Pearl of Great Price

Ehu rahn, ohl emen kohdo Kirtland iangahki paliwar en aramas mehla kei sang Ihsip. Me iangedo paliwar mehla kat iei sikrol kei, de doaropwe me weliwelpene kei en mahso. Sikrol kat audaudki inting en Ihsip. Ohlet kasalehiong Soukohp Sosep Smith. Sosep inenen pereniki inting ko.

Souleng kan, 1:219–20

Ekei kompoakepah kan sewese Sosep pwainda paliwar en me mehlahr ko iangahki sikrol ko. Ni Sosep ah onopiki inting ko, Kauno ketin kasalehiong ih inting kan sang Eipraam, soukohp en nan Pwuhk Sarawi. Sang ni sawas en kompoakepah me rasehng Oliver Cowdery, Sosep intingiada dahme Kauno ketin padahkiong ih duwen padahk kan en Eipraam.

Souleng kan, 1:220

Eipraam kilang kaudiahl en atail mour rehn Samatail Nanleng mwohn atail ipwidi pohn sampah. E kilang me Sises malipilipda en wia atail Sounkomour. Eipraam pil eseda duwen kapikipikdahn sampah. Souleng kan inenen perenikihda padahk kan me kohsang Eipraam. Irail inenen pereniki Kauno ketin kupwuriki en padahki irail.

Eipraam 2:6–11; 3–5; Souleng kan, 1:220

Ahn Eipraam inting kan wiahla kisehn pwuhk sarawi ehu me kadahneki Pearl of Great Price. Pwuhk wet pil audaudki inting kan sang Moses, emen soukohp nan Pwuhk Sarawi. E padahngki mehlel kei me sohte mih nan Pwuhk Sarawi. Kauno kupwurki aramas en ese mehlel pwukat, eri E ketin ehukiong Sosep Smith.

Moses 1–8; Eipraam 1–5

Pearl of Great Price pil kolokol ahn Sosep Smith kadehde oh Iren Pwoson me 13. Sosep Smith intingiada mepwukat pwe en pakairohng tohn sampah dahme Souleng en Imwin-Rahn-Akan kamehlele. Pearl of Great Price wia pwuhk tikitik ehu, duwehte kisin takai kesempwal me tikitik, ahpw inenen kesempwal.

Sosep Smith—Poadopoad; Iren Pwoson 1