Mimitongin te Atua Bon te Wanawana

I a tia ni kabanea n angiin maiu ni irekereke inanon te reirei. Ngke I uarereke riki, I taku n au iango bwa te reirei nanona ti te nanakon te tabo n reirei, karaoan ukeuke, ao karekean taian bwii aika tamaroa. Ma ngke I a ikawai riki, I a moanna n reiakina te kaokoro imarenan ae ko rabakau inanon tain te reirei ao ae ko a riki n tia ni waantongaki man kanoan waakin te reirei. E kona te aomata n tamaroa ana bwii n te ukeuke ma e bon tuai naba n reireinaki. Te reirei ni koaua bon te reireinaki bwa ko na kanga n reiakinna. Man te tai are I kunea iai te reirei anne, te reireinaki e a riki ni kakukurei.

Teuana oin bukin te maiu n rabwata aei bon te reiakinaki—karekean te rabakau ao te wanawana. E taekinaki n Doctrine and Covenants 93:36, “Mimitongin te Atua bon te Wanawana.” Ko kona ni iangoia bwa te wanawana nanona bwa te konabwai ni karaoan kanoan waakin te reirei, ma nanon naba te wanawana bon kamwakuran te rabakau are ti karekei ibukin te kantaninga ae kororaoi.

Te rabakau, ibukin te maiu n rabwata ao n tamnei, e roko inanon taian mwaneka. Au koaua e rikirake n te tua iaon te tua, te reirei iaon te reirei, teutana ikai, teutana ikanne (tara Itaia 28:10)—n aron te bwai ae karaoia nakoia ni kabane kaain te Ekaretia. Ngke te ataei ngai, ao I uringa tinau ngke e warewareka Ana Boki Moomon ao taian karaki n rongorongon te Ekaretia nakoiu. I namakina te kukurei, te rau ae korakora, te namakin ni kakoauana bwa bwaai ake I a tia n reiakini a bon koaua. Te namakin aei e rikirake nakon te nano ni kan reiakina ao ni kamatebwaia riki koroboki aika tabu. Akea te bwai ae a tia n rootaki ni korakora inanon maiu man te wareware, kamatebwaian, ao ukeukeran kanoan booki aika tabu ni karekean riki te rabakau ao te wanawana.

I ikawairake i California ngke tebwitabun au ririki inanon taai ake a korakora iai karaoan mwakuri aika buakaka, n aron te kamanging ae taburoroko ao katangitang aika buakaka, a rikirake n tatangiraki. Ibukin te rabakau are I a tia ni kakabwaiaki ni karekei, I rineia bwa n na aki iri waaki aikai ni akanne. I katauraoai n riki bwa te mitinare ao ni beku ibukin te Uea. Inanon te mwakuri ni mitinare, te atatai ae I beku iai ibukin te Uea e kakorakora nanou ni mwakuri mwaaka ni katean Abanueana. Te mwakuri ni mitinare bon teuana te kawai ae moan te tamaroa ibukin reiakinana ao karekean te rabakau n te maiu n tamnei.

Oin kakawakin te kona n reireinaki bwa e na kona ni karikiko bwa te tia ibuobuoki n aekakin waaki ake ko mena iai—ni baireia bwa tera ae ko na karaoia ngkana ko aki ataia bwa tera ao ko na karaoia! Ti aki toki n reireinaki inanon booki aika tabu bwa ti na kakaea te reiakinaki man te kamatebwai ao man te onimaki (tara D&C 88:118). Inanon oin maiura, inanon ara utu nako, ao inanon te Ekaretia, ti ko na ni karekei taian kakabwaia ibukin te kakorakoraki n tamnei, kairiiri, ao te kamanoaki ngkana ti kakaea te onimaki ni karikirakea te wanawana ao ni kamwakura te rabakau n tamnei inanon te raoiroi.