Iango ibukin bootakin te utu n te tairiki

A kona iango n anga reirei aikai ni kabonganaaki n te umwanreirei n ikotaki ma te mweenga. Ko na bae n tangiria ni biti ni kangaraoia ibukin am utu ke n te umwanreirei.

“Nakomai nakon te Tembora,” iteraniba. 14: Kabonganaan te rongorongo ni, karinani otenanti ake a karaoaki n te tembora, ao marooroakin kakabwaia man te nebonebo n te tembora. Marooroakinna bwa ti na kanga ni katauraoi nakon te tembora.

“Teimatoa mai Moana,” iteraniba 29: Karaoa te amwarake ae mamate nanoia iai kaain am utu. Karekea n nena are ana kona n noria man arokia iai kaain te utu. Tuangiia bwa e ngae ngke a tangiria ni kani kanna n te tai naba arei, a na riai n tataninga. Tibwaua ana karaki Maria. Kabotaua aron te tataninga ni kani kana te amwarake are a mamate nanoia iai ma aron ana tataninga Maria ibukin ana bwabetito ao kamatoakina.

“Ibukin Kakorakoraakim” iteraniba. 32: Te wiiki imwaina, kaoia kaain te utu n tatabemaniia nako bwa ana katauraoa aia taetae ae uarereke ibukin teuana tuan te aroaro are oti Ibukin Kakorakoraia Kairake. Tibwaua te taetae, ao rinea teuana ke uoua tuan te aroaro are ko na kabanea am tai iai n te wiiki anne ma kaain am utu.

“Te Kaa Ae Akea Kanoana,” iteraniba. R2: Imwain te reirei, koroi araia kaain te utu ni kabane iaon te mwakoro ni beeba. Tibwaua ana reirei Beretitenti James E. Faust, ao maroroakin titiraki ni kabanean te boki. Tuangiia n tatabemaniia nako bwa ana rinea teuana mai ibuakon taian mwakoro ni beeba aikanne. Kabwarabwara bwa ana riai ni kakaai kawai ni ibuobuoki aika raba n te wiiki anne nakon te aomata are a tia n rinea ana beeba.

“Buan Michael,” iteraniba. R12: Wareka te karaki, ao maroroakinna bwa e kanga Natalie ni buoka mwaanena. Tuangiia kaain te utu bwa a na wareka 1 Ioane 4:21. Maroroakinna bwa tera ae nanonaki n “tangira naba tarina.” Ko bae n tangiria ni kan buoka te ataei n te utu ni korea te reta ae uarereke nakon te aomata ae aki bati n roroko n te taromauri. A kona naba ni kaoa te aomata anne nakon aia bootaki kaain te Moanrinan ke nakon ana waaki ni kakukurei te Moanrinan are imwiina.