Ibukin Kakorakoraakim: Te Marooro ma te Beretitentii ni Kabuta n Aia Bootaki Ataeinaine

Titita Susan W. Tanner: Ngkai ngaira te beretitentii iai ara botoniango: “I kona ni karaoi bwaai aika kangaanga.” Ara tia ibuobuoki man te nakoanibonga, Unimwaane John B. Dickson, e bubuti bwa ti na bitia nakon “Ngkana I ataia bwa antai ngai, I kona ni karaoi bwaai ake E tuangai bwa N na karaoi.” Ti namakinna ma te korakora bwa ngkana a ota raoi kairake bwa antai ngaiia ngkai bon natin te Atua, ngkanne a na bon kaawakin anua aika tamaroa. Ataakin ae ngaiia bwa antai e anganiia te nanomatoa ibon irouia.

Titita Elaine S. Dalton: Te taetae iaon anua aika tamaroa bon tiaki taekan taian tua; anua aika tamaroa bon taekan karekean te tau ni karekea ana iraorao te Tamnei ae Raoiroi. Anua aika tamaroa bon taekan te tei n taabo aika tabu bwa ko aonga n tau ni karekea ana iraorao te kateniman irouia kaain taian Atua. E na riki bwa am tia kairiiri inanon kawaim ngke ko rin inanon bwabetitoam ao kamatoam—te kawai are e kaineti nakon te tembora.

Titita Julie B. Beck: I uringa te tia ribooti ngke e buakana anuara aika tamaroa bwa te bwai ae ko taburoroiko nako iai. E a tia ni wareka te boki Ibukin Kakorakoraia Kairake, ao e namakinna bwa bon taekan taian tua ni kabane. Ai ngaia are I a taetae ma ngaia iaon te kamanomano ao taian rinerine, ao I kabonganai taeka aika kainaomataa ao inaomata ao kamanoa. I taku, n aron te katooto, ngkana te kairake n ataeinaine e kawakin anuara aika tamaroa n aki moi manging ke n taui kamanging aika matoatoa (drugs), e na bon aki toronaki n aekan katei aikai. E na inaomata, ao konabwaina ni karaoi rinerine a na kona n rikirake riki ibukina bwa e na aki karekea kangaangan te bwai ae ko a reke iai. E moana katoutouan atuna te tia riboti ngke e ota bwa taian anua aika tamaroa bon tiaki otabwaniniara n te o bwa ti na kawakinaki inanona. Anua aika tamaroa bon bwaai aika a buokira bwa ti na waaki ma ni kakamwakuri inanon te aonaaba ae onrake n taian rinerine. Ti kona n anga ara ibuobuoki nakon te aonaaba aei ao ni maiuakin, maiu aika karikiuaa ibukina bwa ti kamanoaki.

Titita Tanner: N tabetai ao ti tarai aia kangaanga kairake ake a kaitara ma ngaai ao ni karekei ara taratara ae tawe nakon ae e maan-iangoana. E rangi ni kakaongora warekan Ibukin Kakorakoraia Kairake ni ukeuke ibukin taian berita; e rangi ni kakukurei warekan booki aika tabu ni ukeuke ibukin taian berita. N te tai are ti reireiaki iai bwa ti na karaoa te bwai teuana, ni bon arona e na bon rimwiaki ma te berita. Kaaro ao taan kairiiri aika a maiuakin anua aika tamaroa bon taan katooto aika korakora. A kona n noori aekan bwaai aika raoiroi akanne kairake n riki inanon maiura, bwa ti a tia ni kona ni katei utu aika akea tokia. Aikai berita aika a kakoroaki bukiia inanon maiura.

Titita Dalton: I tuai ma ni kaitibo ma temanna ae aki tangiri berita ake inanon Ibukin Kakorakoraia Kairake: “Ko na kona riki ni karaoi mwakurin maium ma te wanawana ae korakora ao te konabwai,” ko na kona ni “kaitarai kataaki ma te ungannano ae korakora,” “ko na karekea ana ibuobuoki te Tamnei ae Raoiroi,” “ko na namakina ae raoiroi ibukim,” ko “na riki bwa te tia kariiri ae raoiroi inanon maiuia tabemwaang,” ao “ko na riki ni kororaoi bwa ko na nako nakon te tembora” (2–3).

Titita Beck: Ngkana ko aki maama ke ni namakina te kaairua ibukin taian kakabwaia, ngkanne ko bon aki maama iaon bwaai ake a karekei kakabwaia nakoim.

Titita Dalton: N tabetai kaaro a iangoa te anua ae tamaroa bwa te bwai ae uarereke. A taku, “N na bon aki irekereke ma te itabarara are e aki bongana uneakinana.” Ma tiaki taekan te tokanikai ke kabuaan te itabarara; bon taekan te mimitong. Te anua ae tamaroa bon taekan ataakin ae antai ngkoe ngkai bon ngkoe te nati te mwaane ao te nati te aine iroun te Atua.

Titita Beck: I iangoi tabeua koroboki aika tabu: “Ko na tai maaku i rouia: bwa I memena i roum” (Ieremia 1:8) ao “Kauka wiim, ao e na kanoaki” (Moses 6:32). E kantaningaiia Ana taan kairiiri te Uea—ao te karo n tatabeman nako bwa bon te tia kairiiri—bwa e na taetaekina te koaua.

Titita Tanner: E taekina te Doctrine and Covenants mwakoro 121 bwa ngkana ti boaia aomata n tabetai ma te matoa, ti kaota imwiina rikiraken te tangira (tara v. 43). Ngkana a ataia kairake bwa ko tangiriia, a na rangi n tauraoi ni kan kakauongo. Ao ngkana ko ririmwia am mwakuri ma am tangira, ko na kona n taekin bwaai aika kangaanga.

Titita Beck: I taku bwa ti kakeaa bonganaia kairake. A mena inanon te roro ni ukeuke—bon te roro n titiraki “ibukin tera.” Iai bukin anne: E tangiria te Uea bwa a na bon karekei oin aia koaua. Bon aia mwakuri kaaro ao taan kairiiri bwa a na anganiia te reirei iaon “ibukin tera” ao a na kateitei iaon anua aika tamaroa man angareirei iaon bukin bwaai nako. I uring tabeua marooro are I karekea ma natiu te aine iaon te kunnikai n te Tabati. I kabwarabwara aron au namakin bwa e riai ni kunnikaia raoi ibukin kaean te bootaki n toa. I reiakinna naba taekan te toa ao I kaota au koaua bwa e aera ngkai ti nanako n taromauri. E bon karaoaki ma te tangira. E aki bita aron kunnikaina n te Tabati anne ke te wiiki are imwiina. Ma n te tai ae tawe ao e a karekei riki aekan anua aika tamaroa iaon te kunnikai ibukin te bootaki n toa. I taotaona nanou ngke e karekea oin kamatoana iroun te tamnei iaon te bwai ae e a tia n reiakinna. Ao e bon aki manga okira aron kunnikaiana are e taneiai iai mai mwaaina. E a tia n reiakini ana reirei nako te Ekaretia, ao ana titiraki “ibukin tera” e bon kaekaki.

Titita Tanner: I tatangira te boki Ibukin Kakorakoraia Kairake ibukina bwa e boboto iaon reirei. Te reirei bon te koaua ae akea tokina, ae e a kaman karikaki imwain katean te aonaaba. Ao anua aika tamaroa a bon boboto iaon reirei, ai ngaia are anua aika tamaroa a bon aki kona ni bitaki naba. Tiaki te bwai teuana ae a aki ota iai ikawai ni maiuia kairake ae oteaki bwa e aonga n rangi ni kangaanga iai te maiu. E kaoti reirei ao anua aika tamaroa te boki Ibukin Kakorakoraia Kairake bwa a na riki ni mataata riki nakon bwaai n reirei riki tabeua. E taetae naba iaon mwiin bwaai aika na riki. Ai ngaia are ko kona n noria bwa tera te koaua ae akea tokina, ao tera ae ti riai ni karaoia ao ae tiaki riai ni karaoia, ao bukin tera ti riai ke n aki riai ni karaoia. Te boki aei e bon kona n riki bwa te ibuobuoki ae bubura nakoia kaaro. N tabetai ngkana I iango, “I tangiria ni kaeta kabwarabwaraan te bwai aei n taeka aika kai ota,” I karekea te boki anne, ao te iango are I kainnanoia e bon kakimototoaki n te kibuntaeka.

Titita Beck: Ko kona ni marooroakina te anua ae tamaroa n tain te bootaki ni utu n te tairiki ao ni katoa te mwakoro mwaakena te reirei, anua aika tamaroa, ao mwiina aika a na riki. Ngkai ngkoe te tia reirei n te Ekaretia, ko kona ni kabongana n reirei nako. E a tia ni buokai bwa N na kamatenanoi tabeua taeka aika kakaawaki ake I tangiria ni katuruturui, ao I kunea bwa ngkana I taetae nakoia kairake, kibuntaeka aikai a roko ni bebete nakon au iango.

Titita Dalton: N aron te katoto, teuana te taeka ae kakaawaki bon “E tangiriko Tatan bwa ko na iangoia bwa ko aki kona n raira nanom, ma …”

Titita Dalton ao Titita Beck, ni kauoman: “… anne e bon aki koaua” (30)!

Titita Tanner: Tenaan kairake bon taan reirei aika kabanea n tamaroa ni bon nakoia n tatabemaniia. Teuana mai buakon bwaai ake ti tatangiria ni karaoi ngkana ti taetae nakoia kairake bon te anganako te boki Ibukin Kakorakoraia Kairake nakoia tabeman aomata aika kairake ao ni kangai, “I tangiriko bwa ko na rinea teuana naba mai buakon anua aika tamaroa aikai ao inanon tabeua te miniti ao ko na anga am taetae iaona.” E tiraua au taetae aika I aki iangoi raoi ake a kanoa te ruu ma te Tamnei. Ngkana a tibwaua aia namakin ao ni kaoti aia koaua kairake, a namakina te Tamnei ao ni moana reiakinan mwaakan te boki.

Titita Beck: Karekean te tairiki ibukin anua aika tamaroa ae tii teuana n te tairiki e bon aki tau. Ti kona ni kabongana Ibukin Kakorakoraia Kairake n tain te kaembwa (camp); ti kona ni kabonganai n tain aia maungatabu kairake ao ni waaki aika aki baireaki ao aika baireaki. Bon te bwai n reirei ae e na riai ni memena i mataia ara kairake. Ao kaaro ao taan kairiiri a na maiuakinna. Ko aki kona n riki bwa te tia kairiiri ngkana ko tuangia te kairake bwa baikara tamnei aika a na kararoai, ao imwiina ko nako nakon tamnei aikai. Ko aki kona n riki bwa te tina ae taku, “Tai bwaina te kunnikai ae aki kaota te karinerine anne” ao imwiina ko bwaina teuana. Ko aki kona n riki bwa te karo ae kangai, “Kabwaka am kabwianibwai,” ma ko bon aki.

Titita Dalton: I aranna bwa Ibukin Kakorakoraam “Ngkoe.” E bon kaineti nakoira ni kabane.

Titita Beck: Au boki iai arau iaona, ao e mwakenaki ibuku. Anua aika tamaroa bon tiaki ibukiia mwaine ke ni kaineta te roro teuana; bon ibukiia natin te Atua.

Titita Dalton: Raun te Iango.

Titita Beck: Ana iraorao te Tamnei ae Raoiroi.

Titita Dalton: Ao te nanomatoa ibon iroum. E irekereke ma te botoniango ni Iwawaaki ibukin 2007: Kariaia te tamaroa bwa e na katamaroa ara iango n aki toki, ao nanomatoara ngkanne e na rikirake ni matoatoa i matan te Atua (D&C 121:45). Taian kakabwaia aika tawe aikai a bon kakaawaki ibukina bwa n tabetai te kairake a iango, “Ngkana I rinea aei, N na aki karekeia raoraou.” Ma te kananokawaki anne e kona ni koaua.

Titita Tanner: E bon koaua ibuku n te kaitiua ni koraki. I bon koaua, I kakaitara te bwai ae a tangirai bwa N na karaoia te kurubu n ataeinaine ae a rangi ni kinaki. Ibukin anne, ao ai akea raoraou ao I a rangi n nanokawaki, ma I karekea te nanomatoa bwa te bwai ae I karaoia e bon eti. Ao I koaua raoi bwa bon anne ae kamatoai rinanon te tai ae uarereke anne. I ataia ae I kona n aitara ma temanna ae I rangi ni kainnanoia bwa N na kaitibo ma ngaia—Tamau are I Karawa ao au utu.“ Ma ngkai te atatai anne e aki rangi n nano e bon aki naba kammaraki.

Titita Dalton: E aki berita nakoim te boki Ibukin Kakorakoraia Kairake te maiu ae akea kangaanga iai ngkana ko maiuakin anua aika tamaroa, ma e taekinna bwa “ko na … mwakuri taian kataaki ma te ninikoria ae korakora riki” (2). E ngae ngke I aki ataia n te tairiki are I otinako iai man te bootaki ao ni katoka arou ni kakukurei n taai aika a na roko—a aikoa kinaai ataei aika a rangi ni kinaaki man te tai arei—I a ataia ngkai bwa maiuakinan anua aika tamaroa e kona ni karikiko bwa te tia kairiiri. Temanna te ataeinaine ke temanna te ataeinimwaane ae iai te ninikoria irouna ni maiuakini anua aika tamaroa aikai ao ni kitani waaki aika aki riai aikai e na anga te ungannano nakoia tabemwaang bwa a na iria.

Titita Beck: N te wiiki ae nako ao I nako ni bobwai ma tibu aine. I nora te tia kabobwai ni mataku ni kukureira. Imwiina ao I anganna te kaati ibukin karekean ana Boki Moomon ae akea boona. E tuangai, “I a mena ngkai n te waaki inanon maiu ae I a kataia ni baronga arou, ao I aki ataia bwa N na kanga ni karaoia.” Ai ngaia are ti a marooro. Au kabanea n taetae nakoina bon, “Ngkana ko tangira aei ngke rorou ngkoe”—ao I koteia tibu aine aika uarereke—“ko na rangi n taratara raoi n te bwai ae ko rineia ngkai. Taian rinerine ake I karaoi n rorom e kamatoaai bwa antai ngai ngkai.”

Titita Dalton: Kakabwaia aika a maan taia e maenako rinanon rooro, ao teuana te bwai ae uarereke ae kam karaoia ae eti ngkai e kona ni karaoa te kaokoro ae korakora n tokim ae ngkai ao n te tabo are a iririko iai rooro nakon tokim ae ngkai. Ao tiaki kona ni mwaninga bwa rooro ake imwaaira a maraki ibukira bwa a na karekea te euangkerio ao bwa a na ata taekan taian anua aika tamaroa.

Titita Dalton: Ngkana I titirakinia kairake, “Tera te kabanea ni kangaanga ni bwai ae kam karaoia?” a taku angiina, “Bon te nako n te bootaki ao n anganaki te manging ao ko aki mooi iai.” Ai ngaia are I a titiraki, “Bukin tera ko mena n te bootaki?” Ao a taku, “I nako bwa N na riki bwa te banna ae tamaroa nakoia tabemwaang.” Imwiina I kaeka n taai nako, “Ko na uotia raoraom nakon taabo aika ko kona iai n namakina te Tamnei. Tai kataia n nakonako nako nanon taabo are e aki kona n roko iai te Tamnei. Kararoai taabo akanne!”

Titita Beck: Iai ana kabotau Unimwaane Lynn G. Robbins man te Itingaun. E taku bwa ngkana ngkoe te aomata ae ko taburoroiko man kanakin te tiaokureti, ma ko rinnako inanon te umwanikuka n te tai ae waekoa imwiin ae a mwai bitiketi—e rangi ni boi kangkang ao ko kona ni iangoa te tiaokureti ae maranako ngkana ko a bwenaua te bitiketi—e na maanra tain ae imwaain ae ko katoonga teuana? Kanga aekara aron matoatoam? Anne bon te totoko—ke te kataia n totoko. Ma ngkana ngkoe temanna ae ko taburoroiko man kanakin te tiaokureti ao ko aki rinnako inanon te umwanikuka ike a umunaki iai ao ko aki umun bon ngkoe, ngkanne ko bon kararoa te kariri. E bebete riki anne!

Titita Beck: E na roko Tatan man am itera ni kabane n am tai ni kairake. Ma iai otangara, ai ngaia are ti na bon aki maaku. Ti kona n onimaki n ana berita te Uea. E taku bwa ataeinaine ao ataeinimwaane a na miakini taian mii ao n noori mii ni burabeti, bwa E na nurakina Tamneina i aoia n te kabanea ni bong ao E na buakana te aonaaba ma te raoiroi ao te koaua (tara Joel 2:28–32; Moses 7:62). Akea te bwai ae raoiroi ae a aki kona ni karaoia kairake!

Titita Dalton: Ara kairake bon aomata aika kakaawaki ni kabanean te waaki iaon te aonaaba. Ti wareki taekan kangaanga aika riiriki ao bwaai aika a na riki, ma maiuakinan anua aika tamaroa inanon Ibukin Kakorakoraia Kairake e na bon kawakinia ao ni kamanoia ao ni kakorakoraia ara kairake n te aro ae okoro are a na bon kona iai n riki bwa taan ibuobuoki ao ni karaoa te bwai ae a aki kona ni karaoia tabeman riki.

Titita Tanner: Irouia kairake ni boong aikai bon kanga ai aron ana taanga ni buaka Ereman! Kairake aikai a kaikawaaki bwa a na kamaiuiia aia kariki I-Nibwaite, ao ara kairake a kaikawaaki rake bwa a na kamaiuiia te roro aei.

Teuana te kawai ni moanakin karaoan te angareirei inanon Ibukin Kakorakoraia Kairake (aitam nambwa. 36550) bwa mwakoron maiura—ao karinakiia inanoia kairake—bon kinakin raoi taian reirei, anua aika tamaroa, ao bwaai aika a na riki imwiina ake inanon mwakoro nako n te boki aei. N aron te katooto, iangoa te mwakoro are te “Wenebure ae Itiaki”.

E kaeka te titiraki te reirei ae “E aera bwa ti na maiuakin anua aika tamaroa aikai?”: “Te itoman n te rabwata imarenan te buu mwaane ao te buu aine e bon tamaroa ao ma n tabu. E katabuaki iroun te Atua ibukin karikaia ataei ao ibukin kaotakin te tangira i marenan te buu mwaane ao te buu aine. E a tia n taekinna te Atua bwa te itoman n te rabwata e na kawakinaki ibukin te mare” (26).

Anua aika tamaroa a reireiniira bwa tera ae ti riai ni karaoia ao tera ae ti aki riai ni karaoia: “Ko na tai karaoa te wenebure i mwaain te mare, ao kakaonimaki raoi nakon buum i mwiin te mare” (26).

Mwiin bwaai aika riki bon tokin bwaai aika raoiroi ao aika bubuaka ni maiuakinan anua aika tamaroa: “Ngkana ko ongeaba nakon ana tua te Atua ni kakaraoa te wenenibure ae itiaki, ko bon katauraoiko raoi ni karaoi ao ni kaawakin berita aika tabu inanon te tembora. Ko katauraoiko naba ni katea te mare ae matoatoa ao ni karikiia ataei nakon te aonaaba bwa mwakoron te utu ae tangiraki. Ko bon kamanoko man urubwain te namakin are e roko n taainako man tibwauaan te itoman n te rabwata ma temanna i tinanikun te mare” (26).

E bwarannano teutana te ataeinaine temanna ae I kina ngke a tiititiraki raoraona iaon anuana aika tamaroa: “E aera ko aki kona ni karekenano imwaain ae koro 16 am ririki?” “E aera ko aki mooi manging?” Ngke e tataro bwa e na kanga ni kaitara te waaki aei, e roko te iango aei nakon ana kantaninga: “N na kaaki te boki ae uarereke ae Ibukin Kakorakoraia Kairake inanon buuan au kawaerake te rii. Ngkana a titiraki aomata iaou, n aron te katooto, te karekenano, N na anganiia te boki ao n tuangia bwa a na wareka te mwakoro are iaon te karekenano.”

E a riki bwa te iango ae moan te tamaroa! Inanon teniua namwakaina e a tibwai 52 katooton te boki iaon Ibukin Kakorakoraia Kairake. Ao teniman raoraona aika boou a moana kaakaean te taromauri ma ngaia.

Te ataeinaine ae kairake aei e tei ni matoatoa n te kawai ae iraorao ao e aki kabwara ana bure ibukin anuana aika tamaroa. Ngkana a maiuakin anua aika tamaroa kairake ni katerei raoi n akea te kabwarabure, tabemwaang a na bon karineia ao ni ukoukora aia katooto.

Mary N. Cook, kauoman kauntira n te beretitentii ni kabuta n aia Bootaki Ataeinaine.