີ່ສຳຜັດໄດ້ດັ່ງຂອງມະນຸດ; ພຣະບຸດກໍຄືກັນ; ແຕ່ພຣະວິນຍານບໍລິສຸດບໍ່ມີພຣະກາຍທີ່ເປັນເນື້ອໜັງ ແລະ ກະດູກ, ແຕ່ເປັນພຣະກາຍທີ່ເປັນພຣະວິນຍານ.”
ຂ້າພະເຈົ້າເປັນພະຍານວ່າ ການມາຢ້ຽມຢາມຂອງພຣະບິດາ ແລະ ພຣະບຸດຕໍ່ໂຈເຊັບ ສະມິດ ເປັນການລິເລີ່ມເຫດການຄັ້ງຍິ່ງໃຫຍ່ໃນ “ການຟື້ນຟູຂອງທຸກສິ່ງທັງປວງ ຊຶ່ງເວົ້າໄວ້ໂດຍປາກຂອງສາດສະດາຜູ້ບໍລິສຸດທຸກຄົນນັບແຕ່ການເລີ່ມຕົ້ນຂອງໂລກ.”
ພຣະຄຳພີມໍມອນ
ລຳດັບທີສອງຂອງປະສົບການທີ່ອັດສະຈັນທີ່ນຳໄປສູ່ການຈັດຕັ້ງສາດສະໜາຈັກທີ່ຖືກຟື້ນຟູຂອງພຣະຜູ້ຊ່ວຍໃຫ້ລອດຢ່າງເປັນທາງການ ຄືການແປ ແລະ ການອອກມາຂອງພຣະຄຳພີມໍມອນ.
“ພວກເຮົາເປັນພະຍານອີກວ່າ ໂຈເຊັບ ສະມິດ ໄດ້ຮັບຂອງປະທານ ແລະ ອຳນາດຂອງພຣະເຈົ້າ ເພື່ອໃຫ້ແປບັນທຶກບູຮານ: ພຣະຄຳພີມໍມອນ—ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ. … ໃນບັນທຶກທີ່ສັກສິດນີ້ ແມ່ນລວມທັງເລື່ອງລາວກ່ຽວກັບການປະຕິບັດສາດສະໜາກິດເປັນສ່ວນຕົວຂອງພຣະເຢຊູຄຣິດ ໃນບັນດາຜູ້ຄົນຢູ່ຊີກໂລກເບື້ອງຕາເວັນຕົກ ບໍ່ດົນຫລັງຈາກການຟື້ນຄືນພຣະຊົນຂອງພຣະອົງ. [ພຣະຄຳພີມໍມອນ] ສິດສອນເຖິງຈຸດປະສົງຂອງຊີວິດ ແລະ ອະທິບາຍຄຳສອນຂອງພຣະຄຣິດ, ຊຶ່ງເປັນຈຸດໃຈກາງຂອງຈຸດປະສົງນັ້ນ. ໂດຍທີ່ເປັນພຣະຄຳພີຄຽງຄູ່ໄປກັບພຣະຄຣິສຕະທຳຄຳພີ, ພຣະຄຳພີມໍມອນເປັນພະຍານວ່າ ມະນຸດທຸກຄົນເປັນບຸດ ແລະ ທິດາຂອງພຣະບິດາຜູ້ສະຖິດຢູ່ໃນສະຫວັນທີ່ຊົງຮັກ, ວ່າພຣະອົງມີແຜນແຫ່ງສະຫວັນສຳລັບຊີວິດຂອງເຮົາ, ແລະ ວ່າພຣະບຸດຂອງພຣະອົງ, ພຣະເຢຊູຄຣິດ, ກ່າວໃນທຸກວັນນີ້ ເທົ່າໆກັບໃນສະໄໝກ່ອນ.”
ໃນຖານະທີ່ເປັນສະມາຊິກຂອງສາດສະໜາຈັກທີ່ຖືກຟື້ນຟູຂອງພຣະຜູ້ຊ່ວຍໃຫ້ລອດ, “ພວກເຮົາເຊື່ອວ່າ ພຣະຄຣິສຕະທຳຄຳພີເປັນພຣະຄຳຂອງພຣະເຈົ້າ ຕາບໃດທີ່ແປມັນຖືກຕ້ອງ; ພວກເຮົາເຊື່ອອີກວ່າ ພຣະຄຳພີມໍມອນເປັນພຣະຄຳຂອງພຣະເຈົ້າ.” ພຣະຄຳພີມໍມອນຄື ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ, ຢືນຢັນຄວາມຈິງຂອງພຣະຄຣິສຕະທຳຄຳພີ, ແລະ ຟື້ນຟູຄວາມຈິງທີ່ແຈ່ມແຈ້ງ ແລະ ມີຄ່າທີ່ສູນຫາຍໄປຈາກພຣະຄຣິສຕະທຳຄຳພີ.
ຖານະປະໂລຫິດໄດ້ຖືກຟື້ນຟູ
ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍສິດສອນວ່າ ສາດສະໜາຈັກດັ້ງເດີມທີ່ຖືກສ້າງຕັ້ງຂຶ້ນໂດຍພຣະຜູ້ຊ່ວຍໃຫ້ລອດ, ພ້ອມດ້ວຍສິດອຳນາດແຫ່ງສະຫວັນ, ຄຳສອນ, ແລະ ພັນທະສັນຍາ ແລະ ພິທີການ, ໄດ້ສູນຫາຍໄປຈາກໂລກນີ້. ໃນຖານະສ່ວນໜຶ່ງຂອງການຟື້ນຟູທຸກສິ່ງໃນຍຸກສຸດທ້າຍທີ່ຖືກທຳນາຍໄວ້, ສາດສະດາ ແລະ ອັກຄະສາວົກໃນສະໄໝບູຮານໄດ້ມອບສິດອຳນາດຖານະປະໂລຫິດໃຫ້ກັບໂຈເຊັບ ສະມິດ ດ້ວຍຕົນເອງ ແລະ ມອບຂໍກະແຈແຫ່ງຖານະປະໂລຫິດໃຫ້ກັບເພິ່ນ. ນີ້ແມ່ນລຳດັບທີສາມຂອງປະສົບການທີ່ອັດສະຈັນທີ່ນຳໄປສູ່ການຈັດຕັ້ງສາດສະໜາຈັກທີ່ຖືກຟື້ນຟູຂອງພຣະຜູ້ຊ່ວຍໃຫ້ລອດຢ່າງເປັນທາງການ.
ສິດອຳນາດຖານະປະໂລຫິດນີ້ອະນຸຍາດໃຫ້ຜູ້ຮັບໃຊ້ຂອງພຣະເຈົ້າ “ເປັນຕົວແທນຂອງ [ພຣະອົງ] ແລະ ປະຕິບັດໃນພຣະນາມຂອງພຣະອົງ.” “ຂໍກະແຈຂອງຖານະປະໂລຫິດຄືສິດອຳນາດທີ່ຈະຊີ້ນຳການນຳໃຊ້ຖານະປະໂລຫິດເພື່ອລູກໆຂອງພຣະເຈົ້າ.”
ພາຍໃຕ້ການຊີ້ນຳຂອງພຣະບິດາ ແລະ ພຣະບຸດ, ໂຢຮັນບັບຕິສະໂຕທີ່ໄດ້ຟື້ນຄືນຊີວິດແລ້ວໄດ້ຟື້ນຟູສິດອຳນາດຂອງການບັບຕິສະມາໂດຍການລົງໄປໃນນ້ຳໝົດທັງຕົວເພື່ອການປົດບາບ. ໃນປີດຽວກັນນັ້ນ, ສາມຄົນຂອງກຸ່ມອັກຄະສາວົກສິບສອງລຸ້ນດັ້ງເດີມ—ເປໂຕ, ຢາໂກໂບ, ແລະ ໂຢຮັນ—ໄດ້ຟື້ນຟູການເປັນອັກຄະສາວົກ ແລະ ສິດອຳນາດ ແລະ ຂໍກະແຈຂອງຖານະປະໂລຫິດ.
ຫົກປີຫລັງຈາກການຈັດຕັ້ງສາດສະໜາຈັກຢ່າງເປັນທາງການ, ໃນພຣະວິຫານເຄີດແລນ, ໂມເຊ, ອີລາຍ, ແລະ ເອລີຢາ ໄດ້ມອບສິດອຳນາດເພີ່ມເຕີມທີ່ຈຳເປັນໃຫ້ແກ່ໂຈເຊັບເພື່ອບັນລຸວຽກງານຂອງພຣະເຈົ້າໃນຍຸກສຸດທ້າຍ.
ໂມເຊໄດ້ມອບຂໍກະແຈແຫ່ງການເຕົ້າໂຮມອິດສະຣາເອນ.
ອີລາຍໄດ້ມອບພຣະກິດຕິຄຸນແຫ່ງຍຸກສະໄໝຂອງອັບຣາຮາມໃຫ້, ຊຶ່ງລວມທັງການຟື້ນຟູພັນທະສັນຍາຂອງອັບຣາຮາມ.
ເອລີຢາໄດ້ມອບຂໍກະແຈຂອງອຳນາດແຫ່ງການຜະນຶກ, ໂດຍການໃຫ້ສິດອຳນາດທີ່ອະນຸຍາດໃຫ້ພິທີການຕ່າງໆທີ່ຖືກປະຕິບັດຢູ່ເທິງໂລກຖືກຜູກມັດໄວ້ໃນນິລັນດອນ, ດັ່ງເຊັ່ນ ການຮ່ວມຄອບຄົວເຂົ້າກັນຕະຫລອດໄປ ໃນຄວາມສຳພັນນິລັນດອນ ທີ່ເໜືອກວ່າຄວາມຕາຍ.
ສາດສະໜາຈັກຂອງພຣະເຢຊູຄຣິດຖືກຈັດຕັ້ງຂຶ້ນ
ຂະນະທີ່ໂຈເຊັບ ສະມິດ ແປພຣະຄຳພີມໍມອນ, ເພິ່ນໄດ້ຮັບການເປີດເຜີຍທີ່ບົ່ງບອກວ່າ ສາດສະໜາຈັກຂອງພຣະເຢຊູຄຣິດຈະຖືກຈັດຕັ້ງຂຶ້ນອີກຄັ້ງ. ແຕ່ພຣະຜູ້ເປັນເຈົ້າໄດ້ແນະນຳໂຈເຊັບ ບໍ່ໃຫ້ຈັດຕັ້ງສາດສະໜາຈັກຂອງພຣະອົງໃນທັນທີ. ກົງກັນຂ້າມ, “ໂດຍວິນຍານແຫ່ງການທຳນາຍ ແລະ ການເປີດເຜີຍ” ພຣະຜູ້ເປັນເຈົ້າໄດ້ເປີດເຜີຍກັບໂຈເຊັບວ່າ “ມື້ອັນແນ່ນອນ … [ເພິ່ນ] ຄວນຈະເລີ່ມຈັດຕັ້ງສາດສະໜາຈັກຂຶ້ນອີກ [ຄັ້ງ] ຢູ່ເທິງແຜ່ນດິນໂລກ.”
ສາດສະໜາຈັກໄດ້ຖືກຈັດຕັ້ງຂຶ້ນຕາມລຳດັບທີ່ເໝາະສົມ ຫລັງຈາກການຟື້ນຟູຖານະປະໂລຫິດ ແລະ ການຈັດພິມປື້ມພຣະຄຳພີມໍມອນ. ປື້ມພຣະຄຳພີມໍມອນເຫລັ້ມທຳອິດຈັດພິມອອກມາໃນວັນທີ 26 ເດືອນມີນາ, 1830, ແລະ ສາດສະໜາຈັກໄດ້ຖືກຈັດຕັ້ງຂຶ້ນຢ່າງເປັນທາງການໃນວັນທີ 6 ເດືອນເມສາ.
“ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ … ຄືສາດສະໜາຈັກຂອງພຣະຄຣິດໃນພຣະຄຳພີໃໝ່ທີ່ຖືກຟື້ນຟູ. ສາດສະໜາຈັກນີ້ຍຶດໝັ້ນຢູ່ທີ່ພຣະຊົນຊີບທີ່ດີພ້ອມຂອງຫີນເສົາເອກອັນສຳຄັນ, ພຣະເຢຊູຄຣິດ, ແລະ ໃນການຊົດໃຊ້ອັນບໍ່ມີຂອບເຂດຂອງພຣະອົງ ແລະ ໃນການຟື້ນຄືນພຣະຊົນທີ່ຈິງແທ້ຂອງພຣະອົງ. ອີກເທື່ອໜຶ່ງ ພຣະເຢຊູຄຣິດໄດ້ເອີ້ນເອົາອັກຄະສາວົກຂອງພຣະອົງ ແລະ ໄດ້ມອບສິດອຳນາດຖານະປະໂລຫິດໃຫ້ພວກເພິ່ນ. ພຣະອົງເຊື້ອເຊີນເຮົາທຸກຄົນໃຫ້ມາຫາພຣະອົງ ແລະ ສາດສະໜາຈັກຂອງພຣະອົງ, ເພື່ອຮັບເອົາພຣະວິນຍານບໍລິສຸດ, ພິທີການແຫ່ງຄວາມລອດ, ແລະ ຄວາມສຸກທີ່ຍືນຍົງ.”
ຍຸກສະໄໝຂອງຄວາມສົມບູນແຫ່ງເວລາ
ການມາປະກົດຂອງພຣະບິດາ ແລະ ພຣະບຸດຕໍ່ໂຈເຊັບ ສະມິດ, ການແປ ແລະ ການອອກມາຂອງພຣະຄຳພີມໍມອນ, ແລະ ການຟື້ນຟູສິດອຳນາດ ແລະ ຂໍກະແຈຂອງຖານະປະໂລຫິດເປັນຂໍ້ກຳນົດເບື້ອງຕົ້ນທີ່ຈຳເປັນຕໍ່ການຈັດຕັ້ງສາດສະໜາຈັກທີ່ຖືກຟື້ນຟູຂອງພຣະຜູ້ເປັນເຈົ້າເມື່ອ 195 ປີກ່ອນໃນມື້ນີ້.
ໃນພຣະຄຳພີເດີມ, ສາດສະດາດານີເອນໄດ້ຕີຄວາມໝາຍຂອງຄວາມຝັນກ່ຽວກັບຫີນກ້ອນໜຶ່ງ ທີ່ຈະແຕກອອກມາເອງຈາກໜ້າຜາໂດຍບໍ່ມີຜູ້ໃດເຮັດ ແລະ ຈົນເຕັມແຜ່ນດິນໂລກ. ໜຶ່ງປີຫລັງຈາກການຈັດຕັ້ງສາດສະໜາຈັກ, ພຣະຜູ້ເປັນເຈົ້າໄດ້ແນະນຳໂຈເຊັບ ສະມິດ ວ່າຂໍກະແຈແຫ່ງອານາຈັກຂອງພຣະເຈົ້າໄດ້ “ຖືກມອບໃຫ້ແກ່ມະນຸດເທິງແຜ່ນດິນໂລກ” ອີກຄັ້ງ ແລະ “ພຣະກິດຕິຄຸນ [ຂອງພຣະເຢຊູຄຣິດຈະ] ຂະຫຍາຍອອກໄປຈົນເຖິງທີ່ສຸດຂອງແຜ່ນດິນໂລກ, ຄືກັນກັບຫີນກ້ອນໜຶ່ງ ຊຶ່ງແຕກອອກມາເອງຈາກໜ້າຜາໂດຍບໍ່ມີຜູ້ໃດເຮັດ.”
ຂ້າພະເຈົ້າເປັນພະຍານວ່າ: ພຣະຜູ້ເປັນເຈົ້າກຳລັງເຮັດໃຫ້ຄຳສັນຍາຂອງພຣະອົງສຳເລັດຄົບຖ້ວນ. ສາດສະໜາຈັກທີ່ຖືກຟື້ນຟູຂອງພຣະຜູ້ຊ່ວຍໃຫ້ລອດກຳລັງຖືກສະຖາປະນາໄປທົ່ວໂລກ ແລະ ເປັນເຄື່ອງມືທີ່ພຣະເຈົ້າຈະໃຊ້ເພື່ອ “ຮວບຮວມສິ່ງສາລະພັດ ທັງມີຢູ່ໃນສະຫວັນ ແລະ ເທິງແຜ່ນດິນໂລກໄວ້ໃນພຣະຄຣິດ ຜູ້ຊົງເປັນພຣະປະມຸກ.”
ວຽກງານໃນຍຸກສຸດທ້າຍຂອງພຣະຜູ້ເປັນເຈົ້າ “ເປັນອຸດົມການທີ່ສ້າງຄວາມສົນໃຈຕໍ່ຜູ້ຄົນຂອງພຣະເຈົ້າໃນທຸກຍຸກທຸກສະໄໝ; ມັນເປັນຫົວຂໍ້ທີ່ບັນດາສາດສະດາ, ປະໂລຫິດ, ແລະ ກະສັດກ່າວເຖິງດ້ວຍຄວາມເບີກບານໃຈເປັນພິເສດ; ພວກເພິ່ນໄດ້ຕັ້ງຕາຄອຍວັນທີ່ເຮົາຈະມີຊີວິດຢູ່; ແລະ ລຸກໄໝ້ດ້ວຍການຕັ້ງຕາຄອຍແຫ່ງສະຫວັນທີ່ຊື່ນຊົມຍິນດີ ພວກເພິ່ນໄດ້ຮ້ອງເພງ ແລະ ໄດ້ຂຽນ ແລະ ໄດ້ທຳນາຍເຖິງວັນເວລານີ້ຂອງເຮົາ.”
ໃນຄວາມຍິ່ງໃຫຍ່ທີ່ສຸດ ແລະ ສຸດທ້າຍຂອງຍຸກສະໄໝທັງໝົດຂອງພຣະກິດຕິຄຸນ, “ການມາຮ່ວມກັນທີ່ເປັນໜຶ່ງ ແລະ ສົມບູນ ແລະ ດີພ້ອມ, ແລະ ການເຊື່ອມເຂົ້າກັນຂອງຍຸກສະໄໝຕ່າງໆ, ແລະ ຂໍກະແຈ, ແລະ ອຳນາດ, ແລະ ລັດສະໝີພາບຈະເກີດຂຶ້ນ, ແລະ ຖືກເປີດເຜີຍນັບຕັ້ງແຕ່ວັນເວລາຂອງອາດາມ ແມ່ນແຕ່ຈົນເຖິງເວລາປະຈຸບັນ. ແລະ ບໍ່ພຽງເທົ່ານີ້, ແຕ່ສິ່ງທີ່ບໍ່ເຄີຍຖືກເປີດເຜີຍນັບຕັ້ງແຕ່ການວາງຮາກຖານຂອງໂລກ… ຈະຖືກເປີດເຜີຍ … ໃນຍຸກນີ້, ໃນຍຸກສະໄໝຂອງຄວາມສົມບູນແຫ່ງເວລາ.”
ສາດສະດາໂຈເຊັບໄດ້ອະທິບາຍເພີ່ມເຕີມວ່າ, “ພິທີການ ແລະ ໜ້າທີ່ທັງໝົດທີ່ເຄີຍຮຽກຮ້ອງຈາກຖານະປະໂລຫິດ, ພາຍໃຕ້ການຊີ້ນຳ ແລະ ພຣະບັນຊາຂອງພຣະຜູ້ຊົງລິດອຳນາດຍິ່ງໃຫຍ່ໃນຍຸກສະໄໝໃດກໍຕາມ, ທັງໝົດຈະມີຢູ່ໃນຍຸກສະໄໝສຸດທ້າຍ, … ນຳມາຊຶ່ງການຟື້ນຟູທີ່ເວົ້າໄວ້ດ້ວຍປາກຂອງສາດສະດາຜູ້ບໍລິສຸດທັງຫລາຍ.”
ຄຳສັນຍາ ແລະ ປະຈັກພະຍານ
ຂ້າພະເຈົ້າໄດ້ພະຍາຍາມສະຫລຸບອົງປະກອບພື້ນຖານຂອງ “ຂ່າວດີ” ທີ່ສຳຄັນ ແລະ ຮຸ່ງໂລດທີ່ສຸດ ທີ່ບໍ່ວ່າຈະແມ່ນໃຜ ຢູ່ໃສກໍຕາມໃນໂລກນີ້ສາມາດຮັບໄດ້—ນັ້ນກໍຄື ຂ່າວສານທີ່ວ່າ ອົງພຣະເຢຊູຄຣິດເຈົ້າໄດ້ຟື້ນຟູພຣະກິດຕິຄຸນ ແລະ ສາດສະໜາຈັກຂອງພຣະອົງໃນຍຸກສຸດທ້າຍ.
ຂ້າພະເຈົ້າເຊື້ອເຊີນທຸກຄົນໃຫ້ຮຽນຮູ້ ແລະ ພິສູດຂ່າວສານນີ້. ຂ້າພະເຈົ້າສັນຍາວ່າ ບຸກຄົນ “ຜູ້ທີ່ສຶກສາຂ່າວສານເລື່ອງການຟື້ນຟູດ້ວຍການອະທິຖານ ແລະ ກະທຳຕາມດ້ວຍສັດທາ ຈະໄດ້ຮັບພອນ [ຜ່ານທາງອຳນາດຂອງພຣະວິນຍານບໍລິສຸດ] ແຫ່ງການເປັນພະຍານດ້ວຍຕົວເອງ ເຖິງຄວາມສູງສົ່ງ ແລະ ຈຸດປະສົງຂອງການຟື້ນຟູ ເພື່ອກະກຽມໂລກສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ທີ່ສັນຍາໄວ້.” ເມື່ອທ່ານອະທິຖານຢ່າງຈິງຈັງ ດ້ວຍຄວາມຄາດຫວັງທີ່ຈະຮັບເອົາ ແລະ ປະຕິບັດຕາມຄຳຕອບຈາກພຣະເຈົ້າ, ດັ່ງທີ່ຊາຍໜຸ່ມໂຈເຊັບ ສະມິດ ໄດ້ເຮັດ, ຄວາມສາມາດຂອງທ່ານທີ່ຈະຮັບຮູ້ ແລະ ຕອບສະໜອງຕໍ່ພະຍານແຫ່ງສະຫວັນນັ້ນ ຈະເພີ່ມຂຶ້ນ.
ຂ້າພະເຈົ້າເປັນພະຍານວ່າ ພຣະເຈົ້າ, ພຣະບິດານິລັນດອນ, ເປັນພຣະບິດາຂອງເຮົາ. ຂ້າພະເຈົ້າເປັນພະຍານວ່າ ພຣະເຢຊູຄຣິດຄືບຸດທີ່ຮັກຂອງພຣະບິດາ ແລະ ເປັນພຣະບຸດອົງດຽວທີ່ຖືກຳເນີດໃນທາງເນື້ອໜັງຂອງພຣະອົງ. ພຣະອົງເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ.
ແລະ ຂ້າພະເຈົ້າເປັນພະຍານຢ່າງມີຄວາມຊື່ນຊົມຍິນດີວ່າ ພຣະບິດາ ແລະ ພຣະບຸດໄດ້ມາປະກົດຕໍ່ຊາຍໜຸ່ມ ໂຈເຊັບ ສະມິດ, ດ້ວຍເຫດນີ້ ຈຶ່ງໄດ້ລິເລີ່ມການຟື້ນຟູພຣະກິດຕິຄຸນຂອງພຣະເຢຊູຄຣິດໃນຍຸກສຸດທ້າຍ. ພຣະຄຳພີມໍມອນ ເປັນປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ ແລະ ບັນຈຸພຣະຄຳຂອງພຣະເຈົ້າ. ສິດອຳນາດຂອງຖານະປະໂລຫິດ ເພື່ອເປັນຕົວແທນຂອງພຣະຜູ້ຊ່ວຍໃຫ້ລອດ ແລະ ປະຕິບັດໃນພຣະນາມຂອງພຣະອົງອີກຄັ້ງ ໄດ້ຖືກພົບເຫັນຢູ່ເທິງແຜ່ນດິນໂລກນີ້. ແລະ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍຄືສາດສະໜາຈັກຂອງພຣະຄຣິດໃນພຣະຄຳພີໃໝ່ທີ່ໄດ້ຖືກຟື້ນຟູ. ຂ້າພະເຈົ້າເປັນພະຍານອັນແນ່ນອນວ່າທຸກສິ່ງເຫລົ່ານີ້ເປັນຄວາມຈິງໃນພຣະນາມອັນສັກສິດຂອງອົງພຣະເຢຊູຄຣິດເຈົ້າ, ອາແມນ.