“ʻOku lahi haʻaku ngaahi fili mahuʻinga ke fakahoko. Te u maʻu fēfē ha fakahā fakataautaha?”

“Ako ki hono ngaahi leleí mo e ngaahi polé pea fili e meʻa te ne fakafenāpasi koe mo e ʻOtuá. Manatuʻi ke ke lotu kimuʻa, lolotonga, pea mo e hili hoʻo fai hoʻo filí. ʻE fakapapauʻi atu ʻe he Laumālié kiate koe ʻa e meʻa ʻoku totonú.”

Lanei S., 16, ʻIutā, USA

“ʻE tokoni 100% atu ʻa e lotú mo e lau folofolá. ʻOku pehē ʻe he folofolá, ʻKole, pea te ke maʻu.ʻ Ko ia ai, kole! Peá ke ngāue leva ki he meʻa ʻokú ke fiemaʻú. Manatuʻi, ʻe tokoni maʻu pē ʻa e ʻEikí!”

Paaka B., 16, Kalefōnia, USA

“Kole ki he Tamai Hēvaní pea lau ʻEne folofolá. Tokanga ki he founga e fetuʻutaki atu ai ʻa e Laumālie Māʻoniʻoní pea hiki e ngaahi ueʻí he ʻaho kotoa pē, pea te ke lava ʻo ʻilo ha ngaahi sīpinga ʻo e founga te ke maʻu ai e fakahā fakatāutahá.”

Kēlepi A., 18, Kalolaina Tokelau, USA

“Ko e Tohi ʻa Molomoná ko e taha ia ʻo e ngaahi meʻangāue lelei taha ʻoku tau maʻu ki hono maʻu e fakahā fakatāutahá. Te tau lava ʻo ako mei he ngaahi sīpinga ʻa e kau palōfita ʻi he kuonga muʻá.”

Siao C., 19, Sao Paulo, Palāsila

“Ko e taimi ʻe niʻihi he ʻikai te ke maʻu hoʻo talí he taimi pē ko iá, pea taimi ʻe niʻihi ʻe hoko. Ko e taimi ʻe niʻihi ʻoku hoko mai e talí ʻi ha ongo mātuʻaki makehe pe ko ha hiva ʻokú ke fanongo ki ai ʻi he lotú. ʻE lava foki ʻa e fāmilí mo e ngaahi kaungāmeʻa falalaʻangá ʻo ʻoatu ha faleʻi lelei.”

ʻAnapela V., 12, ʻIutā, USA