Kasarawi en Tehnpas Sarawi en Kirtland

Mwurin sounpar siluh en doadoahk laud, Tehnpas Sarawi en Kirtland imwseklahr. Soukohp Sosep luke Souleng kan en patehng mihting kesempwal ehu en kasarawihala tehnpas sarawi. E pahn wia kapakap kesempwal ehu oh kihda tehnpas sarawio ong Kauno. E pahn wiahla Sapwellimen Kauno tehnpas me sarawi.

Souleng kan, 1:235

Ni menseng en rahn en mihtingo, Souleng epwiki samwa pidolong nan tehnpas sarawio. Ansou me sehr koaros audaudehr, aramas akan kesihnen ni wenihmw oh likin ihmw, kilekilenglong nan wenihmwtok kan. Koaruhsie inenen peren oh men kilang tehnpaso ah pahn kasarawihlao.

Souleng kan, 1:235–36

Sosep wadek kapakap ieu pwe en kasarawihala tehnpaso. E pato ong Kauno me Souleng kan peikiong Ih. E patowan peki rehn Kauno en ketin alehda tehnpaso oh wiahkila tehnpese.

Tepin Padahk oh Inou kan 109:1–5

Sosep kapakapki me koaros me iang kohdo ni tehnpaso en kak kehn manaman en Kauno oh ese me Tehnpese mwo.

Tepin Padahk oh Inou kan 109:13

Sosep pil kapakapki me ansou me Souleng kan pahn wiahda dihp, irail en mwadangete koluhkihla. E peki rehn Kauno en kihong irail manaman en ehukiwei Sapwellime rongamwahuo wasa koaros nan sampah. Mwurin kapakapo, pwihn en koul ieu koulkihpene koul kapw ehu me adahniki “Ngehn en Koht.“ Aramas ako audaudkihda peren. Irail kesihnenda oh kapinga Kauno.

Tepin Padahk oh Inou kan 109:21–32; Koul Sarawihkan, no. 28; Souleng kan, 1:237

Aramas tohto kilangada tohnleng kei nan tehnpaso rahno. Irail kilangada marain lingan kohkohdihsang nanleng pohn tehnpaso. Ekei aramas koasoaia me e mwomwen depwek; ekei koasoaia me e mwomwen kisiniei. Irail koaros kehn me tehnpaso wia wasa sarawi ehu. E udahn wialahr tehnpas en Kauno.

Souleng kan, 1:237