Falala ki he ʻEikí

Tā fakatātā ʻa Katelyn Budge

ʻI he taimi naʻe fuofua akoʻi ai ʻe he ongo faifekau sisitaá hoku fāmilí fekauʻaki mo e palani ʻo e fakamoʻuí hili e mālōlō ʻeku tangataʻeikí, naʻá ku faʻa hohaʻa he taimi ʻe niʻihi pea ʻikai ke u ʻilo pe naʻá ku tui ki ai. Ka naʻe nonga hoku ngaahi tuongaʻané pea nau tokoniʻi au ke u tui pea ʻoua ʻe fuʻu tōtuʻa ʻeku fakakaukau ki he meʻa kotoa pē.

ʻOku ʻikai ke u fuʻu ongoʻi mālohi ʻi he Siasí he taimi ʻe niʻihi. Ka ʻo kapau ʻoku ʻi ai ha meʻa naʻá ku hohaʻa ki ai pe feʻao mo ha palopalema, ʻoku ou feinga maʻu pē ke fakakaukau ki he meʻa ʻe taha: Falala ki he ʻEikí. ʻOkú Ne tataki au ki he feituʻu ʻoku totonu ke u ʻi aí.

Ko e ʻuhinga ia ʻoku ou fie ʻalu ai ʻo ngāue fakafaifekaú—ke maʻu ha mahino lahi ange kiate Ia mo e meʻa ʻokú Ne finangalo ke u fakahokó. ʻI heʻeku vakai ki he kau faifekaú mo e laumālie ʻoku nau maʻú, ʻoku ou fie hangē ko kinautolú. Ko ha ngaahi sīpinga lelei kinautolu ʻo e kau ākonga ʻa Sīsū Kalaisí. Koeʻuhí ko ʻenau ngaahi sīpingá, ʻoku ou vēkeveke moʻoni ke ʻalu ʻo ngāue fakafaifekau hili ʻeku ʻosi mei he ako māʻolungá. ʻOku ou fie foaki ʻa e fiefia mo e ʻilo ʻoku ou maʻú ki hoku ngaahi kaungāmeʻá mo e niʻihi kehé.