Jane Manning Seiloklahng Nauvoo

Jane Manning oh ah peneinei kin kouson wasa ehu me aramas akan sohte kin perenikin irail oh sohte kin wiahkin irail mehkot pwehki kolor en kilirail ko. Rahn ehu, Jane rongada misinieri men ah padapadahk. E ese me ah padahko mehlel. Rahnsarawi ohte, e pepdaisla.

Souleng kan, 1:500–501

Ahn Jane peneinei pil iangala Mwomwodiso. Kauno ketin kupwuriki Souleng kan en kohpene nan Nauvoo. Jane poakohng Kauno. Ih oh ah peneinei pil men iang patehng Souleng teikan. Eri irail tapiada arail seiloklahng Nauvoo.

Tepin Padahk oh Inou kan 124:25; Souleng kan, 1:501

Erein kisehn arail seilok, irail pahn dake pwoht. Palilaud en aramas nan pwohto kak pwain arail iang pwohto ansou me re lel wasa re kohkohla ie. Ahpw ekei ohl oko padahkiong Jane oh ah peneinei me re anahne pwain arail pahn iang pwohto mwohn arail pahn douda nan pwohto. Sohte itar wehn mwohni me re kolokol. Ohl oko kahrehiong irail en doudihsang nan pwohto, eri pwohto kohkohlahsang irail.

Souleng kan}, 1:501

Ahn Jane peneinei pahn anahnehte seilongki mile 800, de kilometer 1,300. Re pahn anahne kotehla pihl loal ehu me sohte piris. Irail anahne meir liki. Nan mesenlahng kin kalapw lomwulomwur. Ahpw ahn Jane peneinei udahn kehlailki arail pahn lel Nauvoo. Irail kin kakehlailih pein irail ni arail kin wie kokoul kohwei.

Souleng kan, 1:501, 505–6

Jane oh ah peneinei alialu lau arail suht kan ohla oh paten nehrail kan pil ohla. Ahpw ansou me re kin kapakapkihong Koht en sewese irail, E kin ketin kamwahuila paten nehrail ko.

Souleng kan, 1:505

Irail kin sewese aramas akan me re kin tuhwong nan arail seilok. Irail pil kamwahuila seri men me soumwahu sang ni arail pwoson.

Souleng kan, 1:505–6

Eri, Jane oh ah peneinei lelehr Nauvoo! Irail inenen pwangada oh anahne wasahn kouson. Eri irail kohla ni ihmwen Emma oh Sosep. Ansou me Sosep rong dahme irail lelohng loale, e ndaihong Jane, “Koht en ketin kapaiukada. Ke mihmier rehn kompoakepahmw kan.“ Sosep oh Emma luhkeiong Jane en kin mihmi rehra.

Souleng kan, 1:506