Joseph me Oliver Ra Angei Kiien Pristut

Eu wik mwirin ewe Kirtland Tempel a efeioch, eu ngerou Souneng ra chu non ewe tempel ar repwe fen ngeni ewe Chon Amanau. A Raninfenin Easter. Joseph Smith, Oliver Cowdery, me ekkewe Engon me Ruemon Aposel ra ngeni ekkewe Souneng ewe sakrament.

Doctrine and Covenants 110, section heading; Saints, 1:239

Mwirin ewe sakrament, Joseph me Oliver ra kutta eu neni mi mosonoson non ewe tempel, nukunupen ewe kateng, ar repwe iotek.

Doctrine and Covenants 110, section heading; Saints, 1:239

Nupwen ra wes me iotek, ra neneta. Jises Kraist a uta me mwer! A sinei ekkewe Souneng ra angang weires ne oueta ewe tempel. “Ua fen etiwa ei imw,” A apasa. Jises a ureni Joseph me Oliver pwe ekkewe feiochun ewe tempel repwe wato watten pwapwa ngeni chommong aramas.

Doctrine and Covenants 110:1–10

Mwirin an Jises a no, Moses ewe soufosun Testamen Noom a pwa ngeni Joseph me Oliver. A ngenir ekkewe kiien pristut ren ionfenenin Israel. Ei wewen pwe ra tongeni emweni ewe angangen afanafana ewe kapas allim. Ra tongeni tinano misineri non unusen ewe fonufan ar repwe uweato aramas ngeni an ewe Chon Amanau we Mwichefen.

Doctrine and Covenants 110:11

Mwirin, ewe soufos Elias a pwato. A ngeni Joseph me Oliver ekkewe kii ar repwe eniwinato ewe pwon mi pin ren Abraham. Wewen ei pwe ekkewe Souneng ra tongeni angei seni ewe Samon ewe pwan chok pwon mi pin Abraham a angei. Epwe wor ar manaman ne wano ewe kapas allim me an Kot kewe feioch ngeni aramas ekis meinisin ren chommong ier repwe feito.

Doctrine and Covenants 110:12

Omuchunon, ewe soufos Elijah a pwato. A ngeni Joseph me Oliver ekkewe pristut kii ne eriri, ika ochufengeni, famini ren fansoun esemuch. Ewe angang minne ekkewe Souneng ra fori non ekkewe tempel repwe ketiw non nang. Iei a wor ren ewe Mwichefen ewe manaman ne fori an ewe Chon Amanau angang me amonnata ren an epwe niwin sefan ngeni fonufan.

Doctrine and Covenants 110:13–16