Tau Talanoa fekauʻaki mo e Paʻangá!

ʻOku ʻafioʻi ʻe Sīsū ʻoku lahi ha ngaahi meʻa ʻokú ke fiemaʻu (hangē ko ʻení, meʻakai) mo holi ki ai (hangē ko ʻení, keimí). ʻOkú Ne akonaki, “Fokotuʻu maʻamoutolu ʻa e koloa ʻi he langí, ʻa ia ʻe ʻikai kai ai ʻe he ané pe ko e ʻumeʻumeá” (Mātiu 6:19–21). Ko e lahi taha ʻo e meʻa ʻoku fakatau ʻe he paʻangá ʻoku ʻauha ia, ko ia fakapotopoto ʻi he meʻa ʻokú ke fakataú.

Te ke lava ʻo fakapotopotoʻi e paʻangá ʻi hoʻo fakamavaheʻi hoʻo ngaahi fiemaʻú mei hoʻo ngaahi holí. Fakakaukauloto pē kiate koe, “ʻOku ou fakatau nai ʻení koeʻuhí ʻoku ou fiemaʻu ia pe koeʻuhí ʻoku ou holi ki ai?” Kapau ʻoku ʻikai ke ke fakapapauʻi, ʻahiʻahi tatali ʻi ha māhina; ʻi he ʻosi atu e taimí, toe fakahoko e ngaahi fehuʻi ko iá. ʻI hoʻo fai ʻení, te ke lava ai ʻo fakaʻehiʻehi mei he fakatau tavalé mo e feinga ke fakaʻaliʻali ki he niʻihi kehé. Ka te ke fai ha ngaahi fili fakapotopoto ki he taimi ke fakahaofi mo fakamoleki ai e paʻangá.

ʻI he talanoa fakatātā ʻo e ngaahi talēnití, ʻoku fakamatalaʻi ʻe Sīsū ha ʻeiki ʻokú ne foaki ha paʻanga kehekehe (ʻoku ui ko e “ngaahi talēniti”) ki ha kau tamaioʻeiki ʻe toko tolu. Naʻe liunga ua ʻe he ongo tamaioʻeiki ʻe toko ua ʻa e paʻanga ne ʻoangé, pea tanu ʻe he tamaioʻeiki ʻe taha ʻene paʻangá. ʻI he foki mai ʻa e ʻeikí, ʻokú ne fiefia ʻi he ongo tamaioʻeiki ne fakalahi ʻena ngaahi talēnití pea mamahi ʻi he tamaioʻeiki ne ʻikaí (vakai, Mātiu 25:14–30).

Hangē pē ko hono foaki ʻe he ʻeiki ʻi he talanoa fakatātaá ʻa e ngaahi talēniti ki heʻene kau tamaioʻeikí, ʻi he taimi ʻoku tāpuekina ai koe ʻe he ʻOtuá ʻaki ha paʻangá, ʻokú Ne ʻamanaki mai ke ke fakaʻaongaʻi hoʻo paʻangá ke tāpuekina koe mo e niʻihi kehé. ʻI hoʻo tokangaʻi e niʻihi kehé, ʻokú ke fakahoko ai e fekau ʻa Sīsū ke “ʻofa ki ho kaungāʻapí ʻo hangē pē ko koé” (Maʻake 12:31).

ʻOku sai pē ke fakatau ha ngaahi meʻa lelei, ka ʻoku totonu ke ke fakakaukau ki hoʻo ngaahi fiemaʻú mo e niʻihi kehé kimuʻa peá ke toki fakataú. ʻI hoʻo fakakaukau ki he ngaahi fiemaʻu ʻa e niʻihi kehé, ʻe tokoniʻi koe ʻe he ʻOtuá ke ke ʻiloʻi e founga ke fakaʻaongaʻi ai e paʻangá ke tāpuekina e kakai ʻi hoʻo moʻuí.

Kapau ʻokú ke hohaʻa he ʻikai te ke maʻu ha paʻanga feʻunga koeʻuhí ko hoʻo totongi vahehongofulú, lau e ngaahi lea fakafiemālie ko ʻeni mei he ʻOtuá: “Mou ʻomi ʻa e ngaahi vahehongofulu ʻo e meʻá ki he tukuʻanga koloá … pea mou ʻahiʻahiʻi ai au … pe te u fakaava ʻa e ngaahi matapā ʻo e langí pe ʻikai, peá u lilingi hifo kiate kimoutolu ha tāpuaki, ʻe ʻikai ha potu ʻe faʻa hao ia ki ai” (Malakai 3:10). Kapau te ke totongi hoʻo vahehongofulú, ʻe tāpuakiʻi koe ʻe he ʻOtuá ʻo lahi ange ʻi he meʻa ʻokú ke mafakakaukauá!

Mahalo he ʻikai tāpuakiʻi koe ʻi ha ngaahi founga fakatuʻasino—mahalo he ʻikai te ke maʻu e paʻanga ʻokú ke fiemaʻú ke fakatau ʻaki e sote mamafa ʻokú ke saiʻia aí, ko ia ai ʻe ala fiemaʻu ke ke fakatatali hoʻo fakahōhōlotó. Ka ʻe tāpuekina koe ʻe he ʻEikí. ʻE ʻalu pē ʻa e taimí, pea ʻe faingofua ange ke ke totongi e vahehongofulú, pea ʻe matatali ange ʻe ho lotó e ngaahi meʻa fakapaʻanga ʻokú ke hohaʻa ki aí.

Falala ki he ngaahi lea ʻa Palesiteni Lāsolo M. Nalesoní: “ʻOku ʻikai ha fakangatangata ia ʻi he ivi ʻo e Fakamoʻuí ke tokoniʻi koé” (konifelenisi lahi ʻOkatopa 2024 [Liahona, Nōvema 2024, 122]). ʻI hoʻo fakaʻaongaʻi fakapotopoto hoʻo paʻangá ke feau hoʻo ngaahi fiemaʻú, tokangaʻi e niʻihi kehé, mo totongi hoʻo vahehongofulú, te ke ʻiloʻi ai ha ʻofa lahi ange ki he ʻOtuá mo e niʻihi kehé pea mo ha houngaʻia ʻi he meʻa ʻokú ke maʻú.