Elijah Able

Kauno malipe ohl emen adaneki Elijah Able en wia misineri men. Elijah padahkih Eunice oh Charles Franklin duwen rongamwahu en Sises Krais. E padahkiong irail duwen Pwuhk en Mormon oh Soukohp Sosep Smith. Eunice oh Charles kamehlele dahme e padahngki oh men iangala Mwomwodiso. Elijah pepdaisih irahla.

Souleng kan, 1:316

Elijah kohkohla pwe en ehuki rongamwahuo nan ehu kanihmw. Pwohng ehu, mwurin sounpwong kei, eh ouramankihda kompokepah Eunice. Nan ouramano, Eunice sohla nohn kamehlele me Pwuhk en Mormon mehlel de ma Sosep Smith wia soukohp men. Ansou me Elijah pirida, e mwadangete pwurala pwe en tehkada Eunice.

Tepin Padahk oh Inou kan 75:27; Souleng kan, 1:315–16

Eunice pwuriamwei ah kilangada Elijah ni ah wenihmwo! Ahn Elijah ouramano pwung: Eunice sohlar kamehlele Pwuhk en Mormon de Sosep Smith.

Souleng kan, 1:317

Elijah peki Eunice en kohdo oh iang rong ah padahk ni ihmwen sukuhlo. Ansou me e rong ahn Elijah padahko, e pwurehng kehnda Ngehn Sarawio, E ese me rongamwahuo mehlel!

Souleng kan, 1:317

Elijah inoukiong Eunice me e pahn pwurodo mwurin wihk riau pwe en pwurehng padahk. Ahpw ekei aramas kan nan kanihmwo sohte mwahuki ah en pwuredo. Mwurin Elijah ah kohkohlau, irail tepida koasoaiaiong aramas akan me Elijah kemehla aramas kei. Irail kihda wehn pweipwei ehu ong aramas emen me pahn diar ih.

Souleng kan, 1:318

Eunice ese me aramas akan likamwkihda soahng koaros me pid Elijah. E sohte kemehla aramas emen. E wia ohl mwahu men oh ladu en Koht men. E ese me arail likamw akan sohte pahn kauhdi Elijah sang ah kohdo nan arail kanihmwo pwe en padahk. Eunice ndaihong aramas akan me Elijah pahn pwuredo. “Koht pahn sinsile ih,“ e inda.

Souleng kan, 1:318

Elijah pwuredo. E pwuredo ni ihmwen sukul ohte me e padahk ie rahn teio. E audaudkihda aramas akan me mwahuki ah en soalidi. Elijah kesihnenda mwohn pokono. E koasoaia ma irail men saliedi ih, irail anahne wia met, mwohn ah pahn tepida padahk. Ma soh, irail en mweidohng ah en padahk.

Souleng kan, 1:318

Sohte me mwekid. Elijah awih, ahpw pokono mwomwohd ni meleilei. Elijah koulki koul sarawi ehu, wie kapakap, oh padahngki rongamwahu en Sises Krais. Manaman en Koht ketiket reh. Mwurin ah kaimwsekalahr ah padahko, e koasoaiong kompokepah Eunice oh Charles oh doulahte nan ah misin ni meleilei.

Souleng kan, 1:319