Ko Hono Vahevahe ʻo e Ongoongoleleí … ʻi ha Paʻake Fakafiefia?

Naʻá ku toki ʻalu kimuí ni ki ha paʻake fakafiefia mo ha ngaahi kaungāmeʻa mei he lotú. Lolotonga ʻeku tuʻu laine mo hoku kaungāmeʻa ko ʻIví ki ha meʻavaʻinga ʻe taha, naʻe kamata talanoa mai ha talavou ko ʻĒliki fekauʻaki mo ʻene sēnolo ʻi he YouTube. Naʻá ne talanoa ʻi ha miniti nai ʻe 15 fekauʻaki mo hono fakakata ʻaki ia ʻe ha niʻihi he akó mo talaange ke tamateʻi ʻene sēnoló.

ʻI he lotú, naʻe fakatukupaaʻi kimautolu ʻe homau kau takí ke mau ʻalu mo ha fakahinohino Ki Hono Fakamālohia ʻo e Toʻu Tupú pea vahevahe ia mo ha taha. Naʻe hangē naʻe faingataʻaʻia ʻa ʻĒliki ʻi hono ngaahi kaungāmeʻá, ko ia ne u fakakaukau mahalo ʻe tokoni e fakahinohinó kiate ia.

Naʻá ku toʻo hake ia pea talaange ke ne tauhi ia. Naʻá ne ʻeke mai pe ko e hā ia, pea ne u fakamatala ange ko e meʻa ia mei hoku Siasí pea ʻe lava ʻo tokoni ange ke ne fakahoko ha ngaahi fili lelei mo akoʻi ange mo ha ngaahi meʻa lelei kehe. Naʻá ku talaange ʻoku totonu ke ne lau ia ʻi haʻane faingamālie. Naʻá ne talamai ʻoku sai, pea faʻo ia ki hono kató mo hoko atu ʻene talanoa ki heʻene sēnolo YouTube.

ʻOku ʻikai ke u ʻilo pe kuó ne lau e fakahinohinó, ka naʻe akoʻi au ʻe he aʻusiá ni te ke lava ʻo hoko ko ha faifekau ʻi ha faʻahinga taʻu, mo ha feituʻu pē—ʻo aʻu pē ki ha paʻake fakafiefia.