Oueta ewe Kirtland Tempel

Ewe Samon a ureni Joseph Smith pun a tori fansoun ren ekkewe Souneng repwe oueta eu imw mi auchea non Kirtland. Ei imw epwe eu tempel, eu neni ian ewe Samon epwe churi Noun aramas me pwon ngenir. I epwe fang ngenir eu auchean niffang non an tempel. I a aita ewe niffang eu endowment ren manaman.

Doctrine and Covenants 88:119; 95:8; Souneng, 1:205

Ekkewe Souneng rese mwitir poputa oueta ewe tempel. Ekkoch maram mwirin, ewe Samon a achema ngenir pun ewe tempel a fokkun auchea. Hyrum Smith a sano ren inan me seman ne ioni pisekin taiku. Nupwen inan we a aisini ian epwe no ian, i a apasa pwe a mochen epwe akkom non angang won imwan ewe Samon.

Doctrine and Covenants 95:1–8

Ekkewe Souneng non Kirtland ra poputa oueta ewe tempel. A watte momon me watte angangan. Mempurun ewe Mwichefen usun Sidney Rigdon ra fangeno chommong moni ne oueta ewe tempel. Ra pwapwa ne apwonueta an Samon annuk me angei An afeioch non Imwan we.

Souneng, 1:209–211

Nupwen ekkewe Souneng ra angang won ewe tempel, a poputa ne kisino ewe moni. Sidney me ekkoch meinapen Mwichefen ra nuokus. Sidney a iotek ngeni Kot ren aninis.

Souneng, 1:210-11

Emon chon Mwichefen itan Caroline Tippets me an famili ra isoiseno watten moni. Caroline a mut ngeni Mwichefen repwe nounou nour moni ne anisi ouetan tempel.

Souneng, 1:211–13

Chommong Souneng non Kirtland ra angang weires ne oueta ewe tempel. Ekkoch ra pusei wakon mi ur ren fau ngeni ewe tempel. Ekkoch ra tete mangak me mongo ren chon angang. Semirit ra ioni fengen kinas mi mok repwe ataietiw me pacheta won nepekin ewe tempel pwe epwe meretin me saram fan tinen akkar.

Souneng, 1:210, 219, 221

Mwirin ewe tempel a wesino! Ekkewe Souneng ra pwapwa ne tonong non imwen ewe Samon ne angei ewe efeioch I a pwonei ngenir.

Souneng, 1:221