Te Tia Kawakin Rongorongon te Ekaretia E Marooroakina Taben Rongorongon Rimoa n ana Mition te Ekaretia

Te kantaninga ae riai ibukin Aobitin te Utu ao Rongorongon Ngkoa te Ekaretia, e taekinna Unimwaane Marlin K. Jensen man te Itingaun, bon “buokaia natin te Atua bwa a na karaoi ao ni kawakina aia berita aika tabu,” te kaetieti ae anganaki man te koroboki ae tabu Iotebwa Timiti ni bongin moanakin te Ekaretia.

N taetaena nakon te maungatabu n te ririki ibukin te Bootaki ibukin Rongorongon Ngkoa te Moomon ni Meei 26, 2007, Unimwaane Jensen, are e aranaki bwa te tia kawakina rongorongon te Ekaretia ao te tia taui mwiia n Eberi 2005, e taekinna ni kabwarabwara raoi te rikirake ni mwaangan nako tauan mwiin rongorongo ao taian angabwai irouia taan kairiiri ake a rangi n kawakin raoi ana tua te Uea are e anga n te bong are e moan kateaki iai te Ekaretia bwa e na tauaki mwiin rongorongon te Ekaretia.

“I aki taetae bwa te tia kawakin rongorongo ae rangi ni mwaatai, ma te tia kawakin rongorongon te ‘Ekaretia’, bwa te kabanea mai buakoia tenaan aobitia ni kabuta n te Ekaretia ake a weteaki ibukin te tai ae aki baireaki bwa e na kakoroa nanon te wewete are e kateaki man te kaotioti nakon te Burabeti Ioteba Timiti,” e taku.

Kakoroan nanon mwakuri n taai aika nako n te mwaanga aei, e reitia, e bon kabotoaki iaon ikoikotan, kawakinan, ao n te mwaiti ae uarereke, te boreti iaon bwaai aika tauaki mwiia ake a kanoaaki n rongorongon te Ekaretia ae anainano.

“Tera te kaantaninga ae riai n rongorongon ngkoa te Ekaretia?” e taku. “E a tia n riki te Ekaretia bwa te botaki ae korakora n te aonaaba ma tibwatibwaakin kaaina ae boboto iaon te maiu n tameni are tabe ni mwaing nakon iteran te aonaaba are mai maiaki. Bwai aika riki aikai ao tabeua riki a tia ni kakoaua nakoira bwa ti na aki kona ni waakina karaoan ara kakaea iaon rongorongo ngkoa n aron ae ti taneiai iai.”

Imwiin iangoana ma te tataro mwaaka inanon ririki aika nako bwa ti na kanga ni baairea kawain te tabo ni mwakuri n taai aika a na roko, e taku Unimwaane Jensen, “ti namakinna bwa rongorongo ngkoa e na riai ni ibuobuoki nakon ana mition ae bwanin te Ekaretia, … nakon kamaiuakiia aomata ni kabane.”

E katerea Unimwaane Jensen bwa te Kaetieti aei e kanikinaeaki kaokoroan Aobitin te Utu ao Rongorongon Ngkoa te Ekaretia mai rouia taan rabaku ao naake a irekereke ma kakaean rongorongo ngkoa.

“Aio te kouru ae tamaroa ao man rietata, ae aki kai reke ao e aki kona ni butimwaeaki n taai nako irouia raora aika taan rabakau,” e taku.

Ni kakoroan nanon te kaetiteti aei, e reitia n taku, Aobitin te Utu ao Rongorongon Ngkoa te Ekaretia a kaatuua aia iango iaon teniua bwaai aika kainnanoaki: bwa a na kamatoa urungakin ana bwai te Atua aika korakora, bwa a na buoka kateimatoaan babairean te abanuea are e manga kaokaki, ao ni kakoaua ao n tei ibukin te koaua ni Kaokan Bwaai.

Te kouru aei, “ae kabwarabwara ara mwakuri ao ara taan ongora,” e karika “mwaitin te mwakuri ni kabubura nakon are ti kona ni karekea n oin korakorara—ai ngaia are ti kainnanoia bwa ti na ikotaki ni mwakuri,” e taku Unimwaane Jensen. E “kamwaingiira man te riki n tia ikoikoti ae ongeaba nakon te botaki ae korakora ana kakamwakuri are e na katei moa bwaai aika kakawaki n ana ikoikoti, ana tibwatibwa, ao n ana kakae ma ana koroboki.”

Katean te tabo ni mwakuri bwa e na buoka te Ekaretia ni kabutaa te aonaaba e tangira bitakin te iango ae akea te maraki iai, e taku. Te rikirake aei e tangiri bitaki man bootaki nako are e katuruturua te beku ibukiia kaain te Ekaretia ni kabuta ao taan kairiiri naba. Ni kabane taian bitaki aikai a tangira kabonganaakin rabakau aika boou ni kabane.

Teuana te mwaneka ae kakaawaki nakon karikirakean aobitin rongorongo ngkoa bon katean te kateitei ae 250,000 te tikuea buuti (23,000-tikuea miita) ae na ataaki bwa ana Tabo n Tangoboki ibukin Rongorongon Ngkoa te Ekaretia.

“E moanaki te kateitei n Okitobwa ae nako ao e waaki te kateitei n taina ae baireaki ibukin te katabu i nuukan 2009. E na kawakina ara rongorongo aika kakaawaki n te tabo n tangoboki ao e na kantaningaaki bwa e na uki, ao ni butimwaea kawarana, ao n rangi ni bongana,” e taku Unimwaane Jensen.

Anaaki man te Church News, Tuun 2, 2007.