ພຣະອົງເປັນພຣະຄຣິດ
(ມັດທາຍ 16:16)
ເຮົາຕ້ອງການໃຫ້ລູກໆຂອງເຮົາເຊື່ອໃນພຣະເຢຊູຄຣິດ, ເປັນຂອງພຣະເຢຊູຄຣິດ ແລະ ສາດສະໜາຈັກຂອງພຣະອົງ ຜ່ານທາງພັນທະສັນຍາ, ແລະ ພະຍາຍາມທີ່ຈະກາຍເປັນເໝືອນດັ່ງພຣະເຢຊູຄຣິດ.
ຕອນທີ່ເອລີ ລູກຊາຍຂອງພວກເຮົາຮຽນຢູ່ຊັ້ນປະຖົມປີທີສີ່, ຫ້ອງຮຽນຂອງລາວໄດ້ຈັດຕັ້ງລັດຖະບານຈຳລອງຂຶ້ນ ໂດຍທີ່ໄດ້ຮັບການເລືອກຈາກໝູ່ເພື່ອນຂອງລາວໃຫ້ເຮັດໜ້າທີ່ເປັນຜູ້ຕັດສິນຂອງຫ້ອງຮຽນ. ມື້ໜຶ່ງ ຜູ້ພິພາກສາທີ່ມາຈາກສານຢູທາ ເຂດທີສອງ ໄດ້ມາຢ້ຽມຢາມ, ແລ້ວສວມຊຸດທາງການໃຫ້ກັບເອລີ, ແລະ ຈາກນັ້ນໄດ້ເຮັດພິທີສາບານຕົນໃນການເຂົ້າຮັບຕຳແໜ່ງໃນຫ້ອງຮຽນຂອງເຂົາເຈົ້າ. ສິ່ງນີ້ໄດ້ຈຸດປະກາຍຄວາມປະທັບໃຈໃຫ້ແກ່ຈິດວິນຍານໄວໜຸ່ມຂອງເອລີໃຫ້ຫລົງໄຫລໃນການສຶກສາກ່ຽວກັບກົດໝາຍ, ແລະ ຜູ້ໃຫ້ກົດພຣະອົງເອງ, ພຣະເຢຊູຄຣິດ.
ຫລັງຈາກທີ່ໄດ້ພະຍາຍາມຢ່າງພາກພຽນເປັນເວລາຫລາຍປີ, ເອລີກໍໄດ້ຮັບການເຊື້ອເຊີນໃຫ້ເຂົ້າສຳພາດກັບໜຶ່ງໃນໂຮງຮຽນກົດໝາຍອັນດັບຕົ້ນໆຂອງຕົວເລືອກຂອງລາວ. ລາວໄດ້ເວົ້າວ່າ, “ແມ່, ລູກຖືກຖາມຢູ່ 10 ຄຳຖາມ. ຄຳຖາມສຸດທ້າຍຄື, ‘ເຈົ້າມີແນວທາງຊີ້ນຳຄວາມສຳນຶກທາງສິນທຳຂອງເຈົ້າມາຈາກໃສ?’ ລູກໄດ້ເວົ້າວ່າຕະຫລອດທົ່ວປະຫວັດສາດ ມະນຸດໄດ້ສ້າງລະບົບສິນທຳຂຶ້ນໂດຍການສ້າງແບບແຜນຊີວິດຂອງເຂົາເຈົ້າຈາກຕົ້ນແບບ. ຕົ້ນແບບແຫ່ງສິນທຳທີ່ລູກພະຍາຍາມໃຊ້ເປັນຕົ້ນແບບໃຫ້ກັບຊີວິດຂອງລູກແມ່ນມາຈາກພຣະເຢຊູຄຣິດ. ລູກໄດ້ເວົ້າອີກວ່າຖ້າວ່າມະນຸດທັງປວງປະຕິບັດຕາມຄຳສອນຂອງພຣະເຢຊູຄຣິດໃນການເທດສະໜາທີ່ໂນນພູ ໂລກນີ້ກໍຈະເປັນຕາໜ້າຢູ່ ແລະ ສະຫງົບສຸກຫລາຍຂຶ້ນ.” ແລ້ວຈາກນັ້ນການສຳພາດກໍສິ້ນສຸດລົງ, ແລະ ລາວໄດ້ຄິດກັບຕົວເອງວ່າ, “ໝົດແລ້ວຄວາມໄຝ່ຝັນໃນໄວເດັກຂອງເຮົາ. ບໍ່ມີໃຜໃນແວດວົງວິຊາການທາງໂລກຕ້ອງການທີ່ຈະໄດ້ຍິນກ່ຽວກັບພຣະເຢຊູຄຣິດ.”
ສອງອາທິດຕໍ່ມາ, ເອລີໄດ້ຮັບທຶນການສຶກສາ. ກ່ອນທີ່ຈະຕົກລົງ, ພວກເຮົາໄດ້ໄປຢ້ຽມຊົມໂຮງຮຽນກົດໝາຍທີ່ໃຫ້ທຶນ. ໂຮງຮຽນກົດໝາຍແຫ່ງນີ້ເບິ່ງຄ້າຍຄືຫໍປາສາດ ແລະ ຕັ້ງຢູ່ເທິງເນີນພູສູງທີ່ເບິ່ງເຫັນທະເລສາບທີ່ສວຍງາມ. ເປັນທີ່ໜ້າປະຫລາດໃຈ, ຂະນະທີ່ພວກເຮົາຍ່າງຜ່ານຫ້ອງສະໝຸດທີ່ສວຍງາມ ແລະ ທາງຍ່າງທີ່ສະຫງ່າງາມ, ພວກເຮົາໄດ້ເຫັນຄຸນລັກສະນະຈາກຄຳເທດສະໜາທີ່ໂນນພູຢູ່ເທິງປ້າຍ ແລະ ແກະສະຫລັກລົງໃນຫີນ.
ຄຳເທດສະໜາທີ່ໂນນພູ ແມ່ນສຸນທອນພົດທີ່ສະຫງ່າຜ່າເຜີຍ ມີຄຸນຄ່າທີ່ສຸດເທົ່າທີ່ເຄີຍມີມາ, ໃນການບຸກເບີກຄຳສອນຂອງມັນ. ບໍ່ມີຄຳເທດສະໜາອື່ນໃດທີ່ສາມາດຊ່ວຍໃຫ້ເຮົາເຂົ້າໃຈລັກສະນະນິໄສຂອງພຣະເຢຊູຄຣິດໄດ້ດີໄປກວ່າ, ຄຸນລັກສະນະອັນສູງສົ່ງຂອງພຣະອົງ, ແລະ ຈຸດປະສົງສູງສຸດຂອງເຮົາໃນການກາຍເປັນເໝືອນດັ່ງພຣະອົງ.
ການເປັນສານຸສິດຂອງພຣະເຢຊູຄຣິດຕະຫລອດຊີວິດແມ່ນເລີ່ມຕົ້ນຈາກທີ່ບ້ານຂອງເຮົາ—ແລະ ໃນຊັ້ນປະຖົມໄວນັບຕັ້ງແຕ່ອາຍຸ 18 ເດືອນ. ເຮົາຕ້ອງການໃຫ້ລູກໆຂອງເຮົາ ເຊື່ອ ໃນພຣະເຢຊູຄຣິດ, ເປັນຂອງ ພຣະເຢຊູຄຣິດ ແລະ ສາດສະໜາຈັກຂອງພຣະອົງ ຜ່ານທາງພັນທະສັນຍາ, ແລະ ພະຍາຍາມທີ່ຈະ ກາຍເປັນ ເໝືອນດັ່ງພຣະເຢຊູຄຣິດ.
ເຊື່ອໃນພຣະເຢຊູຄຣິດ
ທຳອິດ, ເຊື່ອໃນພຣະເຢຊູຄຣິດ.
ຫລັງຈາກຄຳເທດສະໜາເຂົ້າຈີ່ແຫ່ງຊີວິດ, “ສານຸສິດຫລາຍຄົນ [ຂອງພຣະຜູ້ເປັນເຈົ້າ]” ມີຄວາມຫຍຸ້ງຍາກທີ່ຈະຮັບເອົາຄຳສອນຂອງພຣະອົງ, ແລະ ພວກເຂົາ “ໄດ້ທໍ້ຖອຍ, ແລະ ບໍ່ໄປກັບພຣະອົງອີກ.” ຈາກນັ້ນພຣະເຢຊູໄດ້ຫັນໄປຫາພວກສາວົກສິບສອງຄົນ ແລະ ຖາມຄຳຖາມອັນເຈັບປວດໃຈວ່າ: “ພວກເຈົ້າເດ ກໍຢາກໜີໄປຄືກັນບໍ?”
ເປໂຕໄດ້ຕອບວ່າ:
“ພຣະອົງເອີຍ, ພວກຂ້ານ້ອຍຈະໜີໄປຫາຜູ້ໃດ? ພຣະອົງເປັນຜູ້ມີຖ້ອຍຄຳແຫ່ງຊີວິດນິລັນດອນ.
“… ພວກຂ້ານ້ອຍເຊື່ອ ແລະ ຮູ້ແລ້ວວ່າ ພຣະອົງເປັນພຣະຄຣິດ, ເປັນພຣະບຸດຂອງພຣະເຈົ້າທີ່ຊົງພຣະຊົນຢູ່.”
ດັ່ງທີ່ເປໂຕໄດ້ສະແດງໃຫ້ເຫັນ, ຄວາມເຊື່ອຄື “ການມີສັດທາໃນຄົນໃດຄົນໜຶ່ງ ຫລື ຍອມຮັບວ່າສິ່ງໃດສິ່ງໜຶ່ງເປັນຄວາມຈິງ.” ແລະ ສຳລັບສັດທາຂອງເຮົາທີ່ນຳໄປສູ່ຄວາມລອດ, ຈຳເປັນຕ້ອງມີສູນກາງຢູ່ໃນອົງພຣະເຢຊູຄຣິດເຈົ້າ. “ເຮົາ … ໃຊ້ສັດທາໃນ [ພຣະເຢຊູ] ຄຣິດ ເມື່ອເຮົາມີຄວາມໝັ້ນໃຈວ່າພຣະອົງມີຈິງ, ມີ [ຄວາມເຂົ້າໃຈ] ເຖິງລັກສະນະນິໄສ [ທີ່ແທ້ຈິງ ແລະ ເປັນທຳມະຊາດ] ຂອງພຣະອົງ, ແລະ ຄວາມຮູ້ທີ່ວ່າເຮົາກຳລັງພະຍາຍາມທີ່ຈະດຳລົງຊີວິດຕາມພຣະປະສົງຂອງພຣະອົງ.
ສາດສະດາທີ່ຮັກແພງຂອງເຮົາ, ປະທານຣະໂຊ ເອັມ ແນວສັນ, ໄດ້ປະກາດວ່າ, “ສັດທາໃນພຣະເຢຊູຄຣິດເປັນຮາກຖານຂອງຄວາມເຊື່ອທັງໝົດ ແລະ ເປັນວິທີເຂົ້າຫາອຳນາດແຫ່ງສະຫວັນ.”
ເຮົາຈະສາມາດຊ່ວຍເຫລືອເດັກນ້ອຍໃນການເພີ່ມຄວາມເຂັ້ມແຂງໃຫ້ກັບຄວາມເຊື່ອຂອງພວກເຂົາໃນພຣະເຢຊູຄຣິດ ແລະ ເຂົ້າເຖິງອຳນາດແຫ່ງສະຫວັນຂອງພຣະອົງໄດ້ແນວໃດ? ເຮົາບໍ່ຈຳເປັນຕ້ອງຊອກຫາສິ່ງອື່ນໃດນອກຈາກພຣະຜູ້ຊ່ວຍໃຫ້ລອດເອງ.
“[ພຣະຜູ້ເປັນເຈົ້າ] ກ່າວກັບຜູ້ຄົນ, ໂດຍກ່າວວ່າ:
“ເຮົາຄືພຣະເຢຊູຄຣິດ. …
“ຈົ່ງລຸກຂຶ້ນ ແລະ ຍ່າງອອກມາ. …
“… ຝູງຊົນໄດ້ອອກໄປ, ແລະ ໄດ້ເດ່ມືໄປໃສ່ຂ້າງ ແລະ ໄດ້ລູບຄຳຮອຍຕະປູທີ່ພຣະຫັດ ແລະ ພຣະບາດຂອງພຣະອົງ; ແລະ ພວກເຂົາໄດ້ກະທຳສິ່ງນີ້ໂດຍການອອກໄປເທື່ອລະຄົນ … ແລະ ໄດ້ ເຫັນ ດ້ວຍຕາຂອງຕົນເອງ, ແລະ ໄດ້ ລູບຄຳ ດ້ວຍມືຂອງຕົນເອງ, ແລະ ໄດ້ ຮູ້ ເຖິງຄວາມແນ່ນອນນີ້ ແລະ ໄດ້ເປັນ ເປັນພະຍານ, ວ່າມັນແມ່ນພຣະອົງແທ້ໆ.”
ຂ້າພະເຈົ້າຂໍເຊື້ອເຊີນທ່ານໃຫ້ໄຕ່ຕອງວ່າ ສິ່ງນີ້ຈະມີລັກສະນະແນວໃດໃນຊີວິດຂອງເດັກນ້ອຍ. ພວກເຂົາ ໄດ້ຍິນ ປະຈັກພະຍານເຖິງພຣະເຢຊູຄຣິດ ແລະ ພຣະກິດຕິຄຸນຂອງພຣະອົງຫລືບໍ່? ພວກເຂົາ ເຫັນ ພາບທີ່ໜ້າເຄົາລົບ ແລະ ບູຊາຂອງການປະຕິບັດສາດສະໜາກິດ ແລະ ຄວາມເປັນພຣະເຈົ້າຂອງພຣະອົງຫລືບໍ່? ພວກເຂົາ ຮູ້ສຶກ ແລະ ຮູ້ຈັກເຖິງພຣະວິນຍານບໍລິສຸດທີ່ເປັນພະຍານເຖິງຄວາມເປັນຈິງ ແລະ ຄວາມເປັນພຣະເຈົ້າຂອງພຣະອົງຫລືບໍ່? ພວກເຂົາ ຮູ້ຈັກ ຂ່າວສານ ແລະ ພາລະກິດຂອງພຣະອົງຫລືບໍ່?
ເປັນຂອງພຣະເຢຊູຄຣິດ ແລະ ສາດສະໜາຈັກຂອງພຣະອົງ
ທີສອງ, ເປັນຂອງພຣະເຢຊູຄຣິດ ແລະ ສາດສະໜາຈັກຂອງພຣະອົງ.
ຜູ້ຄົນຂອງກະສັດເບັນຢາມິນໄດ້ປະສົບກັບການປ່ຽນແປງອັນຍິ່ງໃຫຍ່ໃນໃຈ ແລະ ດ້ວຍພັນທະສັນຍາ ໄດ້ອຸທິດຊີວິດຂອງເຂົາເຈົ້າໃນການເຮັດຕາມພຣະປະສົງຂອງພຣະເຈົ້າ. ເພາະພັນທະສັນຍາທີ່ເຂົາເຈົ້າໄດ້ເຮັດໄວ້ກັບພຣະເຈົ້າ ແລະ ພຣະເຢຊູຄຣິດ, ເຂົາເຈົ້າຈຶ່ງ “ຖືກເອີ້ນວ່າ ລູກຂອງພຣະຄຣິດ, ບຸດຂອງພຣະອົງ, ແລະ ທິດາຂອງພຣະອົງ.” ໃນຖານະສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ເຮົາມີຄວາມຮັບຜິດຊອບຕາມພັນທະສັນຍາທີ່ຈະສ້າງອານາຈັກຂອງພຣະອົງ ແລະ ກຽມພ້ອມສຳລັບການກັບມາຂອງພຣະອົງ.
ເຮົາຈະສາມາດຊ່ວຍເຫລືອເດັກນ້ອຍໃຫ້ເຮັດ ແລະ ຮັກສາພັນທະສັນຍາອັນສັກສິດໄດ້ແນວໃດ? ໃນປຶ້ມ ຈົ່ງຕາມເຮົາມາ, ໃນພາກຫ້ອຍທ້າຍ ກ ແລະ ຂ, ເຮົາພົບເຫັນຫົວຂໍ້ການເລີ່ມຕົ້ນບົດສົນທະນາ ແລະ ບົດຮຽນທີ່ເສີມກຳລັງໃຫ້ກັບຄອບຄົວ ແລະ ສົ່ງເສີມຄູສອນ ແລະ ຜູ້ນຳໃນໜ້າທີ່ຮັບຜິດຊອບທີ່ສັກສິດຂອງເຂົາເຈົ້າ ເພື່ອກຽມເດັກນ້ອຍໃຫ້ເດີນໃນເສັ້ນທາງແຫ່ງພັນທະສັນຍາຂອງພຣະເຈົ້າໄປຕະຫລອດຊີວິດ.
ກາຍເປັນເໝືອນດັ່ງພຣະເຢຊູຄຣິດ
ທີສາມ, ກາຍເປັນເໝືອນດັ່ງພຣະເຢຊູຄຣິດ.
ໃນພຣະຄຳພີມໍມອນ, ພຣະຜູ້ຊ່ວຍໃຫ້ລອດໄດ້ຕັກເຕືອນສາວົກທີ່ຫາກໍໄດ້ຮັບການເອີ້ນໃຫ້ຮຽນແບບຕາມພຣະອົງໃຫ້ໄດ້ໃກ້ຄຽງຫລາຍທີ່ສຸດວ່າ: “ເຈົ້າຄວນເປັນແນວໃດ? ຕາມຈິງແລ້ວ ເຮົາກ່າວກັບເຈົ້າວ່າ, ເຖິງແມ່ນດັ່ງທີ່ເຮົາເປັນ.”
ເຮົາຈະສາມາດຊ່ວຍເຫລືອເດັກນ້ອຍທີ່ໄດ້ຮັບບັບຕິສະມາ ແລະ ໄດ້ຮັບການຢືນຢັນແລ້ວໃຫ້ປະຕິບັດຄວາມຮັບຜິດຊອບຕາມພັນທະສັນຍາຂອງພວກເຂົາ ໃນການເຕົ້າໂຮມຕົວເຂົາເອງ ແລະ ຄົນອື່ນໃຫ້ມາສູ່ພຣະເຢຊູຄຣິດໄດ້ແນວໃດ? ການເປັນສານຸສິດໄປຕະຫລອດຊີວິດຮຽກຮ້ອງເຮົາໃຫ້ “ … ບໍ່ພຽງແຕ່ຟັງເທົ່ານັ້ນ, ແຕ່ຈົ່ງປະຕິບັດຕາມ.”
ເມື່ອເຮົາເຊື້ອເຊີນສານຸສິດຂອງພຣະຜູ້ເປັນເຈົ້າທີ່ອາຍຸນ້ອຍທີ່ສຸດ, ຈົ່ງໃຊ້ທຸກໂອກາດໃນການນຳທາງເຂົາ, ນຳພາເຂົາ, ເດີນຄຽງຂ້າງເຂົາ, ແລະ ຊ່ວຍເຫລືອເຂົາໃຫ້ພົບເສັ້ນທາງ. ຈົ່ງໃຫ້ຄຳປຶກສາກັບເດັກນ້ອຍທີ່ປະເສີດເຫລົ່ານີ້ ໃນຂະນະທີ່ພວກເຂົາຕຽມຕົວສິດສອນ, ເປັນພະຍານ, ອະທິຖານ, ຫລື ຮັບໃຊ້ ເພື່ອພວກເຂົາຈະມີຄວາມໝັ້ນໃຈ ແລະ ປະສົບກັບຄວາມຊື່ນຊົມໃນການບັນລຸໜ້າທີ່ຮັບຜິດຊອບຂອງພວກເຂົາ. ສະແຫວງຫາວິທີທີ່ດົນໃຈ ເພື່ອຊ່ວຍເຫລືອພວກເຂົາໃຫ້ຮູ້ຈັກວ່າ ນີ້ຄືສາດສະໜາຈັກຂອງພວກເຂົາ ແລະ ພວກເຂົາມີບົດບາດສຳຄັນໃນການກຽມພ້ອມສຳລັບການສະເດັດມາອີກຄັ້ງຂອງພຣະຜູ້ຊ່ວຍໃຫ້ລອດ.
ໃນຂະນະທີ່ພຣະຜູ້ຊ່ວຍໃຫ້ລອດກາຍເປັນຈຸດສູນກາງໃນຊີວິດຂອງເຮົາ, ເປັນສິ່ງທີ່ເຮົາປາດຖະໜາ, ແລະ ວິທີທີ່ເຮົາປາດຖະໜາ, ຈະຖືກປ່ຽນແປງໄປຕະຫລອດການ. ການປ່ຽນໃຈເຫລື້ອມໃສປ່ຽນແປງທຸກສິ່ງ! ມັນປ່ຽນແປງທຳມະຊາດຂອງເຮົາ “ຈົນວ່າພວກເຮົາບໍ່ມີໃຈທີ່ຈະກະທຳຄວາມຊົ່ວອີກຕໍ່ໄປ, ແຕ່ປາດຖະໜາຈະເຮັດແຕ່ຄວາມດີໂດຍຕະຫລອດ.” ມັນປ່ຽນແປງການໃຊ້ເວລາ, ຊັບສິນຂອງເຮົາ; ສິ່ງທີ່ເຮົາອ່ານ, ເບິ່ງ, ຟັງ, ແລະ ແບ່ງປັນ. ມັນຍັງປ່ຽນວິທີທີ່ເຮົາຕອບການສຳພາດທີ່ໂດດເດັ່ນ, ດ້ານວິຊາການ, ແລະ ກ່ຽວກັບອາຊີບນຳອີກ.
ເຮົາຈະຕ້ອງເຕີມແສງສະຫວ່າງຂອງພຣະເຢຊູຄຣິດ ເຂົ້າໃນທຸກຊອກທຸກມຸມໃນຊີວິດຂອງເຮົາ. ຖ້າຫາກເຮົາບໍ່ໄດ້ເປັນພະຍານເຖິງຄວາມຈິງຂອງການເປັນພຣະເຈົ້າກ່ອນມະຕະຂອງພຣະອົງ, ພາລະກິດອັນສູງສົ່ງຂອງພຣະອົງ, ການຟື້ນຄືນພຣະຊົນຂອງພຣະອົງທີ່ທຳລາຍຄຸກ ໃນບ້ານຂອງເຮົາ ແລະ ໃນການປະຊຸມແຕ່ລະຄັ້ງຂອງສາດສະໜາຈັກແຫ່ງນີ້, ແລ້ວຂ່າວສານແຫ່ງຄວາມຮັກ, ການຮັບໃຊ້, ຄວາມຊື່ສັດ, ຄວາມຖ່ອມໃຈ, ຄວາມກະຕັນຍູ, ແລະ ຄວາມເຫັນອົກເຫັນໃຈຂອງເຮົາ ອາດຈະກາຍເປັນຄຳເວົ້າທີ່ພຽງແຕ່ໃຫ້ກຳລັງໃຈໃນການໃຊ້ຊີວິດຢ່າງມີສະຕິເທົ່ານັ້ນ. ຖ້າປາດສະຈາກພຣະເຢຊູຄຣິດກໍຈະບໍ່ມີພະລັງໃນການປ່ຽນແປງ, ບໍ່ມີຈຸດປະສົງທີ່ຈະໄຝ່ຫາ, ແລະ ບໍ່ມີການຄືນດີຈາກຄວາມເຈັບປວດຂອງຊີວິດ. ຖ້າເຮົາຂາດຄວາມເອົາໃຈໃສ່ ໃນການເປັນສານຸສິດຂອງພຣະເຢຊູຄຣິດ, ອາດຈະເກີດໄພພິບັດກັບລູກໆຂອງເຮົາໄດ້.
ເມື່ອເຮົາບອກລູກໆຂອງເຮົາວ່າ ເຮົາຮັກພວກເຂົາ, ເຮົາໄດ້ບອກພວກເຂົາແດ່ບໍວ່າພຣະບິດາຜູ້ສະຖິດຢູ່ໃນສະຫວັນຂອງພວກເຂົາ ແລະ ພຣະຜູ້ຊ່ວຍໃຫ້ລອດ ພຣະເຢຊູຄຣິດ ກໍຮັກພວກເຂົາເຊັ່ນກັນ? ຄວາມຮັກຂອງເຮົາອາດຈະປອບໂຍນ ແລະ ເປັນແຮງບັນດານໃຈ, ແຕ່ຄວາມຮັກ ຂອງພວກພຣະອົງ ສາມາດຊຳລະໃຫ້ບໍລິສຸດ, ສູງສົ່ງ, ແລະ ປິ່ນປົວໄດ້.
ພຣະເຢຊູອົງນີ້ບໍ່ຄວນເປັນພຣະເຢຊູທີ່ຖືກແຕ່ງຂຶ້ນ, ຫລື ພຣະເຢຊູທີ່ລຽບງ່າຍ, ຫລື ພຣະເຢຊູທີ່ບໍ່ມີຕົວຕົນ, ຫລື ພຣະເຢຊູທີ່ທຳມະດາ, ຫລື ພຣະເຢຊູທີ່ບໍ່ມີໃຜຮູ້ຈັກ, ແຕ່ຄືພຣະອົງທີ່ສະຫງ່າລາສີ, ປ່ຽມດ້ວຍພະລັງ, ຟື້ນຄືນພຣະຊົນ, ສູງສົ່ງ, ເປັນທີ່ເຄົາລົບບູຊາ, ມີອຳນາດ, ຄືພຣະບຸດອົງດຽວທີ່ຖືກຳເນີດຂອງພຣະເຈົ້າ, ຜູ້ຊົງ ອານຸພາບທີ່ຈະຊ່ວຍໃຫ້ລອດ. ແລະ ດັ່ງທີ່ເດັກນ້ອຍຄົນໜຶ່ງໃນປະເທດຟີລິບປິນໄດ້ສະແດງປະຈັກພະຍານຢ່າງໜັກແໜ້ນຕໍ່ຂ້າພະເຈົ້າວັນໜຶ່ງວ່າ, “ພວກເຮົາມີຄ່າທີ່ຈະໄດ້ຮັບການຊ່ວຍໃຫ້ລອດ!” ໃນພຣະນາມອັນສັກສິດ ແລະ ບໍລິສຸດຂອງພຣະອົງ “ທີ່ພຣະເຈົ້າໄດ້ຊົງໃຫ້ປະກົດນັ້ນ ເພື່ອໃຫ້ເປັນຜູ້ໄຖ່ໂທດແທນບາບກຳ [ທີ່ຍິ່ງໃຫຍ່] ,” ພຣະເຢຊູຄຣິດ, ອາແມນ.