Paano Ako Magtatakda ng Mabubuti at Makatotohanang mga Mithiin?

Sa panahon ng paghihirap, maaari mong isipin kung makabuluhan bang magtakda ng mga mithiin o kung posible bang makamit ang mga ito. Ganito rin ang tanong ng propetang si Mormon: “Paano mangyayari na kayo ay makakapananganan sa bawat mabuting bagay?” (Moroni 7:20). Pagkatapos ay ipinaliwanag niya kung paanong ang mga tao sa lahat ng panahon ay “[na]nampalataya kay Cristo; at sa gayon sa pamamagitan ng pananampalataya, sila ay nananganan sa bawat mabuting bagay” (Moroni 7:25).

Sa pamamagitan ng pananampalataya kay Cristo, magagawa at matatamo natin ang mabubuting bagay. Ang Kanyang kapangyarihan, pagmamahal, at mga turo ay nagbibigay-kakayahan sa atin na maisakatuparan ang ating mabubuting hangarin. Noong mga unang araw ng Pagpapanumbalik, sinabi ng Panginoon sa kanyang mga lingkod, “Kung iyong nanaisin, ikaw ang magiging daan upang makagawa ng maraming kabutihan sa salinlahing ito” (Doktrina at mga Tipan 6:8).

Ano ang ibig sabihin para sa iyo ng “makagawa ng maraming kabutihan”? Maraming paraan na maaaring gamitin ng Diyos ang iyong natatanging mga talento at katangian upang itayo ang Kanyang kaharian. Habang iniisip mo ang mga mithiing nais mong itakda, humingi ng inspirasyon at tulong sa Kanya. “Makipagsanggunian sa Panginoon sa lahat ng iyong mga gawain, at gagabayan ka niya sa kabutihan” (Alma 37:37).

Natutuhan natin sa Aklat ni Mormon na, “sa pamamagitan ng maliliit at mga karaniwang bagay ay naisasakatuparan ang mga dakilang bagay” (Alma 37:6). Ang turong ito ay nagpapadama sa atin na hindi naman mahirap ang pag-abot sa ating mga mithiin at mas kayang gawin ito. Kung minsan ay gumagawa ang Diyos “sa pamamagitan ng napakaliit na pamamaraan” (Alma 37:7) at ibinibigay sa atin ang kanyang salita nang “taludtod sa taludtod, [nang] tuntunin sa tuntunin, kaunti rito at kaunti roon” (2 Nephi 28:30).

Maaari mo ring isakatuparan ang iyong mithiin nang “taludtod sa taludtod” at sa “napakaliit” na pamamaraan. Narito ang ilang halimbawa ng pagtatakda ng mga mithiin na gumawa ng mabuti, kasama ang maliliit na pamamaraan na gagawin tungo sa tagumpay:

Sinabi ni Elder Dieter F. Uchtdorf ng Korum ng Labindalawang Apostol: “Kapag sinusuri natin ang ating buhay at nakikitang napakarami pa nating dapat gawin, tayo ay napanghihinaan-ng-loob. Kapag tinitingnan natin ang isang bagay—ang pagmamahal at paglilingkod sa Diyos at sa Kanyang mga anak, sa maraming iba’t ibang paraan—magagawa natin ang mga bagay na iyon nang may kagalakan.”

Kung mabagal ang iyong pag-unlad o ikaw ay natitisod sa daan, huwag panghinaan-ng-loob. Itinuro ni Nephi sa atin na “magpatuloy sa paglakad nang may katatagan kay Cristo, na may ganap na kaliwanagan ng pag-asa” (2 Nephi 31:20). Si Jesucristo ay handang suportahan ka at tulungan ka na sumubok muli.

Natutuwa ang langit sa bawat pagsisikap natin na makamit ang ating mga mithiin, kahit hindi ito perpekto. Sinabi ni Pangulong Howard W. Hunter: “Lahat tayo ay nakararanas ng mga cycle ng pag-unlad at mga pagkakataong nilalabanan natin ang mga di-maiiwasang hamon na pagbabalik sa dati. Ang malalaking pagpapala ng Panginoon ay tumutulong sa pagsisikap nating umunlad.”

Alam ng iyong Ama sa Langit ang iyong mga hangarin at hamon. Gagabayan at tutulungan ka Niya sa iyong mabubuting mithiin. Manalangin sa Kanya, at ilalaan Niya ang nagawa mo, gaano man ito kaliit, upang “maging para sa kapakanan ng [iyong] kaluluwa” (2 Nephi 32:9).