Ko e Maama ʻi Hoku Faingataʻaʻiá

Ne u foua kimuí ni ha meʻa ne mātuʻaki faingataʻa. ʻOku māvae ʻeku tamaí mo ʻeku faʻeé, pea ʻoku ngāue ʻeku faʻeé ʻi muli. Naʻá ku tupu hake mo ʻeku kuifefiné—ko ia naʻá ne fakafeʻiloaki au ki he ongoongoleleí mo e Siasí. Ka ʻi he taʻu ní, naʻe taʻeʻamanekina ʻa ʻene mālōloó.

Naʻá ku pehē ko ia ʻe mate fakamuimuitahá. Naʻá ku fakakaukau he taimi ʻe niʻihi te u ʻuluaki mate au ʻiate ia koeʻuhí naʻá ne moʻui lelei ʻaupito! Naʻe ʻikai teitei hā meiate ia ha vaivai pea naʻá ne mālohi maʻu pē ʻi heʻeku vakai kiate iá. Naʻe ʻikai ke u teitei fakakaukau te u moʻui taʻe te ne kau ai.

Hili ʻene mālōloó, naʻá ku faʻa fakaʻamu he taimi ʻe niʻihi ke u mate foki mo au. Naʻá ku maʻu ha ngaahi fakakaukau ke toʻo ʻeku moʻuí. Ka naʻe ʻikai fuoloa naʻá ku ʻalu ki ha ʻekitivitī fakasiteiki ʻa e toʻu tupú ʻa ia naʻa mau fakahoko ai ha lēsoni fekauʻaki mo e palani ʻo e fakamoʻuí.

Naʻá ku ʻilo fekauʻaki mo e palani ʻo e fakamoʻuí, kae mahalo naʻe ʻikai fuʻu mahino lelei ia koeʻuhí ko e meʻa naʻe hoko ki heʻeku kuifefiné. ʻI heʻeku fakafanongó, naʻá ku fakakaukau, “Kuo ngalo ʻiate au ʻa e ngaahi tāpuaki ʻo e fakalelei ʻa Sīsū Kalaisi maʻakú.”

Naʻá ku fakatokangaʻi naʻe pekia ʻa Sīsū Kalaisi ke fakahaofi au. ʻOku ʻikai totonu ke u toʻo ʻeku moʻuí koeʻuhí ko e ngaahi faingataʻa ne u fepaki mo iá. ʻOku ʻomi ʻe he palani ʻo e fiefiá ha ʻamanaki lelei te u lava ʻo toe sio ki heʻeku kui fefiné ʻi ha ʻaho, koeʻuhí ʻoku ʻikai ngata ʻa e moʻuí ʻi heʻetau maté. ʻOku fiemaʻu ke hokohoko atu ʻeku muimui ki he Fakamoʻuí kae lava ke u toe mamata kiate ia.

Hili e mālōlō ʻeku kuifefiné, naʻe hiki mai e tokotaha ʻoku ou tokoua ʻaki ʻo ma nofo peá ne hoko ko hoku tauhi. Ko hoku ngaahi kaungāmeʻa mamaé ʻa e niʻihi ʻoku ou tokoua ʻakí, ka naʻe kei faingataʻa ʻaupito ʻa e liliú. Naʻe pau ke u ako ke fai e ngaahi ngāue kotoa pē naʻe faʻa fai ʻe heʻeku kuifefiné. Naʻe pau ke u ʻā pē ʻiate au ki he akó mo tokangaʻi e falé.

Naʻe lea maʻu pē ʻeku pīsopé fekauʻaki mo e moʻui fakafalala pē kiate kitá, ko ia naʻá ku fekumi ki ai ʻi he Gospel Library. Naʻe tokoni ia ke u ako ke fakafalala pē kiate au.

ʻOku ou kei fetuʻutaki pē foki mo ʻeku tamaí. ʻI ha ʻaho ʻe taha, naʻá ma kē ai. Naʻá ku fefaʻuhi moʻoni ai, ka naʻe fakafokifā ne ʻi ai ha faingamālie ke ʻalu ai mo e toʻu tupú ki he temipalé. Lolotonga ʻeku ʻi he temipalé, naʻá ku ongoʻi nonga. Naʻe ʻikai ke u fakakaukau ki he ngaahi palopalema ʻi ʻapí. Naʻe ʻikai ke u fakakaukau ki heʻeku ʻita ki heʻeku tamaí. Naʻá ku fakakaukau ki he meʻa te u lava ʻo fai ke tokoni ai kiate iá. Naʻá ku fakakaukau ki he hoko ko ha sīpinga leleí. Naʻá ku fakakaukau ki he ngaahi meʻa taʻengatá, fekauʻaki mo e sila mo ʻeku ongomātuʻá ʻi he temipalé ha ʻaho. Naʻá ku fakakaukau ai ke u kole fakamolemole ki heʻeku tamaí ʻi heʻeku kē mo iá.

Kuó u ako ke tokanga taha maʻu pē kia Sīsū Kalaisi mo e Tamai Hēvaní. ʻOku ou maʻu hoku mālohí meiate Kinaua, pea ʻoku ou manatuʻi te Na maluʻi au.

Naʻe tokoni e mahino ʻa e palani ʻo e fakamoʻuí, tautautefito ki he Fakalelei ʻa e Fakamoʻuí, ke u ikunaʻi ʻeku ngaahi fakakaukau taonakitá. ʻOku tokoni ia ke u ongoʻi nonga ʻi he moʻuí. ʻOkú ne ʻomi ha ʻamanaki lelei te u lava ʻo toe feʻiloaki mo ʻeku kuifefiné ʻi he tafaʻaki ʻe taha ʻo e veilí ʻi ha ʻaho.

Ko Sīsū Kalaisi ʻa e ʻamanaki lelei ke hoko atu ʻeku moʻuí neongo e lahi hoku ngaahi faingataʻá. ʻOku taʻe-fakangatangata ʻEne ʻofa ʻiate aú. Ko Ia ʻa e maama ʻi heʻeku moʻuí. ʻI he taimi ʻoku matangi pe ʻuha aí, ʻokú Ne ʻi ai. Ko Ia hoku Fakamoʻuí. Ko Ia ʻa hoku ʻapí. Ko Ia ʻeku moʻuí. ʻOkú Ne tokoni ke hoko atu ʻeku moʻuí. Ko Ia ʻa e taha ʻo e ngaahi ʻuhinga ʻoku ou saiʻia ai ʻi he moʻuí.