ʻOku ʻIate Koe Maʻu Pē ʻa e ʻOtuá
Naʻa mo e taimi naʻe ʻikai ke u tui ai ki he ʻOtuá, naʻá Ne kei ʻofa pē mo tokangaʻi au.
Tā fakatātaaʻi ʻe Uran Duo
Naʻe ʻAfioʻi Au ʻe he ʻOtuá kimuʻa Peá U ʻIloʻi Iá
ʻI hoku taʻu valú, naʻe fetaulaki e ongo faifekaú mo ʻeku kuifefiné mo e tokoua ʻeku faʻeé ʻi he halá. Hili ʻemau ako fekauʻaki mo e ongoongoleleí, naʻa mau papitaiso kotoa. Ka neongo ia, ʻi he 2020, naʻe pau ke taʻofi ʻemau ō ki he lotú koeʻuhí ko e KOVITÍ. Naʻe faifai pea ʻikai ke mau toe tui.
ʻI he taʻu ʻe ua kuohilí, naʻe ʻikai ke u teitei tui ki he ʻOtuá pe ʻiloʻi pe naʻá Ne moʻoni. ʻI he ʻaho ʻe taha he tuku ʻa e akó, naʻá ku fie kolosi he halá ke fakatau mai ha kiʻi fakamāmālohi. Ka naʻe talamai ʻe ha leʻo ke ʻoua te u kolosi ʻi he halá. Naʻá ku tuʻu, pea naʻe fepaki ha ongo meʻalele ʻi muʻa tonu pē ʻiate au. Kapau naʻá ku kolosi ʻi he halá, naʻe mei tau ʻa e meʻalelé ʻiate au pe mahalo te u mate ai. Naʻá ku ʻiloʻi leva ai naʻe ʻafioʻi au ʻe he ʻOtuá mo ʻofa ʻiate au. Neongo naʻe ʻikai ke u tui kiate Ia pea ʻikai ke u ʻalu ki he lotú he taimi ko iá, ka naʻá Ne kei ʻofeina au mo maluʻi au.
Naʻe kamata ke u toe lau ʻa e Tohi ʻa Molomoná pea ako ʻo ʻiloʻi ko e folofola ia ʻa e ʻOtuá. Naʻe kamata foki ke u toe ʻalu ki he lotú. ʻI heʻeku ʻalu ki he lotú, ʻoku ou ongoʻi e nonga, ko e ʻofa ʻa e ʻOtuá, mo ʻEne tokoní. ʻOku ou ongoʻi ʻokú Ne ʻiate au maʻu pē, pea ʻoku ou fiefia ai.
Ko hoku himi manakó ko e “Fānau Au ʻa e ʻOtuá” koeʻuhí ʻokú ne fakamanatu mai ʻoku ʻofa ʻa e Tamai Hēvaní ʻiate kitautolu mo tokoniʻi kitautolu. ʻOku ou saiʻia foki ʻi he potufolofola 2 Nīfai 2:27, ʻa ia ʻoku talanoa fekauʻaki mo ʻetau tauʻatāina ke fili ʻi he totonú mo e meʻa ʻoku halá.
ʻOku ʻIate Au ʻa e ʻOtuá ʻi Hoku Ngaahi Faingataʻá
ʻI he ngaahi māhina lahi kuohilí, naʻe kamata ke ma ʻalu mo hoku tuongaʻané ki he lotú, ka naʻe hili pē ha vahaʻataimi naʻá ne nofo. ʻOkú ne hohaʻa ki he fakakaukau ʻa hono ngaahi kaungāmeʻá mo e niʻihi kehé ʻo kau kiate iá. ʻOkú ne fakakaukau ʻoku fakamā ʻa e ʻalu ki heʻetau lotú, ka ʻoku ou talaange ʻoku ʻikai mahuʻinga e fakakaukau ʻa e ngaahi kaungāmeʻá. Ko e fakakaukau ʻa e ʻOtuá ʻoku mahuʻingá.
ʻOku ʻikai ʻalu hoku fāmilí ki he lotú. ʻOku ou ʻalu tokotaha pē. Koeʻuhí ʻoku ʻikai ha pasi ki falelotu mei he hala ʻoku ou nofo aí, ʻoku ou lue ʻi ha miniti nai ʻe 30 ke aʻu ki ai. ʻOku hohaʻa hoku fāmilí ki he fakakaukau ʻa e kakai kehé kiate kinautolú, ka ʻoku ou talaange ʻoku ʻikai mahuʻinga ia koeʻuhí ʻoku ou ʻilo ʻoku moʻoni ia.
ʻI he taimi ʻoku ou fetaulaki ai mo hoku ngaahi kaungāmeʻá, ʻoku nau faʻa inu kofi. Pea ʻi heʻeku sio ki aí, ʻoku ou fie inu kofi foki mo au he taimi ʻe niʻihi. Ka ʻoku ou manatuʻi ʻoku ʻiate au ʻa e ʻOtuá. ʻOkú Ne puke hoku nimá mo tokoniʻi au. ʻOku ou fanongo ki ha leʻo ʻokú ne talamai ke ʻoua te u fai ia, pea ʻoku ou ʻilo ʻoku tokoniʻi au ʻe he ʻOtuá ke u ikunaʻi e ngaahi faingataʻa ko ʻení.
ʻOku faingataʻa ʻa e ʻalu tokotaha ʻa Nala ki he lotú ʻo ʻikai kau ai hono fāmilí, ka ʻokú ne ʻiloʻi ʻoku ʻofa mo tāpuekina ia ʻe he ʻOtuá. Naʻá Ne maluʻi foki ia mei ha fakatuʻutāmaki ʻi he halá.
Ko ʻEku Faleʻi ki he Niʻihi Kehe Hangē ko Aú
Kapau te u fai ha faleʻi ki ha taha ʻoku tūkunga tatau mo au, te u talaange ki ai ʻokú ke mohu tāpuekina, pea ʻoku lahi ʻaupito hoʻo tuí. ʻOku ʻikai ke ke tuenoa, koeʻuhí ʻe lava ʻa e kāingalotu ʻo e Siasí mo e kau faifekaú ʻo ʻoatu ha faleʻi lelei. ʻOku ʻofa ʻa e ʻOtuá ʻiate koe. Ko Hono foha pe ʻofefine koe, pea ʻokú Ne finangalo ke tokoniʻi koe.
ʻOku nofo ʻa e tokotaha naʻá ne faʻú ʻi Ielevani, ʻAmēnia.