Ang Ipinanumbalik na Simbahan ni Jesucristo

Ang pag-aaral ng Doktrina at mga Tipan sa Pumarito Ka, Sumunod Ka sa Akin ngayong taon ay bibigyang-diin kung paano ipinanumbalik ng Panginoon ang Kanyang Simbahan at ebanghelyo sa pamamagitan ng mga propeta sa mga huling araw. Maraming artikulo sa isyu ng buwang ito ang nagtatampok sa mga pagpapala ng Pagpapanumbalik.

Mga Aral sa Artikulong Ito

Lumahok sa Pagtitipon

Sa pahina 2, ibinahagi ni Pangulong Russell M. Nelson ang mga paraan na maaari tayong magtipon tungo sa Tagapagligtas, magtipon na kasama ng mga Banal, at magtipon sa paglilingkod sa Diyos. Isiping magtakda ng mithiin para sa buwang ito para makatulong sa isa sa tatlong uri ng pagtitipong iyon.

Maglingkod sa Ipinanumbalik na Simbahan

Nagsalita si Elder Patrick Kearon ng Korum ng Labindalawang Apostol tungkol sa mga oportunidad natin sa ipinanumbalik na Simbahan ni Jesucristo na “maglingkod sa iba nang may pagmamahal” (tingnan sa pahina 8). May mga tao ba sa inyong ward o branch na nahihirapan? Maaari ninyong ipagdasal ang mga taong ito at humingi ng inspirasyon kung paano sila paglilingkuran.

Matuto mula sa Proklamasyon ng Pagpapanumbalik

Noong 2020, inilabas ng Unang Panguluhan at Korum ng Labindalawang Apostol ang “Ang Pagpapanumbalik ng Kabuuan ng Ebanghelyo ni Jesucristo: Isang Proklamasyon sa Mundo para sa Ika-200 Taong Anibersaryo” (tingnan sa pahina 40). Habang nirerebyu mo ang proklamasyon ng Pagpapanumbalik, maaari mong pag-isipan ang mga tanong na ito: Anong mahahalagang pangyayari ang binabanggit nito, at paano ginabayan ng Panginoon ang mga pangyayaring iyon?

Katuwaan ng Pamilya sa Pumarito Ka, Sumunod Ka sa Akin

Doktrina at mga Tipan 1:30

Sa talatang ito, inilarawan ng Panginoon ang Kanyang Simbahan bilang “ang tanging tunay at buhay na simbahan sa ibabaw ng buong mundo.” Ipauunawa ng sumusunod na mga ideya sa pagtuturo sa iyong mga anak ang ibig sabihin ng “totoo” at “buhay”:

Sa Liahona ng Hunyo 2024, tinalakay ni Elder J. Devn Cornish, isang emeritus General Authority Seventy, ang tanong na “Ano ang ibig nating sabihin kapag sinasabi natin na ang Simbahan ay totoo?” Maaari mong ibahagi sa iyong mga anak ang ilan sa mahahalagang punto mula sa artikulong iyon. Anong mga espirituwal na karanasan ang tumulong sa inyo na malaman na ang Simbahan ay totoo—na ito ay pinamumunuan ni Jesucristo, na ito ay may awtoridad ng priesthood, na pinamumunuan ito ng mga propeta, na ibinabahagi nito ang ebanghelyo ni Jesucristo?
Kung maaari, magpatulong sa iyong mga anak na pumitas ng isang dahon o pumutol ng maliit na sanga mula sa isang puno o halaman sa malapit. Talakayin kung ano ang mangyayari dito ngayong hindi na ito konektado sa puno. Bakit mamamatay ang dahon o sanga? Basahin ang Juan 15:4, kung saan inihambing ng Tagapagligtas ang Kanyang sarili sa isang puno ng ubas at ang Kanyang mga alagad sa mga sanga. Paano pa maituturing na buhay na simbahan ang Simbahan ni Jesucristo?